Am-ammo ken Ay-ayatennakayo ti Dios

Ni Elder Ulisses Soares

Ti Korum dagiti Sangapulo-ket-dua nga Apostol

Maysa a sigurado ken agnanayon a kinapudno ket ay-ayatennatayo ti Nailangitan nga Amatayo ken dinatayto pulos malipatan wenno baybay-an.

Uray pay sakbay a nakikappeng dagiti dadakkelko iti Simbaan ni Jesucristo dagiti Santo iti Ud-udina nga Aldaw, insuroda kadakami ken dagiti tallo a kakabsatko maipapan iti Dios ken ni Jesucristo. Kanayon nga ammok nga adda ti Dios ken am-ammo ken ay-ayatennak. Diak pulos nagduadua iti dayta.

Bayat ti panaglabas dagiti tawen, immuneg ti pannakaawatko ken ti pammaneknekko no kasano nga am-ammonak ti Dios ken no kasano ti panangayatna kaniak. Ita nga aldaw, kas maysa nga Apostol ni Apo Jesucristo, paneknekak nga ammo ken ay-ayaten ti Dios dagiti amin nga annakna.

Kayatko nga awisenkayo a mangutob kaniak iti nauneg a bendision ti pannakaawat no kasano ti kauneg ti pannakaammo ken naan-anay nga ayat ti Dios kadakayo.

Am-ammo ken Inayatnakayo ti Dios idi Punganay

Imbaga ti Apo ken ni propeta Jeremias, “Sakbay a binukelka iti tian naam-ammoka” (Jeremias 1:5). Pudno daytoy iti tunggal tao—agraman kadakayo.

Ti Dios ti Nailangitan nga Amayo. Nabayagen nga am-ammonakayo. Kinapudnona, addakayon “idi punganay a kadua ti Ama” (Doktrina ken Katulagan 93:23). Kas maysa kadagiti espiritu nga annakna, addakayo iti maysa a konseho idiay langit a nangidatag ti Nailangitan nga Ama iti naindaklan a planona iti ragsak. Insuro ni Propeta Joseph Smith a ti plano ti Dios ket mangted iti tunggal maysa kadatayo iti “maysa a pribilehio a dumur-as a kas Kenkuana [ken] … maitan-ok a kas Kenkuana.” Kayat ti Nailangitan nga Ama a maaddaankayo iti daytoy a pribilehio ken inikkannakayo iti gundaway nga agpili tapno agbalinkayo a kas Kenkuana.

Amin nga inaramid ken ar-aramiden ti Nailangitan nga Ama iti panangidur-as iti naindaklan a planona iti ragsak ket maysa a pannakaiparangarang ti naan-anay nga ayatna para kadatayo. Addaan isuna iti pakabuklan ti rag-o ken kayatna a maaddaantayo met iti dayta a pakabuklan. Kas “dungdungnguen nga espiritu nga anak a lalaki wenno anak a babai dagiti nailangitan a nagannak,” addaantayo iti daytoy nadiosan a potensial a mangisilpo kadatayo iti Nailangitan nga Ama ken mangsukog no kasano ti panangkitana kadatayo.

Napno ti Nailangitan nga Ama iti awan patinggana, naan-anay, nasantuan, ken nasin-aw nga ayat para kadakayo a saan a mailadawan. Napategkayo Kenkuana gapu ta anaknakayo. Nangrugi ti panagayatna kadakayo kadagiti kinaagnanayon sakbay unay ti pannakayanakyo. Ket agtalinaed daytoy iti unos ti mortal a biagyo ken agtultuloy agingga kadagiti kinaagnanayon.

Am-ammo ken Ay-ayatennakayo ti Dios

Bayat ti mortalidad ti lagip ti kaaddatayo iti biag sakbay daytoy a biag ket siaasi a di naipalgak, a mangipalubos kadatayo a magna babaen ti pammati ken mangaramat iti kinawaya a panagpilitayo a maitunos iti naan-anay a plano ti Nailangitan nga Ama. Ngem malagip ti Nailangitan nga Ama. Saanna laeng a malagip no siasinotayo idi, no di ket ammona pay ti amin maipapan kadatayo ita.

