Nshindamenu ya Buambi, Ngondo Muisatu 2020

BUAMBI KUPITSHILA KU MUDIMU WA MU NTEMPELO

Patudi tuambuluisha bakuabu bua basanka ne mabenesha a ntempelo, tudi tuenza buambi.

Bimfuanyi mbia Getty Images; foto wa Ntempelo wa ku Tegucigalpa mu Honduras

Diya dia ku ntempelo didi dilomba tshisumi. Muimanyinyi Russell M. Nelson wakalongesha se “ntempelo udi ne mushinga wabungi bua lupandu ne dizanjikibua dietu ne bua mêku etu. …

“… Umua yonso wa ku tudi udi dijinga ne bukola bua nyuma bua kashidi ne kulongesha kudi kuikala anu mu nzubu wa Mukalenga.”¹

Kubuela kua mu ntempelo kudi kulomba kufila kua diba dietu, ne midimu yetu, ne bintu bietu anu mutudi mua kudilongolola mu nyuma. Tudi bikala tuenza buambi patudi bikala tumona bidi bikala bipangisha bana betu ba baluma ne ba bakanji bua kuya ku ntempelo ne kubambuluisha bua kupeta tshia kuenza.

Ntempelo Udi Dibenesha Didi Muntu Yonso mua Kusanka Nadi

Mishionyi mupingana, Meg, wakamuna mamu wa tshitenda musomba pa tshibasa nkayenda pambelu pavuaye muikala wenda mutangila ku bîbi bia ku Ntempelo wa ku Kona mu Hawaii. Meg wakumvua bua se uvua ne bua kuyukila ne nsonga mukanji ewu, kadi yeya kavua mumanya tshia kuamba menamena to. Nunku wakamukonka bua amumvuija mifundu ya nsalu ivua mu kapombo kenda. Tshiakatuadija muyuki wa kenza bua se nsonga mukaji wa tshitenda, Lani, alonda muyuki wenda.

Lani wakambila Meg bua lutatu luenda lua kualukila ne kushala mu Ekelezia, bidimba bimpa bivua bimuambuluisha, ne ditekemena dienda dia kutuangajibua kudi muanenda wa bakaji dimua dituku.

Meg wakabikila Lani bua alua kusomba nenda mu shambala wa tshikishilu wa ntempelo. Kabavua bikala bakubana bua kuya kula mu ntempelo nansha, kadi bavua bikala bakumbana bua kusabuka mushiku wa nzubu. Lani wakitaba ne bakaya bonso buabu kupitshila pa bibi binena bia tshibueledi. Muena mudimu wa ku ntempelo wakabaleja ku tshibasa foto wa Musungidi.

Bamana kusomba nunku, Lani wakanungana wamba, bushuwa mvua ne dijinga dia kulua ku ntempelo lelu, kadi mvua ne kudikanda.” Bumuvua Meg mulonda Nyuma, wakandamuna disambila dia munda dia Lani.

Ngenyi ya Kuambuluisha Nayi Badi kabayi ne Dianyishi

Nansha aba badi kabayi ne diangishi dia kubuela mu ntempelo badi ne bua kubeneshibua kudi ntempelo.

• Leja kumvua kueba pa mushindu udi Mukalenga mukubenesha kupitshila ku mudimu wa ntempelo.

• Bikila muntu bua aluaku mudituku dia bîbi biunzulula bia ntempelo anyi pa muaba wa babikila. Peta dongamu wa diunzulula dia bîbi ku temples.ChurchofJesusChrist.org.

• Tangila foto ne longa biabungi pa bidi bitangila ntempelo ku temples.ChurchofJesusChrist.org.

Pepejela Bakuabu bua Kuya ku Ntempelo

Nansha bua bidimba bidi bikala ne dianyishi dia kubuela mu ntempelo, kuya ku ntempelo kudi mua kuikala anu kukola. Bakuabu badi ne bua kuenza luendu lula. Bakuabu badi mua kuikala ne bana bakesa anyi bidimba bia dîku bishindama bidi dijinga ne bulami. Tudi mua kuenza mudimu pamua bua kupepeja mudimu wa ntempelo bua muntu yonso.

Leola Chandler wakumvua ditatshishibua pa kulama bayenda uvua muikala usama ne bana babu babidi. Nunku wakasua bua kuikala ne dîba mu Dibidi dionsu bua kubuelaye mu ntempelo wa pabuipi. Tshiakalua mushindu wa ditalala ne bukola mu matuku enda a moyo.

Dinga dituku wakumvua se bamua bamamu banunu ba mu tshikongu tshienda bavua ne dijinga dia kuya ku ntempelo kadi kabayi ne mushindu wa kufuta njila to. Leola wa kaleja dijinga dia kuya nabu. Bua bidimu 40 biakalonda, wakaya ku ntempelo mu mpukampuka nkayenda.²

Leola uvua mubeneshibua, ne wakabenesha bakuabu pakayaye nabu ku ntempelo.

Ngenyi bua Kuambuluisha Bakuabu bua Baya ku Ntempelo

Mushindu kayi uudi mua kusaka bakuabu bua bikala baya ku ntempelo ku misangu? Neupeta bua se ngenyi imua eyi idi ikuambuluisha.

