Sib Sab Laj txog tej uas Lawv Xav Tau

Koj tsis tas ua li no koj ib leeg xwb. Kev sib sab laj yuav muab kev pab rau koj kom koj pab tau lwm tus.

Vajtswv tau caw koj los txhawb pab ib tug neeg los sis ib tsev neeg nyob hauv koj pawg ntseeg los sis ceg ntseeg raws li lawv xav tau. Koj yuav ua li cas kom paub tias tej kev xav tau ntawd yog dab tsi? Lub ntsiab cai uas yog kev sib sab laj, uas lub Koom Txoos qhia ntau txog, yog ib qho tseem ceeb.

Tom qab hais txog tej yam uas peb xav tias peb yuav sib sab laj txog, peb yuav kawm txog:

Kev sib sab laj nrog Leej Txiv Saum Ntuj Ceeb Tsheej.
Kev sib sab laj nrog tib neeg thiab tsev neeg uas peb txais kev txib mus saib xyuas.
Kev sib sab laj nrog peb tus khub.
Thiab kev sib sab laj nrog lwm tus uas kuj tau txais kev txib saib xyuas tus neeg los sis tsev neeg ntawd.

Peb kuj yuav tsum sib sab laj nrog peb cov thawj coj. Ib zaj lus txog Tej Ntsiab Cai txog Kev Txhawb Pab uas yuav sau yav tom ntej nyob hauv phau Liahona yuav hais txog kev sib sab laj nrog cov thawj coj thiab qhov uas kev sib tham txog kev txhawb pab hauv tus txheej txheem ntawd pab li cas.

Peb Sib Sab Laj txog Dab Tsi

Ib leeg yuav tsum to taub ib leeg tej kev xav tau kom ua kev txhawb pab. Tiam sis tej kev xav tau ntawd zoo li cas, thiab puas muaj dab tsi ntxiv tshaj tej kev xav tau uas peb yuav tsum kawm txog?

Muaj ntau yam uas tib neeg xav tau. Tej zaum cov uas peb pab muaj teeb meem uas yog los ntawm lub siab ntsws, nyiaj txiag, lub cev nqaij daim tawv, kev kawm ntawv, thiab ntxiv. Muaj tej kev xav tau uas tseem ceeb dua li lwm yam. Muaj ib txhia uas peb yuav txawj pab lawv; muaj lwm yam uas tej zaum peb yuav tsum hais kom lwm tus pab peb. Thaum peb siv zog pab lawv kom tau tej yam uas lawv xav tau ntawm sab cev nqaij daim tawv, cia li nco ntsoov tias ib feem ntawm qhov uas Vajtswv hu peb mus txhawb pab yog qhov uas peb yuav tsum pab lawv taug txoj kev khi lus, npaj thiab txais cov kab ke pov thawj hwj uas yuav tsum muaj kom txais tau kev tsa nto.

Ntxiv rau qhov uas peb sib sab laj txog ib tug neeg los sis tsev neeg tej kev xav tau, peb yuav tsum kawm txog lawv tej kev muaj zog. Muaj tej yam twg uas lawv tsis tas txais kev pab hlo li? Lawv muaj tej txiaj ntsim thiab tej txuj ci twg uas yuav foom koob hmoov rau lwm tus? Lawv ib leeg muaj tej yam twg uas yuav pab txhim tsa Vajtswv lub nceeg vaj? Tej zaum qhov uas ib tug neeg txawj ua tej yam yeej tseem ceeb kom to taub npaum li yuav tsum to taub nws tej kev xav tau.

Sib Sab Laj nrog Leej Txiv Saum Ntuj Ceeb Tsheej

Ib lub ntsiab cai tseem ceeb tshaj plaws ntawm peb txoj kev ntseeg yog qhov uas Leej Txiv Saum Ntuj Ceeb Tsheej hais lus rau Nws cov me nyuam (saib Tej Nqe Kev Ntseeg 1:9). Thaum peb txais kev txib tshiab mus txhawb pab lwm tus, peb yuav tsum thov peb Leej Txiv Saum Ntuj Ceeb Tsheej, nrhiav tej lus qhia thiab kev to taub txog lawv tej kev xav tau thiab lawv tej kev muaj zog. Tus txheej txheem sab laj los ntawm kev thov Vajtswv los yuav tsum ua li ntawd txhua lub sij hawm thaum peb ua raws li kev txib mus txhawb pab.

Sib Sab Laj nrog Tib Neeg thiab Tsev Neeg

Qhov uas peb hais li cas thiab hais thaum twg rau ib tug neeg thiab tej tsev neeg uas Vajtswv hu peb mus pab los qhov ntawd yuav nyob ntawm seb lawv muaj xwm txheej dab tsi, tiam sis yuav tsum sib sab laj ncaj qha nrog tus neeg los sis tsev neeg ntawd thiaj li yuav sib raug zoo thiab to taub lawv tej kev xav tau, tsis hais lawv xav txais kev pab li cas. Muaj tej lus nug uas yuav tos ntsoov nug mus txog thaum neb sib raug zoo dua ntxiv. Txawm yog tsis muaj tib txoj kev ua li ntawd xwb, cia li xav txog tej yam no:

Kawm hais tias lawv xav nrog koj tham li cas thiab thaum twg.
Kawm txog tej yam lawv nyiam thiab lawv lub neej zoo li cas.
Thaum tuaj xyuas cia li muaj tej tswv yim uas koj twb xav tias koj pab tau lawv, thiab nug lawv seb lawv muaj tswv yim dab tsi thiab.

