Te paraparau maira te tuahine Spafford ia’u

Sandy Howson, Ohio, Marite

Te ha’uti ra vau i te hoê ha’uti i ni’a i te itenati, e ha’uti no ni’a i te fare tamaaraa, e maororaa pô, e te haere mai nei ta’u tane ma te faaara mai e, te haere ra oia e taoto.

Na ô atura vau ia’na e, « e haere atoa’tu vau ».

Na ô mai nei oia e, « E ti’aturi au ia ite mata’tu vau ».

Te ha’uti ra vau i te hoê ha’uti mai te huru ra e, e tunu vau i te maa i roto i te hoê fare tamaaraa no te mau hoani. Ua hi’o vau i ni’a i te rorouira e na ô a’era, « A, e maa e tunu i roto i te 15 minuti ».

A tia’i noa ai au, ua rave maira vau i E Mau Tamarii Tamahine i roto i To’u Basileia : Te Aamu e te Ohipa a te Sotaiete Tauturu, tei vai noa i ni’a i te iri ohiparaa mai te taime a farii ai au i te reira i roto i te Sotaiete Tauturu. Ua haamata vau i te tai’o i te omuaraa parau. I ni’a i te toru o te api ua ite a’era vau i teie mau parau i raro nei na Belle S. Spafford, te iva o te peresideni rahi o te Sotaiete Tauturu.

Ua papa’i oia e, « Te ti’aturi nei au e e mea maitai ia hi’opo’a te vahine i teie mahana i te mau mea auhia e ana, ia faito i te mau faaoaoaraa ta’na e rave nei, e i muri iho ia rave i te mau taahiraa no te faaohie i to’na oraraa, ma te tuu i mua roa te mau mea faufaa rahi, ma te haapuai i te mau mea i reira te mau utu’a maitai rahi roa’e e maoro roa’e e noaa ai, e ma te faaore i te mau mea faufaa ore » (2011, xiii)

Taa ê atu i te mau papa’iraa mo’a, aita â vau i tai’o a’enei i te hoê mea tei haaputapû roa ia’u. Teie vahine tei pohe hau atu i te 30 matahiti i teie nei, te paraparau mai nei oia ia’u. E mea tano roa ta’na mau parau no teie mahana i to te tau a faahiti ai oia i te reira.

Ua ite a’era vau i reira iho e, eiaha vau e ha’uti faahou i te mau ha’uti i ni’a i te itenati. Ua tupohe a’era vau i te rorouira, ua haere atura e taoto, e ua faaite atu vau i ta’u tane i ta’u faaotiraa. I te mahana i muri iho, aita roa’tu vau i faaama noa a’e i te rorouira. Ua feruri râ vau e, e hia rahiraa hora tei mau’a ia’u i ni’a i taua mau ha’uti ra i te mau mahana atoa.

Ua tai’o vau e toru hora i te mahana hoê i ni’a i te 365 (mahana i roto i te hoê matahiti) e ua tuha e 24 (hora i roto hoê mahana). Ua maere au i te iteraa e, ua haamau’a vau e 45,62 mahana i te matahiti hoê. Ua reva taua mau hora e mau mahana tao’a rahi ra e a muri noa’tu. Ahani pai i faaohipa na vau i te reira no te tai’oraa i te mau papa’iraa mo’a, te haereraa e ta’u tane e te mau tamarii, te taviniraa ia vetahi ê, e aore râ, te faarahiraa i to’u mau piiraa.

E mea pinepine te mau Hui Mana Faatere rahi i te vauvau mai i teie tumu parau i roto i te amuiraa rahi. Aita roa’tu râ i puta mai, e ua feruri au e, e ere no’u te reira parau.

Te oaoa nei au i te mea e, ua tauturu mai te Varua Maitai ia’u ia ite e, te paraparau maira te Hui mana faatere rahi—e o Belle S. Spafford—ia’u.