President a Odzi Kan na n’Apamfo Amandzɛɛbɔ, Ebɔbira 2018
Ber a Yɛbɔmu Kɔ Kan no
President Russell M. Nelson ne Kasaa
Mo nuanom adɔfo na me nkyerɛbaa, ahobrɛadze mu na menye hom wɔ ha anapa yi. Nda anan a abɛsen yi na yɛkɛpɛɛ ɔbarimba ɔkatakyi, Nyankopɔn no nkɔnhyɛnyi—President Thomas S. Monson kurabew. Nsɛnfua dodow biara nnkotum akyerɛ n’abrabɔ ne kɛseyɛ anaa no krɔnee. Hɛn anyɛnkoyɛ na dza ɔkyerɛkyerɛɛ me ho nkae no bɛyɛ me enyisɔ daapem. Sesei otwar dɛ yɛdze gyedzi a odzi mu wɔ Ewuradze Jesus Christ a, Asɔr yi yɛ Ne dze no, hwɛ ndaamba kwan.
Nda ebien a abɛsen no, Asomafo atseafo no nyina hyiaa mu wɔ Salt Lake Temple abansor. Hɔn nyina sii egyinae kor dɛ, odzi kan, wɔbɛhyehyɛ President a Odzi Kan na n’Apamfo no fofor sesei na, otsĩa ebien, dɛ monsom dɛ Asɔr no ne President. Nsɛm nnkotum akã akyerɛ hom nkã-tse a minyae ber a m’Enuanom—Enuanom a wokitsa asɔfodzi nsaafee nyina a wodua Nkɔnhyɛnyi Joseph Smith do dze saan ananmu baa wɔ berano yi mu no—dze hɔn nsa guu me tsir do na woyii me sii hɔ na wɔhyɛɛ me Asɔr no ne President. Nna ɔyɛ ahobrɛadze sũahu krɔnkrɔn.
Nkyii ɔbɛyɛɛ m’asodzii dɛ mohwehwɛ hɔn a Ewuradze esiesie hɔn dɛ wɔmbɛyɛ m’apamfo no. Mibesi dɛn asan mu eyi Asomafo Duebien no a, modɔ hɔn mu kor biara ara yie no, hɔn mu ebien pɛr? Ɔyɛ me enyisɔ ara yie dɛ Ewuradze tsiei mo ntotɔserɛ mpaabɔ. Meda President Dallin Harris Oaks na President Henry Bennion Eyring ase papaapa dɛ woenya pɛ dɛ wɔnye me bɔsom dɛ Ɔpamfo a Odzi Kan na Ɔpamfo a Otsĩa Ebien. President Dieter F. Uchtdorf asan kɔ n’ananmu wɔ Asomafo Duebien no hɔn Quorum no mu. Seisei mpo oenya dwumadzi tsitsir a ɔsɛ fata ɔnoara ara yie.
Mekamfo ɔno na President Erying wɔ hɔn som nwanwa a wɔdze soom dɛ apamfo maa President Monson. Woetu hɔnho esi hɔ dze nkenyan asom ara yie. Yɛkyerɛ hɛn enyisɔ ma hɔn. Hɔn mu kor biara pɛ dɛ ɔsom bea a wohia no tsitsir.
Dɛ ɔyɛ Ɔsomafo panyin abedzi ekyir no, President Oak bɛyɛ Asomafo Duebien no hɔn President. Naaso, osian ne frɛ wɔ President a Odzi Kan na n’Apamfo mu ntsi na ma ɔnye Asɔr nhyehyɛɛ sɛ no, President M. Russell Ballard, nyia odzi do wɔ mpanyindzi mu no, bɔsom dɛ quorum no ne President no ne Ngyina-Ananmu. President a Odzi Kan na n’Apamfo nye Duebien no bɔbɔ mu ayɛ edwuma dze ehu Ewuradze Ne pɛ na wɔama No ndwuma krɔnkrɔn no akɔ kan.
