Abasi Ɔfiɔk onyuŋ Ama Mbufo

Etop otode Elder Ulisses Soares

Eke Eboho mme Apostle Duopeba

Ɔsɔŋɔ ye nsinsi akpanikɔ edi ke Ete nnyin ke Heaven ama nnyin ndien Enye idifreke inyuŋ isinke nnyin.

Mbemiso ete ye eka mi eduk Ufɔk Abasi Jesus Christ Mme Ndisana Owo ke Ukperedem Usen, mmɔ ema ekpep nditɔ eka mi iren ita ye ami ebaŋa Abasi ye Jesus Christ. Ami mmansifiɔk nte ke Abasi odu ndien ke Enye ɔdiɔŋɔ mi onyuŋ ama mi. Akananam ami ŋkeyik-ke oro.

Nte mme isua ebede, ifiɔk mi ye ikɔ ntiense mi kabaŋa nte Abasi enehede ɔfiɔk mi ye nte Enye amade mi edinehede okpon. Mfin emi, nte Apostle Ɔbɔŋ Jesus Christ, ami metie ntiense nte ke Abasi ɔfiɔk onyuŋ ama ofuri nditɔ Esie.

Ami nyema ndikot mbufo nte ekere ye ami ebaŋa eridiɔŋ ndifiɔk nte Abasi etimde ɔfiɔk onyuŋ enehede ama mbufo.

Abasi Ama-ɔfiɔk onyuŋ Ama Fi Tɔŋɔ ke Eritɔŋɔ

Abasi ɔkɔdɔhɔ prophet Jeremiah ete, “Mbemiso Ami ŋkobot fi ke idibi Ami mmamfiɔk fi” (Jeremiah 1:5). Emi edi akpanikɔ abaŋa ofuri owo—ye afo ke esit.

Abasi edi Ete fo ke Enyɔŋ. Enye ɔfiɔk fi ke anyan ini. Ke akpanikɔ, afo okodu “ke ntɔŋɔ ye Ete” (Doctrine ye Covenants 93:23). Nte eyen spirit Esie kiet, afo ama odu ke mbono ke heaven emi Ete ke Heaven ekemende akwa uduak inemesit Esie owut. Prophet Joseph Smith ekpep ete ke uduak Abasi ɔnɔ nnyin kiet-kiet “ufaŋ ndikɔri nte [E]nye nyuŋ … ndɔk-ke-ubɔŋ ye [E]nye.” Ete ke Heaven okoyom fi enyene ufaŋ emi ndien Enye ɔnɔ fi ifet ndimek ndikabade ntie nte Enye.

Kpukpru ŋkpɔ emi Ete ke Heaven akanamde ye emi anamde ke ndinam akwa uduak inemesit Esie edi ediyarare mfɔnmma ima emi Enye enyenede ɔnɔ nnyin. Enye enyene uyɔhɔ ima ndien Enye oyom ete nnyin ŋko inyene uyɔhɔ ima oro. Nte “edima eyen eren mme ŋwan eke ete ye eka ke heaven,” nnyin iminyene edisana ukeme emi adiande nnyin ye Ete ke Heaven onyuŋ otuk nte Enye esede nnyin.

Ete ke Heaven ɔyɔhɔ ye anana-adaŋa, mfɔnmma, edisana, ye ata ima ɔnɔ fi emi okponde akan se ekemede nidtiŋ. Afo edi akpan-ŋkpɔ ɔnɔ Enye ke ntak emi afo edide eyen Esie. Ima emi Enye enyenede ɔnɔ fi ɔkɔtɔŋɔ ke mme nsinsi mbemiso afo ekedima-mana. Ndien ima oro odu ke ofuri ini uwem isɔŋ fo ye ke mme nsinsi.

Abasi Ɔfiɔk onyuŋ Ama Mbufo Idahaemi

Ke ini uwem isɔŋ eda mbɔm edip nnyin ifiɔk uwem nnyin mbemiso nnyin ikidimana, emi ayak nnyin isaŋa ke mbuɔtidem inyuŋ inam mbumek nnyin nte asaŋade ye mfɔnmma uduak Ete ke Heaven. Edi Ete ke Heaven eti. Enye itihi ikpɔŋ se nnyin ikidide idahaoro, edi Enye ɔfiɔk ofuri ŋkpɔ abaŋa nnyin idahaemi.

