“E Kinako ao e Tangiriko te Atua,” Riaona, Oki. 2026.
Te Rongorongo man te Riaona ni Katoa Namwakaina, Okitobwa 2026
E Kinako ao n Tangiriko te Atua
Te koaua n te koaua ae akea tokina bwa e tangiriira Tamara are i Karawa ao e na bon aki mwanuokiniira.
Imwaain kaainakin Ana Ekaretia Iesu Kristo ibukiia Aika Tiaki ni Boong aika Kaitira irouia au karo, a reireiniia teniman mwaaneu ao ngai taekan te Atua ao Iesu Kristo. I bon ataia n taainako bwa iai te Atua ao E kinaai ao n tangirai. I aki kona n nanokokoraki iai.
Ni waakinakon te ririki, e a nano riki ootau ma au kakoaua n aron te Atua ni kinaai ao mwaitin tangirau i Rouna. N te bong aei, ngkai ngai ana Abotoro te Uea ae Iesu Kristo, I kakoauaa bwa e kinaia ao n tangiriia natina ni kabane te Atua.
I tangiria ni kaoko bwa ko na ururing ma ngai n te kakabwaia ae kakaawaki ae te mataata n aron nanon ana atatai ao ana tangira te Atua ae korororaoi nakoim.
E a Kaman Kinako ao n Tangirko te Atua mai Moana
E taku te Uea nakon te burabeti are Ieremia, “Ngke I tuai karikiko i nanon te birito ao I ataiko” (Ieremia 1:5). E bon koaua aio ibukiia aomata n tatabemaniia―ni ikotaki ma ngkoe.
Te Atua bon ngaia Tamam i Karawa. E a kaman kinako n te tai ae maan. Ni koauana, kam bon mena “mai moana ma te Tama” (Reirei ao Berita aika Tabu 93:23). Ngkai ngkoe temanna natina n tamnei, ko bon mena n te bootaki ni kauntira i karawa ike e kaota iai Ana babaire ni kakukurei ae korakora Tamara are i Karawa. E reireiniira te Burabeti ae Iotebwa Timiti bwa ana babaire te Atua e anganiira “te tibwanga n rikirake n ai [A]rona [ao] … n karietataaki n ai [A]rona.” E tangiriko Tamara are i Karawa bwa ko na karekea te tibwanga aio ao e a tia n anganiko te tai bwa ko na rineia bwa ko na riki n ai arona.
Bwaai ni kabane ake e a tia ni karaoia ao e karaoia ngkai Tamara are i Karawa ni waakinan Ana babaire ni kakukurei ae korakora bon kaotan Ana tangira ae koraraoi i bukira. Iai irouna bwaninin te kimwareirei ao e tangiriira bwa ti na karekea naba bwaninin anne. Ngkai “natiia kaaro ake i karawa n tamnei te mwaane ao te aine,” iai iroura te konabwai mai karawa ae tomaira ma Tamara are i Karawa ao ni karika aron noorakira i Rouna.
E kaonaki Tamara are i Karawa n te kororaoi, tabu, ao te tangira ae itiaki ae akea tokina ibukim ae aki kona ni kabwarabwaraaki. Ko kakaawaki nakoina ibukina bwa ngkoe bon natina. E moa ana tangira i bukim mai karawa i mwaain bungiakim. Ao n teimatoa rinanon maium n te aonaaba ao ni manga karokoa te maiu ae akea tokina.
E Kinako ao n Tangiriko te Atua Ngkai
N tain te maiu ae mamate a rabunaki ara ururing ni maiura i mwaain te maiu aei ma te nanoanga, are e karekea nakoira bwa ti na nakonako ma te onimaki ao ni kammwakura i naomatara ma ana babaire ae kororaoi Tamara are i Karawa. Ma e uringnga Tamara are i Karawa. E aki ti uringnga bwa antai ngaira ngkoa, e bon uringa naba bwaai ni kabane i bukira n te tai aei.
E atai ni kabane arora ni maiura, kakaewenako ni kabane ni maiura, taian kimwareirei, ao karawaawata. Bon ti ngaia ae atai ara iango ao ana kantaninga nanora (taraa Reirei ao Berita aika Tabu 6:16). E reirei Unimwaane Ronald A. Rasband man te Kooram n Abotoro n te Tengaun ma Uoman, “Akea ae ataiko raoi riki ke n tabeakiniko raoi riki nakon ae karaoia nakoim [Tamam are i Karawa].”
Ibukina bwa E kinaira ao n tabe i bukira riki nakon temanna, E raraoma Tamara are i Karawa ibukin mwaneka ake ti toui ikai i aon te aba. E ataia ake a na buokiira ni kakoroa nanon konabwaira mai karawa ngkai natina te mwaane ao te aine. Nakon ae ti kona n iangoia, E tangiriira bwa ti na karekea te maiu n te tiretio—n oki nakon mwengara i karawa.
E ngae ngke ti aki kororaoi ni kabane, E tangiriira n tatabemaniira n te aro ae kororaoi. Iai te kawai teuana are e kaota iai Ana nabenabe n tangira iai Tamara are i Karawa “Ba E tangiriia aomata te Atua n te aro are E anga Natina ae te riki temanna iai, ba e aonga n aki mate ane onimakinna, ma e na reke irouna te maiu are aki toki” (Ioane 3:16).
E rangi n tangiriira te Atua—tangiriira ni koaua—ngaia are E a tia ni kanakoa Iesu Kristo, Ana Moan Nati, “Natina ae Tatangiria ao n Rineia man moan karikan bwaai” (Mote 4:2), bwa e na riki bwa Ti Natina ae Tatangiraki ao te Tia Kamaiua te aonaaba. Ana angakarea ni kamaiu Iesu Kristo bon kaotan ana tangira te Tama i bukira ao i bukiia natina ni kabane aika a kakawaki man mimitong.
