Stephen W. Owen

Peresideni rahi no te Feia Apî Tamaroa

I te 14 matahiti o Stephen W. Owen, ua tarahu te taata e noho ra i piha‘i iho i to ratou faaearaa ia’na no te tapu i te aihere i roto i to’na aua rahi e no te utaru i te aihere i te mau hepetoma atoa. « E pau ia’u e toru mahana no te tapu i te aihere », te parau ïa a te taea‘e Owen ma te ataata, tei paturuhia i te 4 no eperera 2015, ei peresideni rahi no te feia apî tamaroa.

Ia oti ana‘e te ohipa a Stephen, e ani to’na fatu ohipa ia’na ia apee ia’na no te haere na roto i te aua no te faaite ia’na i te hoê aihere ino e aore ra, e piti tei mo‘ehia.

Ua parau oia e, « Ua parau mai oia ia’u e, e mea ti‘a ia’u ia hutihuti i te mau aihere ino atoa ». « Tera ïa ta’u ohipa matamua e ua tauturu te reira ia’u ia ite i te auraa o te parau ra, ia ruuruuhia i te ohipa ».

I taua matahiti ra, ua apo mai te taea‘e Owen i te mau haapiiraa eiaha no ni‘a noa i te atuaturaa i te aihere e te aua. A tahi, ua itehia ia’na e, e itehia te oaoa i roto i te raveraa i te mau ohipa paari ma te afaro. Ua haapii atoa mai oia i te faufaa o te feia haapiipii.

Ua titau te taata e noho ra i te tahi pae i ô ratou i te mea maitai a‘e i roto ia Stephen. « Mai te huru e, te parau mai ra oia ia’u e, ‘Ua ite au o vai oe a muri a‘e, e te hinaaro nei au e tauturu ia oe’ ».

Ua parau faahou oia e, e mea ti‘a i te feia apî tamaroa tata‘itahi ia farii i taua huru taata haapiipii ra no te tauturu ia’na ia riro ei taata mau i te autahu‘araa maitai roa a‘e. « E here rahi to’u i te feia apî », te na reira ra oia. « Te here nei au ia ratou e ua ite au e, o teie te taime faufaa roa e haamauhia ai te hoê haerea no te toe‘a o to ratou oraraa taatoa ».

Ua tavini te taea‘e Owen i roto i te misioni no Texas, San Antonio, e i muri a‘e, ua tavini ei raatira Scout, ei peresideni Feia Apî Tamaroa no te paroisa, ei episekopo, ei melo apooraa teitei, e ei peresideni tĭtĭ.

Ua peresideni atoa teie tamaiti ai‘a no Holladay, i Utah, i te misioni no Kalifonia, Arcadia mai te 2005 e tae atu i te 2008, i reira ho‘i to’na taviniraa e ta’na vahine o Jane Stringham Owen. Ua faaipoipo raua i te 28 no titema 1979 i roto i te hiero no Provo Utah. E pae tamarii ta raua.

Ua fanauhia oia i Roto Miti, Utah, i te 22 no mati 1958, na Gordon e o Carolyn Owen. Ua farii oia i te parau tu‘ite matututaa moni no roto mai i te fare haapiiraa tuatoru no Utah, e o oia te peresideni no te taiete ‘Great Harvest Bread’ i Provo, Utah.