Juon Leta jān juon Būratōr Eļap an Iakwe
Rijeje eo ej jokwe ilo Utah, USA.
Ļeo jeiū eaar jab pād ippa ilo raan in keemem eo kein 16 aō kōnke eaar jerbale juon mijen. Kōn menin naan in rejan̄ eo eaar jilkintok n̄an n̄a āinwōt juon menin letok inaaj indeeo kaorōke.
Jōn̄ouljiljino! Juon tōre in mour! “Ejjeļo̧k juon aikuj in kar kōm̧m̧an menin makeļo̧k,” iaar ļōmņak.
Ro jinō im jema relo̧ļe raar jouj im iien otemjej letok n̄an eō kapilōk em̧m̧an. Lio jeiū ej kab m̧ōj an kar m̧are im eaar em̧m̧akūt jān state eo. Ļeo jatū edik eaar itok limo wōt ilo men ko an juon 11 iiō. Eaar lōn̄ ro m̧ōtta, im iaar jeļā ritōl ro aō ilo Kabun̄ raar m̧ool in kea kōn n̄a.
Bōtaab ļeo jeiū erūtto, Gary, eaar eo iaar lōke. Iaar reilo̧k n̄an e ilo aolep men ko āinwōt juon jodikdik. “Jabdewōt iien ij kōnono n̄an e, men ko raar alikkarļo̧k,” iaar jiron̄ eō make. “Iakwe n̄e en kar pād ijin kiiō.”
Bōtaab eaar jab. Eaar ettoļo̧k im pād Japan, jerbale juon mijen.
Jekdo̧o̧n būrom̧ōj kōn Gary, iaar m̧ōņōņō ilo keemem eo. Jinō eaar kōm̧m̧ane kōm̧abun̄ in keemem eo iminene kake n̄an n̄a, im iaar bōk jet menin letok ko m̧okta jān etal n̄an jikuuļ. Bon̄ōn eo, baam̧le eo aō im n̄a kar ilo̧k n̄an kōjota pizza im kar kōjjem̧ļo̧k kōn cake. Jon̄an iaar kalimoik eō make kōn ļōmņak im date, kattōr im men ko rekalimomo jet imaron̄ kōm̧m̧ani āinwōt juon 16 iiō dettan.
Ijo wōt ke, menin letok eo em̧m̧an tata iaar bōke raan jab eo eaar leta eo ilo meeļ. Gary eaar jab meļo̧kļo̧k raan eo elukkuun aorōk aō! Menin eaar m̧okta jān an kar wōr email, kōn menin letal eaar bōk juon iien eo eaitok n̄an an kar itok jān Japan n̄an Cache Valley, Utah, USA. Iaar bwilōn̄ bwe leta eo an eaar jikrōktok ilo raan in keemem eo aō! Leta eo eaar jeje kōn pā, eo eaar kōm̧m̧an bwe en āinwōt ļeo jeiū eaar pād ippa ke iaar riiti.
“Iakwe Merilee:
“Ekwe, kwoj pojak in kōm̧m̧ane keemem eo am̧, kwe ke? Ij kōtmene n̄e kwoj bōk let in enaaj m̧ōj an mootļo̧k kadede. Ijjab tōmak—kwoj 16 iiō rūttoam̧. Ej āinwōt jejjo wōt iiō ko remootļo̧k ke kwar kijon̄ [kōņak at in kabuwā eo edik ebūrōrō].
“Pād wōt ilo am̧ jouj im erreo, im iien otemjej kōm̧m̧an bwe aolep rej jeļā bwe Kabun̄ ekanooj ļap meļeļe in n̄an kwe. Eļan̄n̄e kwoj kōm̧m̧ane, koban n̄an jidik pād ilo juon jekjek me kwoj aikuj kōm̧m̧ane juon jokāālet kōn aolep kareel an ro m̧ōttam̧. Waanjon̄ak: Ilo high school, aolep raar jeļā bwe iaar jab kōņaan kadōk ak kōbaatat, jekdo̧o̧ņ ta, kōn menin ikar jab n̄an jidik ruwainene n̄an juon badrei jo me kein men raar kōm̧m̧an. Ro m̧ōtta raar jeļā ijjab kōm̧m̧an rōt in. …
“Eļan̄n̄e kwoj kōm̧m̧an bwe armej ro ren jeļā kōn jon̄ak ko am̧, innām armej ro kōn kain jon̄ak rōt ko am̧ rej kōņaan iwōj ippam̧. Ejjab meļeļe in aō ba kwōn jiron̄ aolep, bōtaab jerbal renaaj kwaļo̧k tōmak ko am̧. Jetōb eo am̧ ej lukkuun em̧m̧an, im kwojetjet n̄an āt eo etam̧. Im kwe kwojeļā kōm̧m̧an kōjak. M̧ōņōņō ilo am̧ ‘tōpar 16 am̧ iiō’ in Keemem!” Jentōj eo āliktata eaar ļaini ium̧win kōn būrōrō. Ejjab bar juon menin leļo̧k an raan in ļotak emaron̄ kar em̧m̧anļo̧k! Iaar riiti im bar riiti, m̧ae iien eo eaar ro̧o̧ltok n̄an m̧weo jān Japan im kōm maron̄ kar āliktata ekōnono jelm̧ae doon.
Elōn̄ iiō ko remootļo̧k jān ke iaar bōk leta eo, bōtaab ej pād wōt ippa. Elōn̄ men ko em̧ōj aer oktak jān tōre eo, bōtaab ejjab iakwe eo aō n̄an ļeo jeiū. Rainin, ij rejtake ejjab wōt kōn an jeiū im m̧ōtta, ak āinwōt Elder Gary E. Stevenson jān Doulul eo an Jon̄oulruo Rijilōk ro. Kapilōk eo ej letok āinwōt juon rikam̧ool ejeno̧lok an kōn Kraist n̄an aolepān laļ in ej juon dam̧oļo̧k in kajoor ilo mour eo aō, ejja āinwōt leta eo ekar jilkintok ilo raan in keemem eo kein 16 aō.