Qhia Lawv tias Koj Hlub Lawv

Muaj ntau yam peb ua tau kom qhia tias peb hlub lwm tus, qhov tseem ceeb yog thaum lub caij Christmas. Peb qhia tau li no thaum peb ntaus ntawv, sau ntawv, pub khoom plig, hais qhia, thov Vajtswv, ua mov, hu nkauj, puag rawv, ua si, cog noob, los sis tu tsev. Cia li sim ua xwb.

Kev qhia lwm tus tias yus hlub lawv yeej yog lub ntsiab ntawm kev txhawb pab. Thawj Tswj Hwm Jean B. Bingham, Koom Haum Niam Tsev tus Tuam Thawj Tswj Hwm, hais tias, “Yuav ua tau kev txhawb pab tiag tiag thaum ib leeg muaj kev hlub pab ib leeg. … Thaum peb muaj siab hlub lwm tus, yuav muaj tej txuj ci tseem ceeb, thiab peb yuav nrhiav kev coj peb cov viv ncaus thiab cov nus uas ‘poob zoo lawm’ los rau Yexus Khetos txoj moo zoo.”¹

Qhov uas peb qhia lwm tus tias peb hlub lawv yeej yog ib qho tseem ceeb uas pab peb nrog lawv sib raug zoo. Tiam sis hais txog qhov uas tib neeg txais ib zaj lus los nyias txawv nyias. Yog li ntawd peb yuav ua li cas kom qhia tias peb hlub lwm tus los ntawm ib txoj kev uas lawv yuav to taub thiab nyiam? Nov yog tej yam uas peb ua tau kom qhia tias peb hlub lawv, nrog rau ob peb lub tswv yim kom pab koj pib xav txog qhov no.

Cia Li Hais

Tej lub sij hawm tsis muaj lwm yam zoo dua li qhov uas koj qhia ib tug neeg hais tias koj hlub nws. Tej zaus koj yuav hais lus qhia ib tug neeg tias koj hlub nws, tiam sis qhov no kuj txhais tias koj qhia nws tias koj nyiam dab tsi txog nws los sis hais lus qhuas nws. Kev pom zoo rau nws li no yeej yuav pab neb sib raug zoo. (Saib Efexus 4:29.)

Nrhiav cib fim kom qhia nws hais tias koj saib ib yam uas nws muaj zog rau nqi.
Mus ntsib nws, hu xov tooj, los sis xa email, ntaus ntawv, los sis xa ib daim rau nws qhia tias koj xav txog nws.

Mus Xyuas

Kev siv sij hawm kom sib tham thiab mloog ib tug neeg hais lus yog ib txoj kev zoo kom qhia tias koj saib nws rau nqi. Txawm yog koj mus xyuas nws nyob hauv tsev, hauv lub tsev koom txoos, los sis lwm qhov chaw, muaj ntau tus neeg uas xav tau lwm tus nrog lawv tham. (Saib Mauxiyas 4:26; Lus Qhuab Qhia thiab Kev Khi Lus 20:47.)

Raws li ib tug neeg xav tau, cia li teem sij hawm mus xyuas nws. Siv sij hawm mloog zoo thiab to taub nws tej xwm txheej.
Thaum uas nyuaj mus sib ntsib hauv tsev vim tias nyob deb, tsis yog raws li yus kab lig kev cai, los yog vim lwm yam xwm txheej, tej zaum yus xav nrhiav sij hawm sib ntsib tom qab muaj kev sib ntsib hauv lub Koom Txoos.

Ua Hauj Lwm nrog Ib lub Hom Phiaj

Ua tib zoo xav txog tej yam uas tus neeg los sis nws tsev neeg xav tau. Qhov uas koj pab nws ua tej yam uas tseem ceeb rau nws qhia tias koj hlub nws. Ua li no los yus pub txiaj ntsim rau nws uas yog kev siv sij hawm thiab kev ua tib zoo siv zog pab. Muam Bingham hais tias, “Tej yam me me uas peb ua kom pab lwm tus yeej muaj hwj huam heev rau lwm tus.”²

Muab kev pab uas txhawb ib tug neeg los sis nws tsev neeg dag zog, xws li saib xyuas cov me nyuam kom tus niam tsev thiab txiv tsev mus tau rau lub tuam tsev.
Nrhiav kev kom pab lawv tsis txhob ris lub nra hnyav thaum lub neej nyuaj heev, xws li kev ntxuav qhov rais, coj tus aub mus kev, los sis pab tu cov nyom.

Ua tej Yam Ua Ke

Muaj tib neeg uas tsis nyiam sib tham ntau kom sib raug zoo. Rau ib txhia neeg, lawv sib raug zoo nrog lwm tus thaum nrhiav tej yam uas koj thiab lawv nyiam thiab siv sij hawm ua ke ua tej ntawd. Tus Tswv tau yaum kom peb “nyob nrog [peb cov kwv tij thiab cov muam] thiab txhawb lawv lub zog” (Lus Qhuab Qhia thiab Kev Khi Lus 20:53).

Taug kev ua ke, npaj rau ib hmo ua si ua ke, los sis teem sij hawm qoj ib ce ua ke.
Ua hauj lwm pab lwm tus ua ke hauv nej zej zog los sis nyob hauv lub Koom Txoos.

