ministering

Erosom ho Fapem, Fankwa 2018

Fa Hɔn Ehiadze ho Apam

Nnyɛ wo nko na ɔsɛ dɛ iyɛ iyi. Apamfa botum ama mboa a ihia dze aboa binom.

Nyankopɔn ato nsa afrɛ wo dɛ ibɔsom ankorankor anaa ebusua bi a ɔwɔ wo ward anaa nkorbata mu dɛ mbrɛ hɔn ehiadze tse. Ibesi dɛn botum ehu dɛm ehiadze horow no? Apamfa ho fapem no a, Asɔr no esi do akã no, nye saafee no.

Yɛapɛnsampɛnsam ehiadze horow a yɛbotum afa ho apam ewiei no, yɛbɔhwehwɛ:

1. Enye Ɔsor Egya refa apam.

2. Enye ankorankor no anaa ebusua a wɔnye hɔn ahyɛ wo nsa no refa apam.

3. Yɛnye hɛn adamfo-boafo refa apam.4.

4. Na enye binom so a wɔnye ankorankor no anaa ebusua noara ahyɛ hɔn nsa no refa apam.

Yɛnye hɛn baanodzifo refa apam no so hia tsitsir. Ɔnnkɛkyɛr na Ɔsom ho Fapem horow ho nkyerɛwee epue Liahona mu a, ɔbɛkyerɛ yɛnye hɛn baanodzifo refa apam mu nye ɔsom ho kokoamu mpɛnsapɛnsamu no dwuma wɔ dɛm nhyehyɛɛ no mu.

Ehiadze a Yɛfa ho Apam

Yɛretse ehiadze horow ase no hia tsitsir ama yɛasom hɛn ho nkorkor. Naaso ebɛn akwan ahorow mu na ehiadze horow no bɛda edzi, na ana biribi so wɔ hɔ a ɔtra ehiadze a ɔsɛ dɛ yɛhwehwɛ a?

Ehiadze botum aba wɔ akwan ahorow mu. Hɔn a yɛsom hɔn no hyia ɔhaw ahorow a ɔyɛ hɔn nkã-tse, sikasɛm, honandua, adzesũa gyinabew, na no mboree. Ehiadze binom yɛ mprɛnprɛ kyɛn binom. Binom mu no, yebenya ho edwindaze dze aboa; binom behia dɛ yɛhwehwɛ mboa ma hɛnho. Hɛn mbɔdzembɔ mu dɛ yɛbɔboa ma woenya honandua mu ehiadze no, mma hɛn werɛ mmfir dɛ yɛreboa binom wɔ ahyɛmudzi anamɔn kwan do no, wɔreyɛ ahoboa na wɔagye asɔfodzi ayɛdze horow a ohia tsitsir ma nkwagye ntowdo no, kã hɛn frɛ dɛ yɛnsom binom no ho.

Dza ɔkã yɛrefa apam afa ankorankor anaa ebusua n’ehiadze ho no, nye dɛ, ɔsɛ dɛ yɛhwehwɛ hu hɔn ahoɔdzen. Ebɛnadze na wonnhia ho mboa? Ebɛn ndzɛmba na akyɛdze horow a wɔwɔ a wobotum dze aboa binom? Wosi dɛn yɛ soronko a wobotum aboa ma wɔakyekyer Nyankopɔn n’ahenman no? Ohia dɛ yɛtse ankorankor n’ahoɔdzen ase dɛ mbrɛ yɛtse n’ehiadze ase.

Yenye Ɔsor Egya Refa Apam

Hɛn gyedzi ho fapem tsim kor nye dɛ Ɔsor Egya kasa kyerɛ Ne mba (hwɛ Gyedzi ho Nsɛmpɔw 1:9). Sɛ yenya dwuma fofor dɛ yɛnsom obi a, ɔsɛ dɛ yɛnye Ɔsor Egya fa apam wɔ mpaabɔ mu, dze hwehwɛ nhumu na ntseasee dze ehu hɔn ehiadze na ahoɔdzen horow no mu. Dɛm kwan no a yedua mpaabɔ do fa apam no, ɔwɔ dɛ ɔkɔ do wɔ hɛn som dwuma ber no nyina mu.

