2017
Tariņae ej Wōnm̧aanļo̧k Wōt
April 2017


Tariņae eo ej Wōnm̧aanļo̧k Wōt

Tariņae eo eaar ijjino ilo lan̄ ej wōnm̧aanļo̧k wōt n̄an rainin. Ilo m̧ool, Tariņae in ej ļapļo̧k wōt ilo an arrmej ro rekwojarjar kōpooj er n̄an jepļaak tok eo an Rilo̧mo̧o̧r.

Pija
clouds

Pija jān Katarina Stefanovic © iStock/Getty Images; Moment/Getty Images

Jabdewōt armej eo ej ron̄jake nuuj ko an peļaakin laļ in renaaj errā ippa ke jej mour ilo juon tōre in “tariņae ko im unoj ko kōn tariņae ko” (K&B 45:26). Em̧m̧an eo, aolep ro ilo laļ in retijem̧ļo̧k ilo Tariņae. Jeļļakkar tariņaeik jetōb ko renana ilo juon Tariņae eo ejjeļo̧k jemļo̧kin eo eaar ijjino ilo mour eo m̧okta jen ad kar ļo̧tak tok.

Kōnke jejjan̄in kar bōk ānbwin, jaar Tariņae ilo Lan̄ ilo an ejjeļo̧k jaje, pu, ak baam̧ ko. Ak Tariņae in eaar ļapļo̧k āinwōt jabdewot Tariņae ko raan kein, im bilien armej ro raar jako.

Tariņae eo ilo mour eo m̧okta eaar Tariņae ilo naan, ļōmņak, arto artak, im kareel (lale Revelaton 12:7–9, 11). Jerbal eo an Setan ej n̄an kalluik armej. Eaar jeļā ke mijak ej wāween eo em̧m̧an tata n̄an ko̧kkure tōmak. Emaron̄ kar kōjerbal akweel āinwot in: “Elukkuun pen.” “Epen n̄an kōm̧m̧an bwe en bar erreo.” “Elukkuun kauwōtata.” “Ewi wāween am̧ jeļā ke komaron̄ lōke Jisōs Kraist?” Eaar ļap an ebanban e Rilo̧mo̧o̧r eo.

Kam̧m̧oolol eo, karōk eo an Anij eaar anjo̧ ioon riab ko an Setan. Karōk eo an Anij eaar kitbuuj anemkwoj in kālet an aolep armej im juon kijejeto eļap. Jeova, āt eo jejeļā kake Jisōs Kraist, eaar m̧ōņōņō in ajeļo̧k mour eo an—bwe en en̄taan kōn bōd ko ad. Eaar kōnaan ajeļo̧k mour eo An n̄an ro jein im jatin bwe ro renaaj ukweļo̧k ren maron̄ bar erreo im erom āinwōt Jemāer Ilan̄. (Lale Moses 4:1–4; Ebream 3:27.)

Men eo juon em̧m̧an me eaar jipan̄ Irooj wiin i būruōn ro nejin Anij eaar kajoor ilo naan in kam̧ool ko An ro raar jutak ilikin, im kar pād ium̧win tōl an Michael, juon enjeļ (lale Revelesōn 12:7, 11; K&B 107:54). Ilo mour eo m̧okta, Adam kar ņa etan Michael, im Setan kar ņa etan Lucifer, meļeļein “ribōktok meram.”1 Āinwōt ilo lale ej juon āt eo ejjab jejjet n̄an juon irooj in marok (lale Moses 7:26), ak jeje ko rekwojarjar rej katakin bwe Setan eaar “enjeļ eo an Anij eo eaar ilo kōmaron̄e ilo im̧aan mejān Anij” m̧okta jān an kar bun̄ (lale K&B 76:25–28).

Ewi wāween an juon jetōb eo eobrak kōn jeļāļo̧kjeņ im imminene ko maron̄ bun̄ jān tōmak? Kōn an kar utiej būruōn. Lucifer eaar jum̧ae Jemedwōj Ilan̄ kōnke eaar kōņaan bōk aelōn̄ in kiin̄ eo an Anij bwe en an.