• Ndayi pamue. Filaku anyi longololaku difuta dia njila bua muntu. Bidi mua kukolesha moyo wa muntu mukuabu bua kuya ku ntempelo.

• Ebeja bidimba bia dîku dieba anyi tshikongu tshieba bua bakuambuluisha bua kukumbaja mishinga ya bankambua beba, nangananga pawudi ne mena a dîku dieba abungi mikala pabuipi bua mishinga.

• Itaba bua kulama bana ba baledi badi baya ku ntempelo. Anyi dilongolola bua kuikala kutebelêla bana ba umua ne umua.

Padi Ntempelo Muikala Ntanta

Chandradas “Roshan” ne Sheron Antony ba ku Colombo, Sri Lanka, bakangata dipangadika bua kuikala batuanginjibua mu ntempelo. Balunda babu Ann ne Anton Kumarasamy bavua bikala ne disanka buabu. Kadi bavua bamanya se kuya kua ku Ntempelo wa Manila mu Philippines kakuvua kuteketa anyi kua kufuta makuta makesa to.

Roshan ne Sheron bakalama makuta abu ne kulamisha muaba mu ndeka ngondo umua kumpala kua luendu bua bapeta ndeka udibu mua kufuta. Ku ndekelu, dituku diakakumbana. Kadi, dîba didibo bapueka mu Malaysia, bakamona se bua kutungunuka luendu ku Philippines, bavua dijinga ne visa anyi dijinga dia kuangata ndeka mukuabu. Kabiakakumbana bua kupeta visa to, ne kabavua ne mushindu wa kusumba tike ku ndeka mukuabu nansha. Kadi bivua bibakolela bua kupingana ku nzubu kabayi bikala batuangajibua.

Bapangila tshia mua dienza, Roshan wakabikila Anton. Antona ni Ann bakapangila tshia kuenza bua kubambuluisha. Bobu bavua bikala bamua ba ku mêku mu Sri Lanka bavua bikala batuangajibua mu ntempelo, ne bavua bamanya dibenesha didi dikala mu. Kadi bavua bafila makuta avuabu balama bua kuambuluisha nawu tshidimba tshia dîku diabu, ne kabavua ne makuta abungi bua kuambuluisha Roshan ne Sheron bua basumba tike wa ndeka mupiamupia to.

Mu Sri Lanka bidi bikala mu tshibidilu bua muluma asumbila mukaji musela nshena wa mu nshingu wa ngolu bua apeta ndambu wa makuta padi bayenda ufua. Ann wakapangadika bua kupana nshena wenda wa mu nshingu bua bapeta mushindu wa kubasumbila tike mipiamipia. Dipa dienda dia moyo mujima edi diakambuluisha Roshan ne Sheron bua benza ditutakena dia ku ntempelo diabu mu Manila.

Ann wakamba se: “Ndi mumanya mushinga wa dituangajibua dia ku ntempelo.” “Mvua mumanya se Sheron ne Roshan bavua ne bua kuikala dikuatshishi mu ditamba. Tshivua musua bua bapangila mushindu ewu to.”³

Ngenyi ya kuambuluisha nayi Aba Badi Kabayi mua Kuya ku Ntempelo

Udi mua kuikala mubikidibua bua kuenza buambi kudi aba badi kabayi mua kuya ku ntempelo ku misangu anyi kabayi anu mua kuya to bua ntanta anyi bua makuta. Kadi udi anu mua kupeta mishindu ya kubambuluisha bua basanka ne mabenesha a ku ntempelo.

• Longesha anyi buela nabu mu kalasa ka didilongolola bua kuya ku ntempelo anyi ka muyuki wa dîku.

• Bapesha foto wa ntempelo bua bakudika mu nzubu muabu.

• Pawikala ukatu muya ku ntempelo, balondelaku ngumvuilu weba pa mamanya ne bujadiki bueba bua mishinga ya mu ntempelo.

• Bambuluisha bua balonga biabungi pa bipungidi bivuabu benza ne mushindu wa kubilama. Bala kabidi “Understanding Our Covenants with God: An Overview of Our Most Important Promises,” mu Ngondo wa Muanda Muteketa 2012 Liahona.

© 2020 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Ministering Principles, March 2020. Tshiluba. 16985 760

Bibadilu

1. Russell M. Nelson, “Becoming Exemplary Latter-day Saints,” Liahona, Ngondo wa Dikumi ne Umua 2018, 114.

2. Tangila LaRene Gaunt, “Finding Joy in Temple Service,” Ensign, Ngondo wa Dikumi 1994, 8.

3. Ann ne Anton bakapeta nshena wa mu nshingu wabu pakadi Diambuluisha Dinena dia ku Ntempelo dibapingajila makuta, diodi ditu difila diambuluisha kudi bidimba bidi kabiyi ne mushindu wa kufuta njila bua kuya ku ntempelo.

Amba Mamanya Eba a mu Buambi

Tutumina mamanya eba pawuvua muya mu busambi anyi pawikala uvua musambibua. Ndaku ku liahona.ChurchofJesusChrist.org ne kuma pa “Submit an Article or Feedback.”