Mara Bainieer eo
Rijeje eo ej jokwe ilo Texas, USA.
Oktoba 2018, Phnom Penh, Cambodia
Mara eaar batini lukko eo an im kalimjōk kūlaaj eo. Āinwōt ekōjak n̄an ekkōņak nuknuk in jar ilo Jādede, bōtaab menin eaar juon Jādede eo ejeno̧lok. Eaar iien kweilo̧k eo eļap!
“Kwoj ke em̧ōņōņō kōn m̧wein̄an eo an kōrā ro?” Mak (Jinen) eaar kajjitōk. Eaar m̧ōkaj, kōkōm̧anm̧ōn an kuum̧ koļan bōran Mara. “Ikōņaan bwe kwon kajjion̄ ron̄jake jon̄an wōt eo komaron̄.”
“Aaet! Ij kōjatdikdik rej kōnono kōn bwebwenato ko an bainieer ro!” Em̧m̧an tata ippān Mara bwebwenato ko.
“Bōlen renaaj,” Mak eaar ba. “Kwojeļā ke jemam̧ ej juon bainieer?”
Mara eaar tarpok. Jemen eaar jab bwilbwil diaka (handcart).
“Ekōjkan an juon bainieer?” liin eaar kajjitōk.
Mak eaar em̧ajidjid n̄an wintōn eo, ļo̧k n̄an reba eo. “Eaar eon̄ad ijo ke eaar ioon mijenede ro. Eaar eo eo kein kajuon ilo baam̧le eo an n̄an kar peptaij,” Mak eaar ba. “Ekōm̧m̧an bwe en juon bainieer! Kiiō jen etal im kappukōt jibūm̧.”
Yiay (Būbū) eaar kōttar er ilo ruum̧ eo im̧aan. Baam̧le eo an Mara im ro jibūn im jim̧aan aolep raar mour ippān doon. Yiay eaar jipan̄ lale Mara ālkin jikuuļ ke ro jinen im jemen raar jerbal. Kiiō Yiay eaar jutak turin moped eo, jikuutōr kileplep eo me eaar bōkto bōktak er ipeļaakin jikin kweilo̧k eo.
“Kabun̄ in eaar pād ilo Cambodia ium̧win wōt 25 iiō ko,” Mak eaar jiron̄ Mara ke eaar kōpeļļo̧k kōjām eo im bwili moped eo n̄an lowaan iaļ eo. “Kōn menin jej aolep bainieer ro. Jekdo̧o̧n kwe!”
“Ekōjkan aō juon bainieer?” Mara eaar ļōmņak ke eaar iuweļo̧k ioon moped eo. Mar eaar kattōre moped eo, ippān Yiay ilo itulik im Mara ilo ioļapļap. Mara eaar lukkuun kōdāpdep ke raar ettōrļo̧k ilo iaļ eo eim̧aajaj.
Ke raar eļļāļo̧k jān juon m̧ōn idaak meņeņ (café), nemān tii itok ioer. Enan̄in aolep ijin raar idaak tii. Bōtaab Mara eaar jab, Liin eaar ļoor Naan in Māletlet. Mara eaar ettōn̄. Ej juon wāween liin eaar juon painieer!
Ke moped eo eaar bōōl ilo juon kona, Mara eaar lo juon wat, juon tampeļ an Buddha. Bōro̧o̧j eo ekkan̄ ebūrōrō eaar wallōn̄ļo̧k ioon m̧ōko jet. Monk ro kōn bōraer em̧ōj aer rejaiki im libooror ko roran kar jijet ekkatak ilo meļan eo.
Mara eaar jeļā bwe elōn̄ wōt armej ro ilo Cambodia raar Buddhist. Rejjab tōmak ilo Jisōs Kraist. Bōtaab Mara eaar. “Ej bar juon wāween ij juon bainieer,” Mara eaar ļōmņak. Im rainin liin ej maron̄ ron̄jake rikanaan eo!
Ke moped eo eaar jeerļo̧k n̄an jikin baak eo ilo m̧ōn jar eo, Mara eaar lo elōn̄ kōrā ro rej itaakļo̧k. Jet raar etetal laļļo̧k ak kar iuwen ilo moped ko. Jet raar itaklo̧k ilo tuk, tuks waan ektak ko reddik bwili jān juon wōtbai. Elōn̄ iaan kōrā ro raar ekkōņan nuknuk ko ak lūkko ko, āinwōt kar Mara. Im jet raar ekkōņak sampot ko, lūkko aitoktok aiboojoj ko kar kōm̧m̧an jān eed ko rekōļarļar.
Mara, Mak, im Yiay raar jijet ilo jikin jar eo ippān kōrā ro jet. Kweilo̧k eo ilo m̧ool eaar kōm̧m̧an juon wiik emootļo̧k ilo Salt Lake City, Utah, USA. Bōtaab kiiō armej eo ro ilo Cambodia raar maron̄ alooje kaidwōjļo̧k eo imejatoto ilo kajin Khmer. Mara eaar kōnono jim̧or kajin English im Khmar ilo m̧weo, im liin eaar barāinwōt ekkatak kajin French ilo jikuuļ. Bōtaab elōn̄ armej in Cambodia ro rej kōnono wōt kajin Khmar.
Rikōnono eo kein kajuon eaar jab ba jabdewōt bwebwenato ko kōn bainieer ro. Bōtaab innām rikōnono kein karuo eaar kwaļo̧k juon bwebwenato kōn etetal lōn̄ļo̧k ilo iaļ eo eju im bwidejde ilo iaļ eo an n̄an m̧weo jān jikuuļ. Kar n̄an etan “iaļ an ļaddik ro,” im jet iien liin ekōn wūtūk juuj ko an im etetal jintōb. Eaar kōņaan kōm̧m̧ane men ko reppen bwe en maron̄ āinwōt juon bainieer! Mara eaar ettōn̄ ke eaar ļōmņak kōn aolep wāween ko liin eaar juon bainieer.
Rikōnono eo āliktata eaar rikanaan eo. Eaar jutak kankan. Mara eaar kanooj in ron̄jake. “Ij kajjitōk ippāmi n̄an riiti Bok in Mormon eo ikōtaan kiiō im jem̧ļo̧k in iiō in,” eaar ba. “Lan̄ ko renaaj peļļo̧k n̄an kom̧. Irooj enaaj kōjeraam̧m̧an kom̧.”
Mara eaar jeļā eban kar pidodo n̄an riiti aolepān Bok in Mormon. Liin eaar lale kōrā ro jet ipeļaakin. Aoleper kar kāālet n̄an ļoor Jisōs Kraist. Aoleper kar itok joten in n̄an ron̄jake rikanaan eo. Liin enaaj kar ļoor rikanaan eo, ejja āinwōt kar er. Liin enaaj erom juon bainieer!