Ma Wo Nkitahodzi Nkyerɛ Dɛ Edwen Binom ho

Akwanhorow piinara wɔ hɔ a yebotum akyerɛ dɛ yɛdwen binom ho, nkankara Borɔnyaber mu. Yebotum akã, atext, akyerɛw, akyɛ, abɔ mpaa, atõ adze, atow no ndwom, etu efua, edzi agor, edua, anaa atsew ho. Yɛhwɛ ara.

Yɛrekyerɛ ɔdɔ ama binom no nye yɛrosom ne fapem botae no ankasa. Wiadze Mfɛndzanan Relief Society President Jean B. Bingham kãa dɛ: Yɛsom nokwar mu ber a yɛyɛ no ankorankor a ɔdɔ yɛ hɛn nkuranhyɛ. … Dɛ ɔdɔ yɛ hɛn nkuranhyɛ no, anwanwadze bɛba, na yebenya akwan a yɛnye hɛn nkyerɛbaa na enuanom a ‘wɔayew’ no aba Jesus Christ N’asɛmpa no a ofua obiara no mu.”¹

Yɛrema nkaafo ehu dɛ yɛdwen hɔn ho no hia tsitsir ama yeetu nkitahodzi mapã no mpon. Naaso akwan asorɔtow mu na nyimpa horow dua dze tse ɔdɔ nkã. Ntsi yebesi dɛn botum akyerɛ hɛn dɔ ama binom yie wɔ akwan a wɔbɛtse ase na woenya ho enyisɔ? Akwan binom nye iyi a yebotum akyerɛ dɛ yɛdwen binom ho, nye adwenkyerɛ kumaa binom so a ibotum dze akɔ wɔankasa w’adwendwen mu.

Kã

Ɔtɔfabi a biribiara nnkyɛn dɛ ibɛkã w’atsenkã akyerɛ obi. Ber a obotum akyerɛ dɛ ikã kyerɛ obi dɛ idɔ hɔn no, erekã dza ɔyɛ wo enyisɔ wɔ hɔn ho anaa erekamfo hɔn nokwar mu no so botum akã ho. Kasa pa a ɔtse dɛm no hyɛ nkitahodzi dzen. (Hwɛ Ephesusfo 4:29.)

Hwehwɛ kwan bi ma ankorankor no nhu mbrɛ osi na w’enyi gye no suban pa bi ho.
Sera no, frɛ no phone do, anaa kyerɛw email, text, anaa krataasin bi ma ɔnkyerɛ ankorankor no dɛ erodwen hɔnho.

Sera

Irinya mber nye bi akasa na etsie no no yɛ kwan pa a ɔkyerɛ mbrɛ osi som wo bo. Sɛ esera wɔ fie, wɔ asɔr, anaa beebiara a, ibenya nkorɔfo a wohia obi a wobotum nye hɔn akasa. (Hwɛ Mosiah 4:26; N&A 20:47.)

Fa nsera no hyɛ ber a ɔnye ankorankor n’ehiadze no behyia. Fa mber tsie no yie na fatse ne gyinabew horow no ase yie.
Ber a ɔbɛyɛ dzen dɛ ebɛsera efiefi osian kwan tsentsen, amambra, anaa gyinabew horow ntsi no, susu dɛ wɔapon Asɔr nhyiamu no wobenya mber dze ehyia mu.

Fa Botae Som

Nya adwen da hɔ ma ankorankor no anaa ebusua no hɔn ehiadze ahorow. Ma som pa a ɔkyerɛ dɛ edwen hɔn ho. Ɔkã mber akyɛdze na enyidaho mbɔdzembɔ bɔ mu. Akyerɛbaa Bingham kãa dɛ: “Som ndzeyɛɛ a ɔnnyɛ nwanwa biara no mpo botum enya nsunsuando kɛse wɔ binom do”.²

Ma som a ɔhyɛ ankorankor anaa hɔn ebusua ebusua dzen, tse dɛ erohwɛ mbofra ama awofo no etum akɔ temple.
Hwehwɛ akwan a edze bɛma adzesoadze ayɛ har ber a abrabɔ adzesoa abor do no, tse dɛ erepepa ntokura mu, enye fie bɔdɔm rutu mpasar, anaa eroboa esiesie paado.

Hom Mbɔ Mu Nyɛ Adze

Ankorankor binom mbaa hɔn ho nndzi hɔn abrabɔ mu nkɔmbɔ. Binom no, eruhu hɔn enyikadze na enye hɔn robɔ mu ayɛ adze no na ɔma wɔbaa hɔn ho. Ewuradze tu hɛn fo dɛ yɛnye hɛn enuanom na nkyerɛbaa no “[n]dzi nkitaho na [yɛn]hyɛ hɔn dzen.” (N&A 20:53)

Hom ntu mpasar, hyehyɛ ewimbir agordzi bi, anaa hyehyɛ mber pɔtsee a hom dze bɛtaa atsentsen hom mpɔw mu.
Hom mbɔ mu nsom wɔ sɔn mu anaa Asɔr dwumadzi bi mu.

