God El Etuh ac Luhngse Kom

Sel Elder Ulisses Soares

Sin U luhn Mwet Sap Singucul Luo

Sie ma pwacye pa Pahpah Inkuhsrao el luhngse kuht ac el fah tiac muhlkihnkuhtlac kuh siskuhtlac.

Finne met liki na ninac ac pahpah tuhmuhk ah welah Alu luhn Jisus Kraist luhn Mwet Luhlahlfongi ke Lwen Sahflah, elos lutiyuc ac tamuhlwel tolu wiyuck ah kacl God ac Jisus kraist. Nga etuh na e met me lah God el oasr ac El etweyuc ac luhngse nga. Wacngihn sie pacl nga ahlohlohi.

Ke yac uh kais kuhtuh na fahsr, kahlwem luhk ac luhlahlfongi luhk ke etuh ac luhngse luhn God nuh sihk yohkwelihk. Mihsenge, ke nga ekihn Mwet Sap se luhn Leum Jisus Kraist, nga fahkwack lah God el etuh ac luhngse nohfohn tuhlihk Nahtuhl.

Nga luhngse suli kowos in wiyuc nuhnkuh ke mwe insewowo yohk se in kahlwem na upac ke luhpan luhngse lal God nuh sum.

God El Etwekom ac Luhngse Kom na E Ke Muhtwacwacackiyac ah

Leum el fahk nuh sel mwet pahluh Jeremiah, “Met liki nga orwekomlac lun insian nina kiom nga etwekom” (Jeremiah 1:5). Ma se inge pwacye nuh sin mwet nuhkwewa—wikomyang pac.

God pa Pahpah tomom Inkuhsrao. El etwekom ke pacl na loeloes se. Kom oasr “ke muhtwacwacackiyac ah yohrohl Pahpah” (Doctrine and Covenants 93:23). Ke kom ekihn sie tuhlihk nguhn Nahtuhl, kom tuh wi toeni se inkuhsrao ke Pahpah Inkuhsrao el tuh ahkkahlwemye ke plwacn wolacna Lal ke engan. Mwet Pahluh Joseph Smith el tuh luti lah sripac lal God nuhke plwacn se inge pa in use nuhsesr “pacl wowo lasr in eklac oacna el [ac] … in moul ma pahtpaht yohrohl.” Pahpah Inkuhsrao el kena kom in eis pacl wowo ses inge in sulaclah in eklac oacna El.

Ma nuhkwewa Pahpah Inkuhsrao el orwaclah ac oruh ingena ma in ahkfahsrye plwacn in engan Lal ac ahkkahlwemye luhngse pwacye Lal nuh sesr. Oasr Sel fohnlah luhn engan uh ac el kena kuht in wi puhla pac fohnlah se ingacn. Ke kuht ekihn “sie wen nguhn kuh acn nguhn sacohk nuhtin ninac ac pahpah inkuhsrao,” oasr sesr srihpac wolacna se ma ahkfototoye kuht nuh sel Pahpah Inkuhsrao ac ikihl ohiyac luhn liye Lal nuh sesr.

Pahpah Inkuhsrao el sesseslah ke luhngse wacngihn sahflahiyac, suwohs, muhtahl, ac pwacye nuh sum ma tiac kuh in ahkuhtweyucki. Kom yohk srihpac Sel ke srihpen kom tuhlihk Nahtuhl. Luhngse lal nuh sum muhtwacwacack met liki na kom tuh isuslac ah. Ac luhngse se inge kuhtanglah moul kawihl se lom inge ac fahlac na ne tok ma pahtpaht.

God El Etuh ac Luhngse Kom Ingena

Ke pacl se kuht moul oasr fin facluh esam lasr ke moul lasr met liki kuht tuhkuh nuh facluh kosrweyucklac, in muh lwelah kuht in fahsr ke luhlahlfongi ac orekmakihn sukohsohk in sulaclah lasr in ukwe plwacn suwohs luhn Pahpah Inkushrao. Tuhsruhk Pahpah Inkuhsrao el esam na. El tiac esam lah suc kuht ke pacl met ah muhkwena, tuhsruhk El oacyacpac etuh ma nuhkwewa kacsr ingena.