Ilo naan ko an “Beware of Pride,” Būreejtōn Ezra Taft Benson (1899–1994) eaar katakin bwe Lucifer “eaar kōņaan bwe ren kautiej e ilōn̄ in ļo̧k ro jet” im bwe “an utiej bōro eaar kōņaan bōk jea eo an Anij.”2 Em̧ōj am̧ kar bar ron̄ ke Setan eaar kōņaan bwe en ko̧kkure anemkwoj in kālet an armej, ak eaar jab kōn un in wōt unin aer kar joļo̧k e. Kar joļo̧k e jān lan̄ kōn an jum̧ae ņae Jemān im Eo Nejin (lale K&B 76:25; Moses 4:3).

Etke kwe im n̄a jej Tariņae ņae devil? Jaar Tariņae kōnke jaar tōmak. Jaar iakwe im jutak ilikin Jemedwōj Ilan̄. Jaar kōņaan erom āinwōt E. Lucifer eaar wōr juon an kōttōbar eoktak. Ekōņaan bōk jikin Jemed (lale Aiseia 14:12–14; 2 Nipai 24:12–14). Pijaikļo̧k jon̄an an Setan jum̧ae ekar kōmetak Jemed im Jined Ilan̄. Ilo jeje ko rekwojarjar, jej riit bwe “lan̄ ko rekar jan̄ kake e” (K&B 76:26).

Ālkin arto artak eo eļap, Michael im ritariņae ro an raar tōprak. Ruo m̧ōttan jilu in jetōb ko ilan̄ raar kālet n̄an ļoor Jemād (lale K&B 29:36). Setan im rikaļoor ro an kar joļo̧k er jān lan̄, ak raar jab joļo̧k er n̄an kapin marok. Mokta, raar jilkintok er n̄an laļ in (lale Reveleson 12:7–9), ijo Jisōs Kraist eaar ļo̧tak ie im ijo pinmuur eo An eaar bōk jikin.

Etke jetōb ro m̧ōttan Setan kar kōtļo̧k er n̄an itok n̄an laļ in? Raar itok n̄an bōktok jum̧ae n̄an ro rej kajjieon̄ kapoik er (lale 2 Nipai 2:11). Renaaj ke joļo̧k er juon iien n̄an kapin marok? Aaet. Ālkin juon taujin iiō, Setan im jetōb ro m̧ōttan naaj joļo̧k er n̄an indeeo.

Setan ejeļā ke em̧ōj bwini raan in mour ko an. Ilo Itok eo Kein Karuo an Jisōs, Setan im enjeļ ro an naaj lukwōj er ium̧win 1,000 iiō ko (lale Reveleson 20:1–3; 1 Nipai 22:26; K&B 101:28). Ilo an epaake tok raan eo, kajoor in naan ko rej kab baj kajoor ļo̧k wōt n̄an wiin i elōn̄ armej ro.

Kar kwaļo̧k n̄an Jon eo ribok reveleson kōn Tariņae eo ilo Lan̄ āinwōt m̧ōttan wōt visōn in eļap. Kar kwaļo̧k n̄an e wāween an Setan kar itok n̄an laļ in n̄an kapo armej. Uwaak eo an Jon in: “Wo n̄an āne im lo̧meto, bwe tepiļ ear wanlaļwōj n̄an kom̧ im eļap an illu, bwe e jeļā jidik wōt iien ippān” (Reveleson 12:12).

Ta ko Setan ej kōm̧m̧ani ilo raan in mour kein an, ilo an jeļā ke ejabwe iien n̄an e. Rijilōk Piter eaar je bwe “tepil eo, āinwōt ļaion e rorror, ej etetal wōt im pukot eo ej maron̄ in kan̄i” (1 Piter 5:8).

Pija
family kneeling in prayer

Ta eo eaar kareel Setan? Ejamin wor ānbwinnin, ejamin wōr ippān ak an baam̧le, im ejāmin bōk lan̄lōn̄ eo elikio, kōn menin ekōņaan bwe aolep em̧m̧aan im kōrā “ren en̄taan āinwōt e” (2 Nipai 2:27).

