2020
Erudua Asɔr Dwumadzi horow mu do dze Rosom
Ayɛwoho 2020

“Erudua Asɔr Dwumadzi horow mu do dze Rosom,” Liahona, Ayɛwoho 2020

Mfonyin
erosom

Young men a wɔrobɔ asese hɔn mfonyin a Bud Corkin twae; basiaba a ɔroto pon a Sherie Price McFarland twae; dza wɔwɔ do no fi Getty Images.

Erosom ho Fapem, Ayɛwoho 2020

Rosom erudua Asɔr Dwumadzi horow mu do

Ɔsamufo n’asɛnsin: Wɔkyerɛɛw krataa yi ansaana COVID-19 nsanyarba no reba. Nsusui a ɔwɔ ase yi mu bi rennyɛ edwuma wɔ nyimpa ntamu ntsetsewee ber mu mbom wɔbɛyɛ edwuma prɛko pɛr a Asɔr nhyiamu na dwumadzi horow bɛhyɛase. Sɛ obehia a, meserɛ sesã nsusui yinom dɛ mbrɛ sesieara Asɔr na aban nhyehyɛ tse.

Kwan kor a yebotum dze asom hɛn mfɛfo wardmba, fipamfo, na anyɛnkofo nye yedua Asɔr dwumadzi horow mu do. Dɛ ihyehyɛ dwumadzi bi fa obi a isom no n’ehiadze anaa n’enyikadze ho, anaa eto nsa frɛ hɔn ma wɔbɛkã dwumadzi horow anaa ɔsom akwan horow mu ma binom ho o, dwumadzi horow wɔ ward, stake, anaa mpo stake dodow no, obotum ayɛ mfaso na enyigye akwan a yɛdze benya koryɛ na yɛahyɛ asɔrmba no dzen.

Asɔr dwumadzi horow so botum ebue akwan horow ma wɔdze asom. Mfatoho, Asɔr dwumadzi horow botum ama akwan horow ma edze woho ahyɛ som dwumadzi mu a ohyira binom na wɔakyekyer nkitahodzi pa wɔ sɔn mu. Asɔr dwumadzi horow botum so ayɛ akwan a edze bɛsera Asɔrmba akɔtrɔbɔdwefo na anyɛnkofo a wɔnnyɛ asɔrmba anaa anyɛnkofo a wɔnnkɔ asɔr biara.

Yɛdze nkorɔfo pii rekã Asɔr dwumadzi horow mu no ma Ewuradze kwan ma ohyira hɛn ward na nkorbata ahorow, hɛn fipamfo, na hɛn sɔn ahorow.

Yɛrekyekyer Nkitahodzi Mapã

Nna awɔwber reba, na nna David Dickson nnyim mbrɛ obesi bɛma n’ebusua akã hɔnho hyew ho adwen biara.

Nna ɔnnkyɛree na David, ne yer, na mbasiamba beenu tuu kɛtsenaa Fredonia, Arizona, kurow kakrabaa mu wɔ USA, asaase kɛsɛɛ a nna mbotan amemen, na nhaban nhaban etwa ehyia ho.

Fie a nna Dicksonfo no tua ho kaw no, nyena mbukyia a wokuwa mu no nye hɔn adze tsitsir a wɔdze nya hyew. David hun no ntsɛmara dɛ eroboaboa nyena ano yɛ nsaano dwuma a ohia osiandɛ esukwankyɛba na ice dɔɔ sõ wɔ awɔwber mu wɔ Fredonia.

David see dɛ: “Nna minnyi nyena anaa chainsaw efir anaa mpo nyimdzee biara wɔ mbrɛ wosi dze dzi dwuma ho!’’ “Nna minnyim dza nna mebɛyɛ.’’

Wardmba no bi bisaa David sɛ n’ebusua no wɔ nyena a ɔbɔsõ a ɔdze hɔn etwa awɔwber no a. David see dɛ “Annkyɛr koraa na wohun dɛ minnyi bi.’’ “Ntsɛmara elderfo quorum no yɛɛ dɛ wɔbɔboa me ma maboa nyena ano. Ndaase hyɛɛ modo mã, megyee hɔn mboa no too mu.’’

Ntsɛm na David hun dɛ nyena mboaboa ano no yɛ ward dwumadzi horow no kor a wɔahyehye no yie ato hɔ, a wɔtaa yɛ, na dodow so dze hɔnho hyɛ mu. Memenda anapa bi, David, elderfo quorum, na wardmba foow ahɛn na trailɛs dze hɔn enyiwa kyerɛɛ mbepɔw no do.

David see dɛ, “Ewiaber kor pɛr, a nna wɔdze hɔn edwindadze na nyimdzee no, wardmba no maa m’ebusua nyena dodow a ɔdze hɛn twaa awɔwber ebien.’’ “Dza ohia dodow mpo no, wɔkyerɛɛ me biribiara a nna ohia dɛ muhu wɔ marankasa moroboaboa nyena ano ho. Ber a nna merefi Fredonia no, nna minyim mbrɛ wosi suo chainsaw efir mu, na mber pii no moboaa ward nyena-mboaboa ano dwumadzi horow mu a munnkotum akan.”

Ward dwumadzi horow a ɔtsetse dɛm no annkyekyer nkitahodzi mapã wɔ Asɔrmba no ntamu nko, mbom so wɔnye obiara nyaa nkitahodzi mapã wɔ sɔn no mu.

