“Iamwir me ren Mwichenapen Mwichefen,” Liahona, April 2020
Nongonongen Iamwir, April 2020
Iamwir me ren Mwichenapen Mwichefen
Ren ekkewe kapas meinisin mi amwasangasang, orenien famini, me asukun seni noun ewe Samon chon angang, mwichenapen mwichefen a ngeni kich chommong aanen ach sipwe iamwir—me mwan, fansoun, me mwirin mwichenapen mwichefen!
Non wiser ren pekin sensen klasin ammonetan misin, Susie me Tom Mullen ra soun pesei chon ar we klas ar repwe tingorei emon epwe katon mwichenapen mwichefen.
“Ach tingorei emon epwe fori och mettoch ina ew auchean kinikinin angangen misineri, me mi pwan fich ngeni iamwir,” neminewe a apasa. “Noum kewe chon sukun ra soun repot sefan ren ifa usun a murino ngenir me pwan ewe emon ra tingorei.”
Ikkei ekkoch ekkewe napanap nour kewe chon sukun ra repotuni ar anisi ekkoch:
-
“Aua iamwir ngeni emon chiechiem mi wor an osukosuk a riaffou ren. Aua tingorei epwe ausening ngeni mwichenapen mwichefen ren punuwan an osukosuk. Nupwen aua churi i mwirin mwichenap, a urenikem pwe a rong chommongen ekiek epwe anisi.”
-
“Aua efisi ew parin mwichenapen mwichefen me emon me emon mi uweiato och mwongo aupwe aea fengen. A fokkun apwapwa ina minne aua finata aupwe pwan fori sefan.”
-
“Ua tingorei emon chienei an epwe katon mwichenapen mwichefen rei. Nupwen aua kapas usun, aua finata pwe aupwe sano ngeni ewe imwen mwich ren am aupwe pi ika am mi tongeni katon ikewe. Aua katon, me a ew mettoch mi fokkun amwarar am mon ikewe!”
Usun ekkewe Mullens me nour kewe chon sukun ra kaeo, mi chommong aanen ach sipwe iamwir me ren mwichenapen mwichefen. Ina ew aan mi amwarar ach sipwe aea ngeni ekkoch kapas mi amwasangasang, orenien famini, aporous mi auchea, me ekkewe afanafan an noun ewe Samon chon angang!
Etiwa Ekkoch ngeni Imwom
“Ewe Chon Amanau a annuku ngeni Noun kewe chon tapweno mwirin pwe repwe ‘tong fengen; usun chok ngan ua tongei kemi’ (John 13:34). Iwe sia nenengeni ifa usun I a tongei kich. … Ika sia fori pwe I epwe ach chon appiru, sipwe achocho fansoun meinisin ne etiwa meinisin repwe pachenong .” —Preseten Dallin H. Oaks1
Ekkoch ier a no noum we amwararen chon asukunen famini itan Mike a apareni pwe ngang me nei kewe unumon semirit a wor chok ew noum kukkun kampiuter ne katon mwichenapen mwichefen won. A mwitir tingorei kem am aupwe feinno ngeni imwan we ne katon ren me punuwan we, Jackie, me a pesei pwe ir repwe sani am nonnom rer. Nei kewe semirit ra fokkun pwapwa ar repwe katon mwichenap won we wesen TV; ua fokkun kinisou ren ewe aninis; me aua sani am we fansoun fengen.
Mwirin ena, am katon mwichenapen mwichefen fengen a ew oreni. Pwan mwo nupwen aua pwisin angei ew noum TV, am mi chok pwapwa ne feinno ngeni imwen Mike me Jackie fiti am pinnu, noum puken mak, me mwongo fan iten mwichenapen mwichefen. Ausening ekkewe kapas an ekkewe soufos fengen a fori an epwe kon auchea. Aua winiti usun ew famini. Mike me Jackie ra winiti ekkoch me nein chiechiei kewe me aruwen semen me inen nei kewe semirit chinnap. Ar tong me chiechioch ra fen ew feioch amwarar ngeni ai famini. Ua men kinisou ren ar chengen ne suki imwer me netiper ngeni kem.