El etuh ma nuhkwewa sikyak ke moul lasr, ma upac nuhkwewa lasr, engan lasr, ac ahsor lasr. El muhkwena pa etuh nuhnak lasr ac kena luhn insiacsr (liye Doctrine and Covenants 6:16). Elder Ronald A. Rasband ke U luhn Mwet Sap Singucul luo el tuh luti, “Wacngihn mwet etwekom wo kuh elyah sum yohk oacna [Pahpah Inkuhsrao] el oruh.”

Ke srihpen El etwekuht ac elyah sesr yohk liki mwet nuhkwewa, Pahpah Inkuhsrao el elyah ke inkacnek kuht eis fin facluh se inge. El etuh inkacnek ma ac kahsrwe kuht in ahkfahsryelah srihpac lasr in ekihn wen kuh acn Nahtuhl. Yohk liki na ma kuht kuh in nuhnkuh, El kena kuht in orwaclah ma kuht tuhkuh in oruh fin facluh—pa in fohlohk nuhke acn sesr inkuhsrao.

Finne kuht nohfohn sesuwohs, El luhngse kuht kais sie ke suwohs. Oasr inkacnek se ma Pahpah inkuhsrao el ahkkahlwemye arulacna kahlwem luhpan luhngse Lal: “Tuh God el lungse faclu ouinge, El ase Wen sefanna natul, tuh elos nukewa su lulalfongi in el fah tia misa, tuh elos fah eis moul ma pahtpat” (John 3:16).

God el luhngse kuht—el luhngse kuht yohk—oruh El suhpwaclma Jisus Kraist, Wen se Emet Nahtuhl, “Wen Sacohk ac Sollac Nahtuhl na e ke muhtwacwacackiyac ah” (Moses 4:2), in pa Wen se Fanna Nahtuhl ac in pa Mwet Lahngo luhn facluh. Iwaclah luhn Jisus Kraist pa mwe ahkuhtweyac na yohk ac wolacna ke luhngse luhn Pahpah nuh sesr ac nuh sin nohfohn tuhlihk Nahtuhl.

Jisus Kraist el tuhkuh in oruh luhngse luhn Pahpah. Ke insepuhsisacl, El puhtati ten liki ma nuhkwewa (liye Doctrine and Covenants 122:8) ac orwaclah iwaclah Lal in ahkfahsryelah plwacn wolacna ke engan luhn Pahpah. El kuhtanglah ma koluk ac misac nohfohn in kuh in sifilpac moulyak ac eis pacl la in auliyak ac eis nuhnak muhnahs. El use olwelah ma use nuh sesr “lwelah nuh ke luhngse ac pahkotwen” ac pacl wowo in eis moul ma pahtpaht ac “ma nuhkwewa [ma] oasr yohrohl Pahpah” (Doctrine and Covenants 84:38).

Nuhnak muhnahs esam lah “ma nuhkwewa [ma] oasr yohrohl Pahpah” tiac mwe insewowo ma el ac fah use nuh sesr tukun moul se inge muhkwena tuhsruhk ma El oacyacpac ahkinseowoye kuht kac ingena. El “karihngihn [kowos] ke lwen nuhke lwen” (Mosiah 2:21), finne ke ohiyac ma oacna in oreklac na nuh sesr ac ma nuhkwewa ma tuhkuh kac an.

Ke kuht fototoyang nuh Sel ac nuh sin Wen Nahtuhl, ke kuht nuh sel Pahpah ke inen Wen, ac ke kuht liyacacng masap Lalos, “el ac sa in ahkinsewowoye [kuht]” (Mosiah 2:24) ke mwe insewowo yohk liki na met ah.

Ke moul se inge, God el “tiac loes liki kuht kais sie” (Acts 17:27).

Nga kalweni fahk lal Elder Neal A. Maxwell (1926–2004), suc luhlahlfongi muh “sie lwen ac fah kahlwem liki na ingena lah Pahpah tuhmasr Inkuhsrao el oruh ma nuhkwewa ma El kuh in oruh in kahsrwe kuht!”

