Savali a Faiaoga Asiasi
O Uiga o Iesu Keriso: E Aunoa ma le Pepelo po o le Faagutugutulua
Ia suesue ma le agaga tatalo lenei savali ma saili ia iloa mea e faasoa atu. O le a mafai faapefea e le malamalama i le soifuaga ma matafaioi a le Faaola ona faateleina lou faatuatua ia te Ia ma faamanuiaina ai i latou o loo e tausia e ala i le faiaoga asiasi? Mo nisi faamatalaga, alu i le reliefsociety.lds.org.
Faatuatua, Aiga, Toomaga
O le malamalama e aunoa Iesu Keriso ma le alualua pe faagutugutulua, o le a fesoasoani tatou te taumafai faamaoni ai e mulimuli i Ana faataitaiga. Na faamalamalama e Elder Joseph B. Wirthlin (1917–2008) o le Korama a Aposetolo e Toasefululua: “O le pepelo o le faaseseina po o le taitaieseina lea. …O se tagata e aunoa ma le pepelo, o se tagata mama lea, faamaoni i ona manatu, mama i ona faamoemoega ma ua faaalia i lona olaga i aso taitasi lona usiusitai i mataupu faavae o le amiotonu. …Ou te talitonu i le tatau i tagata o le Ekalesia ona aunoa ma le pepelo ua sili atu ona manaomia i le taimi nei nai lo aso ua mavae, ona o le toatele o tagata i le lalolagi e foliga mai e le malamalama i le taua tele o lenei uiga o le faamaoni.”1
E faatatau i le faagutugutulua, na saunoa Peresitene Dieter F. Uchtdorf, Fesoasoani Lua i le Au Peresitene Sili: “E leai ma se tasi o i tatou ua matuai pei o Keriso e pei ona tatou iloa e tatau ona avea ai i tatou. Ae tatou te mananao ma le naunautai ia faatoilalo o tatou sese ma le tuinanau e fai le agasala. Faatasi ai ma o tatou loto ma agaga tatou te naunau ai ia lelei atili i le fesoasoani a le Togiola a Iesu Keriso.”2
Ua tatou iloa “o le a faamasinoina i tatou e tusa ai ma mea tatou te fai, o manaoga o o tatou loto, ma ituaiga o tagata ua avea ai i tatou.”3 Peitai, a tatou taumafai e salamo, o le a avea sili atu lo tatou mama—ma “amuia i latou o e loto mama: aua latou te iloa atu le Atua” (Mataio 5:8).
Mau Faaopoopo
Mai Tusitusiga Paia
E le pepelo tamaiti laiti. Na fetalai Iesu: “Ina tuu mai ia o tama iti e o mai ia te au; aua le vavao ia te i latou; aua e faapei o i latou nei o e o i le malo o le Atua. … Ona siitia lea e ia o [tamaiti] i ona lima, ua faaee foi ona aao i luga ia te i latou, ma faamanuia ia te i latou” (Mareko 10:14,16).
Sa auauna atu foi Keriso i tamaiti i Amerika ina ua mavae Lona Faasatauroga. Sa Ia poloaiina tagata ina ia latou aumai a latou fanau laiti ma “Ua faanonofo i latou i lalo i luga o le eleele faataamilo ia te ia, ma sa tu Iesu i le totonugalemu; …
“… [Ma] sa tutulu o ia, ma sa molimauina e le motu o tagata lenei mea, ma sa ia ave a latou fanau laiti, taitoatasi, ma faamanuia i latou, ma tatalo atu i le Tamā mo i latou. …
“Ma a o latou vaai atu sa tetepa ae o latou mata e faasaga i le lagi, ma sa latou vaai i agelu ua afifio ifo mai le lagi e peiseai ua i ai i le totonugalemu o se afi; ma sa latou afifio ifo i lalo ma lio faataamilo ia tamaiti laiti, … ma sa auauna atu agelu ia te i latou” (3 Nifae 17:12, 21, 24).