Jen Jar Iturin Tampeļ
Juan Beltrame
Buenos Aires, Argentina
Kōmeļeļe jān Allen Garns
Ke ļaddik eo nejim Marco eaar jilu iiō dettan, e im n̄a kar en̄taan jān baijin in m̧ōn̄ā. Marco eaar lukkuun in nan̄inmej jon̄an eaar okjak n̄akļo̧kjeņ. Lio pāleō, Marianela, im n̄a kar ekairirļo̧k kake n̄an aujpitōļ. Ilo iien eo ke kōmij itaakļo̧k, eaar āinwōt n̄e emej. Āliktata, ālkin emen awa ko, eaar bar jino an ruj.
Innām jān iien eo m̧aantak, Marco eaar en̄taan kōn an dibūbūb im eaar endeo ium̧win ļalem iiō. Ke kōm kar bōkļo̧k n̄an jikin an kiki kajjojo jota, kōm kar ļōmņak eļan̄n̄e ilo lukōn bōn̄, kōm naaj kar bar aikuj in ekairirļo̧k kake n̄an aujpitōļ. Eaar pen am kiki ilo iiō ko rekakūm̧kūm̧, im kōm kar pedped ioon jar, tōmak, jitlo̧k, im kōjeraam̧m̧an ko an priesthood.
Ke Marco eaar enan̄in jiljino, Marianela eaar ko̧o̧ļe tok eō ilo jikin jerbal im jiron̄ eō n̄an ekairirļo̧k n̄an aujpitōļ. Marco ekar ioon juon dibūbūb eo eļap im eaar pād ilo kom̧a. Ke liin eaar ko̧o̧ļ, iaar jerbal n̄an bar kōkāāl Im̧ōn Kaminene eo an Mijenede ilo Argentina, eo ekar pād turin wōt Buenos Aires Argentina Tampeļ.
M̧okta jān aō kar ilo̧k n̄an aujpitōļ, juon m̧ōtta im rijerbal eaar ba, “Kōnke jekanooj epaakeļo̧k m̧weo im̧ōn Irooj, etke jejjab jar ippān doon m̧okta?” Tampeļ eo eaar kilōk kōn jerbal in bar kōkāāl im kōdepakpakļo̧k eo, bōtaab kōm kar kepaakļo̧k m̧weo im̧ōn Irooj, ijo iaar jar kōn Marco.
Kōjekdo̧o̧n men otemjej kōm kar dibuki ippān Marco, iaar en̄jake kam̧m̧oolol n̄an Anij kōn iien eo Marianela im n̄a kōm kar maron̄ pād ippān. Ke iaar jar, iaar jiron̄ Jemedwōj Ilan̄ bwe kōm kar kajjion̄ n̄an erom ro jinen im jemen ro rem̧m̧an im kar kōjparok Marco jon̄an eo em̧m̧an tata kōm kar maron̄. Iaar jiron̄ E bwe kōm naaj bōk Ankilan eļan̄n̄e Enaaj kur e n̄an im̧weo im̧ōn.
Ke iaar tōkākļo̧k ilo aujpitōļ eo, iaar jab jeļā eļan̄n̄e Marco ekar mour jān kom̧a eo ak, eļan̄n̄e enaaj mour jāne, emaron̄ naaj bar etetal ak bar kōnono. Ālkin awa ko relukkuun eppen, eaar ruj. Eaar kanooj in m̧ōk, bōtaab eaar em̧m̧an an mour. Innām jān iien eo m̧aantak, kōn kabwilōn̄lōn̄, eaar ājmourļo̧k. Āliktata, Marco eaar jidik kōn jidik dikļo̧k aer leļo̧k an uno, im kar lukkuun diwōj jān aujpitōļ.
Marianela im n̄a komro kar reilikļo̧k n̄an iien eo eaar kanooj pen ak kam̧m̧oolol bwe epād Marco ippam̧ im kam̧m̧oolol kōn men ko kōm kar ekkatak jāne. Māllijon̄ eo am eaar kakobaik kōm im kōm̧m̧an bwe kōmin kajoorļo̧k ilo jetōb. N̄e ekar jab, kōm maron̄ kar jab ekkatak n̄an kile wāween ko rellōn̄ Irooj ej kwaļo̧k Pein ilo mour ko am.
Āinwōt an Marianela ba, “Kōm kar lo juon kein kam̧ool ekilep im en̄jake ko me kar litok n̄an kōm juon naan in kam̧ool kōn an Anij pād, bwe E ej ippām im bwe Ej ron̄jake kōm. Eļan̄n̄e jej niknik im wōr kijenmej, kōjeraam̧m̧an ko remaron̄ itok n̄e jejjab kanooj kōtmeni.”