Ma Akyɛdze bi

Ɔtɔfabi a mber anaa kwan a wobenya dze behyia mu no suar koraa. Amambra pii mu no, erema akyɛdze horow no kyerɛ tsema na dɛ edwen hɔn ho. Dakor dakor, akyɛdze kakraba mpo kyerɛ w’enyigye dɛ epɛ nkitahodzi pa. (Hwɛ Mbɛbusɛm 21:14.)

Fa akɔndɔdze a wɔpɛ kɛma hɔn.
Kyɛ ɔserakã bi, kyerɛwsɛm, anaa asɛm bi a egye dzi dɛ wobenya mu mfaso.

Adɔyɛ Edwuma Bi

Ber a ehu hɔn a esom hɔn no yie na hɔn a ehwehwɛ hɔn ho nkenyan no, ebɛba ebosũa mbrɛ ebɛkyerɛ wo dɔ yie wɔ nkitahodzi mu na adwen hɔn ho ankorankor.

Kimberly Seyboldt a ofi Oregon, USA, kã asɛm a ɔfa erohwehwɛ nkenyan na erema akyɛdze dze akyerɛ ɔdɔ:

“Sɛ muhu dɛ abrabɔ rekyer mo do a, mosoɛr tõ zucchina paanoo, bɛyɛ awɔtwe. Dza medze kã ho a ɔyɛ soronko nye me kommyɛ mpaabɔ ber a morotõ no dɛ munhu hɔn a wobehia dɛm paanoo no. Zucchini paanoo hyew no ama meetum ahɛn hɔn efiefi na abrabɔ mu ma meebohu me fipamfo a woetwa moho ehyia no yie.

“Ɔhyewber da kor bi a nna wimu ayɛ hyew no, migyinaa me kaar wɔ ebusua bi a wɔrotɔn blackberries nsã dɛw a ogugu gallon fã mu wɔ kwan nkyɛn. Nna minnhia blackberries nsã bio, naaso banyimba a ɔafon a ogyinaa ho no n’enyigyee dɛ oehu me, a ɔrodwen dɛ emi nye hɔn guadzefo a ɔaba. Motɔɔ blackberries no bi, nna memaa no akyɛdze so. Memaa banyimba no paanoo ebien. Ɔdanee hwɛɛ n’egya dɛ ɔbɛpen do a, na ɔkãa dɛ, Papa, sesei yeenya dza yebedzi no ndɛ.’ Kwan yi a ɔmaa mekyerɛɛ ɔdɔ wɔ kwan a ɔnnyɛ nwanwa do no dze enyisɔ hyɛɛ me mã.”

“Elder Jeffrey R. Holland a ɔkã Asomafo Duebien no hɔn Quorum ho no totɔe serɛɛ dɛ, “banyin na basia biara—nye hɛn mbabanyin na mbabaa a hɔn enyi efir kakra no—besi … nkitse ara yie dze akoma pa dze aboa hɔn ho nkorkor a, Christ No dɔ mãpa no na ɔhyɛ hɔn nkuran ma wɔyɛ. … Hom ma yɛnye wenyin ture Ewuradze no nyɛ edwuma afã na afã, yɛma Nyankopɔn na hɛn nyina Egya mboa nsa wɔ No dwuma kukuankoma ho dɛ Ɔrema mpaabɔ ho mbuae, Ɔrema awerɛkyekye, Ɔrepepa enyisuwa, na Ɔrema nkotodwe a wɔagow no mu reyɛ dzen.”³

Jesus Christ Dwen Hɛnho

Jesus Christ nyaan Lazarus fii owu mu ekyir no, “Jesus sũi.

“Nna Jewfo no see dɛ, Hwɛ mbrɛ ɔdɔ no!” (John 11:35–36).

Christ see Nephifo no dɛ, “Mowɔ ayamuhyehye wɔ homho.” Na Ɔfrɛɛ hɔn ayarfo, hɔn ebubuafo na efurafo, na “ɔsaa hɔn yarba” (hwɛ 3 Nephi 17:7–9).

Agyenkwa no yɛɛ fasusu maa hɛn wɔ kwan a Ɔdze dween nkaafo ho no. Ɔkyerɛkyerɛɛ hɛn dɛ:

“Dɔ Ewuradze wo Nyankopɔn, wɔ w’akoma nyina mu, nye wo kra nyina mu, nye w’adwen nyina mu.

“Iyi nye mbra no mu asɛm kɛse a odzi kan na ɔsõ.

“Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho (Matthew 22:37–39).”

Woana na ohia dɛ edwen noho? Ibesi dɛn botum akyerɛ hɔn dɛ edwen hɔnho?

© 2018 Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/17. Nkyerɛase ngye ntomu: 6/17. Ministering Principles, December 2018 ne nkyerɛasee. Fante. 15056 502