Devil ej kōttōpare aolep armej, ak eļaptata ro me ewōr aer kōttōbar n̄an bōk m̧ōņōņō eo ejjeļo̧k jemļo̧kin. Ealikkar an lukkuun ebanbane aolep armej ro me rej pād iaļ eo n̄an mour eo eutiejtata. Jeje ko rekwojarjar rej katakin kōj bwe Setan “ej kōm̧m̧an tariņae ippān ro rekwōjarjar an Anij, im jepooļe peļaakier” (K&B 76:29).

Tariņae eo eaar ijjino ilo lan̄ ej wōnm̧aanļo̧k wōt n̄an rainin. Ilo m̧ool, Tariņae in ej ļapļo̧k wōt ilo an arrmej ro rekwojarjar kōpooj er n̄an jepļaak tok eo an Rilo̧mo̧o̧r.

Būreejtōn Brigham Young (1801–77) eaar kanaan “bwe kabun̄ in enaaj ajeded, jeraam̧m̧an im eddōkļo̧k im debakbakļo̧k, im bwe kōn an ajeded Gospel in ipeļaakin laļ in, kajoor eo an Setan enaaj kajoor ļo̧k.”3

Ij ļōmņak kōj aolep jenaaj errā ke kanaan in em̧ōj an kūrm̧ool ilo ad kam̧ooli men ko renana rej waļo̧k ilo jukjukin pād ilo laļ in. Būreejtōn Young eaar katakin bwe jej aikuj ekkatak kōn kōttōbar ko an rikōjdat eo bwe jen maron̄ anjo̧ jān e. Ij kwaļo̧k wāween ko emān im ļōmņak ko jet kōn wāween anjo̧ jāni.

Kilen Ko̧kkure ko an Setan

1. Kapo. Devil ejjab jook n̄e ej itok n̄an letok ļōmņak ko renana ilo kōļmenļo̧kjeņ ko ad. Bok in Mormon ej katakin bwe Setan ej unoojdikdik kōn ļōmņak ko rettoon im rejjab em̧m̧an im ej kōļapļo̧k ļōmņak in kabwerer ko. Ej kakijoroor kōj n̄an bōki men ko jej an̄ūri im n̄an ļōmņak kōn kōj make im tōr. Ejjab kōņaan bwe jen kile ia eo me ļōmņak kein rej itok jān e, kōn menin ej unoojdikdik, “Ej jab n̄a devil, bwe ejjeļo̧k juon” (2 Nipai 28:22).

Ewi wāween ad anjo̧ jān kapo kein? Juon iaan kein jerbal ko rem̧m̧an ej n̄an upaakeļo̧k Setan. En̄in ej ta eo Jisōs en kar kōm̧m̧ane.

Bwebwenato in Rilo̧mo̧o̧r ilo Kalimur Ekāāl me ej letok katak ko kōn kapo. Ālkin kajjojo kapo Setan ej kapoiki, Jisōs eaar kōjerbal ruo wāween ko n̄an bōbrae e make: kein kajuon, Eaar kakoik Setan; innām Eaar kouti jeje ko rekwojarjar.

Ij lewaj juon waanjon̄ak: “Kwon ilok, Setan, bwe ar je, Kwon kabun̄ n̄an Irooj am̧ Anij, im kwon jerbal n̄an E wōt” (Matu 4:10). Eoon eo juon eaar rekoot e, “Innām tepil ej ilo̧k jān E, im lo, enjeļ ro rej itōm jipan̄ E” (Matu 4:11). Jojomar an Rilo̧mo̧o̧r eaar lukkuun kajoor!

