2020
Sakiusa im Salote Maiwiriwiri
Oktoba 2020


Pija ko kōn Tōmak

Sakiusa im Salote Maiwiriwiri

Suva, Fiji

Pija
Sakiusa and Salote

Ijjab tōmak kōn aenōm̧m̧an im m̧ōņōņō eo ikar en̄jake ilo kapijuknen eo an Maiwiriwiri. Jekdo̧o̧n emej ruo iaan ajri ro nejierro, erro kar mour kōn lan̄lōn̄ im jibadbad aolep raan.

Lesley Nilsson, Ripija

Salote:

Ruo iiō ālkin an ļaddik eo nejim mej kōn kāānjōr in ār, leddik eo nejim ekar mej kōn juon nan̄inmej in kōmālij etan meningitis. Ilo tampeļ, ikar en̄jake juon unoojdikdik ekajoor n̄an kōnono ippān juon mijinede sister erūtto ijeņ eo me ekar barāinwōt jako ruo iaan ajri ro nejin iiō ko m̧oktaļo̧k. Ekar ba n̄an n̄a, “Eļan̄n̄e kwoj kōm̧m̧an bwe m̧weo im̧ōm̧ en juon jikin ekwojarjar, komaron̄ en̄jake an ajri ro nejim pād ie.”

Menin ekar erom̧ juon am kōttōpar. Aolep men ko kōm ej kōm̧m̧ani ej n̄an kōm̧m̧an bwe m̧weo im̧ōm̧ en juon jikin ekwojarjar. Jekōņaan en̄jake aer epaake kōm.

Jejjab jeļā kilen kōkaajriri ajri ro ilo iturājet in ran̄ōl eo. Ak eļan̄n̄e jejjab kōm̧m̧ane kijejeto ko ad n̄an mour jim̧we, jej tōmak renaaj en̄jake kijejeto ko ad. Ilo nokon ko an baam̧le eo am, jej karuwaineneik tok Esa im Esalynn ilo ad ba etaer.

Ilo m̧weo im̧ōm̧, jekdo̧o̧n n̄e jejjab errā ippān doon, jej kajjieon̄ ņa mejļan ilo iien eo em̧ōkaj tata. Jekōņaan bwe m̧weo en pād wōt ilo an juon jikin ekwojarjar jon̄an wōt ad maron̄. Ilo am kar kōm̧m̧ane menin, kōm kar en̄jake kōjatdikdik im kōmour im iakwe.

Sakiusa:

En̄jake eo kōn jako eo an Esa im Esalynn ekar āliktata kepaake baam̧le eo am ippān doon. Jej kapilōk doon ippān ajri ro jet nejim. Jej etal n̄an tampeļ eo āinwōt juon baam̧le. Jej mour kōn mour ko rettā im kālet n̄an kam̧m̧olool aolep raan. Ilo am kōnono kōn ta meļeļein n̄an liāp āinwōt juon baam̧le ilo tampeļ, liāp in emour ilo kōm. Im kōn aolepān men in, kōm ej en̄jake an ajri ro nejim pād itūrim.

Juon iaan men ko jinointata kōm kar kōm̧m̧ane bwe m̧weo im̧ōm̧ en kwojarjar kar jino am riiti Bok in Mormon aolep raan. Kar jinoin, kōm kar kwaļo̧k bwebwenato ko jān Bok in Mormon n̄an ajri ro nejim reddik. Innem kōm kar kakobaik pijaan alooj ko. Kiiō jej riit eļapļo̧k jān Bok in Mormon. Imaron̄ kwaļo̧k aō kam̧ool kōn kajoor eo an Bok in Mormon.

Imaron̄ barāinwōt kwaļo̧k aō kam̧ool kōn kajoor in karōk in lo̧mo̧o̧r. Ke kōm kar karōke kobban ilomej eo an Esa im Esalynn, kōm kar kālet bwe kōm en jab kōm̧m̧an ilomej eo me ekkā kōm̧m̧ane ilo manit eo an Rifiji. Ijjeļo̧kin, kōrā eo pāleeō im n̄a kar kom̧ro kar rikōnono, im kom̧ro kar kōnono kōn karōk in lo̧mo̧o̧r. Elōn̄ ro nukum ro rekar oktaktok n̄an Kabun̄ in ālkin aer kar ron̄ m̧ool kein ilo iien ilomej eo.

Pija
Sakiusa in the kitchen

Sakiusa ej katakin baam̧le eo bwe jeban bar rool likļo̧k ilo mour in, jej wōnm̧aanļo̧k wōt. “Aolep raan ekar ļapļo̧k amim kajoor,” eaar ba. Rej mour kōn ettā jon̄an wōt aer maron̄ im rej mije wōt kam̧m̧olool.

Pija
Salote with a little girl

Salote ej lo eļap m̧ōņōņō ilo an joļo̧k iien ko an ippān ajri ro nejin im ilo an katakin er gospel eo.

Pija
Little girl holding up photo

Baam̧le eo an Maiwiriwiri ewōr juon aer naan in kam̧ool ekajoor kōn liāp ilo tampeļ. Rej dāpij m̧ool kein ilo buruōer ilo aer keememej Esa im Esalynn.

Pija
Maiwiriwiri family smiling boys

Ilo aer pedped wōt ioon ettā im erreim̧aanļo̧k wōt, baam̧le eo an Maiwiriwiri rej kam̧m̧olool kōn kōjeraam̧m̧an ko aer aolep raan. “Kōmij kam̧m̧oolol kōn ta eo ewōr ippam,” Sakiusa ej ba.