God El Fah Etuh ac Luhngse Kom Ne Tok

Mwet kuht luhlahlfongi yohk ke moul se inge pa mwet kuht etuh yohk emet uh, suc etwe kuht yohk pac, suc luhngse kuht ac kena in wo nuh sesr ke insiaclos kwewa, ac elos ahkkahlwemye lah elos kuh in luhlahlfongiyuck. Ke srihpen Pahpah Inkuhsrao el etwekuht na pwacye, luhngse kuht na upac, el orwaclah ac el oruh ma puhs nuh sesr, ac El suwohs ac tiac ekyek, kuht kuh in luhlahlfongwel ke pacl nuhkwewa.

Oasr pacl kuht puhla muh luhlahlfongi lasr uh muhnahslah? “Kuh oasr pacl [kuht] puhla toasr?” Kuh inkacnek lom tiac kahlwem? Oasr ma upac ma oacna in wacngihn sahflahiyac finne kuht sang kuhiyacsr kuh finne kuht sang insiacsr in pruhe siyuck ke ahkkweyeyuck? Kuh oasr mwe insewowo kuht finsraki ac pruhe kac ma tiacna sikyak?

Nga fahkwack lah God el fah tiacna muhlkihnuhtlac; ac El oacyacpac fah tiacna fahsr liki kuht. El etwekuht ac etuh lah mac wo nuh sesr ke pacl nuhkwewa in moul lasr uh. El liye sahflahiyac uh na e ke muhtwacwacackiyac ah. Ke na pacl se inge El liye kuht, etuh puhla lasr, enenuh lasr ke moul in mahno ac moul in nguhn, weacng pacna enenuh luhn mwet nuhkwewa ma rauni kuhtlac uh.

Yohk srihpac in kahlwem kac lah mwe insewowo Lal tuhkuh ke luhngse Lal, inkacnek, ac pacl Lal sifacna. Pacl Lal kuh in siena liki pacl lasr, tuhsruhk mwe insewowo Lal fah tuhkuh. Kuht enenuh in luhlahlfongi Leum fal tuh kuht in “tu na sano ac etuh lah El pa God” uh (Psalm 46:10), lah El etuh ma nuhkwewa, ac lah El etwe kuht kais sie. Ke kuht luhlahlfongi in El, luhngse Lal fah rauni kuhtlac. El olwelah muh kuht kuh in for nuh Sel in suk kahsruh ac kolyuck ke pacl nuhkwewa. El fah etuh ac luhngse kuht ne tok.

Nga ahkpwacyei nuh sum lah ke kuht e sang luhlahlfongi lasr nuh sin Pahpah Inkuhsrao ac ke Wen Nahtuhl, liyacacng olwelah lasr, ac kampare nuhke sahflah, kuht e fah puhlakihn olwelah luhn Pahpah tuhmasr Inkosrao, suc oruh ma nuhkwewa ke kuh Lal in kahsrwe kuht in fohlohk nuh yohrohl sie lwen. Ke kuht oruh ohinge uh, nga olwelah lah kuht fah kuh in fahkwack, oacna ke Isaiah el tuh oruh ke pacl loes somlah ah, ke “the multitude of [God’s] lovingkindnesses” (Isaiah 63:7).

Pahpah Inkuhsrao el etwekuht na e met me ac luhngse kuht. El luhngse kuht ac oasr in kahsrwekuht ingena. Nga ahkpwacyei lah El ahkolah in topuk pruhe lasr ke pacl nuhkwewa. Lwelah kuht in puhla ac etuh pacl nuhkwewa luhpan karihngihnyuck lal nuh sesr, luhngse lal, ac kena lal in kahsrwekuht ac ahkinsewowoye kuht—ingena ac nuh tok.

© 2026 sin Intellectual Reserve, Inc.Suwohs nuhkwewa fihliyucki. Printiyucki fin acn USA. Ahkkweyeyucklac ke English: 6/19. Ahkkweyeyucklac luhn lweng: 6/19. Lwenglah ke Pweng ke Liahona nuhke Mahlwem Nuhkwewa, Ohktohpa 2026 . Kosraean. 20059 868