REKAR lo E
Aolep rein kajjojo raar lukkuun loe Rilo̧mo̧o̧r eo ke eaar jerkakbeje, ak kwe maron̄ bar juon kam̧ool kōn Kraist ilo wāween in.
Emōj an Jerkakbeje,jān Greg K. Olsen, emaron̄ kar jab kape
Ta am̧ ļōmņak n̄e kwōn bar āinwōt kam̧ool kōn Kraist eo eaar jerkakbeje? Elōn̄ bukwi armej ilo tōre ko an Jisōs, raar jab aikuj antooneļo̧k—raar mour kake. Jeje ko rekwojarjar ej kwaļo̧k kōn jet iaan rekoot in ta ko raar waļo̧k ilo Kalim̧ur Ekāāl im ko jet ilo Bok in Mormon ke Irooj ālkin an jerkakbeje eaar waļo̧k n̄an armej ro. Aolep rein kajjojo raar kam̧ool juon iaan kabwilōn̄lōn̄ eo eļaptata ilo bwebwenato: Jisōs Kraist eaar anjo̧ ioon mej im kōm̧m̧an bwe jen maron̄ bar mour. Ebwe an kar kabwilōn̄lōn̄, ejimwe ke?
Ta lukkuun meļeļein juon rikam̧ool an Kraist? Jen mōk lale jet iaan tōre ko ilo jeje ko rekwojarjar im ļōmņak elmen kōj, men̄e jaar jab lo kōn mejād, jemaron̄ barāinwōt rikam̧ool an Kraist.
Meri Magdalini
Meri Magdalini eaar rikam̧ool eo jinointata. Jibbon̄on Jabōt ālkin Dōbwāāl eo, eaar itok n̄an lōb eo ippān bar jet kōrā n̄an kapit ānbwin Irooj. Ke Meri eaar lo bwe ejjeļo̧k kobban lōb eo, eaar jan̄. Juon armej eaar kōnaanļo̧k jān likin im kajjitōk, Kōrā, etke kwōj jan̄? Pijaikļo̧k an ilbōk ke ej lo bwe Jisōs eo, eaar jerkakbeje jān mej. (Lale Jon 20:1–18.)
Ruo Rikaļoor ilo iaļ eo aer ļo̧k n̄an Emmeōs
Iaļ eo n̄an Emmeōs, jān Jon McNaughton
Cleopas im rikaļoor eo juon raar etetal ilo iaļ n̄an Emmeōs ke rej ioon jet ruwamājet. Raar jab kile ro m̧ōttāer, ak ilo iien kōjota eo aer, ruwamājet eo eaar ruje pilawa eo. Innām mejāier eaar peļļo̧k, im raar kile bwe raar etetal ippān Rilo̧mo̧o̧r aolepān iien eo. “Būrued e jab bwil ilowad ke …?” raar kajjitōkin doon, ļōmņak kōn kam̧ool eo raar en̄jake bwe lukkuun m̧ool ekar pād ilubwiljier. (Lale Luk 24:13–34.)
Rijilōk ro Jon̄oul
Lo peiū im neō, jān Harry Anderson
Ruo rikaļoor ro raar etetal laļļo̧k ilo Emmeōs ippān Kraist kar jepļaakļo̧k n̄an Jerusalem im ba n̄an jon̄oul iaan Rijilōk ro kōn men eo raar loe. Ke raar kōnono wōt, Rilo̧mo̧o̧r eaar kwaļo̧k Emake n̄an er, im ba, “Lo peiū im neō, bwe N̄a make: kom̧win likūt peimi ioō im lo; bwe jetōb ejjeļo̧k kanniōkin im diin, āinwōt kom̧ij lo Ippa.” (Lale Luk 24:36–41, 44–49.)
Rijilōk Thomas
jin̄n̄a pijain Thomas by Brian Call
Rijilōk Thomas eaar jab pād ke Rilo̧mo̧o̧r eaar jino waļo̧k n̄an Rijilōk ro jet, kōn menin eaar jab tōmak bwe Kraist em̧ōj an jerkakpeje. Juon wiik tokālik, Kraist eaar bar waļo̧k n̄an Rijilōk ro. Ilo iien in Thomas eaar pād, im kōnke eaar lo Kraist, eaar tōmak ke em̧ōj an jerkakbeje. Rilo̧mo̧o̧r eaar kakkōļ Thomas ņae tōmak ālkin wōt an kar loe: “Kōn ke kom̧ ar loe eō, kom̧ ar tōmak: ejeram̧m̧an ro rej jab loe, im rej tōmak.” (Lale Jon 20:24–29.)
