Kot a Sineok me Tongek

Seni Elter Ulisses Soares

Seni ewe Mwichen Ekkewe Engon me Ruemon Aposel

Ew wesewesen enneti esemuch pwe Samach non Nang a tongei kich me esap tongeni monnuki ika poutikicheno.

Pwan mwo mwen an semei me inei we choni Ewe Mwichefenin Jises Kraist ren Aramas m Pin non Fansoun Soponon, ra aitiei me pwi kewe unumon usun Kot me Jises Kraist. Ngang mi sinei fansoun meinisin pwe Kot mi chok nonnom me I mi sineiei me tongeiei. Ese fan ew upwe ani tipemwaramwaran.

Nupwen ekkewe ier ra fefeino, ai weweiti me ai kapasen pwarata ren ifa usun an Kot sineochuei me ifa ukukun An tongeiei a fokkun anonnonono. Ikenai, usun emon Aposelun ewe Samon Jises Kraist, Ua pwarata pwe Kot a sinei me tongei Noun semirit meinisin.

Uwa mochen etiwa kemi pwe oupwe fitiei ne ekiek won ewe auchean feiochun ach weweiti ifa usun anonnonen an Kot sinei me unusen tongei kemi.

Kot a Fen Sineok me Tongeok me ne Poputan

Ewe Samon a ureni ewe soufos Jeremiah, Me mwen ai foruk me nenuken inom we Ua fen sisieok (Jeremiah 1:5). Ei mi ennet ngeni emon me emon aramas—en mi pachenong.

Kot i Semach non Nang. I a fen sisienok non fansoun nakatam. Ennet, en mi nom me nepoputan ren ewe Sam (Doctrine and Covenants 93:23). Usun emon me nein Noun kewe semirit ngun, en mi nom non ewe mwichen apungupung me non nang ikewe Samach non Nang a wau An we auchean kokkoten pwapwa. Ewe Soufos Joseph Smith a afanafana pwe an Kot kokkot a ngeni kich “ew tufich ach sipwe fefeita usub [I]pwisin [me] … sipwe angei manau tekia ren [I]pwisin].” Samach non Nang a mochen kopwe ani ei tufich me a fen ngonuk ewe tufich om kopwe fini om kopwe usun I.

Mettoch meinisin Samach non Nang a fen fori me mi fori ren awattenon An auchean kokkoten pwapwa mi pwarano usun An unusen tong fan itach. A wor ren eu unusochun pwapwa me a mochen kich sipwe ani ena pwan unusoch. Usun “emon auchean anuon me fopun ngun noun sam me in non nang,” mi wor rech ei tufich seni nang mi achufengeni kich ngeni Samach non Nang me a anapanapa ifa usun I mi kuna kich.

Samach non Nang mi uren tong mi fochofoch, unusoch, pin me nimenimoch fan itom minne mi nap seni ach sipwe awewei. En mi auchea ngeni I pokiten en Noun semirit. An tong fan itom a poputa me non ekkewe fansoun esemuch me nom me mwen om uputiw. Me a soposopono non unusen manauom won fonufan me ngeni non ekkewe fansoun esemuch.

Kot a Sineok me Tongeok Iei

Fansoun manau won fonufan ach chechemeni ewe manau me mwen ei fonufan mi eppet, a mut ngeni kich sipwe fetan ren nuku me aea ach pungun finata non etipew ngeni an Samach non Nang we unusochun kokkot. Nge Samach non Nang mi chechemeni. Ese chok chechemeni ion kich me akkom, nge I mi sinei mettoch meinisin usun kich iei.

I mi sinei nonnomun manauach meinisin, ach kewe weires meinisin, pwapwa, me netipechou. I ewe chok emon a sinei usun ach ekiek me mochenin netipach (nengeni Doctrine and Covenants 6:16). Elter Ronald A. Rasband seni ewe Mwichen ekkewe Engon me Ruemon Aposel a aiti kich, “Ese wor emon a sineiochuk ika a kon aurekuk nap seni [Samach non Nang].”

Pokiten A sinei kich me aureki kich nap seni pwan emon, Samach non Nang a aureki usun ekkewe mettoch sia fori won fonufan. A sinei mennei me neir epwe anisi kich sipwe apwonueta ach tufich usun Noun att me nengin. Nap seni ach sipwe tongeni ekieki, A mochen sipwe fetanoch non fetanin manauach non pekin selestial—ach sipwe niwin ngeni imwach non nang.

Inamo ika kich meinisin sise unusoch, a unusoch An tongei emon me emon kich. Mi wor eu napanapan non minne Semach no Nang a fen pwaraochueno usun anonnonen An tong: “Pun Kot a fokkun tongei chon fonufan, ina minne a fangeno Noun we anamon pun iteiten aramas mi nuku I resap poutmwanino pwe repwe kuna manau ese much” (John 3:16).

Kot a fokkun tongei kich—an tongei kich mi fokkun nap me unusoch—ina minne a tinato Jises Kraist, Noun we Mwannichi, Noun we “Achengicheng me mi Finita seni nepoputan” (Moses 4:2), an epwe Noun Anamon me ewe Chon Amanauen ewe fonufan. An Jises Kraist asoren achasefan ina ewe amuchunon me wesewesen ningen napanapen an ewe Sam tong fan itach me fan iten Noun semirit meinisin.