Yɛda hom ase wɔ hom mpaabɔ ho. Hom abɔ no wiadze nyina mu ama hɛn. Dakor anapa bi a, President Monson fii mu ekyir no, mfe-anan banyimba bi a wɔfrɛ no Benson bɔɔ mpaabɔ a ɔtse dɛm no bi. Meserɛ kã ne krataa mu nsɛm no bi a ne maame kyerɛwee dze brɛɛ mo hokãfo Wendy. Benson bɔɔ mpaa dɛ, “Ɔsor Egya, yɛda wo ase dɛ President S. Monson botum ehu no hokãfo bio. Yɛda wo ase wɔ hɛn nkɔnhyɛnyi fofor ho. Boa no ma onya akokodur na onnkosuro dɛ ɔyɛ fofor. Boa no ma onyin nya apɔwmudzen na ahoɔdzen. Boa no ma onya tum osiandɛ ɔwɔ asɔfodzi no. Na boa hɛn ma yɛnyɛ dza oye daa.”
Meda Nyankopɔn ase wɔ mbofra a wɔtse dɛm nye awofo a wɔmmfa hɔn tsenenee pisi nndzi agor, wɔkyɛɛn hɔn enyi wɔ baatanyɛ ho—ma baatan biara, kyerɛkyerɛnyi, nye asɔrba biara a wɔasoa no adzesoa a ɔyɛ dur naaso ɔsom ɔpɛ mu ara no. Anaadɛ, m’enyi sɔ hom mu kor biara ahobrɛadze mu ara.
Ewuradze na Ɔda ne Tsir.
Ber a yɛbɔmu kɔ kan no, moto nsa frɛ hom dɛ hom ndwendwen kwan mapã no a Ewuradze dua do dze hwɛ N’Asɔr do no. Sɛ Asɔr no ne President fi mu a, nyia odzi do a wɔbɛfrɛ no dɛ onsom dɛm dzibew no nnyɛ esumadze. Wɔnntow amba biara, obiara mper ho, mbom ɔyɛ mpanyindzi nhyɛananmu nhyehyɛɛ krɔnkrɔn a, Ewuradze Noara dze abɔbɔ adze no na odzi dwuma dzinn.
Ɔsomafo biara no som dabiara no yɛ adzesũa da na ahoboaboa ama ndaamba asodzii bi. Ɔgye mfe du mfe du pii mu som ana Ɔsomafo bi efi ahyɛse asetsena dze ekefir mpanyindzi asetsena wɔ kɔntɔnkrɔn no mu. Dɛm ber no mu no, onya sũahu wɔ Asɔr n’afã biara dwumadzi ho. Ber a edwumayɛ taa dze no kɔ wiadze aporow no, ɔba so bohu wiadzemba yie, a hɔn abakɔsɛm, amandze, kasa horow kã ho. Asɔr no ne baanodzi mpanyindzi nhyɛananmu nhyehyɛɛ no yɛ soronko. Minnyim biribiara a ɔtse dɛm. Onnyi dɛ iyi yɛ hɛn nwanwa, osiandɛ iyi nye Ewuradze N’Asɔr. Ɔnnyɛ edwuma wɔ ɔdasanyi no kwan do.
Masom wɔ Asomafo Duebien no hɔn Quorum wɔ Presidentfo beenum a wɔabɛsen kɔ ase. Mahwɛ ber a President kor biara nya nyikyerɛ na odzi nyikyerɛ no do. Daa Ewuradze ama No nkɔnhyɛfo nkyerɛkyerɛ na nkenyan na Ɔbɔkɔ do daa so ayɛ. Ewuradze na Ɔda ne tsir. Hɛn a wɔahyɛ hɛn asɔfo dɛ yɛngye Ne dzin krɔnkrɔn no ho dase wɔ wiadze nyina mu no bɔkɔ do ahwehwɛ ehu Ne pɛ na yeedzi do.