Enye ɔfiɔk ofuri mme ndaha uwem nnyin, ofuri mfina, mme idara, ye mme ukut nnyin. Enye ikpɔŋ ɔfiɔk mme ekikere nnyin ye mme uduak esit nnyin (se Doctrine ye Covenants 6:16). Elder Ronald A. Rasband eke Eboho mme Apostle Duopeba ama ekpep ete, “Owo ndomo kiet ifiɔkke mme ikereke ibaŋa fi ikan [Ete ke Heaven.”

Ke ntak emi Enye ɔfiɔkde nnyin onyuŋ ekerede abaŋa nnyin akan owo ndomo kiet efen, Ete ke Heaven ekere abaŋa isaŋ nnyin mi ke isɔŋ. Enye ɔfiɔk enye emi edifɔnde ye nnyin ke edisana ukeme nnyin nte eyen eren mme eyen aŋwan Esie. Ke okponde akan se nnyin ikerede, Enye oyom nnyin inyene akaŋa celestial nnyin—ndifiak nnyɔŋ ufɔk nnyin ke heaven.

Okposukedi nnyin mifɔnke ima, Enye enehede ama nnyin owo kiet-kiet. Usuŋ kiet odu emi Ete ke Heaven owutde nte aŋwaŋade ntɔtuŋɔ ima ukpeme Esie: “Koro Abasi akamama ererimbot ntem, tutu Enye osio ikpɔŋ-ikpɔŋ Eyen emi Enye Obonde ɔnɔ, man owo ekededi eke ɔbuɔtde idem ye Enye okutak, edi enyene nsinsi uwem” (John 3:16.

Abasi enehede ama nnyin—etim ama nnyin onyuŋ ɔyɔhɔ—anamde Enye ɔnɔ Jesus Chrsit, Akpa Eyen Esie, “Edima ye Edimek tɔŋɔ ke ntɔŋɔ (Moses 4:2), ete edi Ikpɔŋ-ikpɔŋ Eyen emi Enye Obonde ye Andinyaŋa ererimbot. Uwa usio-isop Jesus Christ edi akpatre ye se iyede ikan ke ima emi Ete enyenede ɔnɔ nnyin ye ofuri nditɔ Esie.

Jesus Christ ekedi ndinam uduak Ete Esie. Ye suŋ-suŋ ye nsuhɔreidem ke esit, Enye ɔsuhɔde ebe ofuri ŋkpɔ (se Doctrine ye Covenants 122:8) ndien anam uwa usio-isop Esie man anam akwa uduak inemesit Ete. Enye ama akan idiɔk-ŋkpɔ ye mkpa man ofuri owo eset onyuŋ enyene ufaŋ ndikabare esit enyuŋ ebɔ erifen nnɔ. Enye ɔnɔ mme ediomi emi enɔde nnyin “ufaŋ ke saŋa-saŋa ima ye mbɔm” ye ufaŋ ndibɔ nsinsi uwem ye “ofuri se Ete enyenede” (Doctrine ye Covenants 84:38).

Mbɔk ti ete ke “ofuri se Ete enyenede” esine idighe mme eridiɔŋ emi Enye edinɔde nnyin ikpɔŋ ke uwem emi ebede edi ŋko se Enye adade ɔdiɔŋ nnyin idahaemi. Enye “ke ekpeme [nnyin] ke ini ke ini” (Mosiah 2:21), esinede ke mme usuŋ emi ekemede ye nnyin ye mme ndaha nnyin.

Nte nnyin isikde ikpere Enye ye Eyen Esie, nte nnyin ibɔŋde akam inɔ Ete ke enyiŋ Eyen, nte nnyin inimde ibet Mmɔ, “Enye etim ɔsɔp ɔdiɔŋ [nnyin] ” (Mosiah 2:24) kpa ye ediwak eridiɔŋ.

Ke uwem emi, Abasi “iyomke usuŋ ikpɔŋ nnyin kiet-kiet” (Acts 17:27).

Ami mmetiŋ nte Elder Neal A. Maxwell (1926–2004), emi ekenimde ete ke “usen kiet ke iso ɔyɔwɔrɔ edi akan nte edide idahaemi ete ke edima Ete nnyin kanam kpukpru se Enye ekemede ndinam man aŋwam nnyin!”

