2017
Jerkakpeje eo an Jisōs Kraist im Mool ko kōn Ānbwin
April 2017


Jerkakpeje eo an Jisōs Kraist im Mool ko kōn ĀNBWINNIN

Kōn Jerkakpeje eo An, Jisōs Kraist ekar katakin kōj m̧ool ko rem̧m̧an kōn ānbwin.

Pija
Resurrected Christ with Thomas

Meļeļe ko jān The Doubtful Thomas,jān Carl Heinrich Bloch

Background © janniwet/iStock/Getty Images

“Ekar ba, em̧ōj: im Ej jirļo̧k, im kōtļo̧k An” (Jon 19:30). Ilo iien ņe, jetōb eo an Jisōs Kraist ekar em̧m̧akūt jān Ānbwinnin—juon ānbwin ekar en̄taan im kijenmej bwe En maron̄ pinmuur kōn jerawiwi ko an aolep armej im jipan̄ er ekkar n̄an m̧ōjņo̧ ko aer (lale Alma 7:12–13). Ānbwin in, kiiō ej juon waan ejerakrōk ejjeļo̧k kobban, kar kōm̧akūti jān dōbwāāl eo, kitimi kōn nuknuk ko, im āliktata likūti ilowaan juon lōb. Ilo raan eo kein kajilu, kōrā ro raar etal n̄an lōb eo ijo me remaron̄ kadedeļo̧k kōbpopo ko aer n̄an erreke ānbwin eo.

Ak ānbwin eo ekar jako.

Aer jeļā kōn an lōb eo ejjeļo̧k kobban ekar ijjino eo. Meri Magdalene, Rijilōk ro, im elōn̄ ro jet tokālik rekar kam̧oole juon men eo ekabwilōn̄lōn̄: jerkakpeje eo, Jisōs Kraist eo ewāppen, ilo nāmemein armej eo maron̄ jibwe.

Rilo̧mo̧o̧r eo ekar lukkuun lale bwe ro rekar kam̧oole E ālkin Jerkakpeje eo An rekar lukkuun meļeļe ta kain ānbwin eo rot eo An. Ekar kajjitōk ippān Rijilōk ro, n̄an waanjon̄ak, n̄an jibwe Ānbwinnin bwe ren maron̄ jeļā ippāer make bwe Ekar wōr Ānbwinnin im bwe Ekar jab juon jetōb (lale Luk 24:36–40).1 Aaet Ekar m̧ōn̄ā ippāer (lale Luk 24:42–43).

Ke Rijilōk ro rekar kakūrm̧ool eddo eo aer n̄an kwaļo̧k gospel eo an Jisōs Kraist, rekar jelm̧ae jum̧ae im kakkure, jet rekar itok kōnke rekar ekkatak bwe Jisōs Kraist ekar jerkakpeje im bwe aolep armej renaaj jerkakpeje āinwōt juon tōprak (lale Jerbal 4:1–3).

Rainin, Jerkakpeje eo an Jisōs Kraist ej dilepen ennaan kwaļo̧k kake n̄an laļ in jān Kabun̄ eo An āinwōt kar tōre in. Āinwōt an kar Rikanaan Joseph Smith eaar katakin, “katak ko dilepen kabun̄ in ad rej kam̧ool ko an Rijilōk ro im Rikanaan ro, rejelōt Jisōs Kraist, bwe E eaar mij, kar kalbwine, im bar jerkak raan eo kein kajilu, im walōn̄ļo̧k n̄an lan̄; im aolep men ko jet ko toļļo̧kin kabun̄ in ad ej itok ilo ekkejaak ko nai.”2

Jerkakpeje eo ej jipan̄ uwaake kajjitōk ko raorōk kōn piktokin Anij, piktokid im kadkad eo an n̄an Anij, unleplep in mour in, im kōjatdikdik eo ippād kōn Jisōs Kraist. Erkein rej jet iaan m̧ool ko rej kam̧ool kōn Jerkakpeje eo an Jisōs Kraist.

