យុវមជ្ឈិមវ័យ
ដំណឹងល្អ៖ យោបល់ដ៏មានប្រយោជន៍អស់កល្ប
ឡូរី ហ្វូលើរ គឺជាអ្នកកែសម្រួលអត្ថបទទស្សនាវដ្តី Friend ។ គាត់ចូលចិត្តស្វែងរកក្រុមចម្រៀងថ្មីៗ ស្តាប់ព័ត៌មានតាមវិទ្យុ និងចម្អិនម្ហូបមកពីជុំវិញពិភពលោក ។ ជួនកាលគាត់សរសេរអត្ថបទបន្តិចបន្តួច ។
តើអ្នកធ្លាប់គិតអំពីរបៀបដែលការគោរពបទបញ្ញត្តិធ្វើឲ្យជីវិតមានភាពកាន់តែងាយស្រួលដែរឬទេ ?
កាលពីខែមុន មិត្តភក្តិមួយចំនួន និងខ្ញុំបាននិយាយប្រាប់គ្នាអំពីកិច្ចការដែលយើងធ្វើនៅសប្តាហ៍នោះ ។ មិត្តម្នាក់បានចែកចាយថា គាត់បានដោះស្រាយបន្ទុកមួយដ៏លំបាកគឺការជាសះស្បើយពីការញៀនស្រារបស់ម្តាយគាត់ ។ គាត់មានអាយុក្មេងជាងខ្ញុំបន្តិច ស្តាប់ទៅវាជាកិច្ចការដ៏លំបាកមួយ ។
ពេលយប់កាន់តែជ្រៅបន្តិច យើងបានជជែកគ្នាអំពីថ្លៃចំណាយលើការជក់បារី និងរបៀបដែលមនុស្សម្នាក់ដែលយើងជក់បារីអស់មួយកញ្ចប់ក្នុងមួយថ្ងៃ ។ ( បើគិតលុយវិញគឺអស់ច្រើនណាស់ ! ) គាត់បានព្យាយាមឈប់ជក់ ហើយគាត់កំពុងឆ្លងកាត់ការផ្តាច់បារី ។ កូនប្រុសរបស់គាត់រីករាយណាស់ដែលគាត់ឈប់ជក់បារី ។ ឪពុករបស់គាត់បានស្លាប់ដោយសារហូបថ្នាំលើសកម្រិត ដែលធ្វើឲ្យគាត់ភ័យច្រើនក្នុងការប្រើប្រាស់ថ្នាំនានា ។
ទីបំផុតការសន្ទនារបស់យើងបញ្ចប់ត្រឹមរឿងកាហ្វេ—តើមនុស្សផឹកកាហ្វេច្រើនប៉ុន្មានរៀងរាល់ព្រឹក ( និងពេលរសៀល ហើយជួនកាលពេលយប់ទៀត ) និងរបៀបដែលពួកគេខកខានមិនបានផឹកកាហ្វេ ដោយសារតែពួកគេគ្មានប្រាក់ទិញផឹករៀងរាល់ថ្ងៃទៀត ។
ពេលខ្ញុំបើកឡានទៅផ្ទះវិញដោយគិតអំពីការសន្ទនាទាំងនេះ នោះខ្ញុំបានគិតថា « ពាក្យសម្ដីនៃប្រាជ្ញាវាងវៃគឺជាយោបល់គ្រឹះដ៏មានប្រយោជន៍ចម្បងដ៏ធំបំផុតនៃជីវិត ។ ( ប្រសិនបើអ្នកពុំស្គាល់ « យោបល់ដ៏មានប្រយោជន៍ » គឺជារបៀបមួយដែលធ្វើឲ្យជីវិតរបស់អ្នកល្អប្រសើរឡើង រស់នៅកាន់តែមានប្រសិទ្ធិភាព ជាដើម ។ ដូចម្នាក់នៅលើអ៊ិនធើរណែតបានពិពណ៌នាវាថា យោបល់ដ៏មានប្រយោជន៍គឺជាអ្វីដែលគេធ្លាប់ហៅថា « គំនិតល្អ » ) ។ វាដូចជាអ្វីដែលព្រះបានមានបន្ទូល « នេះជារបៀបមួយដើម្បីសន្សំប្រាក់របស់អ្នក ជួយអ្នកឲ្យមានសុខភាពល្អ ការពារកូនរបស់អ្នក ហើយចៀសផុតពីបន្ទុកខាងផ្លូវចិត្តដ៏លំបាក រួមទាំងការញៀនផ្ទាល់ខ្លួន និងការញៀនរបស់មនុស្សដទៃ ។ វាស្ទើរតែដូចជាអ្វីដែលព្រះបានរៀបចំទុកជាមុននូវរាល់បញ្ហាទាំងអស់ដែលយើងជួប ហើយប្រទានដល់យើងនូវវិធីមួយដើម្បីចៀសវាងពាក់កណ្តាលពីវា ។ …
ជាមួយនឹងបទបញ្ញត្តិណាមួយរបស់ព្រះ នោះយើងមានជម្រើសដើម្បីធ្វើតាម ឬព្រងើយកន្តើយនឹងបទបញ្ញត្តិទាំងនោះ ។ ប៉ុន្តែនៅពេលខ្ញុំគិតអំពីពាក្យសម្តីនៃប្រាជ្ញាវាងវៃថា ជាសេចក្តីណែនាំមកពីព្រះដែលរៀបចំទុកជាមុន និងការពារយើងពីឧបសគ្គជាច្រើន នោះខ្ញុំបានគិតថា « ចុះមានអ្វីកើតឡើងប្រសិនបើបទបញ្ញត្តិរបស់ព្រះទាំងអស់ដំណើរការតាមរបៀបនោះ ? » ចុះមានអ្វីកើតឡើង ប្រសិនបើព្រះវរបិតាសួគ៌ជាទីស្រឡាញ់ ដែលមានបទពិសោធន៍នៃជីវិតនេះ និងឧបសគ្គនានា បានប្រទានសៀវភៅណែនាំមួយ ដើម្បីជួយយើងឲ្យរស់នៅដោយគ្មានការឈឺចាប់ ? ហើយតើមានអ្វីកើតឡើង ប្រសិនបើទ្រង់ប្រទានសៀវភៅណែនាំនោះដល់យើង ដោយសារទ្រង់ស្រឡាញ់ពួកយើង ហើយមានព្រះទ័យការពារយើង ?
តើអ្នកពេញចិត្តនឹងអ្វីដែលអ្នកមាន ដើម្បីរីករាយ និងមានអំណរដែរឬទេ ? « កុំឲ្យលោភចង់បានផ្ទះអ្នកជិតខាងខ្លួនឲ្យសោះ » ( និក្ខមនំ ២០:១៧ ) ។
តើអ្នកចង់ចៀសវាងពីកំហុស ការជាប់ឃុំឃាំង ការបង់ប្រាក់ធានាច្រើនដើម្បីរួចពីការឃុំឃាំង និងថ្លៃចៅក្រមដែរឬទេ ? តើអ្នកចង់រក្សាទំនុកចិត្ត និងការគោរព—និងការងាររបស់អ្នកឬទេ ? « កុំឲ្យលួចប្លន់ឲ្យសោះ » ( និក្ខមនំ ២០:១៥ ) ។
តើអ្នកចង់បន្តនៅជិតព្រះ ដើម្បីឲ្យទ្រង់អាចណែនាំ និងដឹកនាំអ្នក ហើយជួយអ្នកឲ្យរែកបន្ទុករបស់អ្នកដែរឬទេ ? « ត្រូវឲ្យស្រឡាញ់ព្រះអម្ចាស់ជាព្រះនៃឯងឲ្យអស់អំពីចិត្តអស់ពីព្រលឹង ហើយអស់អំពីគំនិតឯង » ( ម៉ាថាយ ២២:៣៧ ) ។
