2016
Jet armej rej ba n̄an n̄a ke iaikuj ro m̧ōtta ro rej jab kwaļo̧k jon̄ak ko aō bwe ren maron̄ kōkajoor eō. Em̧ool ke menin?
October 2016


Kajjitōk ko im Uwaak ko

“Jet armej rej ba n̄an n̄a ke iaikuj ro m̧ōtta ro rej jab kwaļo̧k jon̄ak ko aō bwe ren maron̄ kōkajoor eō. Em̧ool ke menin?”

Kwoj kōkajoorļo̧k jon̄ok ko am̧ ko rej make wōt ilo ekkatak im mour kake gospel eo an Jisōs Kraist, me ro jeram̧ ak kipel eok n̄an kōm̧m̧ane. Ro m̧ōttam̧ ewōr aer leke eļap ilo kwe—kōn wāween am̧ ļōmņak, kōnono, im m̧akūtkūt n̄an erom̧ armej eo kwoj kōnaan. Kōkajoorļo̧k Jodrikdrik Ro ej kōmelet, “Kālet ro jeram̧ ro rej kwaļo̧k jon̄ok ko n̄an kōkajoorļo̧k im rōjan̄ eok n̄an mour kake jon̄ok ko reutiej ļo̧k” ([2011], 16). Kain jem̧jerā rot in ejipan̄ eok mour kake gospel eo an Jisōs Kraist, dāpij jon̄ok ko, im erom̧ juon armej em̧m̧an.

Ijoke, ejjab aolep armej kwoj iaio ippāer renaaj āinwōt jon̄ok ko am̧ ak erom̧ membōr in Kabun̄ in. Eaorōk bwe jen m̧ōttāik doon im kōm̧m̧an em̧m̧an n̄an er ilo wāween eo Rilo̧mo̧o̧r en kar kōm̧m̧an n̄an er—kōn iakwe im jouj. Ilo am̧ mour kaki jon̄ok ko am̧ “kwōn juon jon̄ak n̄an ro rej tōmak, ilo naan, ilo kōm̧anm̧an, ilo yokwe, ilo tōmak, im ilo kwojarjar” (1 Timote 4:12). Kōn waanjon̄ok eo am̧, renaaj lo wāween am̧ jeram̧m̧an n̄an mour kaki jon̄ok ko, im kwomaron̄ rōjan̄ er n̄an kōm̧m̧an āinwōt.

Pukot tōl eo an Jetōb Kwojarjar—im peran n̄an jerbale ioon im̧we ko—ilo am̧ kālet ro m̧ōttam̧ im kajieon̄ in kōkajoorļo̧k jon̄ok ko am̧.

Ro Mōttad Rem̧ool

IIō eo aō jinointata ilo middle school iaar mijak bwe ijjab maron̄ elolo ro m̧ōtta renaaj kautieji jon̄ok ko aō. Ālkin jidik iien iaar jino m̧ōttā ippān juon classmate, im iaar ba ij juon Mormon n̄an e. Eaar kajjitōkin eō kake, innām iaar leļo̧k n̄an e juon bok in N̄on Kōkajoorļo̧k Jodrikdrik Ro. Jino jen raan eo, eaar bōjrak an kōjerbal naan ko rejekkar n̄e kom̧ro ej ippān doon. Eļan̄n̄e ro m̧ōttam̧ rem̧ool, renaaj kautiej pepe ko am̧ im jipan̄ eok dāpij jon̄ok ko am̧.

Candela M., iiō 13, Buenos Aires, Argentina

Ļoor Rikanaan ro

Jet iien epen n̄an anjo̧ jen kapo n̄e jej iaio ippān ro m̧ōttad me rej kōm̧m̧ani kālet ko rebōd ak kajjieon̄ in kōm̧m̧an bwe jen kōm̧m̧ani kālet ko renana. Rikanaan ro raar jiron̄ kōj ilo bok eo N̄on Kōkajoorļo̧k Jodrikdrik Ro bwe ro m̧ōttād “naaj im̧we kōn wāween am̧ ļōmņak im kōm̧m̧an, im aaet kajieon̄ erom̧ armej eo kwoj kōnaan” ([2011], 16). Ij ļōmņak jej aikuj m̧ōttāik ro renaaj kautiej jon̄ok ko ad im kwaļo̧k itok limo eo ilo kōj ilo ad kōjparok jon̄ok ko ad.

