Messaġġ tal-Għalliema taż-Żjajjar, Jannar 2017
L-Għan tas-Soċjetà tal-Għajnuna
Bl-għajnuna tat-talb studjaw dan il-materjal u fittxu li tiksbu l-ispirazzjoni biex tkunu tafu x’ għandkom taqsmu ma’ ħutkom.
Fidi, Familja, Għajnuna
L-għan tas-Soċjetà tal-Għajnuna hu li “nħejju lin-nisa għall-barkiet tal-ħajja eterna,” qalet Linda K. Burton, President ġenerali tas-Soċjetà tal-Għajnuna.1 Huwa permezz tal-fidi, tal-familja u tal-għajnuna li aħna ningaġġaw irwieħna fl-“irwol mill-aktar importanti tagħna f’ din il-ħidma.”2
Is-Soċjetà tal-Għajnuna “hija ħidma temporali u spiritwali,” qalet Carole M. Stephens, l-Ewwel Kunsillier fil-President Ġenerali tas-Soċjetà tal-Għajnuna. “Hekk għamlu n-nisa fi żmien is-Salvatur, u aħna hekk inkomplu nagħmlu.”3
Hekk kif aħna nħarsu lejn il-mara Samaritana ħdejn il-bir, li ħalliet warajha l-ġarra bl-ilma u telqet biex tgħid lil ħaddieħor li Ġesù kien profeta (ara Ġwanni 4:6–42), jew lil Febi li tul ħajjitha serviet b’ ferħ lil ħaddieħor (ara Rumani 16:1–2), aħna naraw fihom eżempji ta’ nisa fi żmien is-Salvatur li raw kif għamlu biex iressqu lil ħaddieħor lejn Kristu. Huwa Hu li jiftaħ it-triq tagħna għall-ħajja eterna (ara Ġwanni 3:16).
Hekk kif aħna nħarsu lejn ħutna n-nisa li kien hemm ġewwa Nauvoo, Illinois, li fl-1842 inġabru fid-dar ta’ Sarah Kimball biex jifformaw l-organizzazzjoni tagħhom, aħna naraw il-pjan ta’ Alla li ġab fis-seħħ is-Soċjetà tal-Għajnuna skont il-prinċipji tas-saċerdozju. Wara li Eliza R. Snow kitbet il-kostituzzjoni tal-għaqda, il-Profeta Joseph Smith ħadha għandu biex jaqraha. Huwa rrealizza li l-Knisja ma kenitx organizzata għal kollox jekk l-ewwel ma jiġux organizzati n-nisa. Huwa qal li l-Mulej aċċetta l-offerta tagħhom iżda qal ukoll li kien hemm xi ħaġa aħjar. “Jiena se norganizza lin-nisa taħt id-direzzjoni tas-saċerdozju wara l-mudell tas-saċerdozju,” huwa qal.4
“Is-Soċjetà tal-Għajnuna ma kenitx sempliċiment grupp ieħor ta’ nisa li kienu qed jippruvaw jagħmlu l-ġid fid-dinja. Kienet xi ħaġa differenti. Kienet ‘xi ħaġa aħjar’ għaliex ġiet organizzata skont l-awtorità tas-saċerdozju. L-organizzazzjoni tagħha kienet pass neċessarju biex tiġi fis-seħħ il-ħidma ta’ Alla fid-dinja.”5
Skrittura u Informazzjoni Addizzjonali
Doctrine and Covenants 25:2–3, 10; 88:73; reliefsociety.lds.org
© 2017 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/16. Approvazzjoni tat-traduzzjoni: 6/16. Traduzzjoni ta’ Visiting Teaching Message, January 2017. Maltese. 97921 159
Ikkunsidraw Dan
Kif tista’ s-Soċjetà tal-Għajnuna tgħin lin-nisa jġibu fis-seħħ l-irwol divin ta’ Missierna tas-Smewwiet għalihom u tmexxihom lejn il-ħajja eterna?