Thaum peb ib leeg ntseeg ib leeg, cia li xav tias puas tsim nyog sib tham txog tej uas lawv tus kheej los sis lawv tsev neeg xav tau. Cia li nug tej yam raws li tus Vaj Ntsuj Plig Dawb Huv tshoov koj lub siab ua.¹ Piv txwv hais tias:

Lawv muaj tej teeb meem dab tsi?
Lawv tsev neeg los sis lawv tus kheej muaj hom phiaj zoo li cas? Piv txwv hais tias, lawv puas xav muaj tsev neeg hmo ua ke ntau dua, los sis vam tau lawv tus kheej ntxiv?
Peb yuav ua li cas pab lawv ua raws li lawv tej hom phiaj thiab kov yeej lawv tej teeb meem?
Tsis ntev tom ntej yuav muaj cov kab ke ntawm txoj moo zoo twg? Peb yuav ua li cas kom pab lawv npaj?

Cia li nco ntsoov kom hais tias yuav pab lawv li cas, xws li, “Hmo twg zoo nqa ib pluas mov rau nej noj?” Qhov uas hais zoo li no tias, “Qhia wb paub yog muaj dab tsi uas wb pab tau,” yeej tsis pab ntau.

Sib Sab Laj nrog Peb tus Khub

Vim hais tias koj thiab koj tus khub yuav tsis nyob ua ke txhua lub sij hawm uas neb nrog tus neeg los sis tsev neeg ntawd tham, yog ib yam tseem ceeb kom koom tes thiab sib sab laj ua ke thaum neb ua ib khub nrhiav kev tshoov siab. Nov yog tej lus nug rau koj xav txog:

Neb yuav ua ib khub sib tham li cas thiab ntau npaum li cas?
Nej nyias siv nyias tej kev muaj zog li cas kom txhawb pab ib tsev neeg los sis ib tug neeg tej kev xav tau?
Nej tau kawm dab tsi, nej tau muaj xwm txheej li cas, thiab tau txais kev tshoov siab twg txij thaum lub sij hawm kawg uas nej tau sib tham txog tus neeg los sis tsev neeg ntawd?

Sib Sab Laj nrog Lwm Tus uas Txais Kev Txib

Tej lub sij hawm yog ib yam zoo kom hais lus rau lwm tus uas tau txais kev txib mus txhawb pab tib tug neeg los sis tsev neeg uas koj mus txhawb pab.

Sib Tham Kom Kov Yeej Teeb Meem

Txwj Laug Chi Hong (Sam) Wong ntawm Pawg Xya Caum tau muab ib zaj lus los ntawm Malakaus 2 nruab rau peb lub caij nyoog kom piav hais tias kev sib sab laj ua ke tau pab plaub tug neeg kawm tias yuav ua li cas pab ib tug neeg tuag tes tuag taw mus cuag Yexus.

Txwj Laug Wong hais tias, “Tej zaum yuav zoo li no. Plaub tug neeg yuav ua raws li lawv tus npisov txib kom lawv mus xyuas ib tug txiv neej uas tuag tes tuag taw nyob tom nws lub tsev. … Nyob hauv pawg ntseeg pawg sab laj, tom qab lawv sib tham ua ke txog tej tug neeg tej kev xav tau, tus npisov txib kom lawv mus ‘cawm neeg.’ Nws tau txib plaub leeg no mus pab tus txiv neej [no]. …

“[Tiam sis, thaum lawv tuaj txog lub tsev uas Yexus nyob,] muaj neeg nyob puv tsev tas. Txawm yog ntawm qhov rooj los twb tsis tau kev mus rau hauv tsev. Nyaj lawv twb ua txhua yam lawv ua tau, tiam sis lawv mus tsis taus rau hauv tsev. … Lawv tau sib tham ua ke seb lawv yuav ua dab tsi—lawv yuav ua li cas kwv tus txiv neej mus rau Yexus Khetos kom Yexus kho nws. … Lawv txawm tawm tswv yim—tsis yog ib qho yooj yim, tiam sis lawv cia li ua kiag xwb.

“ …‘Ces lawv txawm nce mus rau saum ruv tsev thiab rhuav ib qho ncaj ntawm Yexus rau saum. Thaum lawv qhib tau lawm, lawv txawm muab hlua khi daim pam uas pua nws tso nws dauv mus rau hauv’ (Malakaus 2:4). …

“… ‘Thaum Yexus pom hais tias lawv muaj kev ntseeg heev, Yexus txawm hais rau tus txiv neej uas tuag tes tuag taw ntawd hais tias, Me tub, kuv twb zam koj lub txim lawm’ (Malakaus 2:5).”²

Kev Caw Ua tej Yam

Txwj Laug Dieter F. Uchtdorf ntawm Pawg Kaum Ob tug Thwj Tim ntuas hais tias, “[Cia li] sib tham, siv tag nrho tej kev pab uas muaj, nrhiav tus Vaj Ntsuj Plig Dawb Huv tej kev tshoov siab, thov tus Tswv pom zoo, ces sia siv thiab mus ua hauj lwm.

“Kuv cog lus rau nej, yog nej yuav ua raws li tus txheej txheem no, nej yuav txais kev coj kom ua raws li tus Tswv txoj kev paub pab leej twg, ua dab tsi, pab thaum twg, thiab qhov twg.”³

© 2018 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/17. Pub txhais ua lus Hmoob: 6/17. Kev txhais Ministering Principles, September 2018. Hmong. 15052 295