Ajri ro Reddik im Kwojkwoj eo
Rijeje eo ej jokwe ilo Utah, USA.
Ajri ro nejid reddik rekar en̄jake bwe kwojkwoj eo ekar aorōk n̄an kōj. Jemaron̄ kar kōm̧m̧an eļapļo̧k n̄an jipan̄ er lo bwe menin ekar aorōk n̄an er.
Emōj ke kōļmenļo̧kjeņ kake etke jej kōtļo̧k an ajri ro rej jan̄in peptaij bōk m̧ōttan kwojkwoj eo? Jej ke kōm̧m̧ane menin kōnke ren jab ire im kōm̧m̧an ekeroro n̄e rej kōņaan m̧ōn̄ā jidik m̧ōttan pilawe? Ej ke bwe en kōm̧m̧an ļo̧k an pidodo ļo̧k kōm̧m̧ane kwojkwoj eo, n̄an dāpij wōt aenōm̧m̧an eo?
Ijjab ļōmņak un eo in. Ij ļōmņak elōn̄ ļo̧k un ko rem̧wilaļ ļo̧k. Ij tōmak menin kōnke ij tōmak bwe ke Jisōs Kraist ekar ba “aolep,” meļeļein aolep. Im ke Ekar kōnono n̄an juon jarlepju, Ekar jab kōjnolo̧k juon.
Ke Rilo̧mo̧o̧r eo me emōj an jerkakpeje ekar kwaļo̧k kadkad in kwojkwoj eo n̄an armej ro An ilo Amedka, Ekar kwaļo̧k bwe kain̄i eo ewōr aorōk in n̄an kōj ro rekar peptaij.1 Mekarta, Ekar kakien rikaļoor ro An bwe ren “leļo̧k [kwokwoj eo] n̄an jarlepju eo.”2 Jarlepju eo ekoba “ro reddik.”3
N̄e rikabwijer priesthood ro rainin rej kōnono jān jar ko an kwojkwoj eo, rej kajjitōk ippān Jemedwōj Ilan̄ n̄an kōjeraam̧m̧an im kokwojarjar e pilawā im dān eo “n̄an jetōb ko an ro otemjej” rej bōk m̧ōttan.4 Ro otemjej. Kajjojo armej ej bōk m̧ōttan—ekoba kajjojo ajri ro reddik.
Ilo ad bōk m̧ōttan pilawā im dān eo, ajri ro rej bōk kōkkaļļe kein āinwōt juon kōjeraam̧m̧an n̄an jetōb ko aer, ej aikuj wōr juon wāween bwe er ren loe meļeļe eo ilo kain̄i in.
Kōn jeļā in, ij reilikļo̧k ilo raan ko ke ajri ro nejū rekar dik. Kōrā eo pāleeō im n̄a ekar lukkuun jejjet am̧ro dāpij wōt an ajri ro nejūm̧ro ikōn̄ ilo iien aer kōjeraam̧m̧ane kwojkwoj eo. Ij ļōmņak bwe rekar en̄jake bwe kwojkwoj eo ekar aorōk n̄an kōj. Ak jemaron̄ kar kōm̧m̧an eļapļo̧k n̄an jipan̄ er lo bwe menin ekar aorōk n̄an er.
Ta eo jemaron̄ kar kōm̧m̧ane? Jemaron̄ keememej bwe ajri ro reddik remaron̄ kōjparok kallim̧ur ko ilo jar in kwojkwoj eo. Remaron̄ meļeļe, ilo wāween eo aer make edik ak ekajoor, ta meļeļein n̄an “iien otemjej keememej” Jisōs. Remaron̄ kallim̧ur n̄an “kōjparok kien ko An.” Remaron̄ kwaļo̧k bwe “rem̧ōņōņō in bōk ioer etan” Kraist, jeļā bwe ejjab etto enej jeraam̧m̧an in ippāer n̄e rej peptaij im kapen.5
Ak ta kōn kōkāāl bujen ko? Ritōl ro an Kabun̄ in rekar katakin bwe n̄e jej bōk m̧ōttan kwokwoj eo, jej kōkāāl e aolep bujen ko jekar kōm̧m̧ani ippān Irooj.6 Ajri ro reddik ejjeļo̧k aer bujen ko n̄an kōkāāli.
