An Kalim̧m̧ur kōn Iien Otemjej
Robyn Casper, Utah, USA
Kōmeļeļe ko jān Bradley H. Clark
Ilo aō kar jijōt ilo iien jar in kwojkwoj eo ikar kejōkļo̧kijeņ kōn jar eo an pilawe eo, naan ko rekar make āliji er make ilo kōlmenļo̧kijeņ eo aō: “bwe ren maron̄ bōk Jetōb eo an ippāer” (Moronai 4:3; D&C 20:77).
“Iien otemejej,” ej ba—ejjab wōt ilo jejjo iien ko. Etke, innām, jejjo allōn̄ ko m̧oktaļo̧k, n̄a kab ļeo pāleeō kom̧ro kar jab bōk im̧we ikijjen wāween kōjparok ļaddik eo nejim̧ 11 an iiō m̧okta jen an kar mej ilo an kar kūrāāj ilo baajkōl? Etke Jemedwōj Ilan̄ aolep iien ejjab lale kōm im kakkōl kōm?
Ikar katak ilo Būraimere im tōmak bwe Jetōb Kwōjarjar enaaj kar kōjparok kōm. Enaaj kar kōjerbal, ainikien eo elur im mera n̄an lale, tōl, im kakkōl kōm̧ jān kauwōtata. Ļōmņak in elak kar pād ippa jān ke Ben ekar mej. Elukkuun ļap aō būrom̧ōj kake, būrowō ekar matak im kōņaan meļeļe im aenōm̧m̧an.
Ekar pād ia ainikien kakkōl eo ilo n̄a? Ekar pād ia Jetōb Kwojarjar eo? Ikar tōmak ke kōm kar kate kōm jon̄an wōt am maron̄ in wanōk. Kōm̧ kar kōļļā m̧ōttan jon̄oul ko am, iļo̧k n̄an jar, im kōm̧m̧ane kūr ko jabdewōt iien kar kajjitōk. Kōm kar jab lukkuun wanōk, ak kōm̧ kar kōm̧m̧an nukon in jota eo an baam̧le im ekkatak jeje ko rekwojarjar. Kōm̧ kar kajjieon̄.
Ilo ejja tōre in wōt ikar jijōt ilo kūlaaj eo an kōrā ro ke rikaki eo ekar bwebwenato kōn juon nukun. Ke ekar kōttar ilo juon stoplight, eo nukun ekar en̄jake juon en̄jake ke ej aikuj in pād ijo ej pād ie n̄e enaaj green light eo. Ekar ron̄jake im̧we eo, im ejjab etto juon wa kileplep ekar werer tok ilowaan iaļ eo, ilo an būrōrō wōt light eo. Eļan̄n̄e en kar jab ron̄ im pokake ainikien eo, e kab ajri ro nejin remaron̄ kar jorāān ak mej.
Bwebwenato in ekar kalel n̄a, ak ilo aō jijōt ilo jea eo aō im jan̄ im pojak in jutak im etal jen ruum̧ eo, juon kaenōm̧m̧an ekar itok ioō. Ikar en̄jake bwe Jetōb Kwojarjar ekar pād ippa. Ilo en̄jake eo aō ekar pād ippa ejjab āinwōt juon eo ekar kakkōl ak juon eo ekar rikaenōm̧m̧an.
Jān iien eo Ben ekar pād ilo jorāān, ikar en̄jake kajoor eļapļok jen aō kar maron̄ im kar kaenōm̧m̧an jen iakwe eo an Jemedwōj Ilan̄. Ekar dik meļeļe ippa ilo jet iien ko kōn etke jet men rekar waļo̧k, ak ikar jab pere iakwe eo An.
Elōn̄ aō tōmak ke Anij emeļeļe aolep men im eban kōtļo̧k bwe en ejjeļo̧k kaenōm̧m̧an n̄an n̄a. Jetōb Kwojarjar eo elōn̄ men ko ej kōm̧m̧ani ilo mour ko ad. Emaron̄ kōjparok kōj, ak barāinwōt Ej tōl kōj, kaenōm̧m̧an kōj, im letok meļeļe ko im kōjeram̧m̧an ko jet.
Ikar itok n̄an aō jeļā ke Jemedwōj Ilan̄ aolep iien Ej kōjparok kallim̧ur ko An. Ekar aolep iien pād ippa.