Jemedwōj Ilan̄ Ewōr Ānbwinnin eo Eaiboojoj

Pija
First Vision

The First Vision,jān Gary L. Kapp

Meļeļe eo bwe Anij ewōr juon ānbwinnin em̧ool ej waļo̧k ilo Baibōļ,3 im en̄in ej wāween de in an elōn̄ armej ļōmņak, bōtaab elōn̄ imminene ko an jikin jikuuļ in kabun̄ ko im kabun̄ ko rekar jab errā ilo menin im kōņaan bwe Anij “ejjeļo̧k ānbwinnin, m̧ōttan, ak nāmemein,”4 kōn menin, ilo wāween in, ānbwin eo (im lukkuun meļeļein) enana ak ejjab m̧ool, ijoke jetōb, kōļmenļo̧kjeņ, ak ļōmņak ko rej wāween ko rem̧ool kōn armej eo ekajoor ak em̧ool.

Elukkuun aiboojoj im kajoor, bwe, kar revelesōn ko kōn piktokin Anij kōn Nejin, Jisōs Kraist.

Ekar ba, ilo iien eo Ekar kwaļo̧k ioon laļ in, “Eo ear lo N̄a, ear lo Jema” (Jon 14:9). Menin ekar ļapļo̧k an m̧ool ālkin Jerkakpeje eo An kōn Ānbwinnin Ewāppen, Ānbwinnin ejjab Wabanban, eo ekar kwaļo̧k bwe “Jemān ewōr ānbwinnin kanniōk im di ko āinwōt maron̄ un̄ūr wōt ānbwinnin armej; Nejin barāinwōt” (K&B 130:22).

Innām nāmemein ānbwinnin Jemedwōj Ilan̄ ekar waļo̧k. Āinwōt an Josep Smith tokālik kar kōmeļeļeik, “Bwe e eo ejjeļo̧k ānbwinnin ak m̧ōttan ko an ānbwin ejjeļo̧k. Ejjeļo̧k bar Anij ilo lan̄ ak bwe Anij eo ewōr Ānbwinnin im diin.”5

Elder Jeffrey R. Holland jān Doulul eo an Jon̄oulruo Rijilōk ro ekar kōmeļeļeiki ilo wāween in: “Eļan̄n̄e juon ānbwin eo ejjab aikuj wōt ak ebar aikuj jān Anij ro Jilu, etke Ripinmuur an aolep armej ekar pinmuur Ānbwinnin pinmuur i, jān kajoor an mej im lōb eo, kallim̧ur bwe ej jāmin bar jepel jān jetōb eo An ilo iien ak n̄an indeeo? Jabdewōt eo ejako meļeļein ippān kōn an Anij wōr ānbwinnin ejako ippān meļeļe eo jim̧or kōn ānbwin im Kraist eo ekar jerkakpeje.6

Jemedwōj Ilan̄ epād ippān Aolep Kajoor, Aolep Māletlet, im Aolep Iakwe

Kadkad ko rekajoor an inmen ko an Jemedwōj Ilan̄ rej barāinwōt waļo̧k ilo kar iien Jerkakpeje eo an Jisōs Kraist. Āinwōt an Elder D. Todd Christofferson jān Doulul eo an Jon̄oulruo Rijilōk ro kar ba, “Letok m̧ool eo an Jerkakpeje eo an Kraist, pere kōn An kajoor otem kajoor, An pād ijoko jabdewōt, im jouj eo an Anij Jemān—eo Eaar letok Nejin Emake Eaar Keotake n̄an lo̧mo̧o̧r eo an laļ—ejjeļo̧k pedpedier.”7

Kajoor eo, jeļāļo̧kjeņ eo, im em̧m̧an eo an Anij rej kakūrm̧ool kōn Jerkakpeje eo an Jisōs Kraist, eo ej letok kam̧ool im jeļāļo̧kjeņ eo im iakwe eo ilo karōk eo an Jemedwōj Ilan̄ im maron̄ eo An (im eo Nejin) n̄an kōttōbrak e.