Mour eo an Būreejtōn Heber J. Grant (1856–1945) ej letok katak kōn wāween an Būreejtōn Grant, ke eaar juon likao, anjo̧ jān devil. Ke Būreejtōn Grant eaar kile bwe Setan eaar unoojdikdik n̄an e, kajjieon̄ n̄an kabweer e ilo būruon, eaar lam̧ōj im ba, “Mr. Devil, kwon ikōn̄.”4

Ewōr am̧ maron̄ n̄an ba Setan en etal n̄e kwōj jelm̧ae kapo. Jeje ko rekwojarjar rej katakin, “a komwin jum̧ae tepil, im enaaj ko jān kom” (Jemes 4:7).

Mōttan eo juon ilo an Rilo̧mo̧o̧r jojomar e ekar kouti tok jān jeje ko rekwojarjar. Ewōr juon kajoor eļap ilo am̧ kakeememej eoon ko jān jeje ko rekwojarjar, āinwōt an kar Jisōs kōm̧m̧ane. Eoon ko ilo jeje ko rekwojarjar rej erom juon kein jipan n̄an mour in jetōb.

N̄e kwōj jelm̧ae kapo ko, kwōn ba kien ko āinwōt “Kwōn kememej raan in Jabōt, bwe kwōn ko̧kwojarjar e,” “Komwin yokwe ami ri kojdat,” ak “Im erreo en kainōknōk ļōmņak ko am ilo ejjeļo̧k m̧wijkōk” (Exodus 20:8; Luk 6:27; K&B 121:45). Kajoor an jeje ko rekwojarjar rejjab kaam̧ijak wōt Setan, ak ej barāinwōt karuwaineneik jetōb ilo būruom̧, im kōjparok eok ņae kapo.

2. Riab im moņ. Jeje ko rekwojarjar rej kwaļo̧k bwe Setan ej “jemān riab otemjeļo̧k” (2 Nipai 9:9). Jab tōmak e n̄e ej unoojdikdik kōn enaan āinwōt “Kwojamin kōm̧m̧an jabdewot men ejim̧we,” Kolukkuun jerawiwi im ejāmin jeorļo̧k bōd ko am̧,” Kwojāmin oktak,” “Ejjeļo̧k ej kea kōn eok,” im “Ejjeļo̧k am̧ tōļan.”

Juon wāween an riab ej āinwōt in: “Kwoj aikuj kajjieon̄e men otemjej juon kōttan bwe kwōn maron̄ jeļā. Juon kōttan eban kōmetak eok.” Juon men ettino me ejjab kōņaan bwe kwōn jeļā ej bwe jerawiwi ej juon men kwōj an̄n̄ūri.

Bar juon wāween an riab me Setan enaaj kajjieon̄ bwe kwōn kōm̧m̧ane: “Aolep armej rej kōm̧m̧ane menin. Em̧m̧an.” Ejjab em̧m̧an! Kōn menin ba n̄an devil bwe kwojjab kōņaan etal n̄an telestial kingdom—men̄e aolep rej etal n̄an ijeņ.

Pija
father teaching his family

Men̄e Setan enaaj riab e eok, komaron̄ pādped wōt ioon jetōb bwe en ba n̄an eok m̧ool eo. En̄in ej unin an lukkuun aorōk mennin letok eo an Jetōb Kwojarjar.

Devil em̧ōj ņae etan “ri moņ eļap.”5 Ej kajjieon̄ kariab aolep m̧ool ko ilo katak ko an Irooj.

Keememej, riab in ejjab āinļo̧k wōt oktan men ko jabdewōt. Oktan mouj ej kilmeej, ak riab in mouj emaron̄ epaakeļo̧k emouj jidik ak kūrrā. Riab in ej kwaļo̧k eiten āinwōt n̄an men eo me m̧ool in bwe en maron̄ kapok im moņ e ro me rejjab jeļā kake. Rej oktan men ko me rem̧m̧an, im ej āinwōt riab in jāān ko, ejjeļo̧k tokjāer. In kōmeļeļeiki.

Juon iaan kariab ko an Setan kōn tōmak ej tōmak ilo jetōb ettoon. Kariab eo an kōn iakwe ej lōn̄. Ej kariab priesthood ilo an letok rikanij, im ej anōk kabwilōn̄lōn̄ ko an Anij ilo an kōjerbal ekkōbāl.

