Հինգ քայլ, որ կատարում են լավ լսողները

Իսկապես լսելով, դուք կկարողանաք իմանալ, թե ինչպես արձագանքել ուրիշների հոգևոր և նյութական կարիքներին, ինչպես Փրկիչը կաներ:

Տասներկու Առաքյալների Քվորումից Երեց Ջեֆրի Ռ․ Հոլլանդն ասել է․ «Հավանաբար լսելն ավելի կարևոր է, քան խոսելը։ … Եթե լսենք սիրով, մենք հետո կարիք չենք ունենա մտածել, թե ինչ ասենք: Այն կտրվի մեզ Հոգու միջոցով»:¹

Լսելը հմտություն է, որը մենք կարող ենք սովորել: Լսելով, ցույց ենք տալիս մեր սերը ուրիշների հանդեպ, օգնում ենք կառուցել ամուր հարաբերություններ և հրավիրում ենք Հոգին օրհնելու մեզ զանազանելու պարգևով, որպեսզի հասկանանք ուրիշների կարիքները:² Ահա հինգ եղանակներ, որոնցով մենք կարող ենք լավացնել լսելու մեր հմտությունը:

1.Ժամանակ տվեք

Շատ մարդիկ ժամանակի կարիք ունեն, որպեսզի հավաքեն իրենց մտքերը՝ նախքան խոսելը: Մտածելու ժամանակ տվեք նրանց խոսելուց առաջ և հետո (տես Հակոբոս 1.19): Եթե նրանք ավարտել են խոսելը, չի նշանակում, որ ասել են ամեն բան, ինչ պետք է ասեին: Մի վախեցեք լռությունից (տես Հոբ 2.11–3.1 և Ալմա 18.14–16):

2.Ուշադրություն դարձրեք

Մենք ավելի արագ ենք մտածում, քան ուրիշները խոսում են: Դիմակայեք հապճեպ եզրակացություններ կատարելու և ձեր ասելիքից արագ մտածելու գայթակղությանը, երբ ուրիշներն արդեն ավարտել են խոսելը (տես Առակաց 18.13): Փոխարենը լսեք՝ հասկանալու մտադրությամբ: Ձեր արձագանքը ավելի լավը կլինի, քանի որ այն հագեցած կլինի ավելի մեծ հասկացողությամբ:

3.Հստակեցրեք

Մի վախեցեք հարցեր ուղղել, որոնք կհստակեցնեն որոշ բաներ, որոնք դուք չեք հասկացել (տես Մարկոս 9.32): Հստակեցումը մեղմացնում է թյուրըմբռնումը և ցույց է տալիս ձեր հետաքրքրությունը ասվածի հանդեպ:

4.Արձագանքեք

Վերաձևակերպեք ձեր լսածը և այն, թե ինչպես եք հասկացել ուրիշի զգացածը: Սա օգնում է, որ նրանք իմանան՝ արդյոք իրենց հասկացել են, և նրանց հստակեցնելու հնարավորություն է տալիս:

5.Ընդհանուր համաձայնության եկեք

Դուք կարող եք չհամաձայնվել ասվածի հետ, բայց համաձայնվեք, ինչի հետ կարող եք, առանց աղավաղելու ձեր սեփական զգացմունքները: Համաձայնվելով, կարող եք թուլացնել անհանգստությունը և պաշտպանողական վարքագիծը (տես Մատթեոս 5.25):

Նախագահ Ռասսել Մ. Նելսոնն ուսուցանել է, որ մենք պետք է «սովորենք լսել, և լսենք, որ սովորենք մեկս մյուսից»:³ Երբ լսեք ուրիշների մասին սովորելու մտադրությամբ, դուք ավելի լավ կհասկանաք նրանց կարիքները և կլսեք հուշումներ այն մասին, թե ինչպես կարող եք հոգ տանել ձեզ շրջապատողների մասին, ինչպես Փրկիչը կաներ:

Լսել՝ նշանակում է սիրել

Երեց Հոլլանդի պատմությունը լուսաբանում է լսելու զորությունը.

«Իմ ընկեր Թրոյ Ռասսելը ավտոտնակից դանդաղ հանում էր իր բեռնատարը: … Նա զգաց, որ հետևի անիվը գլորվեց մի ուռուցիկ բանի վրայով: Նա դուրս եկավ մեքենայից և հայտնաբերեց իր թանկագին իննամյա որդուն՝ Օսթինին, երեսնիվայր ընկած մայթին: … Օսթինը մահացել էր:

Չկարողանալով քնել, չկարողանալով գտնել խաղաղություն, Թրոյը անմխիթար վիճակում էր: Բայց այդ տագնապալի դեպքից հետո եկավ … Ջոն Մաննինգը: …

Ես իրոք չգիտեմ, թե ինչ ժամանակացույցով էին Ջոնը և նրա կրտսեր զուգընկերը այցելել Ռասսելների տուն:… Միայն գիտեմ, որ անցյալ տարվա գարնանը եղբայր Մաննինգը եկել ու վերցրել էր Թրոյ Ռասսելին այդ ողբերգական ճանապարհից, կարծես, վերցնում էր հենց փոքրիկ Օսթինին: Որպես … եղբայր ավետարանում, Ջոնը պարզապես քահանայության խնամքով վերաբերվեց Թրոյ Ռասսելին: Նա սկսեց, ասելով. «Թրոյ, Օսթինն ուզում է, որ ոտքի կանգնես, այդ թվում բասկետբոլի դաշտում, այնպես որ ես կլինեմ այստեղ ամեն առավոտ ժամը 5:15: Պատրաստ եղիր …»

«Ես չէի ցանկանում գնալ,- Թրոյն ասաց ինձ ավելի ուշ,- որովհետև ես միշտ վերցնում էի Օսթինին ինձ հետ: … Բայց Ջոնը պնդեց, և ես գնացի: Այդ առաջին օրը վերադառնալիս, մենք զրուցում էինք, ավելի շուտ ես էի խոսում, իսկ Ջոնը լսում էր: … Սկզբում դժվար էր, բայց ժամանակի ընթացքում ես հասկացա, որ վերագտնում եմ իմ ուժը, հանձինս [Ջոն Մաննինգի], ով սիրում էր ինձ և լսեց ինձ, մինչև արևը վերջապես կրկին ծագեց իմ կյանքում»: ⁴

© 2018 by Intellectual Reserve, Inc. Բոլոր իրավունքները վերապահված են: Տպագրված է ԱՄՆ-ում։ Անգլերենի հաստատումը. 6/17: Թարգմանության հաստատումը. 6/17: Թարգմանության բնագիր․ Ministering Principles, June 2018. Armenian. 15055 201