Yɛnye Ankorankor na Ebusua ebusua Refa Apam

Nsonsonee bɛba mber na mbrɛ yebesi bɛbɛn ankorankor na ebusua ebusua a yɛsom hɔn no, ɔnam gyinabew horow do ntsi, naaso yenye ankorankor no anaa ebusua refa apam enyim na enyim no hia tsitsir ama yɛaakyekyer nkitahodzi mapã a, ɔboboa ma yɛatse hɔn ehiadze ase, a mbrɛ wɔpɛ dɛ wɔboa hɔn fa no kã ho. Nsɛmbisa binom behia dɛ ɔtweɔn kesi dɛ yɛbenya nkitahodzi mapã. Kwan kor biara nnyi hɔ a oye dze, naaso yebotum esusu iyinom ho:

• Hwehwɛ mbrɛ wosi bɛpɛ dɛ wɔnye hɔn hyia nye mpɛn dodow.

• Suã hu hɔn enyigyedze nye hɔn nkyir ho nsɛm.

• Da nsusui a ibotum dze aboa no edzi, na bisa hɔn nsusui.

Yegu do renya hɔn awerɛhyɛmu no, susu dɛ wɔbɛpɛnsam ankorankor anaa ebusua ehiadze mu. Bisa nsɛmbisa dɛ mbrɛ Sunsum Krɔnkrɔn no bekenyan wo.¹ Mfatoho:

• Ebɛn ɔhaw na ihyia?

• Hɔn ebusua anaa ankorankor botae nye dɛn? Mfatoho, ana wɔpɛ dɛ wotu mpon dze taa yɛ ebusua ewimbir fie nhyiamu, anaa wɔyɛ ahodan yie a?

• Yebesi dɛn botum aboa hɔn wɔ hɔn botae nye ɔhaw horow ho?

• Ebɛn asɛmpa ayɛdze horow na ɔwɔ hɔn enyim wɔ hɔn abrabɔ mu? Yebesi dɛn botum aboa hɔn ma wɔayɛ ahoboa?

Hom nkaa dɛ hom bɛma mboa pɔkyee, tse dɛ, “Anafua dabɛn wɔ dapɛn yi mu na yɛmfa edziban mbra?” Bɔhyɛ biara biara, tse dɛ, “Ma yenhu adzebiara a yebotum ayɛ,” no mmboa koraa.

Yɛnye hɛn Adamfo-boafo Refa Apam

Osiandɛ nnyɛ ber biara na ɔwo na w’adamfo-boafo no bɔbɔ mu nye ankorankor no anaa ebusua no edzi nkitaho no ntsi, ohia dɛ hom hyehyɛ na hom bɔ mu fa apam dze hwehwɛ nkenyan dɛ wɔyɛ adamfo-aboafo. Nsɛmbisa binom a hom bosusu nye yi:

• Hom besi dɛn na mpɛn dodow ahen na hom nye homho bedzi nkitahodzi dɛ adamfo-aboafo?

• Hom besi dɛn botum dze hom ankorankor ahoɔdzen asom ebusua no anaa ankorankor no hɔn ehiadze mu?

• Ofitsi ber a odzi ekyir a ekãa ankorankor no anaa ebusua ho asɛm no, ebɛn ndzɛmba na ehu, ebɛn sũahu na enya, na ebɛn nkenyan na enya?

Yenye Binom a Wɔama hɔn Dwuma no Refa Apam.

Obeye dɛ ofi ber to ber no yɛnye binom a wɔnye ankorankor no anaa ebusua noara a yɛsom hɔn no ahyɛ hɔn nsa no bɛkasa.

Yendzi Nkitaho mfa nya Ɔhaw horow ho Nyiano

Elder Chi Hong (Sam) Wong a ɔkã Eduosuon ho no dze asɛm a ɔwɔ Mark 2 to hɛn nda yi ho dze kyerɛkyerɛ mbrɛ nkorɔfo baanan bɔɔ mu faa apam dze nyaa kwan a wotumii maa banyin bi a oebubu dze baa Jesus n’enyim.