Mare eo ikōtaan em̧m̧an im kōrā ej ekkapit jān Anij, ak m̧are eo an em̧m̧aan n̄an em̧m̧aan im kōrā n̄an kōrā eriab. Ej bōktok ejjeļo̧k jeraam̧m̧an im jeban bōk mour eo eutiej tata. Men̄e anōknōk ko an rej moņe elōn̄ armej, rejjab jet men ko rem̧ool. Rejjab maron̄ bōktok m̧ōņōņō eo ejjeļo̧k jemļo̧kin.

Anij ej kakkōļ kōj kōn moņ ko im ej waļo̧k ilo Katak im Bujen ko. Eaar ba, “Men eo ej jab kōketak ej jab jān Anij, im ej marok” (K&B 50:23).

3. jum̧ae. Setan ej jemān jum̧ae. Rilo̧mo̧o̧r eo ej katakin, “Ej pukwōj būruōn armej n̄an aitwerōk kōn illu, ippān doon” (3 Nipai 11:29).

Devil eto an ekkatak ium̧win elōn̄ iiō ko kōn imminene in me ijo ewōr jum̧ae ie, jetōb eo an Irooj enaaj jako. Jān iien eo eaar kapoik Cain bwe en m̧an Abel, Setan eaar kareel ro jein im jatin bwe ren akweel. Eaar barāinwōt kōm̧m̧an bwe en wōr jorrāān ilo m̧are ko, ilubwiljin ro uwaan ward ko, im ikōtaan mijinede ro rej leiaiki doon. Ej m̧ōņōņō n̄e ej lo an armej akweel. Ej kajjieon̄ kōm̧m̧an bwe baam̧le ko ren akweel m̧okta jān iien jar ilo Jabōt, m̧okta jen nokon in jota an baam̧le ilo joteen in Mande, im iien ko me ripālele rej ļōmņak in jerbal ilo tampeļ. Emōj an kajejjet iien ko an.

Ijo elōn̄ jum̧ae ilo m̧ōko ak jikin jerbal, kajju kabōjrak jabdewōt ta eo kwōj kōm̧m̧ane im kōm̧m̧an aenōm̧m̧an. Jekdoon wōn eo eaar jino kōjerak.

Jum̧ae ej bōktok juon mejatoto enana. Josep Smith eaar katakin bwe “devil ej riab e kōj bwe jelukkuun wānōk, n̄e jej pukōt n̄an ņa ruōn ro jet.”6 N̄e kwōj ļōmņak kake, wānōk eo am̧ make ej riab eo an lukkuun wānōk.

Setan ekōņaan bwe en kajeded jum̧ae ilo Kabun̄ in. Ej kōttōbar eo an n̄an pukōt ruōn ritōl ro ilo Kabun̄ in. Josep Smith eaar kakkōl armej ro rekwojarjar bwe jinoin bun̄tōn eo n̄an bun̄ jān tōmak ej n̄an jab leke ritol ro ilo Kabun̄ in.7

Eiten aolep katak ko an rijum̧ae Mormon ro rej pādped ioon riab kōn kadkadin Josep Smith. Rikōjdat eo ej lukkuun kate bwe en jab kautiej Josep kōnke enaan eo an kōn Jepļaaktok eo ej pedped ioon bwebwenato in Rikanan eo kōn ta eo eaar waļo̧k ilo Bukwin Wōjke eo ekwojarjar. Devil ej lukkuun kate rainin jān kar m̧okta n̄an kōm̧m̧an bwe aolep ro uwaan kabun̄ in ren pere naan in kam̧ool ko aer kōn Jepļaaktok eo.