Calvin W., 16 iiō, Arizona, USA 

Keememej Jon̄ok ko Am̧

Ro m̧ōttad me ejjeļo̧k jon̄ok ko ippāer āinwōt kwe renaaj kajeon̄ im kakkure jon̄ok ko am̧. Ke iaar em̧akūt tok n̄an jikuuļ eo aō ekāāl, iaar kajieon̄ karōk aō im ba men ko armej ro ipeļaakū renaaj ba. Inan̄in kar tin meļo̧kļo̧k jet jon̄ok ko ilo aō kajjieon̄ in āinwōt ro jet. Ijeļā kiiō bwe en kajoor jon̄ok ko am̧, kwonaaj aikuji ro m̧ōttam̧ ro renaaj jipan̄ im rie jon̄ok ko am̧. Ij m̧ōņōņō bwe iaar lo ro m̧ōtta āinwōt in kōnke rej kakeememej eō kōn jon̄ok ko aō.

Logan J., iiō 15, Utah, USA

Dāpij Jon̄ok ko Am̧

Ro m̧ōttad me eoktak jon̄ok ko ippāer ekkā aer jab kōkajoor eok, ak n̄an m̧ōttāik er, kwomaron̄ leļo̧k n̄an er juon waanjon̄ok em̧m̧an n̄an ļoore. N̄e elōn̄ ro m̧ōttam̧ me rej rie tōmak ko am̧, emaron̄ in kōkajoorļo̧k eok n̄an dāpij jon̄ok ko am̧ im jipan̄ eok n̄an jutak kōn ta eo ejim̧we.

Warren S., iiō 14, Oregon, USA

Ro Mōttad Rem̧m̧an Rej jet Kōjeram̧m̧an

Eļan̄n̄e ro m̧ōttam̧ rejjab rie jon̄ok ko am̧, emaron̄ in pen n̄an kōkajoor eok make. Riiti N̄on Kōkajoorļo̧k Jodrikdrik Ro ekkā aer jipan̄ eō kālet ro m̧ōtta ro renaaj kautiej eō. Kiiō ij kōppopo n̄an jerbale juon mijen, im ijeļā bwe iaio ibwiljin armej ro kōn jon̄ok ko aō raar jipan̄ eō tiljek wōt ilo gospel in.

Nair M., iiō 19, Buenos Aires, Argentina

Dāpij wōt Aen in Dāpdāp eo

Mōttāik ro m̧ōttam̧ kōn jon̄ok ko rem̧m̧an ej ta eo kwoj kōnaan. Kwoj kōnaan iaio ippān ro m̧ōttam̧ ro renaaj jipan̄ eok kōjparok kien ko im lōn̄aj eok n̄an mour jim̧we. Dāpij wōt ennaan eo ekajoor ilo aen in dāpdāp eo, eo ej tōlļo̧k n̄an wōjke in mour, ejjab em̧ eo ekilep im ļap. Iaio ippān men eo enana enaaj tōlļo̧k n̄an kapo ko. Mōttā ippān ro renaaj jipan̄ eok mour kake gospel in.

Annie P., iiō 13 dettan, Utah, USA

Jar n̄an Pukot ro Mōttam̧

Ālkin an baam̧le eo aō im n̄a kar em̧m̧akūt ļo̧k n̄an juon bukwōn ekāāļ, iaar lukkuun jar n̄an pukot ro m̧ōtta ro inaaj kōnono ippāer kōn gospel in. Ke iaar jar, iaar en̄jake ineem̧m̧an, im jejjo̧ wōt allōn̄ iaar ioon ro m̧ōtta rem̧m̧an. Imaron̄ kile aer jipan̄, im raar jipan̄ eō kwaļo̧k eļap iakwe n̄an gospel in. Ijeļā bwe ro m̧ōttad reaorōk im remaron̄ kōm̧m̧an bwe en pidodo ad mour kake gospel in.

Sarah P., iiō 16, Rio de Janeiro, Brazil