Kōj Jej Ajri Ro Nejin Anij

Āinwōt an Baibōļ eo katakin kōj, jekar kōm̧anm̧an ilo nāmemein Anij … m̧aan im kōrā” (Jenesis 1:27). Jerkakpeje eo an Jisōs Kraist ej kapen m̧ool in. Ilo m̧ool, ilo awa eo āliktata an Jerkakpeje eo An, Jisōs Kraist ekar kwaļo̧k kadkad eo ad n̄an Jemedwōj Ilan̄, ekar ba, “Ij wanlōn̄ļo̧k n̄an Jema, im Jemami; im n̄an Aō Anij, im ami Anij” (Jon 20:17; eoon eaorōk kar kobaiktok).

Rilo̧mo̧o̧r ekar kwaļo̧k bwe Anij im armej rejjab lukkuun oktak jān doon ilo aorōk eo aer āinwōt armej. Jekjek eo eļam̧ waan an ānbwinnid ej ejja wōt jekjek eo an jetōb ko ad,8 im jetōb ko ad rekar kōm̧anm̧an ilo nememein Anij kōnke ej piktokin im kadkad eo in an jemān im jinen im ajri ro.

Juon Ānbwin Ej juon Mennin Letok eo Ej Letok Maron̄

Pija
sleeping infant

Pija jān David Stoker

Kōn Jerkakpeje eo An, Rilo̧mo̧o̧r eo ekar kwaļo̧k n̄an kōj bwe juon ānbwin, kōmeļeļeik an wōr ānbwin ej m̧ōttan wōt indeeo eo an Anij im ajri ro Nejin. Āinwōt an kar Irooj kwaļo̧k n̄an Josep Smith, “Irinekkatak ko rej n̄an indeeo, im jetōb im irinekkatak, rej jamin tūm̧ jān aer ekkejel, rej bōk tarlep in lan̄lōn̄” (K&B 93:33). Ekkejel in kobaik men ko an jetōb im kanniōk ippān doon bwe ren maron̄ juon ānbwin ejjab wabanban, ejjab jorrāān, eaiboojoj, im ewāppen—kain ānbwin rot in wōt emaron̄ bōk tarlepen gospel eo elan̄lōn̄ me Anij ej pād ie.

Ilo keidi, ālkin kar bōk juon ānbwin in kanniōk innām kar jenolo̧k jān e n̄an deļo̧n̄e laļ eo an jetōb, “ro remej [watōke] jon̄an aetokan … jako eo an jetōb ko aer jān ānbwinnier āinwōt juon lokjak” (K&B 138:50; bar lale K&B 45:17).

Mekarta ānbwin ko ad rej juon iaan m̧ōttan ko raorōk ilo Karōk eo an Jemedwōj Ilan̄ im rej juon iaan mennin letok ko rekwojarjar. Ke jetōb ko ilo mour eo m̧okta rekar itok n̄an laļ in, rekar “kobaikļo̧k ioon” (Ebream 3:26) ippān juon ānbwin. Āinwōt rikanaan Josep Smith ekar katakin: “Jekar itok n̄an laļ in bwe jen maron̄ bōk juon ānbwin im kwaļo̧k an erreo im̧aan mejān Anij ilo laļ eo an celestial. Pedped in eļap an m̧ōņōņō ekitbuuj bōk juon ānbwin. Devil ejjeļo̧k ānbwinin, im en̄in ej kaje eo an.”9