Hom Nantsew Ahyɛmudzi Anamɔn Kwan no do
Afei, mekã kyerɛ Asɔrba biara dɛ, hom nantsew ahyɛmudzi anamɔn kwan no do. Hom pisi dɛ hom bɛkã Agyenkwa no do, ber a hom nye No dzi ahyɛmu na nkyii hom sie ahyɛmudzi no, bobuei sunsum mu nhyira na ndzinoa biara a ɔwɔ hɔ ma mbanyin, mbaa na mbofra a wɔwɔ beebiara no mbobow ama hɔn.
Dɛ yɛyɛ President na n’Apamfo afoforfor yinom, yɛpɛ dɛ yɛhyɛ ase a ewiei no da hɛn adwen do. Ɔnam dɛm ntsi, yɛrekasa fi temple mu kyerɛ hom ndɛ. Ewiei no a hɛn nyina rohwehwɛ nye dɛ yebenya Ewuradze fie mu tum akyɛdze, wɔasɔw hɛn ano dɛ ebusua ebusua, yedzi nokwar ama ahyɛmu a yɛayɛ no temple mu ama yɛafata Nyankopɔn akyedze a ɔso kyɛn akyedze biara—ɔyɛ onnyiewiei akyɛdze no. Temple ayɛdze horow na ahyɛmu a hom dzi no hɔ no yɛ adze tsitsir a ɔhyɛ hom abrabɔ, hom awar na hom ebusua dzen, na ɔboa ma hom tum a hom dze besiw ɔsɛɛfo no a ɔkõ tsĩa hom no kwan. Temple a hom sɔr wɔ mu na hom som ma hom ewuakɔr wɔ hɔ no dze ankorankor nyikyerɛ na asomdwee mbordo behyira hom na wɔahyɛ hom enyimpi no dzen dɛ hom bɛnantsew ahyɛmudzi anamɔn kwan no do.
Sesei, sɛ hom mu binom efi anamɔn kwan no do a, hom ma memfa m’akoma mu enyidado nyina nto nsa mfrɛ dɛ yɛserɛ hom nsan ekyir mbra. Mbrɛ wo dadwen tse biara no, mbrɛ wo haw tse biara no, beebi wɔ hɔ ma wo wɔ Ewuradze N’Asɔr no mu. Sɛ hom fa kwan sesei san ba ahyɛmu anamɔn kwan no do a, wobehyira hom nye ebusuasantsen a wonnyaa nnwoo hɔn. Hɛn Egya a ɔwɔ Sor dɔ Ne mba ara yie, na Ɔpɛ dɛ hɛn mu kor biara san kɔ Ne nkyɛn wɔ fie. Iyi nye Jesus Christ N’asɔr a ɔwɔ hɔ ma Nda a Odzi Ekyir Ahotseweefo no botae tsitsir no—dɛ ɔbɔboa hɛn mu kor biara ma ɔasan akɔ fie.
Modɔ hom kɔ bun mu—ɔdɔ a oenyin mfe du mfe du a menye hom hyiahyia, nye hom asom, na m’asom hom no. Hɛn asɛdze a ofi sor nye dɛ yɛbɔkɔ aman, ebusuafo, kasa horow, nye nyimpa nyinara hɔ, aboa ma yesiesie wiadze yi ama Ewuradze Ne Mbae a Otsĩa Ebien no. Yɛdze gyedzi wɔ Ewuradze Jesus Christ mu bɛyɛ iyi, a yenyim dɛ Ɔno nye Ɔkandzifo no. Iyi nye N’edwuma na N’Asɔr. Yɛyɛ N’asomfo.
Mepaa mu kã mosom ma Nyankopɔn hɛn Onnyiewiei Egya na Ne Ba Jesus Christ. Minyim Hɔn, modɔ Hɔn, na mobɔ anohoba dɛ medze mo nkwa biara a wɔaka no—bɔsom Hɔn—na hom. Wɔ Jesus Christ ne dzin krɔnkrɔn no mu, amen.
© 2018 Intellectual Reserve, Inc. All rights reserved. Printed in USA. English approval: 6/17. Translation approval: 6/17.Translation of First Presidency Message, April 2018. ne Nkyerɛasee. Fante. 15048. 502