បញ្ជីនេះនៅមានបន្តទៀត ។ បទបញ្ញត្តិនីមួយៗអាចការពារយើងពីការឈឺចាប់ ធ្វើឲ្យជីវិតយើងកាន់តែងាយស្រួល ធ្វើឲ្យយើងចៀសវាងពីក្តីអំពល់ ឬជួយយើងឲ្យរកឃើញភាពសុខសាន្ត ។ ហើយយើងទទួលពរជ័យទាំងនេះដោយកិច្ចខិតខំ ឬភាពពុំងាយស្រួលតិចតួចប៉ុណ្ណោះ ។ ( ហើយគ្មានតម្លៃដែលលាក់បាំងឡើយ ! )
ខ្ញុំពិតជាពុំចង់បន្ទាបបទបញ្ញាត្តិទាំងឡាយរបស់ព្រះមកត្រឹមតែជាសេចក្តីណែនាំ ឬយោបល់ដ៏មានប្រយោជន៍នៃជីវិតនោះឡើយ ។ បទបញ្ញត្តិរបស់ព្រះគឺមានទំហំធំជាងនេះឆ្ងាយណាស់ ។ ប៉ុន្តែបទបញ្ញត្តិរបស់ព្រះក៏មានលក្ខណៈសាមញ្ញផងដែរ ។ ព្រះវរបិតាសួគ៌ពុំអាចការពារយើងពីគ្រប់កិច្ចការទាំងអស់ឡើយ ។ ប៉ុន្តែក្នុងនាមជាឪពុកម្តាយជាទីស្រឡាញ់ ទ្រង់សព្វព្រះទ័យរៀបចំយើង ហើយការពារយើងពីឥទ្ធិពលនៃជម្រើសរបស់យើង—តាមរយៈការណែនាំយើងឲ្យធ្វើជាមនុស្សប្រសើរឡើង ។
ប្រាកដណាស់ យើងអាចរក្សាបទបញ្ញត្តិ ហើយនៅតែមានរឿងអាក្រក់កើតឡើង ។ អញ្ចឹងយើងគោរពបទបញ្ញត្តិធ្វើអ្វី ?
ដោយសារយើងនឹងពុំដឹងសោះឡើយថា តើយើងនឹង ត្រូវបាន ការពារពីអ្វីខ្លះឡើយ តាមរយៈការគោរពប្រតិបត្តិរបស់យើង ។ ដោយសារវាជួយរំដោះយើងចេញពីជីវិតដែលធ្វើឲ្យឈឺចាប់ ។ ដោយសារការគោរពប្រតិបត្តិជួយយើងឲ្យបន្តនៅជិតព្រះ ។ ដោយសារវាដាក់យើងនៅក្នុងកន្លែងមួយដើម្បីប្រែចិត្ត នៅពេលយើងជ្រើសរើសខុស ។ ដោយសារយើងទុកចិត្តព្រះ ថាទ្រង់ត្រាស់ដឹងអំពីរបៀបប្រទានពរ និងការពារយើង ។
បញ្ជីនេះនៅមានបន្តទៀត ។ វាគឺជាបញ្ជីមួយដែលវែងជាងបញ្ជីនៃហេតុផលដែលយើង មិន គោរពបទបញ្ញត្តិទៅទៀត ។
ទោះមានលទ្ធផលល្អ ឬអាក្រក់ក្តី ព្រះទុកឲ្យខ្ញុំជ្រើសរើសថា ខ្ញុំចង់គោរពប្រតិបត្តិខ្លាំងប៉ុណ្ណា ។ ខ្ញុំ អាចជ្រើសរើសថា តើខ្ញុំបើកខ្លួនខ្ញុំចំពោះពរជ័យដែលទ្រង់មានសម្រាប់ខ្ញុំធំប៉ុណ្ណា ។ ដូច្នេះហេតុអ្វីត្រូវគោរពបទបញ្ញត្តិ ? ដោយសារខ្ញុំចង់ឲ្យជីវិតខ្ញុំទទួលបានជំនួយដែលព្រះកំពុងព្យាយាមប្រទានឲ្យដោយឥតដែនកំណត់ ។