2020
Erudua Ebusua Abakɔsɛm do dze Rosom
Kwakwar 2020

Erosom ho Fapem, Kwakwar 2020

Erudua Ebusua Abakɔsɛm do dze Rosom

Mfonyin
ministering

Joshua Dennis ne nsaano mfonyin; mfonyin a ɔda ekyir na mfonyin no fi Getty Images

Eroboa obi ma ɔayɛ hɔn ebusua abakɔsɛm yɛ tum kwan dɛ edze som. Ber a edua ebusua nsɛm na dza ɔfa ho do, ma binom nye hɔn ewuakɔr nya nkitahodzi no, okowie dɛ isiw akwan a ɔdeda hɔn akoma mu a nna nkyɛ wonnyim dɛ wɔwɔ no (hwɛ Malachi 4:5–6).

Sɛ ɔyɛ Asɔrba a wɔwoo no too mu anaa obi a ɔnntse Jesus Christ n’asɛmpa nsan-ananmu ho asɛm da mpo a, Nyankopɔn ne mba nyina kɔndɔ dɛ wobohu bea a wofi bae ho asɛm.

Ɔtaa dɛ ɔnnkyɛr dɛ ibegya nkenyan a otsim na mu dɔ, dɛ mbrɛ wɔakyerɛ no wɔ nsɛm a odzi do mu no.

Erohwehwɛ Ebusua wɔ Anamɔn 30,000

Ɔnnkyɛree a metsena wimuhɛn mu rokɔ fie no, nna metsena Steve nkyɛn, a ɔkãa nankasa n’asɛm n’afã bi kyerɛɛ me. Nna oewie nsɔwdo skuul, ɔakɛhɛɛn U.S. Nsordaafokuw mu dɛ nkitahodzi bɔfo a nna oedzi mfe 18, na annkyɛr na ɔhyɛɛ ase yɛɛ edwuma wɔ White House, a ɔdze nkitahodzi ho mboa ma America President no. Ofi mfe 18 kesi 26 no, ɔsoom U.S. Presidentfo beenu. Nna ne nsɛm no yɛ enyigye dodow!

Mesee dɛ, “Steve, ɔwɔ dɛ ekyerɛw nsɛm yinom to hɔ ma w’asefo! Ohia dɛ wonya nsɛm yinom fi ɔwoara wo hɔ dɛ mbrɛ ihunii no.” Ɔgyee too mu.

Afei Sunsum no kenyan me dɛ membisa no dza onyim no wɔ n’ewuakɔr ho. Nna Steve nyim pii wɔ ne maame n’afãmu, a nna mbrɛ mber bi n’ebusua sii nye Abraham Lincoln a ber a nna ɔreper U.S. ɔmanpanyin wɔ afe 1860 ambatow ho aporɔwbɔ wɔ nkurase no kedzidzii, ho asɛm ka ho.

Naaso nna n’egya afãmu dze, nna onyim kakraabi. Nokwar ara nna ɔpɛ dɛ ohu bi kã ho. Miyii mo foon na mubueii FamilySearch app no. “Steve, yebotum ehu w’ebusua seseiara!’’

Medze faa wimuhɛn no ne Wi-Fi no do. Medze mo foon no too pon kakraba no a ɔwɔ hɛn enyim no do ama hɛn beenu no entum ehu. Yɛhwehwɛɛ FamilyTree. Sima kakrabaa nna hɛn beenu no rohwɛ ne nanasumbanyin n’awar dasedzi krataa a ɔdze maa ne nanasumbasia.

Ɔkãa dɛ, “Hɔn nye no!’’ “Mekaa ɔbaa no ne dzin a odzi ekyir sesie!’’

Enyigye sunsum hyɛɛ hɛn beenu no do. Yɛyɛɛ n’ewuakɔr a onnyim hɔn papa no hɔn ho nsɛm sima 45 a nna odzi do no. Ɔsee me dɛ mombɔ no anohoba dɛ yɛbɔkɔ do abɔmu ahwehwɛ wɔ Colorado. Ber a nna wimuhɛn no risi daadze no yedzii hɛn tsenabea nye hɛn foon nkanee amba ho nsesã.

Nna hɛn nyi, a yɛwɔ 30,000 anamɔn wɔ wimu, na yekitsa abaɛfor efir a ne kɛse tse dɛ me nsamu rohwehwɛ ɔbarimba na ɔbaa a wɔwar hɔn mfe 100 a abasen kɔ na wɔayew ɔno nye n’ebusua. Awanwandze! Mbom yehun hɔn. Ebusua ebusua toatoaa do. Wɔkaa nsɛm. Wonyaa ndaase nkã maa abaɛfor mfir-dwuma na edwindze. Nna ɔyɛ anwanwadze.

