Reni i ni’a i te reni
Genese1:26–27
Eaha te auraa no te parau ra, hamanihia mai te huru o te Atua ?
26 Ua parau ihora te Atua, e hamani tatou i te taata ma to tatou iho huru, ia au i to tatou iho hoho’a : e ei ni’a iho ratou i te mau i’a o te tai, e i ni’a iho i te mau manu o te reva, e i ni’a iho i te mau puaa, e i ni’a iho i te fenua atoa, e i ni’a iho ho’i i te mau mea e nee haere i te fenua nei ra.
27 Hamani ihora ho’i te Atua i te taata ma to’na ihora huru, i hamani oia ia’na ma te hoho’a o te Atua ra ; i hamani oia ia raua, o te tane e te vahine.
Te hoho’a o te Atua
« Te fariiraa e, te vai ra hoê mana teitei a’e ia’na iho, eita roa’tu te reira e faahaehaa i te taata ; e faateitei râ. Mai te mea e, e ite tatou e, ua hamanihia tatou mai te huru o te Atua, eita ïa tatou e parau e, e mea fifi roa ia haafatata’tu Ia’na. … Na teie iteraa tei roaa mai na roto i te faaroo, e hopoi mai i te marû i roto e i te hau rahi ».
Peresideni Thomas S. Monson, « Te Fare mori a te Fatu », Ensign, Nov. 1990, 95–96.
E hamani tatou
Ia au i teie huru faahitiraa parau, mai te huru ïa e, te paraparau nei te Atua i te tahi atu taata—Te na reira mau ra Oia. Ua haapii mai Iosepha Semita e, « I te haamataraa, ua faatupu a’era te Atua faatere i te hoê apooraa na te mau Atua ; ua haaputuputu a’era ratou e ua hamani [faaineine] a’era ratou i te hoê faanahoraa no te hamani i te ao e ia faaî i te taata » (History of the Church, 6:308). Tei roto atoa i teie apooraa te Fatu o Iesu Mesia e te tahi atu (a hi’o Mose 2:26–27 ; Aberahama 4:26–27).
Ma to tatou iho huru
« I riro na te Atua mai ia tatou i teie nei, e taata faateiteihia, e te parahi arii nei i ni’a i te ra’i teitei ! Tera ïa te parau huna rahi. Ahiri te paruru e mahaeraa na i teie mahana, e … ahiri e ti’a ia outou ia ite Ia’na i teie mahana, e ite outou Ia’na mai te hoho’a o te hoê taata—mai ia outou iho i roto i te huru taata, te hoho’a, e mai te hoho’a o te hoê taata ».
Te mau Haapiiraa a te mau Peresideni o te Ekalesia: Iosepha Semita (2007), 40.
« E tamarii te taata na te Atua, hamanihia ia au i te hoho’a hanahana, e tei horo’ahia te mau huru hanahana, e ei tamaiti na te hoê metua tane e te metua vahine no te fenua nei, ia tae i te taime e riro mai ai oia ei taata, no reira, teie tamaiti aravihi ore, no na metua mure ore, e nehenehe ta’na, na roto i te mau iteraa o te roaraa o te mau tau, e riro mai ei Atua ».
Te Peresideniraa Matamua, « The Origin of Man », Improvement Era, Nov. 1909, 81 ; Ensign, Feb. 2002, 30.
Ei ni’a iho ratou
« Te fenua e te mau mea atoa i ni’a iho ra, e faaohipahia ïa ma te haapa’o maitai no te paturu i te utuafare taata nei. « Tera râ, e mau tiaau ana’e te taatoaraa—e ere i te fatu—i ni’a i teie fenua e i to’na mau maitai, e e ti’a tiaau atu ratou i mua i te Atua no te ohipa ta ratou i rave no te mau mea Ta’na i hamani ».
« Environmental Stewardship and Conservation », mormonnewsroom.org ; a hi’o atoa Te Parau Haapiiraa e te Mau Parau Fafau 104:13–15.
Te tane e te vahine
« Ua hoho’a te mau tane atoa e te mau vahine atoa i te Metua tane e te Metua vahine o te ra’i nui, e ua riro mau ratou ei mau tamaiti e ei mau tamahine na te Atua ».
Te Peresideniraa Matamua, « The Origin of Man », Improvement Era, Nov. 1909, 78 ; Ensign, Feb. 2002, 29.
« E tuhaa faufaa rahi te riroraa ei tane e ei vahine no te iho taata e no te tumu o te taata tata’itahi i te ao na mua a’e, i te tahuti nei, e i te ao amuri atu ».
« Te utuafare : E poroi i to te Ao nei », Liahona, novema 2010, 129.