Nongonongen Iamwir, January 2020
Ionfengeni Israel ren Iamwir
Iamwir ina ew tufich ach sipwe tapweno mwirin an ewe soufos aurour ne ionfengeni Israel.
Preseten Russell M. Nelson a tingorei kich ach sipwe aninis ne ionfengeni Israel—“ewe mettoch mi kon auchea a fis won fonufan ikenai.”1
Ren ekkewe ir mi mochen repwe choni ei angangen ionfengeni Israel, iamwir mi tongeni epwe ew tufich mi amwarar. Ina ew aan mi murino ach sipwe siwini manauen aramas. Ika sia iamwir ngeni chon ewe mwichefen mi ekis patapateno ika tingorer ar repwe anisi kich nupwen sia angang ngeni ekkewe esap ir chon ach we namanam, iamwir a awora tufich ne ionfengeni Israel.
Angasa Chon ewe Mwichefen mi Niwinsefan
“Ren tong epwe pekin pesepes, manaman epwe fis, me sipwe kuna aanen ach sipwe wato pwich me mwongeach kewe mi ‘poutuno’ ngeni ewe achufengenin ewe kapas allimen Jises Kraist.” —Jean B. Bingham2
“Ua fen patapateno ren arap ngeni ukukun wonu ier nupwen punuwei we mi ngang aua mwokut ngeni ew minafon sopw. Nei we presetenin Fin Anisi a churiei, a eis ika mi tongeni epwe tinato emon sister an epwe churiei. Ren ekis nuokus, Ua tipeew ngeni. Ei sister a churiei iteiten maram, ina mwo ika inisin ese och ngeni konak—me a wor nei konak a men tongei aramas! An iamwir a soposopono ren ru ier, me a watte ochun ngeniei.
“Ina mwo ika an soun churiei non pekin kukunou, fan ekkoch a eisiniei kapaseis mi emweni kem ngeni am porousen mettochun ngun. Ekkei ra ekis fori ai usap kinamwe, nge ir mi peseiei ai upwe finata ika upwe nikitu non ewe kapas allim ika nomwetiw non nonnomi we. Ei pekin finata a weires ngeniei, nge ua finata ai upwe churi ekkewe misineri sister.
“Non ewe ran ua no upwe fiti ewe mwichen sacrament ren ewe aewin fansoun non wonu ier, ua nuokus ai upwe tonong. Nupwen ua fetanong non ewe imwen fan, nei we fefin chon iamwir a witiei, me a fitiei ne fetannong non ewe imwen fan. Mwirinon, a fitiei no ne fatan ngeni wai we taraku, a eisiniei met mi tongeni epwe anisiochu ngeniei nupwen ua arap ngeni ewe Chon Amanau.
“An nei ewe fefin chon iamwir fansoun me tong a anisi ne emweniei ngeni ai upwe pochokun sefan, me ua aucheani an achocho pwe ew me nein ekkewe niffang mi nap a kawor ngeniei. Ua men kinisou pwe mi nom ikewe unukui won ai sai sefan ngeni an ewe Chon Amanau Mwichefen.”
Itan ese affat, British Columbia, Canada
Nongonong sipwe Ekieki
“Churiei iteiten maram”
Ifa usun en mi tongeni pwari pwe en mi ekieki usun ekkewe en mi iamwir ngenir nap seni ekkoch mettoch? (nengeni Doctrine and Covenants 121:44).
“Kapaseis”
Ach eis ekkewe kapaseis mi pung mi tongeni anisi ne awora ach pwisin ekieki usun nonnomun inisich. Chechemeni pwe ach iamwir mi wor popun mi nap seni ach chok kukunou ngenir.3
“Witiei”
Meinisin repwe mefi pwe ir mi ketiw (nengeni 3 Nifai 18:32).
“Ikewe unukui won ai sai sefan”
Ach aninis a tongeni watte sokofesenin ngeni ekkewe ra fen turuno ar repwe niwin ngeni ewe Chon Amanau me chikarsefan (nengeni Hebrew 12:12–13).
Iamwir me Ionfengeni
“Ren menni chok sokun a weweech ngonuk, apworousa ngeni aramas pwata Jises Kraist me an ewe Mwichefel ra euchea ngonuk. …
“… Wisomw kopwe afanafala met mei nomw non netipom me manauoch usun omw nuku.” —Elder Dieter F. Uchtdorf4
Iamwir me afanafana ewe kapas allim ir mi wewefengen. Ikkei ekkoch aanen ach sipwe tongeni ionfengeni chiechiach me chon oruch nupwen sia iamwir—ika iamwir nupwen sia ionfengeni chiechiach me chon oruch.
-
Angang fengen. Kutta ekkoch tufichin om kopwe tingorei chiechiom ika chon orum ar repwe fituk ne iamwir ngeni an emon osupwang. Eisinir ar repwe anisuk ne amwonata och mwongo fan iten emon emon minafon iin, churi emon chon orum chinnap, ika nimeti imwen emon mi semwen.
-
Aiti fengeni. Ekieki om kopwe tingorei emon chiechiom ika chon orum ewe ese kon fifiti fan an epwe efisi ew nesenin misineri non imwer we fan iten emon mi churi ekkewe misineri. Ika chiechiom we mi tongeni anisuk ne efisi ew nesen non imwom we ika fituk ngeni ew nesen non imwen pwan emon.
-
Anisi ekkoch nupwen ka kuna och osupwang. Finata om kopwe etetteni pekin sai ngeni ewe imwen fan. Etiwa semirit ngeni mwokutukutun urumot an serafo me Kinter. Met ekkoch pwan aan om kopwe iamwir me ionfengeni?
-
Aea ekkewe pisek ewe Mwichefen a fen awora. Ewe Mwichefen a awora chommong pisek fan iten chon ewe Mwichefen an epwe anisir ne afanafana ewe kapas allim. En mi tongeni katon non ewe kinikin “Missionary” non ewe Gospel Library app me churi ComeUntoChrist.org fan iten ekkoch ekiek ren ifa usun om kopwe ionfengeni Israel non neniach kewe.
© 2020 by Intellectual Reserve, Inc. All rights reserved. A för non USA. Kapungunon non fosun Merika: 6/19. Kapungunon chiakun: 6/19. Chiakun Ministering Principles, January 2020. Chuukese. 16984 901