Jonathan Petty, Colorado, USA

Ebusua Fofor etwa noho ehyia

Nna Maria ayɛ akɔtrɔbɔdwe bɔbor mfe 20. Abosoom kakra abasen kɔ no, ɔbɛseraa hɛn wɔ hɛn fie, yɛdze dɔnhwer ebien duaa census na abakɔsɛm do hwehwɛɛ n’ebusua. Odu mber bi no ɔdze nyinsuwa tsẽaa mu dɛ, “Medze dɔnhwer ebien ehu m’ebusua ho nsɛm beberee kyɛn dza minyim wɔ m’abrabɔ nyina mu!’’

Yedzii nkitaho wiei no, yɛdze FamilyTree do app Relatives Around Me (Ebusuafo a Wɔbɔ Moho Aporow) afã no kyerɛɛ no. Ɔbaa no dɛ nna menye mo kun beenu nyina yɛyɛ Maria n’ebusuafo a hɛn ntamu twe. Okyii nyinsuwa bio, a ɔsee dɛ nna ɔdwen dɛ ɔyɛ ankonam. Nna onnyim dɛ ɔwɔ ebusuafo wɔ apaamu hɔ da. Adapɛn kakra ekyir no Maria nye hɛn Bishop dzii ehyia. Sesei ɔreyɛ temple nkɔree ho ahoboa edwuma, na oehyia ebusuafo “afofor’’ pii wɔ hɛn ward hɔ.

Carol Riner Everett, North Carolina,USA

Erosom ho Nhyehyɛɛ

Emi na Ashley, akyerɛbaa bi a mosom no, na hɛn beenu no wɔ edzibanyɛ mbuukuu bi fi hɛn nananom hɔ. Nedze no fi ne nanasumbasia hɔ, na medze no fi buukuu bi a mara meyɛe mber a menyaa me Nanabasia Greenwood n’edzibanyɛ adakaba ber a owuii ekyir no.

Menye Ashley beenu no faa edziban bi fi hɛn edzibanyɛ mbuukuu no mu, na anafua bi a yɛapon edwuma no yɛbɔɔ mu dɛ yɛbɔsɔ hɛn nsaano ahwɛ. Ɔno faa mpepaenum edziban, ntsi no yedzii kan yɛe na yɛdze hyɛɛ fononoo no mu. Emi mefaa nkyekyewee—edziban bi a Greenwood ebusua aponto biara no yedzi. Ashley ne babasia boaa hɛn ma yɛsɔɔ edziban no hwɛe. Afei, osiandɛ nna Ashley mmpɛ dɛ ne mba no bedzi mpepaenum ne nyina ntsi, ɔkɛmaa nkyerɛbaa a ɔsom hɔn no bi.

Adze a nna mepɛ no dodow wɔ hɛn edzibanyɛ anafua ho nye dɛ ber a yɛreyɛ edziban na yɛrotõ adze no, yedzii hɛn daa daa som nsɛntsir ho nyina nkɔmbɔ—ɔno n’aperdzi na moso medze. Mbom yedzii hɛn nanabasianom na hɛn enãnom so ho nkɔmbɔ, a ɔyɛɛ awase ma hɛn beenu no.

Jenifer Greenwood, Utah, USA

Akwan horow Pɔkyee a Edze Bɔboa

Ebusua abakɔsɛm botum ebuei mbobow ama erosom akwan horow ber a nna ɔyɛ dɛ biribiara nnkɛyɛ yie. Adwenkyerɛ kakra a ibotum ayɛ ahwɛ nye yi.

  • Boa hɔn ma wɔn-upload ebusua abakɔsɛm etsiedze, tsitsir ara dza wɔnye mfonyin kɔ do.

  • Yɛ fan chart anaa ebusua abakɔsɛm nwoma bi a wobotum etsintsim a ibotum dze ama dɛ akyɛdze.

  • Kyerɛkyerɛ akwanhorow a hɔn nsa bɛka hɔnara hɔn abakɔsɛm a worudua wɔrekyerɛw journal wɔ kwan a hɔn enyi bɛgye ho do do. Etsiedze journal? Mfonyin journal? Video log horow? Nsakyeree pii wɔ hɔ ma hɔn a wɔmmpɛ nhyehyɛɛ a wɔakyerɛw ato hɔ ama journal ne nkyerɛw no.

  • Hom mbɔmu nkɔ temple nkɛyɛ ayɛdze horow mma ewuakɔr. Anaa gye pen yɛ ayɛdze horow ma hɔn ebusua edzin sɛ dza wɔwɔ no bor hɔn do a.

  • Hom mbɔmu nyɛ ebusua ntɔyɛe horow.

  • Wɔmbɔmu nkɔ ebusua abakɔsɛm adzesũa.

© 2020 Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19 Nkyerɛasee ngye ntomu: 6/19 Ministering Principles, February 2020. ne nkyerɛasee. Fante. 16995 502