Elder Wong kãa dɛ “Obotum aba no dɛ,” “Nkorɔfo baanan redzi dwuma a ofi hɔn bishop hɔ dɛ wɔnkɛsera banyin bi a ɔyar mbubui wɔ ne fie. … Ndaansa yi ward abaguafo nhyiamu no, wɔbɔɔ mu faa apam wɔ ward mba no hɔn ehiadze ho no, bishop no maa dwuma dɛ ‘wɔnkɛgye’ nkorɔfo. Baanan yinom no wɔmaa hɔn dwuma dɛ wɔnkɔboa banyin yi. …

“[Ber a woduur dan no a Jesus wɔ no,] nna pia no mu akyer dodow. Nna wonnkotum edua abow no mu ahɛn mu. Megye dzi dɛ wɔdween biribiara a wobotum ayɛ ho, naaso nna wonnkotum ahɛn mu koraa. … Wɔbɔɔ mu faa apam wɔ dza odzi do a ɔsɛ dɛ wɔyɛ—mbrɛ wobotum nye banyin no aba Jesus hɔ abɛgye ayarsa. … Wɔfefaa nhyehyɛɛ bi—nna ɔnnyɛ dza ɔyɛ mberɛw, naaso wɔdze dzii dwuma.

“… ‘Wɔkɛpaa mbrɛ ɔwɔ n’etsifi; wonyae bɔɔr mu no, wɔdze kɛtɛ no a mbubuinyi no da no duaa mu gyaagyaa mu sii famu’(Mark 2:4). …

“… ‘Na Jesus hun hɔn gyedzi no, ɔsee mbubuinyi no dɛ, Ɔba, wɔdze wo bɔn akyɛ wo’ (Mark 2:5).”²

Nsato dɛ Yɛbɛyɛ Biribi

Elder Dieter F. Uchtdorf a ɔkã Asomafo Duebien no hɔn Quorum ho no etu fo dɛ, “Ɔwɔ dɛ yɛbɔ mu fa apam, yɛdze ndzɛmba a ɔboa biara a wɔakã nsa dzi dwuma, yɛhwehwɛ Sunsum Krɔnkrɔn no ne nkenyan no, yebisa Ewuradze Ne pisi, na eyɛ krada na ekɛyɛ edwuma.

“Mobɔ hom anohoba dɛ: sɛ hom bedzi nhwɛdo yi do a, hom benya kwankyerɛ pɔkyee afa woana, ebɛnadze, dabɛn na hemfa a ɔsɛ dɛ yɛma wɔ Nyame No kwan do.”³

© 2018 odzi wɔ Intellectual Reserve, Inc. Wɔakora do tumdzi nyina. USA na wotsintsimii. Ministering Principles, September 2018 ne nkyerɛasee.Fante. 15052 502

Nsɛnsin

1. Hwɛ Preach My Gospel: A Guide to Missionary Service (2004), 183.

2. Chi Hong (Sam) Wong, “Rescue in Unity,” Liahona, Ɔberɛfɛw 2014, 14–15.

3. Dieter F. Uchtdorf, “Providing in the Lord’s Way,” Liahona, Ɔberɛfɛw 2011, 55.

“Erosom ho Fapem” nkyerɛwee no bɔboa hɛn ma yesũa mbrɛ yebesi bɔhwɛ hɛnho nkorkor—ɔnnyɛ amandzɛɛbɔ nsɛm a yɛrekɛkyɛ wɔ hɛn ɔsom nsera ber no mu. Sɛ yɛba bohu hɔn a yɛsom hɔn no yie a, Sunsum Krɔnkrɔn no bekenyan hɛn ma yeehu asɛm a wobehia dze akã hɛn tsema na ayamuhyehye ndzeyɛɛ ho.

Apamfa mu Tum no

President M. Russell Ballard, Asomafo Duebien hɔn Quorum no ne President Ananmusinyi no akã dɛ “Sɛ ipɛ dɛ itu biribi mpon a, ɔwɔ dɛ efa ho apam,”. “Sɛ [yɛyɛ] a, yenya sunsum mu mboa nwanwa bi a ɔma hɛn mbɔdzembɔ anaa ndzeyɛɛ no kɔ kan ɔnam ndzeyɛɛ anaa mboa horow a, no nsunsuando no bor afã no nkekabɔ mu nyina no” (wɔ R. Scott Lloyd, “Counseling with Councils Is Lord’s System, Elder Ballard Declares,” Sanda 11, 2017, news.lds.org; “Strength in Counsel,” Ensign, Ɔberɛfɛw 1993, 77).

Yɛrekyekyer nkitahodzi mapã no so yɛ yɛrobɔ mu afa apam ne fã bi a ohia. Hwɛ “Yɛrekyekyer Nkitahodzi Mapã,” so wɔ Dzifuu 2018 dawurbɔ krataa Liahona, wɔ krataafa 6.