David see dɛ, “Mekaa ɔbaa bi a nna ɔyɛ fofor wɔ apaamu hɔ, na ɔnnyɛ Asɔrba.’’ “Nna ahokyer ama otutu ne dan mu ntaabow a ɔfam banho no kuwa ma ne fie yɛ hyew. Yɛtsee n’akosɛm prɛko pɛr no, yɛhwɛɛ no pefee dɛ onyaa nyena a oye a ɔdze twaa awɔwber no. Ndaase hyɛɛ no mã dodow ma nna onntum mpo nnkasa.’’

Erosom ho mbɔdzembɔ wɔ Fredonia hwɛɛ no pefee dɛ ɔhyew kãa obiara ma onyaa ahotɔ awɔwber no nyina mu.

Yɛroboa Binom

Ber a nna wɔrosom asɛmpakã dwuma wɔ Romania no, nna Meg Yost na ne damfo taa seraa ebusua bi a nna wɔkɔr asɔr akyɛr. “Nna Stanicafo no kã Asɔrmba edzikamfo ankasa ho wɔ Romania,’’ Meg see dɛ, “nna yɛdɔ hɔn.’’

Mber soo dɛ wɔbɛhyehyɛ na woedzi nkorbata dwumadzi bi no, baanodzifo no yɛɛ adwen dɛ wɔbɛyɛ “Odzikanyi Anafua.’’ Iyi bɛyɛ ewimbir bi a wɔdze bɛkamfo edzikamfo akokodurfo no a wotwaa United States dze koduu Salt Lake Bɔnsa no. Ɔbɛsan so ayɛ kwan a wɔdze bɛhyɛ Asɔr n’edzikamfo no a wɔwɔ Romania no enyimnyam.

Meg see dɛ, “Yɛdween ho dɛ ɔbɛyɛ kwan kɛse ma asɔrmba no bi dɛ wɔbɛgye hɔn nsakyeree ho dase na mbrɛ woesi ehu Asɔr ne nyinii wɔ Romania. “Ntsɛmara na yɛdween ho dɛ ɔwɔ dɛ Stanica ebusua no kã ho. Yɛtoo nsa frɛɛ hɔn dɛ wɔmbɛkã ho, na ɔyɛɛ hɔn enyigye!’’

Dwumadzi n’anafua no, ber soo dɛ wɔhyɛ ase no nna Stanicafo no mbae.

Meg kaa dɛ, “Nna ɔhaw hɛn dɛ wonnkotum aba.’’ “Naaso ber soe noara, na wopuee hɔ. Stanicafo no gyee dase dɛdɛɛdɛw faa asɛmpa no na Asɔr no ho. Wonyaa kwan so nye asɔrmba binom a wohun hɔn akyɛr yie no nyaa nkitahodzi.’’

Nkorbata mu asɔrmba no tserɛɛw hɔn abasa mu na wotui fuaa Stanicafo no. Kwesida a odzi do no, Meg noho boow no enyigye mu ara dɛ ohun Akyerɛbaa Stanica wɔ asɔr.

“Abosoom kakra ekyir no a mokɔr nkorbata hɔ no, nna ɔda ho ba!’’ Meg see dɛ: “Megye dzi dɛ kwan a onyae dze gyee ne dase na ɔtsee nkã dɛ ɔkã ho na wohia no wɔ nkorbata mu no, boaa no ara yie.’’

4 Adwenkyerɛ horow ma Erudua Asɔr Dwumadzi horow mu do dze Rosom

  • Hyehyɛ dwumadzi horow a ɔma nsa kã ehiadze: Dwumadzi horow yɛ kwan tsitsir a nsa kã ehiadze asorɔtow pii. Wobotum ahyehyɛ ma ankorankor anaa kuw bi hɔn nsa akã hɔn ehiadze tsitsir bi. Hɔn a wɔdze hɔnho hyɛ mu no wɔdɛ hɔn so nsa kã hɔn ehiadze, sɛ dɛm ehiadze no nye dɛ wobohu hɔn mu kor biara yie, wobohu asɛmpa no yie, anaa wɔbɛtse Sunsum ne nkã o.

  • To nsa frɛ obiara: Ber a hom hyehyɛ dwumadzi horow no, hom mbɔ mbɔdzen tsitsir ara nto nsa nfrɛ hɔn a wɔdze hɔn ho hyɛ mu a ɔbɛyɛ mfaso ama hɔn no. Fa asɔrmba afoforfo, asɔrmba akɔtrɔbɔdwefo, mbabun, single adultfo, nkorɔfo a oedzi dzɛm, na nkorɔfo a wɔnnyɛ asɔrmba to w’adwen do. Fa hɔn enyikadze wɔpɛ no yie no to w’adwen do fato nsa frɛ hɔn, na kyerɛ dɛ ebɛpɛ dɛ wɔbɛba.

  • Ma ahohyɛmu ho nkuranhyɛ: Hɔn a ito nsa frɛ no benya mfaso pii efi dwumadzi horow no mu sɛ wonya kwan dze hɔn ho hyɛ mu a. 9Kwan kor a edze bɛma ahohyɛmu nkuranhyɛ nye ibɛma ankorankor dze hɔn akyɛdze, nsaano dwuma, na talent ahorow no edzi dwuma wɔ dwumadzi ber no.

  • Ma obiara nya ahomka: Sɛ w’anyɛnkofo ba dwumadzi ase a, yɛ dza ibotum nyina ma wonya ahomka. Dɛmara dɛ, sɛ ihu nkorɔfo a nnyim hɔn a, ma hɔn enyi nka na wonya ahomka so!

© 2020 odzi wɔ Intellectual Reserve, Inc. Wɔakora ho tumdzi nyina. Wotsintsimii wɔ USA. English approval: 6/19. Translation approval: 6/19. Ministering Principles, July 2020. ne Nkyerɛasee Fante. 16989 502