Ij bar ļōmņak kōn iien eo ke ajri ro nejūm̧ rekar dik. Kōm̧ kar jab maron̄ jipan̄ er reilikļo̧k n̄an bujen ko, ak kōm̧ kar maron̄ jipan̄ wōt er reim̧aanļo̧k n̄an bujen ko tokālik. Ij pijaikļo̧k n̄a make ippān ļaddik eo nejū edik ak leddik eo nejū edik ilo juon jibbon̄ in Jabōt:
“N̄e enaaj ralitōk am̧ iiō,” ij ba, “kwonaaj peptaij im bōk menin letok eo an Jetōb Kwojarjar. Kwonaaj kōm̧m̧ane juon bujen. Bujen eo kwaar kōm̧m̧ane tōre eo enaaj kallim̧ur eo kwonaaj kōm̧m̧ane kiiō n̄e kwoj bōk kwojkwoj eo.
“N̄e ij bōk kwojkwoj eo rainin, inaaj kōkāāļe bujen eo ikar kōm̧m̧ane ke ikar peptaij āinwōt n̄e ij kōm̧m̧ani kallim̧ur ko bar juon alen. Kwonaaj pād ijeņ ippa, ak kwoban kōkāāl e juon bujen. Kwoj jan̄in kōm̧m̧an bujen kiiō. Ak, komaron̄ in kamminene kōm̧m̧ane juon bujen. Aolep iien kwoj bōk kwojkwoj eo, kwomaron̄ m̧aanjabpopo n̄an peptaij im kapen. Wāween in, kwonaaj pojak eļan̄n̄e enej ralitōk am̧ iiō.”
Āinwōt ej juon men eoktak n̄an kōjerbal naan in kamminene ilo wāween in, ļōmņak kōn menin: Ilo juon jekjek in kautiej, juon baba emaron̄ jipan̄ ajri ro nejin n̄an kain̄i in peptaij eo ilo an kwaļo̧k n̄an er wāween aer naaj jutak ilo dān eo im ilo an kwaļo̧k n̄an er jar in peptaij eo. Ejjab kōm̧m̧ane kain̄i eo ilo jekjek in. Ilo juon wāween, ej jipan̄ ajri ro nejin kamminene. Wāween in, reban maron̄ inepata kōn ta eo enaaj waļo̧k n̄e rej deļo̧n̄ e dān in peptaij ko. Ij tōmak bwe m̧am̧a im baba ro remaron̄ barāinwōt jipan̄ ajri ro kamminene kōm̧m̧an im kōjparok bujen peptaij ko aer. Kajjojo kweilo̧k in kwojkwoj emaron̄ erom juon kamminene ekwojarjar n̄an ajri ro reddik ilo aer bōk m̧ōttan kōkkaļļe ko an Pinmuur eo an Rilo̧mo̧o̧r eo.
Im kiiō ij ro̧o̧lļo̧k n̄an kajjitōk eo aō jinoin. Etke jej kōtļo̧k bwe ajri ro reddik rej jan̄in peptaij ren bōk m̧ōttan kwojkwoj eo? Ej ke n̄an baj wōt “dāpij aenōm̧m̧an eo”? Em̧ool ejjab. Jej jipan̄ ro nejid reddik bōk m̧ōttan kwojkwoj eo bwe ren maron̄ keememej aer Rilo̧mo̧o̧r im dāpij aenōm̧m̧an eo An—juon aenōm̧m̧an eo im einjuon jān jabdewōt aenōm̧m̧an laļ in emaron̄ in letok.7 Jej kōpooje er m̧aanjabpopo bwe aenōm̧m̧an in en ļapļo̧k im ļapļo̧k tokālik, eļan̄n̄e renaaj kōm̧m̧an im kōjparok bujen ko Ippān.