Jerbal in jipan̄ ko an Marta Aolep Raan
M̧am̧a in im leddik in nejin eļap aerro kate erro n̄an mour kōn gospel in ippān doon. Im Marta emaron̄ mour kake ilo an jipan̄ jinen ilo wāween ko rejenoļo̧k.
Pija ko jān Leslie Nilsson
Martha ej juon leddik 11 an iiō jān Portugal, im āinwōt elōn̄ leddik ro jet me rettan, em̧m̧an ippān joļo̧k iien ko an ippān ro m̧ōttan, m̧ōn̄ā, im ikkure ippān toļe ko nejin. Ekar barāinwōt em̧m̧an ippān joļo̧k iien ko an ippān jinen. Ak jokwe ippān jinen meļeļein eoktak jidik an Marta mour jān ajri ro jet.
Jinen Marta, Sonia, ekar ļotak tok kōn juon nan̄inmej etan motor deficiency me ej kōm̧m̧an bwe ne pen an etetal. Ejjab lukkuun mej aolepen ānbwinnin, ak ej aikuj kein etetal ko n̄an jipan̄ e ito itak. Ejjab maron̄ ekkōņak an make nuknuk, tutu make iaan, ak jepļaak n̄an jikin kiki eo an. Menin ekar kōm̧m̧an bwe en pen n̄an e n̄an mour make iaan. Marta ekar maron̄ jipan̄ Sonia ium̧win iiō ko jejjo remootļo̧k ilo an jipan̄ e kōn men ko ejjab maron̄ kōm̧m̧ane make iaan.
“Ij karreoiki wōt peļaakū bwe en pidodo an jinō m̧akūtkūt,” Marta ekar ba. “Ij barāinwōt kakkije jidik jān kōjan̄jan̄ piano bwe en wōr aō iien im lale jinō im lale eļan̄n̄e ej aikuj jipan̄. Eļan̄n̄e ij kōjan̄jan̄ im ej kūr eō, inaaj m̧ōkaj im etal kōnke emaron̄ juon men in kōkairiir.”
Ak Sonia ekar kajjieon̄ kōtļo̧k bwe Marta en mour āinwōt jon̄an eo emaron̄e. Eļan̄n̄e Sonia ejjab aikuj jabdewōt jipan̄, ej lukkuun lale bwe Marta ewōr an iien im ikkure ippān ro m̧ōttan.
Mour kōn Tōmak eo Aer
Marta ewōr an iien em̧m̧an n̄an mour kōn gospel eo kajjojo raan ilo an jipan̄ jinen. Ej bōk ioon elōn̄ eddo ko jān ajri ro jet ro ejeja an lōn̄ aer jerbal ak eddo. N̄an waanjon̄o̧k, ej jerkak aolep jibbon̄ tata n̄an jipan̄ jinen kōpooje n̄an jerbal m̧okta jān an etal im jikuuļ. Kōn jipan̄ eo an Marta, Sonia ejjab maron̄ em̧akūt eļap ak etal im jerbal aolep raan.
Marta im Sonia rej etal im jar ippān doon. Sonia ekar peptaij ke ekar ruwalitōk an iiō, kōn menin Marta ekar rūttoļo̧k ilo Kabun̄ in. Sonia ej katakin Marta kōn aorōkin gospel eo aolep raan. Juon wāween ej kōm̧m̧ane ej ilo an likūt bwijjin pija in Jisōs Kraist ilo m̧weo im̧ōer.
“Ijeļa bwe Anij ej mour im bwe Jisōs Kraist em̧ool,” Sonia ekar ba. “Im ikōņaan bwe aolep ren itok n̄an m̧weo im̧ō bwe ren jeļā bwe tōmak elukkuun aorōk ippa. Ebarāinwōt aorōk n̄an n̄a n̄an katakin kōn menin n̄an Marta bwe en rūttoļo̧k kōn jeļāļo̧kjeņ in kōn Jisōs Kraist.
Marta ekar mour kōn ta eo jinen ekar katakin e im wōnm̧aanļo̧k wōt im ekkatak eļapļo̧k kōn gospel eo ippān make. Juon wāween em̧m̧an ippān ekkatak ej ilo an riiti jeje ko rekwojarjar, eo me je jipan̄ e ejaake juon jemjerā ekajoor ippān Jemedwōj Ilan̄ im Rilo̧mo̧o̧r. “Ke ikar riit jeje ko rekwojarjar, Ij en̄jake an Kraist pād itūrū,” ekar ba.
