Erosom ho Fapem, Obiradzi 2018
Yɛrekyekyer Nkitahodzi Mapã
Sɛ yɛnye binom wɔ nkitahodzi mapã a, yetum hwɛ hɔn do ara yie.
Ɔfrɛ dɛ yɛbɔsom binom no yɛ kwan a yɛnye hɔn bedzi nkitaho papa—nkitahodzi a ɔbɛma woenya ahomka dɛ wobebisa anaa wɔbɛgye hɛn mboa. Sɛ yɛbɔ mbɔdzen dɛ yebenya nkitahodzi a ɔtse dɛm a, Nyankopɔn tum sesã nkitahodzifo beenu no hɔn abrabɔ.
Sharon Eubank, Ɔpamfo a Odzi Kan wɔ Wiadze Mfɛndzanan Relief Society Presidency mu no, kãa dɛ “Megye dzi nokwar mu ara dɛ nsesã soronko biara mmba a nkitahodzi soronko nnka ho.’’ Ɔkãa dɛ, ama hɛn ɔsom dwuma dze nsesã aba binom hɔn abrabɔ mu no, otwar dɛ “otsim wɔ nokwar pɛ dɛ yebesiesie na yetsie na yenya adwen saa na yɛakyerɛ.’’1
Nkitahodzi mapã nnyɛ ndaadaa ndzeyɛe. Wɔkyekyer no wɔ ayamuhyehye, nokwar mbɔdzembɔ, na “ɔdɔ mapã’’ mu (N&A 121:41).2
Akwanhorow a yɛdze Bɛkyekyer Nkitahodzi na Yɛbɛhyɛ no Dzen
Elder Dieter F. Uchtdorf a ɔkã Asomafo Duebien no hɔn Quorum ho no kãa dɛ, “Yɛnye nyimpa nkorkor kyekyer [nkitahodzi] wɔ ne mber mu.’’3 Sɛ yɛper nye hɔn a yɛsom hɔn no nya nkitahodzi mapã a, Sunsum Krɔnkrɔn no botum akyerɛ hɛn kwan. Nsusui horow a odzi do no gyina nhwɛdo a Elder Uchtdorf mae no do.4
-
Sũa hɔnho asɛm
President Ezra Taft Benson (1899---1994) kyerɛkyerɛɛ dɛ, “Nnkotum asom hɔn a nnyim hɔn no yie.’’ Osusuu dɛ ibohu obiara ne dzin wɔ ebusua no mu na ibohu dza ohia a osisi wɔ mu no, tse dɛ awoda, nhyira, enuma na awar. Iyi ma kwan ma ikyerɛw asɛnsin anaa ifrɛ dze ma ebusuaba no mbo na yɛ wɔ no mbɔdzembɔ anaa no koyimdzi soronko no ho.5
-
Wɔbɔ mu hwer hɔn mber.
Nkitahodzi gye mber dze etu mpon. Hwehwɛ akwanhorow fa sera hɔn. Nhwehwɛmu kyerɛ dɛ erema nkorɔfo ehu dɛ hɔn ho hia wo no hia tsitsir ma nkitahodzi.6 Taa sera hɔn a wɔafrɛ wo dɛ som hɔn no. Nye hɔn nkasa wɔ asɔrfi. Fa akwanhorow biara a odzi mu ka ho—tse dɛ email, Facebook, Instagran, Twitter, Skype, foon ɔfrɛ, anaa fa kaad kɛma no. Elder Richard G. Scott (1928–2015) a ɔkã Asomafo Duebien hɔn Quorum ho no kãa tum a wɔkyerɛ no wɔ ɔdɔ na mboa nketsenketse ho asɛm: “Ɔtaa dɛ mubobuei me kyerɛwsɛm mu no, … nna meehu abamba asɛnsin a [me yer] Jeanene akyerɛw no ɔdɔ mu ara dze ahyɛ nkrataafa no mu. … Nsɛnsin yinom a wɔsom bo no … kɔdo yɛ awerɛkyekyer na nkenyan egudze a wonntwa ho bo.’’7
San so kaa dɛ, nkitahodzi gye nyimpa beenu. Ibotum akyerɛ ɔdɔ na anyɛnkoyɛ, naaso nkitahodzi no nnkenyin gyedɛ wɔgye na wɔsan dze ma. Sɛ nyimpa kor no nnkɛgye a, mma mmfa nkitahodzi no nnhyɛ no do. Ma no mber ma onhu wo nokwar mbɔdzembɔ, na sɛ okehia a, nye wo baanodzifo mfa apam dɛ sɛ nkitahodzi mapã no botum ayɛ yie anaa.