Jon̄oul juon Rijilōk ro ilo lo̧m̧aļo̧ in Taibiriōs
Jisōs eo eaar Jerkakbeje me ekar pād ilo lomalo in Taibiriōs, jān David Lindsley
Juon raan ejjab to jān iien Jerkakbeje eo, jet iaan Rijilōk ro raar etal im en̄ōd ilo lomalo in Taibiriōs ak eaar ejjeļo̧k koņaer. Jibbon̄on eo juon, Rilo̧mo̧o̧r eaar waļo̧k im eaar ba n̄an er bwe ren door ok i anmooņōn loon eo. Ke raar kōm̧m̧ane, ok eo eaar obrak kōn ek jon̄an raar jab maron̄ tōbwe lōn̄tak! Ālkin kōjota eo ippān doon, Rilo̧mo̧o̧r eaar katakin er kōn aorōkin kwaļo̧k naan n̄an ro jet, im ba, “Kwōn naajdik Aō sip.” Rijilōk ro raar ajeļo̧k aolepān mour ko aer n̄an kōm̧m̧ane menin—katakin armej ro kōn Kraist—im jet iaan iien ko, raar leļo̧k mour ko aer kōn wōt jerbal in. (Lale Jon 21:1–22.)
RiNipai ro ilo Amedka
Juon Rilale Sip,jān Howard Lyon
Ilo iien Dōbwāāl eo, āne ko ilo Amedka kar kakkure kōn m̧akūtkūt in laļ, kijeek, im jorrāān ko an laļ, im jilu raan in an marok n̄an kōkkaļļeik mej eo an Rilo̧mo̧o̧r. Tokālik, Kraist eaar walaļtak jān lan̄ im loļo̧k jarļepju in 2,500 armej ro raar kuk ippān doon iturin tampeļ Bountiful. Eaar kūr n̄an armej ro n̄an un̄ur jeno̧k in kinej ko ilo Pein im Neen im katin, im kar kwaļo̧k n̄an er, im kar kōjeraam̧m̧an ajri ro nejin RiNipai juon ļo̧k juon. Aaet elōn̄ armej ro raar kuk ippān doon ilo raan eo juon, im Rilo̧mo̧o̧r eaar loļo̧k er im kar katakin er. Rikaļoor ro raar ejaake Kabun̄ eo an Kraist, im Rinipai ro raar bōk juon kam̧ool ekajoor bwe er im Rilaman ro raar lukkuun oktak n̄an Irooj. (Lale 3 Nipai 11–18; bar lale 3 Nipai 8–10; 4 Nipai 1.)
Rikam̧ool ro Mokta im Kiiō
Kraist eaar waļo̧k n̄an elōn̄ ro jet, ekoba jet kōrā raar itok n̄an lōb eo n̄an jipan̄ Meri Magdalini kapit ānbwinin Kraist, juon kurup in 500 armej, Jemes, im Paul (Lale Matu 28:9; Jerbal 9:4–19; 1 Korint 15:6–7; bar lale 3 Nipai 19; 26:13.)
Jemaron̄ kar jab lo Rilo̧mo̧o̧r eo āinwōt an kar rikam̧ool rein loe, ak kwōj maron̄ wōt n̄an erom juon rikam̧ool an Kraist. Komaron̄ pukōt Rilo̧mo̧o̧r, āinwōt an Meri kar kōm̧m̧ane ke eaar etal n̄an lōb eo, ilo an ekkatak eļapļo̧k kōn E. Ak komaron̄ kamineneik tōmak eo am ilo E ilo am kōjparok kien ko an im ļoor kapilōk ko an rikanaan ro. Ak komaron̄ kile kōjeraam̧m̧an ko an Rilo̧mo̧o̧r ilo mour eo am̧, āinwōt rikaļoor ro ruo me raar etal ilo iaļ eo n̄an Emmeōs. Ilo season in Ijtō in, ļōmņak kōn ta meļeļein erom juon rikam̧ool an Kraist. Armej rein raar lukkuun jet rikam̧o̧ol ro raar lukkuun lo Kraist eo eaar jerkakbeje—ak ejjab wāween eo in wōt komaron̄ kam̧ool n̄an E ilo mour eo am̧.