Kappukot Kaenōm̧m̧an
Ke ekar maron̄ pen n̄an bōk aolep eddo kein, etal im jar kajjojo wiik ej jipan̄ Marta lo kaeņōm̧m̧an eo me ej aikuji n̄an wōnm̧aanļo̧k wōt im jipan̄ jinen. “N̄e rej jar jinoin im jem̧ļo̧kin kweilo̧k in kwojkwoj eo, elukkuun ļap kaenōm̧m̧an” ekar ba. “N̄e ij pād ijeņ, jet iien ij en̄jake an Jemedwōj Ilan̄ ba n̄an n̄a ke n̄a juon armej em̧m̧an im bwe inaaj wōnm̧aanļo̧k wōt im erom̧ juon leddik em̧m̧an n̄an jipan̄ jinō.”
Jabdewōt iien ij en̄jake wāween in, ej kakeememej eō jon̄an an kam̧m̧olool e kōn jinen. Ej en̄jake bwe Jemedwōj Ilan̄ ekar jilkintok enjeļ ro n̄an jipan̄ er. “Ij ļōmņak bwe E ej kōkajoorļo̧k eō bwe in jerkak im em̧ōņōņō im utiej buruō kōn jinō,” Marta ekar ba.
Juon iaan katak ko me Sonia im Marta rekar ekkatak ippān doon kake ej bwe mour in ejjab pidodo im wāppen—n̄an jabdewōt. Sonia ekar ba, “Ejjeļo̧k juon iaan apan̄ ko aō rej kaburom̧ōj eō. Ijeļā bwe Anij ekar letok n̄an eō kanniōk im bōtōktōk im di ilo jekjek in kōnke ijeno̧lo̧ktata, im Anij ekar ba bwe imaron̄ e. Inaaj kōm̧m̧an ijo em̧m̧an tata imaron̄e. Imaron̄ kōm̧m̧an eļapļo̧k, ak rainin ij en̄jake EM̧M̧AN ippa. Eutiej būruō kōn ta eo ij kōm̧m̧ane, ta eo ewōr ippa, im ta eo inaaj kōm̧m̧ane ilju.”
Marta ej barāinwōt kile bwe aolep men renaaj em̧m̧an, men̄e mour emaron̄ lukkuun pen jet iien ilo an lale im jipan̄ jinen. Ej lo bwe aolep armej im wōr aer apan̄. “Ejjeļo̧k juon eņ ewānōk mour eo an,” ekar ba. Ak men̄e kōn apan̄ ko an make, Marta ekar pukot wōt men ko rem̧m̧an ilo aolep jekjek ko—jem̧jerā eo an ippān jinen ej juon waanjon̄o̧k. “Jinō ewōr an apan̄ ilo ānbwinnin, ak kōļmenļo̧kjeņ im en̄jake eļap an māletlet. Kōm lukkuun jet rim̧ōtta ro me eļap aerro epaake doon.”
Erreim̧aanļo̧k Wōt
Kōn menin ta eo epād ilju im jekļaj n̄an Marta im Sonia? Marta ekar ba, “Ikōņaan pād wōt epaake jinō, im aet em̧ool ikōņaan m̧are, wōr nejū, im wōr juon aō baam̧le. Ak ilju im jekļaj, eļan̄n̄e imaron̄, ikōņaan bwe jen wia juon m̧ō n̄an jim̧or baam̧le eo aō im jinō kōnke iban kōņaan bwe in ettoļo̧k jān e jekdo̧o̧n juon wōt raan!”
Sonia ej en̄jake kōjatdikdik kōn ilju im jekļaj barāinwōt naaj kam̧m̧olool aolep iien kōn jem̧jerā eo an Marta im iakwe eo an. “Elukkuun em̧m̧an n̄e ewōr juon nejid leddik eaiboojoj. Elukkuun em̧m̧an bwe epād Marta ilo mour e aō. Ej juon menin letok jān Anij. Ekar kōpooj Marta bwe en pād wōt ippa.”