E roko Iesu Kristo ni karaoa nanon te Tama. Ma nanona ae nimamannei ao n nanorinano, E a tia n rinanon bwaai aika a buakaka (taraa Reirei ao Berita aika Tabu 122:8) ao e karaoa ana angakarea ni kamaiu ni kakoroa nanon ana babaire ni kakukurei te Tama ae korakora. E tokanikai i aon te bure ao te mate bwa aonga ni kona ni mangauti aomata ni kabane ao n reke aia tai n raira nanoia ao ni karekea kabwaraan aia bure. E anga berita aika tabu ake a karekea nakoira “karekean te aeka n tangira ao n nanoanga ae okoro” ao te tai ni karekea te maiu ae akea tokina “ao ni kabane ana bwai [te] Tama” (Reirei ao Berita aika Tabu 84:38).
Taiaoka ma uringnga bwa “ni kabane ana bwai [te] Tama” tiaki ti taian kakabwaia are E kona n anganiira imwiin te maiu aei ma are E kakabwaiaira naba ngkai iai. E “kateimatoi[ra] man te bong teuana nakon teuana” (Motiaea 2:21), ni ikotaki ma kawai ake a bootau nakoira ao arora nako.
N ara tai ni kaanira nakoina ao natina, n ara tai n tataro nakon te Tama n aran te Nati, ao ngkai ti kawaakin Aia tua nako, “e na waekoa ni kakabwaiai[ra]” (Motiaea 2:24) ma kakabwaia aika a bati riki.
N te maiu aei, e “aki raroa mai iroura n tatabemaniira” te Atua (Makuri 17:27).
I kaoka ana iango Unimwaane Neal A. Maxwell (1926–2004), are e kakoauaa bwa “n te bong teuana ae tuai ataaki e na mataata riki nakon ae ngkai bwa E karaoi ni kabane Tamara are i Karawa ae tatangira are E kona ni karaoia ni buokiira!”
E na Kinako ao n Tangirko te Atua n Aki Toki
Aomata ake ti onimakiniia n te maiu aei a kona n riki bwa aomata aika ti kinaiia raoi, ake a kinaira riki, ake a tangiriira ao n ataa are e tatangiria nanora, ao ake a tia n kaotiia nakoira bwa a onimakinaki. Ibukina bwa e ataira ni koaua Tamara are i Karawa, e bati n tangiriira, ao n tia ni karaoa ao ni karaoa ae bati ibukira, ao e kororaoi ao n aki bibitaki, ti kona n onimakinna n taainako.
Ti a tia ni kunea bwa e bibitaki ara onimaki? “[Ti] a tia n taonaki ma te tinebu ke te rawawata ae korakora?” E taraa ni mabubu te kawai i mwaaim? Iai kakaewenako ae a taraa n akea tokiia e ngae ngke tera ae ti karaoia ke ti tataro ibukin te buoka n taainako? Iai kakabwaia ae ti kaantaningaia ao n tataroakinna aika a tuai koro nanoia?
I kakoaua bwa e na bon aki mwaninga taekara te Atua; ke e na bon aki mwanuokiniira. E ataira ao e ataa ae te kabanea n tamaroa i bukira i nanon te bong teuana ma teuana i nanon maiura. E noora te toki mai moana. E ataa ae ti mena iai ngkai, ara namakin, ao kainnanora n te maiu n tamnei ao n rabwata, ao n aron naba kainnanoia aomata ni kabane ake a katobibiira.
E kakaawaki bwa ti na mataata bwa a roko Ana kakabwaia ni kaineti ma nanona, Ana kawai ao Ana tai. E na kona ni kaokoro ana tai ma ngaira, ma a bon roko Ana kakabwaia. Onimakinna ao “tei moa, ao kam na ataia bwa te Atua [Ngaia]” (Taian Areru 46:10), bwa e atai bwaai ni kabane, ao bwa E mwannanoira. Ao ngkai ti onimakinna, E kona ni mwaneira Ana tangira. E a tia ni berita bwa ti kona n tannakoina ibukin te ibuobuoki ao te kairiiri n te tai are ti kainnanoia iai. E na ataira ao n tangiriira n aki toki.
I kakoauaa bwa ngkana ti katuka ara onimaki i roun Tamara are i Karawa ae tatangira ao iroun Natina ae tatangira, ti kaawakin ara berita aika tabu, ao ni kakaonimaki ni karokoa te toki n te onimaki ni karokoa tokina, ti na kimwareirei n Ana berita te Tama, are ngaia ae karaoi bwaai nako ni mwaakana are e na buokiira n okirikaaki nakoina n te bong teuana. Ao n karaoan anne, I berita bwa ti na bon kona ni kakoauaa, n aron te burabeti ae Itaia n taai ake ngkoangkoa, n ana atataiaomata te [Atua]” (Itaia 63:7).
E ataia n taainako ao n tangiriira Tamara are i Karawa. E tangiriira ao e tatauraoi ibukira ngkai. I kakoauaa bwa E kukurei ni kaekai ara tataro n taainako. Ti bia namakina mwaitin ataakira i Rouna n taainako, tabeakinara, tangirakira, ao kukureina n buokiira ao ni kakabwaiaira—ngkai ao n aki toki.
© 2026 by Intellectual Reserve, Inc. All rights reserved. Boretiaki n te USA. Kariaiakaki te Ingiriti: 6/19. Kariaiakaki rairana: 6/19. Rairan te Monthly Liahona Message, October 2026. Kiribati. 20059 859