Āinwōt an kar Elder David A. Bednar jān Doulul eo an Jon̄oulruo Rijilōk ro kar katakin: “Ānbwin ko ad rekōm̧m̧an bwe en pidodo ad tōpar ijoko retoļo̧k, rem̧wilaļ, im juon en̄jake eo ekajoor me jejjab maron̄ kar tōpar ak bōke ilo mour eo ad m̧okta. Ilo wāween in, jem̧jerā ko ad ippān armej ro jet, jon̄an maron̄ eo ad n̄an kile im m̧akūtkūt ekkar n̄an m̧ool eo, im maron̄ eo ad n̄an pokake pedped in katak im kain̄i ko an gospel eo an Jisōs Kraist repidodo kōn wōt ānbwinnid. Ilo ad katak ilo mour in, jej en̄jake inem̧m̧an, iakwe, jouj, m̧ōņōņō, būrom̧ōj, ebbweer, metak, im aaet apan̄ ko itok wōt jān m̧ōjņo̧ im likjab an ānbwin ilo elōn̄ wāween ko rej kōpooj kōj n̄an indeeo. Ekar kwaļo̧k, ewōr katak jej aikuj ekkatak im en̄jake ko jej aikuj en̄jaki, āinwōt an jeje ko Rekwojarjar kōmeļeļeiki, ekkar n̄an kanniōk’ (1 Nipai 19:6; Alma 7:12–13).”10

Ilo kakkobaba, āinwōt Josep Smith eaar katakin “Aolep armej ewōr ānbwinnier ewōr aer kajoor ioon ro ejjeļo̧k ānbwinnier.”11 Setan emaron̄ kapoik kōj, ak eban kipel. “Devil ejjeļo̧k an kajoor iood wōt eļan̄n̄e jej kōmālim e.”12

Eļaptata, mennin letok an juon ānbwin ewāppen, ejerkakpeje ej jipan̄ kōj kajoorļo̧k ilōn̄in kajoor eo an Setan n̄an indeeo. Eļan̄n̄e en kar ejjeļo̧k Jerkakpeje, “jetōb ko ad reaikuj kipiliie n̄an … devil eo, n̄an jab bar jerkak. Im jetōb ko ad ren kar erom āinwōt e, im jej erom devil raņ, enjeļ ro n̄an devil eo, n̄an jamin bar jutak im̧aan mejān Anij, im n̄an pād wōt ippān eo jemān riab otemjeļo̧k, ilo en̄taan, āinwōt e” (2 Nipai 9:8–9).

Jetōb eo im Ānbwin eo Rej Jab Rikōjdat ro

Em̧ool er rej oktak, jetōb eo im ānbwin eo rejjab jān ruo men ko raorōk im oktak me rejjab maron̄ jerbal ippān doon. Āinwōt an Josep Smith kar katak, “Ejjeļo̧k juon irinekkatak ejjeļo̧k kobban. Aolep jetōb ej irinekkatak, a eļapļo̧k an ekkwedik ak erreo, im maron̄ wōt kile kōn māj ko rerreoļo̧k; Jejjab maron̄ lo e; a n̄e ānbwinnid rej karreo jenaaj lo bwe ej aolepān ej irinekkatak” (K&B 131:7–8).

Pija
Christ appears to the Nephites

Meļeļe ko KŌN AN KRAIST WAĻOK ĻOK ILO WESTERN HEMISPHERE, jān Arnold Friberg

Ilo aiboojoj eo An, nememein armej me em̧ōj an jerkakpeje, Jisōs Kraist ej bōk jikin an jetōb im ānbwin bar koba, ej kōmeļeļe n̄an kōj bwe “jetōb im ānbwin rej ejaake an eo an armej” (K&B 88:15). Ilo mour in jej kajjieon̄ in “ļōmņak kōn men ko an jetōb” ijjelo̧kin “ļōmņak kōn men an kanniōk” (2 Nipai 9:39), n̄an “[utūkļo̧k] armej eo ilo lukkuun biktokin” (Mosaia 3:19), im n̄an “kajeikiki [aolep] ikdeelel ko am̧” (Alma 38:12). Bōtaab ejjab meļeļein bwe jetōb eo im ānbwin eo rej rikōjdat. Āinwōt an kar Jisōs Kraist kar kwaļo̧k n̄an kōj, ānbwin eo ejjab n̄an dike ak ļōn̄aje ak kammineneiki im ukōte.

