Ta’u ma’imiraa i te parau mau
Te ora nei te taata papa’i i California, i Marite.
Ua haapii-tamau-noa-hia vau e aita e Atua e vai ra, tera râ, ua faaoti au e imi o vau iho i te reira.
Faahoho’araa na Dan Burr
Ua paari au i roto i te hoê fenua i te pae Asia ma, tei reira te mana’o tata’u, e aore e haapa’oraa faaroo to reira ; e ua vai tamau noa i roto ia’u te hinaaro rahi ia riro mai ei taata manuia, tera râ, aita i haapiihia ia’u te mau parau tumu mure ore e aore râ, te mau parau mau no te arata’i ia’u. I roto i to’u fenua, te auraa o te parau ra « manuia » o te riroraa ïa ei taata moni e te puai.
Ua haapii tamau noa to’u na metua ia’u e, aita e Atua e vai ra. No raua, te haapa’oraa faaroo e aore râ, te Atua, e mau parau maamaa ïa, e no te feia paruparu ana’e te reira. E mea maoro to’u faariroraa ia’u ei taata ti’aturi Atua ore. Ua haapii raua ia’u e, eiaha vau e ti’aturi i te hoê noa’tu taata maori râ ei ia’u ana’e. No reira mai te apîraa mai â to’u faaohiparaa i to’u mau hiaai rahi ei faaitoitoraa ia’u ia haapii e ia rave i te ohipa ma te itoito.
E tia’iraa teitei ta to’u na metua i ni’a ia’u. Ua hinaaro raua ia vai noa ta’u mau numera i te faito teitei i te mau taime atoa. E oto vau ia ite i to raua hoho’a mata oaoa ore, e aore râ, ia faaroo ia raua ia mârô te tahi e te tahi ia roaa ana’e ta’u numera ino. Taa ê noa’tu ta’u mau ohipa tamau no te haapiiraa, e rave atoa vau i te mau ohipa hau i te hopea hepetoma ia ti’a ia’u ia tape’a noa i te faito A.
Noa’tu e, ua hope i te faaotihia e au te mau opuaraa ta’u i haamau, ua feruri tamau noa vau e, te vai ra hoê mea hau atu no to’u oraraa. I roto i te hohonuraa o to’u aau, ua ite au e, te vai ra te hoê mea hau atu.
I te hoê mahana ua faaoti au e imi o vau iho e, te vai mau ra anei te Atua. Mai te mea e, te vai mau ra Oia, ua hinaaro vau ia ite e, e aha ta’na e hinaaro no’u, e aore râ, ua riro anei te haapa’oraa faaroo ei parau maamaa, ei ohipa hamani-noa-hia e te mana’o taata. Aita vau i taiâ ia farii i te hoê o teie na pahonoraa e piti. Ta’u noa i hinaaro, o te parau mau ïa.
I taua taime atoa ra, ua riro vau ei hoa rahi no te hoê o to’u mau apiti i roto i ta matou pupu taora popo i roto i te ete, o Taylor to’na i’oa. I te hoê po’ipo’i ua ani au ia’na ia haere na muri iho ia’na i te fare haapiiraa. Ua parau mai oia e, e, tera râ, titauhia ia’u ia ti’a i ni’a hoê hora na mua a’e no te haere i te séminaire na muri iho ia’na. Ua parau tapitapi atura vau e, e, no to’u ite ore e aha te reira. Ua au roa vau i te séminaire, eiaha no te mau mea ta’u i haapii mai, no te mana’o râ tei tupu i roto ia’u.
Aita i maoro i muri a’e i te reira, ua ani maira o Taylor ia’u ia haere i te pureraa na muri iho ia’na. I te haamataraa ua mana’o vau e, e mea ha’umani rii e te huru ê te pureraa, tera râ, i te pae hopea ua putapû vau i te mana’o mahanahana e te hau ta’u i farii i roto i te pureraa.
Noa’tu râ i te reira, aita vau i ti’aturi e, o te Atua te tumu o te reira mana’o maitai. Nahea vau i ite ai e, e ere te reira no roto mai ia’u iho ? Nahea vau i ite ai e, e ere na taua mana’o ra i faatupu i taua huru ra i ni’a ia’u ?
I muri a’e e rave rahi uiuiraa mana’o, ua haere au e farerei i te mama o Taylor no te imi i te mau pahonoraa. Ua parau mai oia ia’u e, e nehenehe ta’u e farii i ta’u mau pahonoraa na roto i te tai’oraa i te mau papa’iraa mo’a e te pureraa no ni’a i te mau pahonoraa ta’u e imi ra. Ua pure au ma te ore e farii i te hoê pahonoraa e ua tafifi rii au i te haapa’oraa i te mau ture e te mau faaueraa o ta’u e apo maira. E rave rahi taime to’u inoinoraa. Ua tia’i au i te hoê fâraa maere e te faahiahia o te Atua e aore râ, te tahi ohipa temeio no te faaite papû mai e, te vai mau ra te Atua. Te mea iho ta’u i hinaaro, o te hoê ïa iteraa papû aueue ore i tera noa taime. Te parau mau râ, rahi noa’tu to’u pureraa, rahi noa atoa’tu te maramarama te roaa ia’u i roto i to’u oraraa. Rahi noa’tu to’u peeraa i te mau faaueraa, rahi noa atoa’tu to’u oaoa. Rahi noa’tu to’u tai’oraa i te mau papa’iraa mo’a, rahi noa atoa’tu te heheuraa ta’u e farii. E tupu marû noa to’u iteraa papû i te rahi, mai te au i te mahana ia ti’a mai i te po’ipo’i.
E piti matahiti te maoro i faaoti ai au e bapetizo ia’u ei melo no te Ekalesia a Iesu Mesia i te Feia Mo’a i te Mau Mahana Hopea Nei. Noa’tu e ua haapa’o vau e rave rahi mau ture e mau parau tumu maitai i te pae morare na mua’tu, e nehenehe ta’u e parau i teie nei e, ua itehia ia’u te parau mau mure ore e te hopea : te ora nei te Atua. O Iesu te Mesia, to tatou Faaora e te Taraehara. Ua vetea te mau ra’i. Te vai nei te hoê peropheta i ni’a i te fenua nei i teie mahana. E parau mau te taraehara a Iesu Mesia. Te faaore nei ihoa te Atua i te mau hara a te feia tatarahapa atoa. Peneia’e e ere au i te mea maramarama e aore râ i te tareni rahi mai te tahi atu mau taata, tera râ, te ite i roaa ia’u, aita ïa to’na e hoo.