Nshindamenu ya Buambi, Ngondo wa Kumpala 2020

Kusangisha Isalela kupitshila ku Mudimu wa Buambi

Buambi budi buikala ndondelu wa mubelu wa muprofeta bua kusangisha Isalela.

Muimanyinyi Russell M. Nelson uvua mutuenza dibikila bua tuambuluisha mu kusangisha kua Isalela—“tshintu tshia mushinga mukola pa buloba lelu.”¹

Bua badi basua kuikala mu mudimu ewu wa kusangisha Isalela, kuenza kua buambi tshidi mushindu mulenga. Tshidi tshikala mushindu wa meji muimpa bua kushintulula mioyo ya bantu. Nansha tuetu tuenza buambi kudi bidimba bitekeshibua anyi tubibikila bua bituambuluisha mu kusadila kua aba badi kabayi ne ditabuja dimua netu, buambi budi anu bufila mishindu ya kusangisha Isalela.

Kulama kua Bidimba bidi Bialukila

Kuikala ne dinanga bu dikankamika, bishima ne bilue, ne netupeta mishindu ya kutuala bana betu bakaji ne baluma ‘bajimine’ mu muanda ewu munena wa lumu luimpe lua Yesu Kilisto.” —Jean B. Bingham²

“Mvua muikala mutekeshibua bua bidimu bitua ku bisambombo patuvua mema ne bayanyi bamuangala bua kuya ku tshimenga tshipiatshipia. Muimanyinyi wanyi mupiamupia wa Kasumbu Kambuluishi wakansamba, kujingaye bua kutuma mamu bua kuikala kunsamba. Ni kuelakana, Ngakitaba. Mamu ewu wakansamba ngondo yonsu, nansha muvuaye ne dibenga kupetangana dienda ne mbua—mvua ne mbua wa dinanga diabungi! Busambi buenda buakatungunuka mu bidimu bibidi, ne buakafila dishintuluka dinena kundi.

“Nansha muvua busambi buenda buikala bua nsombelu wa bantu mu tshibidilu, ku misangu uvua ungela nkonku ivua itulombola ku miyuki ya nyuma. Ebi bivua binsombesha kaseka, kadi biakansaka bua kuangata dipangadika dia kutungunuka mu lumu luimpe anyi dia kushala mungakadi. Dipangadika edi divua bu mvita kundi, kadi ngakasungula bua kumonangana ne ba mishionyi ba bakaji.

“Mu dituku dingakaya bua kubuela mu tshisangilu tshia bia didia bia tshijila musangu wa kumpala panyima pa bidimu bisambombo, ngakadi ne ditshina bua kubuela. Mumvua ngenda nsemena ku ekelezia, mamu muambi wanyi uvua mungindila, ne wakabuela nanyi mu nzubu wa disambila. Pashisha, wakanshindikija ku mashinyi anyi, ne kunkonka bua tshivuaye ne bua kungambuluisha natshi bua nsemena pabuipi ne Musungidi.

Diba ne dinanga dia mamu muambi wanyi biakangambuluisha bua kupingana ku tshisumbu, ne ndi ntua mushinga didienzeja dienda didi dikala bu mapa manena antu tshiyi muanji kupeta. Ndi ne kusakidila kuabungi bua muvuaye muikala ku luseka luanyi ungambuluisha bua dipingana dianyi ku Ekelezia wa Musungidi.”

Dina disokoka, Colombie-Britannique, Canada

Nshindamenu ya Kutua Mushinga

“Wakankumbula ngondo yonsu”

Mushindu kayi uudi mua kuleja se udi usumpakana bua aba bawudi usamba bipita mâlu makuabu? (tangila Malongeshi ne Bipungidi 121:44).

“Nkonku”

Kuebeja kua nkonku mijalama kudi mua kuambuluisha bua kusaka dikontonona dia nkaya. Vulukayi bua se buambi buetu budi ne kipatshila kadi kapita nsombelu muimpa wa bantu.³

“Uvua mungindila”

Muntu yonsu udi ne bua kudiumvua muakidibua (tangila 3 Nefi 18:32).

“Ku luseka luanyi ungambuluisha bua dipingana dianyi”

Dikuatshisha dietu didi mua kufila dishintuluka dia mushinga kudi aba bavua batatshishibua bua kupingana kudi Musungidi ne kondopibua (tangila Ebelu 12:12–13).

Buambi ne Didisangisha

“Mu mishindu yonsu idi mikala ya tshibidilu ne mikumbana bueba, londela bantu bua tshinyi Yesu Kilisto ne Ekelezia Wenda bidi ne mushinga kuudi. …

“… Weba mudimu ngua kuamba tshidi mu muoyo weba ne kuikala ne nsombelu mufuanangana ne biudi muitaba.” —Mukulu Dieter F. Uchtdorf⁴

Buambi ne kutangalaja kua lumu luimpe bidi bikala biendela pamua. Eyi idi mishindu mikesa itudi mua kusangisha nayi balunda ne bena mutumba betu patudi tukumbula—anyi tukumbula nayi patudi tusangisha balunda ne bena mutumba betu:

Enzayi mudimu pamua. Kebayi mishindu ya kubikila nayi balunda anyi bena mutumba bua basemena kunudi mu buambi bua kuandamuna ku majinga a muntu. Balombayi bua banuambuluisha bua kulamba tshiadidia tshia mamu mupiamupia, kusamba muena mutumba mukulakaja, anyi kukomba mu nzubu wa muntu usama.
Longeshayi pamua. Pangadikayi bua kulomba mulunda anyi muena mutumba utu kayi utamba kuya mu ekelezia mu kulongolola dilongesha dia ba mishionyi mu nzubu yabu bua muntu udi umonangana ne ba mishionyi. Anyi mulunda wenu udi mua kunukuatshisha bua kulongolola dilongesha mu nzubu muenu anyi unufila ku dilongesha ku nzubu wa muntu mukuabu.
Tantshilayi bakuabu padiku dijinga. Filayi bulongolodi bua kufuta njila bua kuya mu ekelezia. Bikilayi bana ku bibilu bia bansonga anyi bia Bitenda. Mishindu kayi mikuabu inudi mua kuenza buambi ne kubikila bantu?
Enzayi mudimu ni mishindu idi Ekelezia mufila. Ekelezia udi ufila mishindu yabungi kudi bidimba bua kubiambuluisha mu kutangalaja kua lumu luimpe. Nudi mua kukeba kupitshila ku “Mishionyi” kanungu kadi mu application wa Tshisangi Tshia Mikanda ya Lumu Luimpe ne tangila ComeUntoChrist.org bua kupeta ngenyi ya kusangisha nayi Isalela mu nsangilu yetu.

© 2020 by Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Ministering Principles, January 2020. Tshiluba. 16984 760