BWEBWENATO KO AN IJO JOKWE IE
Jarlepju ko ilo Vanuatu ro rej M̧ōņōņō kōn M̧ōn Jar ko Rekāāl
Membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo Port Vila, Vanuatu ewōr juon aer im̧ōn jar ekāāl n̄an kweilo̧k ippān doon kajjojo wiik. N̄an kabwe jon̄an lōn̄ļo̧k in membōr ro, ruo im̧ōn jar kāāl kiiō epaak aer dedeļo̧k.
M̧ōn jar eo ilo Erakor em̧ōj an dedeļo̧k im (jarlepju eo an) Erakor Branch ej kōjerbale.
M̧ōn jar eo ilo Fresh Wota kar jino kōjerbale n̄an kabun̄ jar ilo Pāpode 2020 eo im ewōr ruo jarlepju ej kōjerbale.
Jarlepju kein rej m̧ōttanļo̧k Port Vila Vanuatu Stake an Kabun̄ eo an Jisōs Kraist im Armej ro Rekwojarjar ilo Raan Ko Āliktata, eo eto an pād ium̧win Vanuatu jān 1973 eo. Kabun̄ in eaar ijjino ilo Vanuatu kōn jejjo wōt mijenede im jejjo baam̧le ko jān Samoa im Tonga.
Ewōr kiiō enan̄in 10,000 membōr ro an Kabun̄ in ilo Vanuatu, im 35 jarlepju ko. Rej m̧ōttanļo̧k 16 milien membōr ro an Kabun̄ in ilo aolepān laļ in.
Armej ro Rekwojarjar rej etal im jar aolep Jabōt ilo m̧ōn jar ko ilo aolepān laļ in. Jarlepju ko ilo ijoko rej jokwe ie kar karōk er n̄an m̧ōn jar ko ekkar n̄an jikin ko rej pād ie n̄an boktok ro rūtūrier im ro ilo jukjuk in pād eo im leļo̧k aer iien em̧m̧an n̄an jerbal im jipan̄ doon. N̄an kōmeļeļe kōn ta eo rej kōm̧m̧ane ilo iien jar, em̧m̧aan, kōrā, im jodikdik ro rej jutak im̧aan ilo lokatok eo; rej al al ko; kwaļo̧k ļōmņak im en̄jake ko aer, rejjab āliji, kōm̧m̧ani jar ko; bōk m̧ōttan kwojkwoj eo (āinļo̧k wōt communion); pād ilo kūlaaj in jeje ko rekwojarjar im bōk koņaaer ilo iien ekōnono ko; im kwaļo̧k bwebwenato in tōmak ko aer, ak “naan in kam̧ool ko.”
Rejjab kōļļā wōņeen rikwaļo̧k ro, rej ajeji eddo im jerbal ko an jarlepju eo me ej kwaļo̧k aorōk in jukjuk in pād eo im jem̧jerā ko. Bōk koņaer ej meļeļe bwe rej bōk koņaer ilo kwaļo̧k im rej ron̄jake katak ko, rej tōl al im rej al, rej leļo̧k kōkapilōklōk im rej bōk kapilōk.