Jises Kraist a feito an epwe fori mochenin ewe Sam. Ren umoumoch me tipetekisonen netip, A feitiw fan mettoch meinisin (nengeni Doctrine and Covenants 122:8) me fori An asoren achasefan an epwe apwonueta an ewe Sam we auchean kokkoten pwapwa. A akkufu tipis me mano pwe meinisin repwe manausefan me angei ewe tufich ne aier me angei omusomusen tipis. A awora pwon mi pin minne mi ngeni kich mumuta ngeni eu auchean sokkun tong me umoumoch me ewe tufichin angei manau esemuch me mettoch meinisin mi wor ren [ewe] Sam (Doctrine and Covenants 84:38).

Ouse mochen chechemeni pwe mettoch meinisin mi wor ren [ewe] Sam ese chok pachenong ekkewe feioch I epwe ngeni kich mwirin ei manau nge pwan met I mi efeiochu ngeni kich iei. I mi “tumunu [kich] seni ran me ran” (Mosiah 2:21), mi pachenong non ekkewe napanap mi wesen fich ngeni kich me nonnomuch.

Nupwen sia arap ngeni I me Noun we, nupwen sia iotek ngeni ewe Sam non iten ewe Nau, me nupwen sia apwonueta Ar kewe annuk, “a mwitir efeiochu [kich]” (Mosiah 2:24) pwan mwo ren ekkoch feioch.

Non ei manau, Kot “ese towaw seni kich” (Foffor 17:27).

Ua tipew ngeni ewe ekiek an Elter Neal A. Maxwell (1926–2004), ewe a nuku pwe “eu ran mi towaweno epwe kon fateno nap seni iei pwe Samach we mi tong a fori mettoch meinisin I mi tongeni fori an epwe anisi kich!”

Kot Epwe Sinei me Tongeok Feinfeino

Ekkewe aramas kich mi kon epinukunukur non ei manau ir ekkewe kich mi kan sisieiochur, ekkewe ir mi sineiochu kich, ekkewe ir mi tongei kich me ra mochen met mi murino ngeni kich, me ekkewe ra fen pwarano pwe ir sipwe epinukunukur. Pokiten Samach non Nang a sisineiochu kich, a fokkun tongei kich, a fen fori me mi chiwen fori watten mettoch fan itach, me mi unusoch me ese sisiwin, sia tongeni epinukuknuku I fansoun meinisin.

Kich mi kan kuna fan ekkoch pwe ach nuku mi tipemwaramwar? “Kich mi kan chou ren osach ach aurek?” Met ewe aan mwach mi usun fatangaw? Mi wor weires usun rese much ese nifinifin met sia fori ika ifa usun ach wesen iotek fan iten ngaseno? Mi wor feioch sia aneanei me iotek fan iter minne rese mwo fis?

Uwa pwarata pwe KOt esap tongeni monnukano kich: I esap pwan poutikicheno. I a sinei kich me sinei met mi och fan itach non fansoun nonnomun manauach meinisin. U a kuna nesoponon seni ewe nepoputan. I non ei wesen fansoun a apareni kich, ach memmef, me met mi namot ngeni ngunuch me inisich, me pwan met mi namot ngeni emon me emon unukuch.

Mi auchea sipwe weweiti pwe An kewe feioch ra fis anongonong won An pwisin mcohen, napanap, me fansoun. An fansoun meni epwe sokkono seni ach, nge An kewe feioch repwe fis. Epwe naf ach nuku i ach sipwe mosonoson, me sinei pwe [I] Kot (Konupin 46:10), pwe I mi sinei mettoch meinisin, me I mi apareni kich. Nupwen sia epinukunuku I, An tong epwe unusen pwenni kicheno. A fen pwonei pwe sia tongeni kun ngeni I ren aninis me emwen inet chok. I epwe sinei me tongei kich feinfeino.

Ua ennet pwe nupwen sipwe wanong ach nuku non Samach non Nang mi tong me non Noun we mi tong, apwonueta ach kewe pwon mi pin, me engino non nuku tori nesoponon, sipwe pwapwaiti ekkewe pwon an Samach, ewe a fori mettoch meinisin non An manaman an epwe anisi kich ne niwin ngeni I non ew ran. Me nupwen sia fori, ua pwonei pwe sipwe tufichin pwarata, usun chok ewe soufos Isaiah a fori me nom, usun chommongun an Kot umoumoch me tong (Isaiah 63:7).

Samach non Nang a fen sisinei kich me tongei kich fansoun meinisin. A tongei kich me mi nonnom fan itach iei. Uwa pwarata pwe I mi mochen fansoun meinisin an epwe ponuweni ach iotek. Amwo sipwe mefi ifa ukukun An mi sisinei kich, aureki kich, tongei kich, me an mochen anisi me efeiochu kich—iei me feinfeino.

© 2026 by Intellectual Reserve, Inc. Meinisin pung mi kawor. A för me Merika. Kapunguno non fosun Merika: 6/19. Kapungunon chiakun: 6/19. Chiakun ren Porous iteiten Maram ren Liahona, October 2026. Chuukese. 20059 901