-
Fa tsema dzi Nkɔmbɔ
Yɛrekyekyer nkitahodzi mapã hia dɛ yɛbɛtra enyiwado dze no. Enyiwado nkɔmbɔdzi ne kɛse yɛ kasa nketsenketse a ɔfa ndzɛmba a ibɛyɛ, wimu nsakyeree, na nsɛmnsɛm a ho nnhia pii, mbom atsenkã ne nkyɛe, gyedzi, botae, na dza ohia dɛ ɔdze nkabɔmu a mfaso wɔ mu no nnkã ho. Ɔsor Egya ayɛ nkɔmbɔdzi yi a mfaso wɔ ho no fasusu a Ɔnye ne Ba kyɛ N’atsenkã na Ne nhyehyɛ (hwɛ John 5:20) na Odua no nkɔnhyɛfo do nye hɛn kyɛ (hwɛ Amos 3:7). Ber a yɛnye hɛn ho rekyɛ dza osisi dabiara na abrabɔ mu tafɛrbanyinmbɔmu dɛ mbrɛ Sunsum no kyerɛ no no, yenya enyisɔ ma hɛnho nkorkor mu biara ber a yehu enyikadze kor a hɛn nyinara yɛpɛ na sũahu a yɛbɔ mu akyɛ no.
Eretsie yɛ nkɔmbɔdzi n’afã a ohia papaapa dɛ ewɔ tsema.8 Sɛ itsie no asopa mu a, wo kwan dɛ iboa binom ma wɔba Christ hɔ no nyin yie ber a inya hɔn ehiadze ho ntseasee na nhumu na ber a wɔtse dɛ wɔdɔ hɔn, wɔtse hɔn ase, na wɔwɔ ahotɔ mu.
-
Kamfo nsonsonee a ɔda hɔn ntamu nye dza ɔma wɔyɛ asɛfo.
Elder Utchdorf kãa dɛ “Binom … gye dzi dɛ Asɔr no pɛ dɛ ɔwen asɔrba biara fi adze kor noara mu—dɛ ɔwɔ dɛ kor biara no bɔbea, atsenkã, adwen, na no su, yɛ tse dɛ ma obiara dze tse. “Iyi nye Nyankopɔn N’anwanwasu bɔbɔ ebira, Ɔno a ɔbɔɔ dasanyi biara soronko fi no nua ho. …
“Asɔr no kɔ do ber a yenya nsonsonee yi ho mfaso na yɛhyɛ obiara nkuran dɛ yebotu hɛn talent horow mpon na yɛdze bedzi dwuma dze epegya hɛn mfɛfo esuafo na yɛahyɛ hɔn dzen.’’9
Yɛbɔdɔ binom dɛ ma Nyankopɔn dɔ hɛn no hia dɛ yɛbɔ mbɔdzen hu binom dɛ ma Nyankopɔn hu hɔn no. President Thomas S. Monson (1927–2018) kyerɛɛkyerɛ dɛ, “Otwar dɛ yetum dɛ yebohu [binom] nnyɛ dɛ ma wɔtse sesieara na mbom dɛ mbrɛ wobotum abɛyɛ.’’10 Yebotum abɔ mpaa dze agye mboa dze ehu binom dɛ mbrɛ Nyankopɔn hu hɔn no. Sɛ yegyina binom hɔn ndaamba mpontu do dze hwɛ hɔn a, dɛmara so na wobenyin abɛyɛ.11
-
Som hɔn.
Ma wo nkãtse nyɛ har mma hɔn a esom hɔn no na nya pɛ dɛ edze wo mber na talent horow bɛma, sɛ wɔ hia ber mu o anaa osiandɛ ewɔ hɔnho tsema. Sɛ mpofirmu ahohia, yarba, anaa gyinabew a ohia bi ba a, ibotum akɔ hɔ akɛma awerɛkyekyer, abamba, na mboa a ohia. Naaso wɔ nkitahodzi pii mu no wɔse hɛn ana yɛayɛ. Nyankopɔn dze nyimpa ne pɛ maa no ama wɔaayɛ biribi akyɛn dɛ wobodua no do ayɛ biribi (hwɛ 2 Nephi 2:14). Dɛmara dɛ Ɔsomafo Paul kyerɛkyerɛɛ dɛ yɛdɔ Nyankopɔn osiandɛ Odzi kan dɔɔ hɛn no (hwɛ 1 John 4:19), sɛ ɔnam hɛn somdwuma do binom tse hɛn nokwar ɔdɔ nkã a, obotum agow akoma ma ɔdɔ na awerɛhyɛmu enyin.12 Iyi ma ayamuyie ndzeyɛe nyin kɔ sor a obotum akyekyer nkitahodzi.
Yɛresom tse dɛ ma Agyenkwa No Yɛe
Jesus Christ nye N’esuafo kyekyeer nokwar nkitahodzi mapã (hwɛ John 11:5). Nna Onyim hɔn (hwɛ John 1:47–48). Odzii mber wɔ hɔn nkyɛn (hwɛ Luke 24:13–31). No nkɔmbɔdzi traa enyiwado dze no (hwɛ John 15:15). Ɔkamfoo hɔn nsonsonee (hwɛ Matthew 9:10) na ohun hɔn ndaamba (hwɛ John 17:23). Mpo dɛ Ɔyɛ adze nyina Owura no, Ɔsoom obiara, rese dɛ Ɔammba ma wɔaasom No, na Ɔbɔsomee (hwɛ Mark 10:42–45).
Ebɛnadze na enye hɔn a ɔafrɛ wo dɛ som hɔn no bɛyɛ dze akyekyer nkitahodzi dzendzen?
© 2018 odzi wɔ Intellectual Reserve, Inc. Wɔakora do tumdzi nyina. Wotsintsimii wɔ USA Ministering Principles, August 2018 ne nkyerɛasee. Fante 15051 502