Ammona amin a kasasaad ti biagtayo, amin a karit, ragsak, ken ladingittayo. Isu laeng ti makaammo iti pampanunottayo ken ti panggep ti pusotayo (kitaen itiDoktrina ken Katulagan 6:16). Insuro ni Elder Ronald A. Rasband iti Korum dagiti Sangapulo-ket-dua nga Apostol, “Awan ti nasaysayaat a makaam-ammo kadakayo wenno ad-adda a maseknan kadakayo no di [ti Nailangitan nga Ama].”

Gapu ta ad-adda nga am-ammona ken maseknan kadatayo ngem iti siasinoman, maseknan ti Nailangitan nga Ama kadagiti addang nga aramidentayo ditoy daga. Ammona no ania dagiti makatulong kadatayo a mangipatungpal iti nadiosan a potensialtayo kas anakna a lalaki wenno babai. Ad-adda ngem iti mapanunottayo, kayatna a maragpattayo ti nailangitan a pagtungpalantayo—nga agsubli iti nailangitan a pagtaengantayo.

Nupay saantayo a perpekto amin, naan-anay nga ay-ayatenna ti tunggal maysa kadatayo. Adda maysa a wagas a nalawag unay nga impakita ti Nailangitan nga Ama maipanggep ti kinauneg ti naayat a panangaywanna: “Ta kasta la unay ti panagayat ti Dios iti lubong, nga intedna ti Anakna a bugbugtong, tapno amin a mamati kenkuana, saan a mapukaw, no di ket adda biagna nga agnanayon” (Juan 3:16).

Inayatnatayo unay ti Dios—inayatnatayo iti kasta unay ken naan-anay—nga imbaonna ni Jesucristo, ti Inauna nga Anakna, ti “Dungdungnguen ken Pinilina manipud idi punganay” (Moises 4:2), nga agbalin a Bugbugtong nga Anakna ken ti Mangisalakan ti lubong. Ti pangsubbot a sakripisio ni Jesucristo ti kangrunaan ken kadayagan nga ebkas ti ayat ti Ama kadatayo ken kadagiti amin nga annakna.

Immay ni Jesucristo tapno aramidenna ti pagayatan ti Ama. Buyogen ti kinaemma ken kinapakumbaba ti puso, bimmaba Isuna iti babaen ti amin a banag (kitaen iti Doktrina ken Katulagan 122:8) ket inaramidna ti pangsubbot a sakripisiona tapno maipatungpal ti naindaklan a plano ti Ama iti ragsak. Naparmekna ti basol ken ipapatay tapno mapagungar ti amin ken maaddaan iti gundaway nga agbabawi ken umawat iti pammakawan. Idiayana dagiti katulagan a mangted kadatayo iti “pannakagun-od iti naisangsangayan a kita ti ayat ken asi” ken ti gundaway nga umawat iti biag nga agnanayon ken “amin nga adda [iti] Ama” ( Doktrina ken Katulagan 84:38).

Laglagipenyo nga “amin nga adda [iti] Ama” ket saan laeng a dagiti bendision a mabalin nga itedna kadatayo iti kamaudiananna kalpasan daytoy a biag no di ket no ania pay ti ibendisionanna kadatayo ita nga agdama. Isu ket “mangsupsuporta [kadatayo] iti tunggal kanito” ( Mosiah 2:21), agraman kadagiti wagas a kaugalian a maibagay kadatayo ken iti kasasaadtayo.

Bayat ti yaasidegtayo Kenkuana ken iti Anakna, bayat ti panagkararagtayo iti Ama iti nagan ti Anak, ken bayat ti panangtungpaltayo kadagiti bilinda, “dagdagus a bendisionanna[tayo]” (Mosiah 2:24 ) nga addaan iti ad-adu pay a bendision.

Iti daytoy a biag, ti Dios ket “saan nga adayo iti tunggal maysa kadatayo” ( Aramid 17:27).

