Օրհնությունն այն ամենն էր, ինչ ես կարող էի տալ
Ջոնաթան Մաֆրա Սենա դե Սանտանա
Սանտա Կատարինա, Բրազիլիա
Ես ավարտեցի իրավաբանական քոլեջը այն ժամանակ, երբ լրանում էր իմ դստեր մեկ տարին: Ես և կինս անհամբեր սպասում էինք տոնելու իմ ավարտումը, մեր դստեր ծնունդը և նոր հնարավորությունները, որոնք բացվելու էին մեր առջև, բայց մեր բոլոր ծրագրերը խափանվեցին:
Դիպլոմը ստանալուց հետո ես գործազուրկ էի և դժվարանում էի աշխատանք գտնել: Շուտով սկսվեցին նյութական դժվարությունները: Անգամ դժվար կլիներ պարզ տոնակատարություն կազմակերպելը:
Կնոջս հետ երկար զրուցելուց հետո ընդունեցինք մեր իրավիճակը: Որպես հայր, ինձ համար դժվար էր գիտակցել, որ չէի կարողանալու նույնիսկ մի պարզ նվեր գնել իմ դստեր համար, կամ տեսնել, որ կինս հուսահատության մեջ է:
Ես չէի հասկանում, թե ինչ էր կատարվում: Ես աղոթեցի և խնդրեցի Երկնային Հորը օգնել ինձ հասկանալ, թե Նա ինչ էր ակնկալում ինձանից: Հանկարծ կարծես մի ձայն խոսեց իմ մտքում, և ես լսեցի հետևյալ խոսքերը. «Դու ունես ավելի արժեքավոր մի բան, քան որևէ նյութական սեփականություն այս երկրի վրա: Դու քահանայության կրող ես: Ի՞նչ ավելի լավ պարգև կարող ես տալ քո դստերը, քան քահանայության օրհնությունն է»:
Աչքերս լցվեցին արցունքով, երբ մտածեցի, թե քահանայությունը ինչ էր նշանակում ինձ համար: Իմ սիրտը լցվեց երախտագիտությամբ, երբ մտածեցի, որ քահանայությունը այն զորությունն է, որը կարող է միավորել իմ ընտանիքը ողջ հավերժության համար:
Իմ զգացմունքներով կիսվեցի կնոջս հետ: Ես ասացի, որ մեր դստերը օրհնություն տալը այն ամենն էր, ինչ ես կարող էի անել: Երկուսով որոշեցինք, որ դա երջանկություն ու խաղաղություն կբերի նրան և դա բավական էր:
Մեր դստեր ծննդյան օրը ընկերները, բարեկամներն ու հարևանները տորթ և զարդարանքներ բերեցին: Մենք երախտապարտ էինք, որ այդ հատուկ օրը տոնում էինք նրանց հետ, ում սիրում էինք: Այդ երեկո ես իմ ձեռքերը դրեցի դստերս գլխին և քահանայության օրհնություն տվեցի նրան: Ես օրհնեցի նրան այն ամենով, ինչ Տիրոջ Հոգին հուշեց ինձ:
Մենք դեռ անցնում ենք փոփոխությունների և դժվարությունների փուլի միջով՝ կապված գործազրկության և ֆինանսների հետ: Բայց նույնիսկ տխրության ու հիասթափության մեջ մեր Փրկիչ Հիսուս Քրիստոսի միջոցով մեզ խաղաղություն ու հանգստություն է գալիս։ Ես կասկած չունեմ, որ օրհնություն է լինել Հիսուս Քրիստոսի Վերջին Օրերի Սրբերի Եկեղեցու անդամը և ունենալ քահանայության զորություն: Դա այն ամենն էր, ինչ ես կարող էի տալ իմ դստեր ծննդյան օրը, և դա ավելի քան բավարար էր: