Andrei im Naan eo Enana
Rijeje eo ej jokwe ilo Utah, USA.
“Inaaj kajjieon̄ ukweļo̧k, kōm̧m̧an em̧m̧anļo̧k, n̄an jar” (Children’s Songbook, 98).
“Kwōj ļōmņak kwom̧m̧an ļo̧k jān ro jet kōnke kwojjab kanejnej,” Nikolai ej ba ke ej iien kakkije.
“Ejjab m̧ool menin,” Andrei ej ba.
“Innām etke kwojjab ba juon naan enana? Juon wot? Kwoban mej. Aolep armej rej kanejnej.”
Andrei ej kōm̧akūt aeran. “Ijjab baj kōņaan.”
Andrei eaar jeļā ke kanejenej enana im ej katoļo̧k Jetōb Kwojarjar. Andrei eaar kōņaan bwe Jetōb Kwojarjar en pād ippān. Kōn menin eaar jab kanejnej.
Andrei eaar kāālļo̧k n̄an jikuuļ eo, innām, Nikolai wōt kar eo wōt ilo kūlaaj jiljino eo an me eaar kōņaan bwe en m̧ōttāiki. Ak Nikolai eaar akweļap e bwe en kanejnej aolep raan. Im aolep raan Andrei emōk in ba jaab. Ijjelokin, Andrei eaar mijak bwe Nikolai eban kar bar m̧ōttāiki, innām enaaj make iaan.
“Kwōn ba juon wōt naan nana,” Nikolai ej ba nan e ālkin an m̧ōj jikuuļ. “Innām iban bar kaabōņōņōik eok.”
Āliktata Andrei eaar m̧ōk kōn an kaabōņōņōik jon̄oulruo eaar kanejnej —juon naan me eaar jab lukkuun nana.
Nikolai eaar kōm̧akūtkūt bōran. “Em̧m̧an, kiiō kwōj juon eo ej m̧ōttam̧.”
Ālkin menin, ro jet m̧ōttan Nikolai raar jino kōņaan n̄an Andrei. Raar m̧ōn̄ā in rālep ippān doon im ikkure football ippan ilo iien kakkije. Ak ilo an pād ilo doulul in ro m̧ōttan Nikolai eaar āinwōt n̄e ej pād ilo kauwōtata. Ilo an ļapļo̧k an Andrei kar iiaio ippāer, ekar kōnono im m̧akūtkūt āinwōt er. Im aolepāer rej kanejnej. Eļap. Rej konajnej im rej kalluik doon Rej ba naan ko renana kōn rūkaki ro aer. Rej illu im eļap aer lāj ilo aer m̧akūtkūt. Jidik kōn jidik Andrei eaar jino an ilulu im ekutkut ļo̧k an kanejnej.
Juon bon̄ ke Jinen im Jemān raar jako, Andrei im leddik eo jein Katya raar akwāāl kōn pija ta eo n̄an alooje. Mokta jān an Andrei ļōmņak, eaar kajju kanejnej.
Katya eaar lukkuun ilbōk. “Ij ba n̄an Mama.”
Andrei ekar ko n̄an ruum̧ eo an im kappokļo̧k kōjem̧ eo. Ta an aolep bōd? Etke aolep rej kōm̧m̧an bwe en illu aolep iien? Ke ro jinen im jemān rej tōpar ļo̧k m̧weo, ke Andrei ej kōppeļļo̧k jidik kōjem̧ eo an ej ron̄ an Katya ba, “Mama, Andrei eaar kanejnej.”
“Ta?” Mama eaar lukkuun bwilōn̄. “Andrei ejjan̄in kar kanejnej.”
Andrei eaar kilōke kōjem̧ eo an im okjak ļo̧k ioon peet eo an. Eaar ļōmņak jon̄an an oktak ļo̧k jān ke eaar jino kanejnej. Ebwe an to an jan̄in bar en̄jake Jetōb Kwojarjar.
Andrei eaar bukwelōlō iturin peet eo an im jar. “Jemedwōj Ilan̄, ij joļo̧k aō bōd kōnke eļap aō illu im lej. Ij joļo̧k aō bōd bwe iaar jino kanejnej. Ij tin kōm̧anm̧an em̧m̧anļo̧k.”
Ke Andrei ej jar, juon en̄jake in okmeneen ej en̄jake ilo būruōn. Ej kab bar kein kajuon jān iien eo eaar jino kanejnej, eaar lukkuun m̧ōņōņō. Eaar jeļā bwe Anij ej iakwe e, im emaron̄ bar en̄jake Jetōb Kwojarjar. Eaar en̄jake jeorļo̧k in bōd im eaar jeļā bwe emaron̄ kar oktak im em̧m̧anļo̧k.
Ālkin an jar, eaar kwaļo̧k m̧ool n̄an jinen im joļo̧k an bōd n̄an Katya. Andrei eaar en̄jake em̧m̧anļo̧k eo ālkin iien eo. Ej en̄jake an m̧ōņōņō ālkin an ukweļo̧k.
Raan eo tok juon ilo m̧ōn jikuuļ eo, Andrei eaar jab m̧ōn̄ā in rālep ippān ro m̧ōttan Nikolai. Ijjelo̧kin eaar jijet ippān ajri ro jet me eaar jab jeļā kajjier. En kar bōk iien, ak Andrei eaar jeļā ke enaaj wōr m̧ōttan ro me rem̧m̧an im rekam̧ōņōņō im rejjab kanejnej. Āinwōt e.