Ilo raan ko jinoin ilo epepen kein ad, elōn̄ em̧m̧aan priesthood ro rejitōnbōro, raar inepata, im jab ron̄jake Rikanaan eo. Juon iaer ekar Lyman E. Johnson, eo kar bukweļo̧k etan jān kabun̄ in kōn an jab mour ekkar n̄an katak ko. Eaar būrom̧ōj tokālik ke eaar etal jān Kabun̄ in: “Inkar jek pe eo tuanbwijmaron̄, n̄e inej bar tōmak e. Innām iaar obrak kōn lan̄lōn̄ im m̧ōņōņō. Ettōņak ko ao raar em̧m̧an. Ke iaar ruj tok ilo jibbon̄ōn̄ eo jetōb eo aō eaar lukkuun m̧ōņōņō. Iaar m̧ōņōņō raan im bon̄, obrak kōn aenōm̧m̧an im lan̄lōn̄ im kam̧m̧oolol. Ak kiiō emarok, metak, būrom̧ōj, ļap an nana aō mour. Ijjan̄in kar lo jon̄an m̧ōņōņō in ilo mour eo aō.”8

Ļōmņak kōn naan kein. Raar jet naan in kakkōl n̄an aolep membōr ro ilo Kabun̄ in.

Ikar oktak tok n̄an Kabun̄ in. Iaar peptaij ke ej 23 aō iiō im iaar pād ilo juon jikuuļ in taktō ilo Arizona, USA. Iaar jeļā m̧okta ke Setan ej jerbal ippān rikatak ro n̄an kapok er n̄an kabweer er ilo aer kappukot m̧ool eo.

Ilo tōre ko ke ej jodikdik, iaar lo waanjon̄ak ko an armej ro rekwojarjar ro m̧ōtta. Iaar bwilōn̄ kōn wāween m̧wil ko m̧wilier. Iaar kōm̧m̧ane kālet eo n̄an ekkatak kōn Kabun̄ in, ak iaar jab kōņaan ba n̄an juon ke iaar katak ippān Mormon. Bwe in katoļo̧k naan in kabweerer ko jān ro m̧ōtta, iaar kōm̧m̧ane kālet eo ao n̄an pukōt im etale ilo ittino.

Elōn̄ iiō ko remootļo̧k m̧okta jān an kar wōr internet, kōn menin iaar etal n̄an juon ļaibrāre. Iaar lo juon kape in Bok in Mormon im juon bok etan A Marvelous Work and a Wonder, jān Elder LeGrand Richards (1886–1983) jān Doulul eo an Jon̄oulruo Rijilōk ro. Iaar jino aō riit bok kein kōn ikdeelel eļap, im iaar lo bwe raar im̧we eō.

Ke jetōb eo aō eaar ikdeelel n̄an ekkatak eļapļo̧k, Setan eaar jino unoojdikdik ilo lo̧jiln̄ū. Eaar ba n̄an eō bwe in maron̄ lukkuun kakūrm̧ool unin, iaar aikuj ekkatak kōn ta ko em̧ōj je ikijjeen kōnana ko an Kabun̄ in. Iaar etal n̄an ļaibrāre im jino bar etale. Āliktata, iaar lo juon bok eo me eaar lukkuun kōnanaiki Rikanaan Josep.

Ilo aō kar riiti bok in an rijum̧ae ro an Mormon iaar tarpok. Eaar jako jetōb eo me em̧m̧an im im̧we eo me eaar tōl eo ilo aō kar ekkatak. Iaar jino illu im kar kabōjrak aō kappukōt m̧ool eo. Iaar jar n̄an bōk uwaak ke ij riiti katak ko an ro rej jum̧ae Mormon!

Iaar ilbōk, Iaar uwaake juon ko̧o̧l jān juon iaan ro m̧ōtta ilo kar high school eo ej jikuuļ ilo Brigham Young University. Eaar ko̧o̧l eō bwe in tin loļo̧k ilo Utah, eaar kallim̧ur eō bwe inaaj lukkuun m̧ōņōņō kōn turaap in. Ekar ejjeļo̧k an jeļā ke iaar ekkatak ilo ittino kōn Kabun̄ eo an.