Abasi Eyefiɔk onyuŋ Ama Fi ke Nsinsi

Mbonowo emi nnyin idoride enyin ke idem ikan uwem emi edi mbon emi nnyin ifiɔkde ikan, emi efiɔkde nnyin ekan, emi emade nnyin ye emi ekerede ebaŋa nnyin ekan, ye emi ewutde ete ke imima nnyin. Ke ntak emi Ete nnyin ke Heaven etimde ɔfiɔk nnyin, amade nnyin eti-eti, ama anam ndien kananam ediwak ŋkpɔ ɔnɔ nnyin, ndien ɔfɔn ama inyuŋ ikpuhɔke, nnyin imikeme ndidori enyin ke Enye ke ofuri ini.

Ndi usuk ini mbuɔtidem nnyin esinyek? “Ndi akananam [nnyin] imibiom ndodobi mbiomo?” Ndi usuŋ ke iso esikim? Ndi odu mme mfina emi etiede nte idikureke isehe se nnyin inamde mme nte ibɔŋde akam iyom uŋwam? Ndi mme eridiɔŋ edu emi nnyin iyomde inyuŋ ibɔŋde akam emi midighe?

Ami mmetie ntiense nte ke Abasi idifreke nnyin; idinyuŋ isinke nnyin tutu amama. Enye ɔfiɔk nnyin onyuŋ ɔfiɔk se ifɔnde ye nnyin ke ofuri ini uwem nnyin. Enye ɔfiɔk utit ke ntɔŋɔ. Enye ke idahaemi ɔfiɔk nnyin, mme ekikere nnyin, ye se iyomde ke spirit ye ke obukidem, ye se ofuri owo emi edude ekpere nnyin eyomde.

Edi akpan-ŋkpɔ ndifiɔk ete ke mme eridiɔŋ Esie edi ke uduak, usuŋ, ye ke ini Esie. Ini Esie ekeme edikpuhɔ ye eke nnyin, edi mme eridiɔŋ Esie esidi. Beri idem ke Enye ke ndi “bet, nyuŋ mfiɔk ete ke [Enye edi] Abasi” (Psalm 46:10), ete ke Enye ɔfiɔk ofuri ŋkpɔ, ndien ke Enye ɔfiɔk nnyin. Nte nnyin iberede idem ke Enye, ima Esie ekeme ndikanare nnyin ŋkuk ofuri-ofuri. Enye ɔŋwɔŋɔ ete ke nnyin imikeme ndiwɔŋɔre mbine Enye nyom uŋwam ye ndausuŋ ke ini ekededi. Enye eyefiɔk onyuŋ ama nnyin ke nsinsi.

Ami mmetie ntiense nte ke nte nnyin idoride enyin ke edima Ete ke Heaven ye edima Eyen Esie, inim mme ediomi nnyin, inyuŋ iyɔde ke mbuɔtidem tutu esim utit, nnyin iyibɔ mme eŋwɔŋɔ eke Ete, emi anamde ofuri ŋkpɔ ke odudu Esie man aŋwam nnyin ifiak inyɔŋ ika iso Esie ke usen kiet. Ndien nte nnyin inamde ntre, ami meŋwɔŋɔ nte ke nnyin iyitie ntiense, nte prophet Isaiah ke anyan ini emi ekebede, ibaŋa “udim edima mfɔn eke [Abasi]” (Isaiah 63:7).

Ete ke Heaven esifiɔk onyuŋ ama nnyin. Enye ama nnyin ndien Enye odu ɔnɔ nnyin idahaemi. Ami mmetie ntiense nte ke Enye ebeŋeidem ndibɔrɔ mme akam nnyin. Yak nnyin ke ofuri ini ikop nte Enye enehede ɔdiɔŋɔ nnyin, ekerede abaŋa nnyin, amade nnyin, ndien ebeŋeidem ndiŋwam nyuŋ ndiɔŋ nnyin-idahaemi ye ke nsinsi.

© 2026 otode Intellectual Reserve, Inc. Ekpeme kpukpru unen ndimiŋ. Ekemiŋ ke USA. Enyime ekabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop Liahona, Ɔfiɔŋ Duop 2026.Efik.20059 553