Mour ilo juon Ānbwin Kanniōk Ewōr juon Unin Eaorōk

Juon ļōmņak bwe mour in ej juon iien mālijjon̄ eļapļo̧k an alikkar n̄e jej kile ta eo jejeļā kōn mour ko ad m̧okta im tokālik. Jekar mour āinwōt jetōb ko m̧okta jān ad itok n̄an laļ in, im Jemedwōj Ilan̄ ekōņaan bwe kōj jen erom āinwōt E im mour n̄an indeeo kōn ānbwin ko rejjab wabanban. Mool kein rej meļeļein bwe iien mālijjon̄ eo ad ilo ānbwin kein rewabanban ejjab pedped wōt ioon kōņaan ak ļōmņak ak ej pedped wōt ioon meļeļe eo em̧ool im un.

Āinwōt an Elder Christofferson kar kōmeļeļeiki: “Jān kālet ko ad, jemaron̄ kwaļo̧k n̄an Anij (im n̄an kōj make) kallimūr eo ad im jon̄ak eo ad n̄an mour kōn kakien ko an celestial tōrein jejjab pād im̧aan mejān im ilo juon ānbwin kanniōk ewōr aolep kajoor ko ie, koņaan, im ikdeelel ko. Jemaron̄ ke kajeikiki ānbwin eo bwe en maron̄ erom juon kein ikkure ijjelo̧kin jeban eo an jetōb eo? Remaron̄ ke lōke kōj jim̧or ilo iien im n̄an indeeo kōn kajoor ko an Anij, ekoba kajoor eo n̄an ejaak mour? Jemaron̄ ke anjo̧ jān men eo enana? Ro me remaron̄ ‘ewōr aiboojoj kar kobaikļo̧k ioon bōrāer n̄an indeeo im indeeo’ [Ebream 3:26]—juon men eļap kōtmene an aiboojoj in ej maron̄ in jerkakpeje, jab wabanban, im ānbwin eo ewānōk.”13

En̄jake ko ad ilo ānbwin eo ad kiiō, ekoba jem̧jerā ko ad ippān doon, rej lukkuun wōrtojeer kōnke rej juon wōt ippān ta eo enaaj itok. Āinwōt Josep Smith ekar katak, “Im ejja iiaio in ippād kiiō ijin enaaj bar pād ippād ijōņ ilo mour eo tok juon, ak enaaj kobaiktok aiboojoj indeeo, aiboojoj eo im jejjab amene kiiō” (K&B 130:2).

Ewōr Ad Kōjatdikdik ilo Jisōs Kraist

Pija
women at the tomb

MERI RO JILU ILO LŌB EO, jān William-Adolphe Bouguereau, Superstock.com

Jān tōre eo ekar ejjeļo̧k kobban lōb eo, Jerkakpeje eo an Jisōs Kraist ekar bōktok kōjatdikdik kōnke jej kile ilo Jerkakpeje eo An ad make maron̄ bar jerkakpeje, ilo wāween eo me aolep men ko [jekar] luuji renaaj ro̧o̧ltok n̄an [kōj] … , pojaktok [jej] wōnm̧aanļo̧k ilo tiljek.”14

Rijilōk ro m̧okta an Rilo̧mo̧o̧r eo rekar maron̄ kwaļo̧k juon kam̧ool ekajoor kōn Jerkakpeje eo An kōnke rekar loe im kar en̄jake Ānbwinnin. Bōtaab ekar juon men eo eļapļo̧k jān menin. Baj āinwōt an Jisōs Kraist kar kōmour ānbwin ko ewōr wūtame ko ie n̄an kwaļo̧k bwe E ewōr an kajoor n̄an jeorļo̧k jerawiwi ko (lale Luk 5:23–25), Jerkakpeje eo An—ej kam̧ool eo jemaron̄ jeļā kake kōn kajoor eo An n̄an anjo̧ jān mej ilo kanniōk—erom rikaļoor ro An rej kam̧ool kōn kajoor eo An n̄an anjo̧ ioon mej ilo jetōb. Kallim̧ur ko E ekar litok ilo katak ko An—jeorļo̧k in jerawiwi ko, aenōm̧m̧an ilo mour in, mour indeeo ilo aelōn̄ in kiin̄ eo an Jemān—rej erom men ko rem̧ool im juon tōmak ejjeļo̧k pere ie.

“Eļan̄n̄e ar jab kajerkakpeje Kraist, [ad] tōmak ej jatokjān” (1 Korint 15:17). Ak kōnke E ekar jerkak jān ro rimej, emaron̄ “wōr ad kōjatdikdik kōn pinmuur eo an Kraist im kajoor in An jerkakpeje, n̄an naaj jerkak n̄an mour indeeo, im men in kōnke [ad] tōmak ilo E ekkar n̄an kallim̧ur eo (Moronai 7:41).

Ilo An kar mour ilo mour in, Jisōs Kraist ekar karuwaineneik armej bwe ren ļoor E. Ālkin mej eo An im Jerkakpeje eo An, mejān kajjik eo eļapļo̧k an alikkarļo̧k. Eļan̄n̄e jej, kōn pokake kakien ko im kain̄i ko an gospel, ejaake “jitibōn selestial” ilo kōj, jemaron̄ “bōk ejja ānbwin eo eaar lukkuun ānbwinnin kanniōk” im “kōmour er jān m̧ōttan eo an selestial [im] innām naaj bōk jān ejja in wōt, em̧ool likiion” (K&B 88:28–29). Ekar kwaļo̧k iaļ eo. E ej iaļ eo. Ej jān kajoor eo An—jān Pinmuur eo An im Jerkakpeje eo An—me ej likiion selestial emaron̄, eo ekoba juon tarlepen lan̄lōn̄ kōn juon ānbwin em̧ōj an jerkakpeje.

Kakeeemej ko

  1. Ke Jisōs Kraist ekar waļo̧k ļo̧k n̄an armej ro ilo Laļ eo Ekāāl, Ekar kajjitōk ippāer—taujin iaer—n̄an itok, “juon ilo̧k juon,” im jibwe Pein, neen, im katin bwe ren maron̄ kam̧ool bwe er jim̧or rekar en̄jake im loe Irooj eo ekar jerkakpeje (lale 3 Nipai 11:14–15; 18:25).

  2. Teachings of Presidents of the Church: Joseph Smith (2007), 49.

  3. Lale Jenesis 1:27; Exodus 33:11; Jerbal 7:56.

  4. Ejja kain meļeļe kein rekar pād ippān ritōmak Rikūrijin ro m̧okta, meļeļe kein rekar itok jān Thirty-Nine Articles of the Anglican Church (1563).

  5. Teachings: Joseph Smith, 42.

  6. Jeffrey R. Holland, “The Only True God and Jesus Christ Whom He Hath Sent,” Liahona, Nov. 2007, 42.

  7. D. Todd Christofferson, “Jerkakpeje eo an Jisōs Kraist,” Liaona, Eprōl 2014, 113.

  8. Barāinwōt revelesōn eo kōn Jisōs Kraist ilo mour eo m̧okta ekar juon naan in kam̧ool an m̧ool in, kōnke ekar kwaļo̧k bwe ānbwin jetōb eo An ekar nememein armej (lale Ether 3:16).

  9. Teachings: Joseph Smith, 211.

  10. David A. Bednar, “ Kōm̧ij Tōmak ilo Jetjet,” Liaona, Eprōļ 2013, 41.

  11. Teachings: Joseph Smith, 211.

  12. Teachings: Joseph Smith, 214.

  13. D. Todd Christofferson, “Etke Jej M̧are, Etke Jej Baam̧le,” Liaona, Māe 2015, 51.

  14. Teachings: Joseph Smith, 51.