Iaar eo̧ron̄ kūr eo an. Eo m̧ōtta eaar ba bwe kōm̧ en etal n̄an Salt Lake City n̄an alooje temple square. Ekar bwilōn̄ ke iaar lukkuun m̧ōņōņō ilo aō uwaak. Ekar ejjeļo̧k an jeļā ke eaar itok limou n̄an ekkatak kōn m̧ool eo kōn Josep Smith im Jepļaaktok eo.

Sister mijenede ro ilo Temple Square raar lukkuun ļap aer jipan̄. Ilo an jab jeļā kake, raar uwaake elōn̄ iaan kajjitok ko aō. Naan in kam̧ool ko aer raar im̧we eo n̄an “pere ļōmņak ko [aō],”9 im tōmak eo aō eaar jino eddōkļo̧k. Jab maron̄ kōmeļeļe jon̄an kajoor in naan in kam̧ool ko an bōro.

Eo m̧ōtta eaar kwaļo̧k an naan in kam̧ool im eaar karuwaineneik eō bwe in jar im kajjitōk ippān Anij eļan̄n̄e Kabun̄ in em̧ool. Ilo juon iaļ eo eaitok n̄an Arizona, iaar jino jar kōn tōmak—ej kab juon kōttan “im eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar (Moronai 10:4). Juon tōre ilo tūrāāp eo, ilo aō kalimjōkļo̧k wa eo waaō eo eaar lukkuun meram. Iaar ekkatak ippa make bwe meram eo emaron̄ dōblo̧ke marok.

Ālkin aō kar kōm̧m̧ane kālet eo n̄an peptaij, devil eaar lukkuun kapoiki eō. Eaar jino jerbal ippān baam̧le eo aō, ro raar kajjieon̄ kōn kajoor eo aer bwe ren kabweer eō, im raar m̧akoko bwe in peptaij.

Iaar wōnm̧aanļo̧k wōt im peptaij, im āliktata būruweer eaar meraļo̧k. Raar jino jipan̄ eō kappukōt menmenbwij an baam̧le eo aō. Jet iiō tokālik, iaar peptaiji ļaddik eo jatū. Eo m̧ōtta me eaar kūr eō bwe in loļo̧k e ilo Utah eaar kiiō lio pāleeō.

4. Kabweerer. Setan ewājabdik ilo an kōjerbal kein jerbal in n̄an armej ro rekwojarjar ro retiljek n̄e emaat an maron̄ kapoiki er. Ippa, ke ij tin jino ebweer, eaar jipan̄ eō bwe in kile wōn eo ej kajjieon̄ kam̧ōjņo̧ik eō. Menin eaar kōm̧m̧an bwe jon̄an illu eo aō in kajju m̧ōņōņō—bwe in maron̄ jum̧ae devil.

Jet iiō ko remootļo̧k, Būreejtōn Benson eaar kwaļo̧k juon enaan ņae etan “Jab Ebweer” Ilo katak in, eaar kakkōl, “Setan eļapļo̧k an kajjieon̄ kabweer armej ro rekwojarjar, kam̧ōjņo̧ik er, kabūrom̧ōj er im kainepataik er.”10 Būreejtōn Benson eaar rōjan̄ membor ro ilo Kabun̄ in bwe ren kōjparok wōt, im eaar kwaļo̧k 12 ļōmņak ko rem̧ool n̄an Tariņae menin kabweerer ko.

Pija
family walking on Boston Massachusetts Temple grounds

Ļōmņak ko an ekitbuuj jipan̄ ro jet; lukkuun jerbal im kōjekdo̧o̧n pād bajjōk; kōmoururi ānbwinnūm̧, eo ekoba kāājimourur im m̧ōn̄ā m̧ōn̄ā ko rem̧m̧an; kappukōt kōjeraam̧m̧an ko an priesthood; ron̄jake al ko rem̧m̧an; bwini menin jouj ko; im kōm̧m̧an am̧ kōttōbar. Im ilubwiljin aolep men, āinwōt an eoon ko katakin, jej aikuj jar bwe jen maron̄ anjo̧ ioon Setan (lale K&B 10:5).11

Setan emijak n̄e ej lo

Armej eo ekwojarjar em̧ōjņo̧ ej bukwelōlō im jar.12

Elukkuun aorōk bwe jen jeļā ke elōn̄ jon̄an kajoor an eo enana. Anij eaar kōm̧m̧an jon̄an, im Setan ejjab maron̄ eļļā jān e. N̄an waanjon̄ak, jeje ko rekwojarjar rej kalikar n̄an kōj bwe “kajoor kar jab leļo̧k e n̄an Setan n̄an kapo ajri ro reddik” (K&B 29:47).