Suzanne Erd, California, USA
Nongonong sipwe Ekieki
“Apareni”
Ewe Chon Amanau a awora an fansoun non tong an epwe kuna met mi auchea ngeni ekkoch me mwirin a fori an epwe awesi ekkena mettoch mi auchea ngenir (nengeni Matthew 9:35–36; John 6:5; 19:26–27). Sia pwan tongeni fori ena usun.
“Mwitir etiwa”
Mwirin ach apareni met mi auchea ngeni ekkewe sia iamwir ngenir, foffor ina ewe mettoch sipwe fori mwirin. “Ausening ngeni kapasen ekkewe soufos”.
Sipwe “mwich fengen fan chommong” (Moronai 6:5) ach sipwe kaeo fengen, mar fengen, me kapas usun ekkewe mettochun ngun mi kon auchea ngeni ngunuch.
“Feito, ausening ngeni mwongungun emon soufos, me ausening ewe kapasen Kot”2 menin epwe ew me nein ekkewe tingor mi auchea sia tongeni ngeni ekkewe sia iamwir ngenir.
“Tong me chiechifengen”
Ren ach sipwe ennetin anisi me pesei ekkoch, sipwe fokkun fori ew chiechifengen ren umoumoch me “tong ennet” (nengeni Doctrine and Covenants 121:41).
Aporousa won ewe Internet
“Ekkewe neenien kunou won internet ir pisek mi chewno won fonufan ra tongeni pwisin aochueno watten mwicheichen emon me emon me famini. Me ua nuku pwe ewe fansoun a wareto ren kich ekkewe chon kunon Kraist ach sipwe aeaoch me aeafichi ekkei pisek ne pwarata usun Kot ewe Sam Esemuch, An kokkoten pwapwa fan iten Noun semirit, me Noun we, Jises Kraist, pwe I ewe Chon Amanauen ewe fonufan.” —Elter David A. Bednar3
Ewe internet a mut ngeni kich ach sipwe afanafana ewe kapas allim ngeni unusen fonufan. Ngang ua sani ena! Ua porous usun ekkoch mwokutukut ren mwichenapen mwichefen, nge akkaewin ua sotuni ne anisi ekkoch ne efisata ew aporous seni afanafanen mwichenapen mwichefen. Ach kuna an ekkoch kapaseis mi tongeni epwe anisi kich ne kuna mettoch me non ew minafon napanap me mi tongeni epwe ew emwenien ach pwisin aporousen ach kapaseis.
Ua fen kuna pwe nupwen kopwe aea kapaseis ne aporousa afanafanen mwichenapen mwichefen ngeni kewe famini ka iamwir ngenir, a anisuk om kopwe kuna ar pochokun me pwan ar osupwang. Ew me nein ekkewe kapaseis ua sani ai upwe eis, Met om mefi pwe a ew itenap seni ewe mwichenapen mwichefen a keran wes?
Napengeni ponuwan pwe a kan mut ngonuk om kopwe kuna met a fis non manauer me met mi auchea ngenir. A mut ngonuk om kopwe winiti emon mwan ika fefin chon iamwir mi murino pokiten ka kunaochur.
Camille Gillham, Colorado, USA
Nongonong sipwe Ekieki
“Afanafana ewe kapas allim”
Sia fen fori pwon mi pin pwe sipwe “chon pwarata usun Kot fansoun meinisin me non mettoch meinisin, me non neni meinisin” (Mosaia 18:9).
“Forata ew aporous fengen”
Porous seni Mwichenapen mwichefen mi tongeni emweni aporous mi amwarar me mi wewefengen. Me ekkei sokkun aporous mi tongeni apochokuna ami chiechifengen, mi tongeni anisi ami kapasen pwarata ar repwe marino, me wato remi pwapwa! (nengeni Doctrine and Covenants 50:22).
“Aea kapaseis”
“Kapaseis mi och repwe anisuk ne weweiti met ekkoch mi pwapwaiti, aureki, ika ani kapaseis. Ir mi tongeni anapano om asukun, etiwa ewe Ngun, me anisi aramas ne kaeo.”4
© 2020 seni Intellectual Reserve, Inc. Meinisin pung mi kawor. A för non USA. Kapungunon non fosun Merika: 6/19. Kapungunon chiakun: 6/19. Chiakun Ministering Principles, April 2020. Chuukese. 16986 901