Jej Kōnono kōn Kraist
Kajoor in Tōmak
Rijeje eo ej jokwe ilo Oregon, USA.
Eļan̄n̄e Jemedwōj Ilan̄ en kar kanemkwoj kōj jān aolep apan̄ ko kōnke jaar kajjitōk, E enaaj kar kōjekdo̧o̧n en̄jake ko remenin aikuj n̄an lo̧mo̧o̧r eo ad.
Juon iiō ilo kaļōj, iaar bōk juon teej ke kenwaō eaar jino metak. Metak eo eaar jab jako ak inepata kōn teej eo eaar jako. Iaar kōnono ippān taktō ro im rikakpilōklōk ro jān taktō im kar kajjieon̄ elōn̄ kakkōļkōļ ko, ak metak eo eaar wōnm̧aanļo̧k wōt. Ilo iiō eo juon, iaar en̄taan n̄an jelm̧ae ejja metak in, iaar barāinwōt en̄taan n̄an kōļapļo̧k aō tōmak. Iaar joļo̧k eļap iien ilo jar, iaar ekkatak jeje ko rekwojarjar, im iaar kajjitōk kōjeram̧m̧an ko an priesthood. Iaar en̄jake bwe eļan̄n̄e ebwe aō tōmak, inaaj mour.
Jisōs eaar kōmour rinan̄inmej, ripilo, riake, rileba—“āinwōt [aer] tōmak” (Matu 9:29). Iaar jeļā bwe E ewōr ippān kajoor n̄an kōmour eō āinwōt E eaar kōm̧m̧ane n̄an elōn̄ ro jet ilo mour eo An. Iaar kōjom̧ļo̧k, kōn menin, en̄in kar wōt dik in aō tōmak ekar dāpij eō jān aō mour, innām bar inepata kōn kijejeto ko aō. Ke iaar wōnm̧aanļo̧k bōk kapilōk ikijeen ānbwin, iaar jar im jitlo̧k im ekkatak im tōmak. Aaet aō metak eaar wōnm̧aanļo̧k wōt.
Jeje ko rekwojarjar rej katakin kōj bwe kōn tōmak jemaron̄ kōm̧m̧an kabwilōn̄lōn̄ (lale Matu 17:20), aaet ikar jab maron̄ ājmour jān en̄taan in edik. Ewi kar kajoor in tōmak eo aō? Āliktata, iaar errā kōn jekjek eo ippād ie, loe iaļ ko n̄an jelm̧ae aō jab aenōm̧m̧an, im m̧ōņōņō n̄an kōjparok meļeļe eo elikio kōn tōmak im kōmour n̄an juon iien ilju im jekļaj.
Iiō ko tokālik iaar kōnono ippān juon m̧ōtta eo eaar en̄taan kōn metak in lo̧je eo enana eaar kōm̧m̧an an etal n̄an aujipitōl elōn̄ ļo̧k jān juon kōttan iien eo ej bōro̧ro. Erin ekar kōņaan bar juon nin̄nin̄, ak liin eaar inepata bwe enaaj jelm̧ae ejja jekjek eo enana eaar jelm̧ae ke eaar bōro̧ro m̧okta. Liin eaar jiron̄ eō bwe eaar jitlo̧k im jar im bwe ej lukkuun in tōmak Jemedwōj Ilan̄ ej jāmin kajjitōk men eo jān e alen kein ruo.
Ke kōm ar kōnono, ikar keememej eoon in, “Kom̧win pād wōt im jeļā bwe N̄a Anij” (Sam ko 46:10). Iaar ļōmņak kōn en̄jake eo aō make n̄an ekkatak pād wōt ilubwilijin en̄taan im kar rōjan̄ Erin n̄an wōnm̧aanļo̧k im tōmak ak jab kōm̧m̧an bwe tōmak in en pedped wōt men̄e eaar en̄jake an etta ak jaab kōn bōro̧ro eo tok juon an.
Ke iaar wōnm̧aanļo̧k katak pedped in katak an tōmak, iaar elōkļo̧k n̄an kōnono eo an Alma kōn tōmak eo ej katakin bwe “eļan̄n̄e ewōr am̧ tōmak kwōj kōjatdikdik kōn men ko jab loi, ko re m̧ool” (Alma 32:21).
Kejōkļo̧kjeņ kōn eoon in, iaar loe bwe tōmak ekar jab ta eo iaar ļōmņak ekar. Tōmak, eo Alma ej katakin kōj kake, ej kōjatdikdik ilo pedped in katak ko rem̧ool. Bwe en wōr tōmak ejjab meļeļe jej tōmak Jemedwōj Ilan̄ bwe enaaj aolep iien letok ta eo jej kajjitōk kake n̄e jej kajjitōk kake. Wōr tōmak bwe Kraist enaaj kōmour kōnwaaō ak bwe E enaaj kōtļo̧k an Erin bōro̧ro ilo an jab nana an etta ej jab tōmak ilo pedped in katak ko rem̧ool. Bōtab, jemaron̄ tōmak bwe Kraist ewōr an kajoor n̄an kōmour, bwe E ej ļōmņak kōn kōj, bwe E enaaj kōkajoorļo̧k kōj, im bwe eļan̄n̄e jenaaj kijenmej, jemaron̄ karbab n̄an mour indeeo.
Irooj eaar kalim̧m̧ur, “Jabdewōt men kwonaaj kajjitōk ilo tōmak, im leke bwe kwonaaj bōk ilo etan Kraist, kwonaaj bōk” (Enos 1:15). Ij tōmak kajoor eo ilo kalim̧m̧ur in ej itok kapilōk eo n̄an tōmak “ilo etan Kraist.” Baibōļ Tikjinede eo ej jeje kōn jar eo ej katakin kōj: “Jej jar ilo etan Kraist n̄e ļōmņak eo ad ej kōļmenļo̧kjeņ kōn Kraist, im ad kōņaan rej kōņaan ko an Kraist—n̄e naan ko An rej pād ilo kōj (John 15:7). Innām jej kajjitōk kōn men ko rekkar bwe Anij en litok. Elōn̄ jar ko rej pād wōt jab uwaak kōnke rej jab pād ilo etan Kraist; rej jab bōk jikin ļōmņak eo An ak rej waļo̧k in būruwōn arōk an armej.”
N̄e jej kajjitōk ilo tōmak kōn jet men eo ekkar n̄an ankilaan Anij, E enaaj letok n̄an kōj āinwōt ad kōņaan. Jemedwōj Ilan̄ ejeļā kōj, Ej iakwe kōj, im Ekōņaan men otemjej remenin aikuj n̄an ad ro̧o̧lļo̧k n̄an im̧aan Mejān. Im jet iien ej kitbuuj kapo ko, inepata ko, im apan̄ ko (lale 1 Piter 1:7). Eļan̄n̄e Jemedwōj Ilan̄ en kar kanemkwoj kōj jān aolep apan̄ ko kōnke jaar kajjitōk, E jāmin naaj kar kōjekdo̧o̧n en̄jake ko remenin aikuj n̄an lo̧mo̧o̧r eo ad. Jej aikuj katak n̄an lōke karōk eo an Anij n̄an kōj im wūjlepļo̧k ankilaad n̄an An. Ilo ad kajim̧we kōņaan ko ad ippān kōņaan ko An im kile ad lukkuun pedped ioon E, jemaron̄ in karbab n̄an bōk “jem̧ļo̧k in [ad] tōmak, aaet tokjān tōmak, aaet lo̧mo̧o̧ren eo [ad]” (1 Piter 1:9).