Ngaahi peesi fakalotofonuá
Blesing blong Lod i bin 30 Minit
Taem we Jacinta Mauafu i aot long ofis blong hem let long wan naet, afta we hem i finisim sam impoten wok, hem i hariap blong gobak long hom blong go lukaot long man blong hem Maeli Maika Mauafu we i sik tumas. Maneja blong hem i gohed blong givim kaonsel long Jacinta blong putum wok blong Lod faswan mo afta bae hem i kasem blesing. Jacinta i bilivim se sapos hem i gohed blong stap mekem wok blong Lod, bae man blong hem i kam oraet. Mekem se Jacinta i sek bigwan taem Maeli i ded haf aoa nomo afta we hem i kam bak long haos.
From hat mo maen blong hem i no save akseptem eksperiens ia, Jacinta i tokbaot bigfala harem nogud we hem i filim from ded blong Maeli, mo blong talem stret , hem i filim se Lod i giaman long hem from i no bin blesem hem, nomata we hem i wok had blong plante aoa blong mekem wok blong translesen blong Jos folem ol en deit blong finisim wok. Be afta Lod i tekemaot man blong hem.
From se hem i harem sore tumas mo i kros tumas long wanem i bin hapen, Jacinta i disaed se hem i neva wantem gobak wok – from wok i bin mekem hem i lusum man blong hem. Afta long fenerol seves blong Maeli, ol pipol oli wokem ringim Jacinta blong faenemaot se wetaem bae hem i kambak long ofis. Oli rili nidim help blong Jacinta blong pruf rid ol kurikulom blong lesenbuk blong Tijing blong Profet Joseph F. Smith. Long en Jacinta i talem long olgeta se bae hem i nomo kambak wok fogud. Be, folem fasin blong wok blong kurikulom ia, hem i agri blong gobak be blong finisim projek ia nomo. Taem hem i stap jenisim ol teks, Jacinta i lanem abaot eksperiens blong bigfala harem nogud profet. Waef blong hem, Julina, i bin sik bigwan mo nomata se Presiden Smit i wantem tumas blong stap long saed blong bed blong hem blong lukaotem hem, waef blong hem i askem strong blong Presiden i go mekem wok blong Lod. Sot taem afta, we Presiden i stap givim toktok long wan jos miting, wan man i kam long rum mo i pasem wan pepa long Presiden Smit—blong letem hem i save se woman blong hem i ded.
Ol wota blong ae oli ron long fes blong Jacinta taem hem i kam blong luksave se !Lod i no bin lego hem! Hem i bin givim hem 30 minit blong stap wetem Maeli bifo hem i ded. !Hemia nao blesing blong hem! Hem i bin gat 30 minit. Nomata we hem i bin harem nogud folem eksperiens blong hemwan, Jacinta i krae from Presiden Smit we i no bin gat semmak blesing blong 30 minit wetem waef blong hem.
Tedei wetem tingting we i stap daon Jacinta i tokbaot rilesensip blong hem wetem Papa long Heven. Jacinta i filim se Hem i oltaem stap wetem hem—mo taem hem i stap luklukbak, hem i luksave plante wei we Hem i sapotem mo givim hem paoa.
Pikinini gel blong Jacinta, Blanche, i kam bak long Samoa mo i stap olsem ston blong hem—hem i bin stap stadi ovasi. Pikinini boe blong Jacinta, JR, i gohed blong stap toktok long mama blong hem, mo i givim lav mo sapot, mo bigfala bubu boe blong hem i soem plante lav we hem i save givim.
Lukluk blong Jacinta i stap strong long gospel blong Jisas Kraes we i kambak mo i gohed blong stap olsem wan disaepol blong Kraes. Hem i wan mama mo apu woman we i kasem plante lav, mo hem i glad blong givim seves long Lod. Hem i gohed blong stap olsem fultaem wokman blong Lanwis Translesen Dipatmen blong Jos mo hem i Yang Woman Presiden, wan YSA tija, Tempol Priperesen Institiut Tija mo Indipenden Laef fasiliteta. Wetem evri koling we hem i gat, hem i oltaem faenem wei blong givim seves long ol sista long wod blong hem mo i laekem blong tijim ol yang woman olsem wanem blong givim seves mo long semmak taem, developem ol lidasip skil blong olgeta. Long Febwari, ol yang woman oli tekem i kam tugeta ol samting blong yusum blong klinim bodi mo go givim aot long ol wido blong wod long Valentaen Dei, tugeta wetem ol smol smol kek we advaesa blong yang woman i bekem. Wan wido i se hem i wan blesing taem oli tingbaot hem. Wan wido we i stap insaed long haos fultaem i laekem olsem wanem ol yang woman oli mekem gud hem mohem i laekem tumas visit blong olgeta- wetem sore hem i ded tu wik afta - be i no bifo hem i bin filim lav blong Lod wan moa taem tru long ol wokman blong Hem.