Jon̄an eo juon me ebar aorōk ej bwe Setan ejjab jeļā ļōmņak ko ad n̄an n̄e jej kwaļo̧k n̄an e. Irooj eaar kōmeļeļe, “ejjeļo̧k bar juon ijello̧kun wōt Anij ejeļā koļmānļo̧kijeņ ko am im kōttōpar ko an būruōm̧” (K&B 6:16).

Em̧ool en̄in unin an Irooj letok n̄an kōj kien ko āinwōt “Jab elotaan” (K&B 9:6) im “Kwōn jab kōnono nana ņae riturum̧” (K&B 42:27). Eļan̄n̄e komaron̄ ekkatak n̄an dāpij loom̧ (lale Jemes 1:26), koban leļo̧k eļap meļeļe n̄an devil. Ijo ej ron̄ aetwerōk, ellotaan, im kajirere, ej lukkuun mijōk wōt kōj. Naan ko am̧ renana ej kapidodoik am̧ po ippān rikōjdat eo.

Elōn̄ nuuj em̧m̧an n̄an kwe. Ritariņae ro an Anij elōn̄ļo̧k uwaer jān ritariņae ro an Lucifer. Komaron̄ reito reitak im ļōmņak kōn kwe make, “Laļ in eļapļo̧k an jerawiwi. Setan jon̄an n̄e e wiin i tariņae in. Jab bwebwe jān e. Mool in ej, elōn̄ uwaad jān rikōjdat eo. Keememej, ruo m̧ōttan in jetōb ro nejin Anij raar kālet karōk eo an Anij.

Ro jeiū im jatū, lale bwe kwōn tariņae ilo jait eo an Irooj. Lale bwe kwōn ineek ippam̧ jaje eo an Jetōb.

Ej jar eo aō in bwe ilo jemļo̧kin mour eo am̧, kwōn lam̧ōj ippān Rijilōk Paul, “Iaar tariņae tariņae em̧m̧an, iaar kam̧ōjļo̧k iaekwoj eo aō, iaar dāpij tōmak eo” (2 Timote 4:7).

Kakeememej ko

  1. Guide to the Scriptures, “Israel,” scriptures.lds.org.

  2. Ezra Taft Benson, “Beware of Pride,” Ensign, May 1989, 5.

  3. Discourses of Brigham Young, sel. John A. Widtsoe (1954), 72.

  4. Lale Francis M. Gibbons, Heber J. Grant: Man of Steel, Prophet of God(1979), 35–36.

  5. Lale, n̄an waanjon̄ok, Dieter F. Uchtdorf, “You Matter to Him,” Liahona, Nov. 2011, 20; Gordon B. Hinckley, “The Times in Which We Live,” Liahona, Jan. 2002, 86.

  6. Katak ko an Būreejtōn ro an Kabun̄ in: Josep Smith (2007), 64.

  7. Lale Teachings: Joseph Smith, 318.

  8. Lyman E. Johnson, in Brigham Young, Deseret News, Aug. 15, 1877, 484.

  9. Dieter F. Uchtdorf, “Kememej Kom̧ Aorōk Ippān,” Kweilo̧k eo Eļap, Nov. 2013, 23.

  10. Ezra Taft Benson, “Do Not Despair,” Ensign, Nov. 1974, 65.

  11. Lale Ezra Taft Benson, “Do Not Despair,” 65–67.

  12. William Cowper, ilo Robert Andrews, comp., The Concise Columbia Dictionary of Quotations (1987), 78.