Ko̧o̧ļe Baba
Eļan̄n̄e ij buul petōļ, Yu ekar ļōmņak, imaron̄ tōpar m̧weo m̧okta jān an ibwijleplep iaļ ko.
“Kom̧in m̧ōņōņō, bwe Inaaj tōlļo̧k kom̧” (Katak im Bujen Ko 78:18).
Yu ekar rool jān m̧ōn jikuuļ in cram eo im pād ilo tōrerein iaļ eo me elukkuun ļap an poktak im ļap boub. Ekar obrak bōran kōn bōnbōn in math jān kūlaaj eo an ālkin jikuuļ. Armej rekar ekkairiir itūrintok kōn am̧bōreļa ko. Ekar lukkuun wōt mijeljel, im ekar lukkuun pedkat iaļ ko.
Eo m̧ōttan Yu, etan in Lin, ekar etal im jutak itūrin. “Kwoj aikuj ko̧o̧ļe jem̧am̧ bwe en bōk kwe,” Lin ekar ba. “Mr. Zhang ej ba elukkuun ibōj jet iaan jikin ko ilo bukwōn eo.”
“Imaron̄ tōpar m̧weo ippa make.”
“Ak lale mōk dān kaņe!” Lin ekar ba, ej jitōn̄ļo̧k dān ko rej toorļo̧k ilo to̧rto̧r ko.
Ejjab to, Yu ekar en̄jake juon en̄jake ekōjak. Ej ke m̧ool Lin? Bōlen ej aikuj ko̧o̧le Jemān bwe en bōke n̄an m̧weo m̧okta jān an ibwijleplep iaļ ko. Ak e im jemān rekar akwāāl bon̄, im Yu eļakkarr illu wōt. Ekar jab kōņaan kajjitōk ippān Jemān bwe en jipan̄.
Yu ekar kōtļo̧k kein loklok ko ilo bajikōļ eo im ba bar lo eok n̄an Lin. Eļan̄n̄e inaaj buuļ petōļ, ekar ļōmņak, imaron̄ tōpar m̧weo m̧okta jān an ibwijleplep iaļ ko.
Ekar lukkuun buuļ petōļ, ak ejjab to pā ko pein rekar jino m̧ōļo, nuknuk ko an rekar lukkuun tutu, im ekar mōk. Bar juon alen, ekar jiktok juon ļōmņak bwe in ko̧o̧le Jemān. Kar ke juon en̄jake jān Jetōb Kwojarjar? Mijenede ro me rekar peptaiji e rekar ba bwe Jetōb Kwojarjar emaron̄ erom̧ juon kein tōl e. Yu ekar reilōn̄ļo̧k n̄an lan̄. Ekar lukkuun kūre jon̄an ekar jab maron̄ loe lōn̄in em̧ kilep ko. Ak eļakkarr illu wōt ippān Jemān.
Ekar kajejtokjen en̄jake eo im ekar wōnm̧aanļo̧k wōt im petōļ wōt. Dān ekar utiej ļo̧k jon̄an armej ro aer m̧ōn wia ko rekar kiil m̧ōn wia ko aer. Armej ro rekar kōm̧akūt m̧weik ko aer n̄an būļoor ko lōn̄. Yu ekar lo juon m̧am̧a ej bwili ajri ro nejin ilo ibwijleplep eo ilowaan juon ļoon jidikdik kōm̧m̧an jān būļāājtiik.
Kōn dān eo kiiō me etōpar ilōn̄inļo̧k jikulele in neen, Yu ekar jab maron̄ petōļ e bajikōļ eo waan. Ekar to im bwilli. Ekar lukkuun rūm̧ūj kiiō n̄an ko̧o̧ļe Jemān, im eļakkar wōt wōt. Ekar lukkuun jourur im ļap an ejarōmrōm ilōn̄in wōt e. Yu ekar lukkuun mijak. Im ekar lukkuun mōk! Ekar erreim̧aanļo̧k wōt. Ekar ettoļo̧k wōt m̧weo. Ekar jab aikuj kōjekdo̧o̧n Jetōb Kwojarjar kōn wōt akwāāl eo me ejjeļo̧k tokjān.
Yu ekar bōjrak im jar. Ekar jab ron̄ ainikien kōn an wōt im jouruur, ak ekar jeļā bwe Jemedwōj Ilan̄ emaron̄ ron̄ ainikien.
“Jemedwōj Ilan̄,” Yu ekar jar. “Jouj im jipan̄ eō bwe in tōpar m̧weo ilo ejjeļo̧k jorrāān.” Ke ekar dedeļo̧k, ekar en̄jake ebwe kajoor n̄an wōnm̧aanļo̧k wōt.
Āliktata, Yu ekar lo m̧weo im̧ōn ioon juon tōļ jidikdik. Pio, mōk, im jako rājet in juuj, Yu ekar kakkōt wōt ilo an tallōn̄e tōļ jidikdik eo. Ekar lo Jemān ej kōttar e inabōj m̧weo. Jemān ekar kōkairiir laļļo̧k bwe en bōke e, ekar ettōr ioon pedkat ko.
Ke Jemān ekar jiburitok, ej atbakwo̧je Yu. “Ikar lukkuun inepata!” Jema ekar ba: “Kwon kar ko̧o̧le n̄a!”
“Ikar ļōmņak kōjro kar illu ippān doon,” Yu ekar ba.
“Ijjan̄in kar lukkuun illu n̄an jipan̄ eok,” Jemān ekar ba. Innem ekar bōk bajikōļ eo waan Yu im bwilliļo̧k n̄an ioon tōl jidikdik eo.
Jekdo̧o̧n kōn ainikien jouruur ikōtaan em̧ kilep ko im an wōt mijeljel, en̄jake in aenōm̧m̧an ekar kobrak būruōn Yu. Ekar en̄jake aenōm̧m̧an im ineem̧m̧an ke ej ļoor Jemān n̄an m̧weo.