Ulitek ti opinion ni Elder Neal A. Maxwell (1926–2004), a namati nga “iti maysa nga adayo nga aldaw ad-addanto pay a nalawag ngem ita ket ar-aramiden ti naayat nga Amatayo ti amin a posible a maaramidna tapno matulongannatayo!”

Ammo ken Ay-ayatennakayto ti Dios iti Agnanayon

Dagiti tao a pagtalkantayo unay iti daytoy a biag ket isuda dagiti am-ammotayo unay, makaam-ammo kadatayo unay, mangay-ayat kadatayo ken addaan iti kasayaatan nga interestayo iti puso, ken napaneknekan ti bagbagida a mapagtalkan. Gapu ta am-ammonatayo unay ti Nailangitan nga Amatayo, ay-ayatennatayo unay, adun ti inaramidna ken ar-aramidenna para kadatayo, ken naan-anay ken saan nga agbalbaliw, kanayon a makapagtalektayo Kenkuana.

Masarakantayo kadi no dadduma nga agkullayaw ti pammatitayo? “Madagsenan[tayo] kadi pay laeng iti awit ti panangaywan?” Kasla saan kadi a nalawag ti dalan iti masanguanan? Adda kadi dagiti karit a kasla awan patinggana uray ania ti aramidentayo wenno kasano ti sipapasnek nga ikararagantayo ti pannakabang-ar? Adda kadi dagiti bendision a ninamnama ken inkararagantayo a saan a natungpal?

Paneknekak a saannatayo a malipatan ti Dios; saannatayo met a pulos a baybay-an. Am-ammonatayo ken ammona no ania ti kasayaatan para kadatayo iti tunggal kanito ti biagtayo. Makitana ti panungpalan manipud pay idi punganay. Iti daytoy a kanito am-ammonatayo, dagiti riknatayo, ken dagiti naespirituan ken temporal a kasapulantayo, kasta met dagiti kasapulan ti tunggal maysa iti aglawlawtayo.

Napateg a maawatan nga umay dagiti bendisionna segun iti bukodna a pagayatan, wagas, ken tiempo. Mabalin a naiduma ti tiempona iti tiempotayo, ngem umay dagiti bendisionna. Umdasen ti panagtalek Kenkuana tapno “agtalna, ken ammo nga [Isu] ti Dios” (Salmo 46:10), nga ammona amin a banag, ken am-ammonatayo. Bayat ti panagtalektayo Kenkuana, mabalinnatayo a sakupen ti ayatna a naan-anay. Inkarina a mabalintayo ti umasideg Kenkuana para iti tulong ken tarabay iti aniaman nga oras. Am-ammo ken ay-ayatennatayo iti agnanayon.

Paneknekak a bayat ti panagtalektayo iti naayat a Nailangitan nga Amatayo ken iti naayat nga Anakna, tungpalentayo dagiti katulagantayo, ken agibturtayo iti pammati agingga iti panungpalan, tagiragsakentayo dagiti kari ti Ama, nga aramidenna ti amin a kabaelanna a tumulong kadatayo nga agsubli iti imatangna inton agangay. Ket bayat nga ar-aramidentayo dayta, ikarik a makapaneknektayo, kas iti inaramid ni propeta Isaias iti nabayagen, maipapan iti “kaadu dagiti naayat a kinamanangngaasi [ti Dios” (Isaias 63:7).

Kanayon nga am-ammo ken inayatnatayo ti Nailangitan nga Ama. Ay-ayatennatayo ken adda sadiay para kadatayo ita. Saksiak a kanayon a situtulok Isuna a mangsungbat kadagiti kararagtayo. Sapay koma ta kanayon a mariknatayo no kasano ti panangam-ammona kadatayo, panangaywanna kadatayo, panagayatna kadatayo, ken situtulok a tumulong ken mangbendision kadatayo—ita ken iti agnanayon.

© 2026 ti Intellectual Reserve, Inc. All rights reserved. Naimaldit iti Pilipinas. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, October 2026. Ilokano. 20059 864