Muab Khoom Plig

Tej lub sij hawm tsis tshua muaj cib fim los sis sij hawm sib tham. Nyob hauv ntau kab lig kev cai, kev muab khoom plig qhia tias yus hlub thiab xav txog lawv. Txawm yog ib lub khoom plig tsis nyuaj ua los, qhov ntawd qhia tau tias koj xav sib raug zoo dua ntxiv. (Saib Paj Lug 21:14.)

Muab khoom qab zib uas koj nyiam pub rau lawv.
Hais ib zaj lus, ib nqe vaj lug kub, los sis lwm zaj uas koj xav tau yuav pab lawv.

Ib txoj Hauj Lwm ntawm Kev Hlub

Thaum koj paub cov uas koj txhawb pab zoo zuj zus thiab koj nrhiav kev tshoov siab rau lawv, koj yuav haj yam txawj paub qhia lawv tias koj hlub lawv thiab paub saib xyuas lawv txhua tus.

Kimberly Seyboldt nyob hauv lub xeev Oregon, lub Teb Chaws Amelikas, hais ib zaj txog thaum nws nrhiav kev tshoov siab thiab pub txiaj ntsim uas qhia tias nws hlub lwm tus.

“Thaum lub neej no ua rau kuv nyuaj siab, kuv sawv thiab siv taub ua khob cij, feem ntau kuv ua yim pob. Qhov tshwj xeeb uas kuv siv yog kev thov Vajtswv thaum kuv ua li no kom kuv paub tias leej twg xav tau tej pob khob cij no. Ua rau kuv paub kuv cov neeg zej zog zoo dua vim cov khob cij uas tseem sov sov pab lawv xav cia kuv los rau hauv lawv lub tsev thiab lawv lub neej.

“Muaj ib hnub thaum lub caij sov, kuv nres tsheb rau ntawm ntug kev ze ib tsev neeg uas muag tej pob txiv pos nphuab dub. Kuv tsis xav yuav txiv pos nphuab dub ntxiv, tiam sis tus tub hluas yuag yuag nyob ntawm qhov chaw muag zoo siab pom kuv, vim nws xav tias kuv mam li yuav khoom. Kuv twb yuav ib co txiv pos nphuab dub, tiam sis kuv kuj muab khoom plig rau nws. Kuv muab tus me nyuam tub ob pob khob cij. Nws saib nws txiv xav tau kev pom zoo, ces hais tias, ‘Saib, Txiv, peb thiaj li muaj dab tsi noj hnub no.’ Ua rau kuv zoo siab ua Vajtswv tsaug vim kuv muaj cib fim ua ib yam yooj yim heev qhia txog kuv txoj kev hlub.”

Txwj Laug Jeffrey R. Holland ntawm Pawg Kaum Ob tug Thwj Tim tau thov kom, “txhua tus txiv neej thiab poj niam—thiab cov tub hluas ntxhais hluas uas hlob me ntsis—ib leeg mob siab saib xyuas ib leeg, tsuas xav ua los ntawm Khetos txoj kev hlub dawb huv xwb. … Thov kom peb yuav nyob ua ke ua hauj lwm hauv tus Tswv lub vaj txiv hmob, ua hauj lwm rau Vajtswv Leej Txiv uas pab peb txhua tus thaum Nws teb peb tej lus thov, nplij peb lub siab, so peb kua muag, thiab txhawb nqa cov uas qaug zog.”³

Yexus Khetos Hlub

Tom qab Yexus Khetos muab Laxalus sawv hauv qhov tuag rov qab los, “Yexus txawm quaj.

“Yog li ntawd cov Yudais hais tias, Nej saib, Yexus hlub Laxalus kawg li! (Yauhas 11:35–36).

Khetos hais rau cov Neeg Nifais hais tias, “Kuv muaj kev khuv leej rau nej.” Ces Nws tau hu lawv cov neeg mob thiab cov neeg txom nyem, cov neeg ceg tawv thiab cov neeg dig muag, thiab “nws kho tau lawv txhua tus zoo” (saib 3 Nifais 17:7–9).

Tus Cawm Seej tau ua yam ntxwv rau peb thaum Nws saib xyuas lwm tus. Nws tau qhia peb hais tias:

“Nej yuav tsum hlub tus Tswv nej tus Vajtswv kawg siab kawg ntsws, kawg plab kawg plawv.

Nqe no thiaj yog lus txib uas tseem ceeb dua ntais.

Thiab nqe ob uas tseem ceeb hais li no hais tias, Hlub koj tej kwv tij zej zog ib yam li koj hlub koj lub cev” (Mathais 22:37–39).

Leej twg xav tau koj txoj kev hlub? Koj yuav ua li cas kom qhia tau tias koj hlub lawv?

© 2018 by Intellectual Reserve, inc. All rights reserved. Luam tawm hauv Teb Chaws Amelikas. Pub luam tawm ua lus Akiv: 6/17. Pub txhais ua lus Hmoob: 6/17. Kev txhais Ministering Principles, December 2018. Hmong. 15056 295