“Ij Aikuij Yuk Aolep Awa”
Rijeje eo ej jokwe ilo Utah, USA.
Eļan̄n̄e kōm kar jab jeļā bar ta kōm maron̄ katakin kake, ļeo m̧ōtta ekar kwaļo̧k an lōmņak bwe kōm en al kōn juon al.
Ilo juon rālepān Jabōt ilo mijen eo aō ilo Balsan, Korea, eo m̧ōtta im n̄a kar iak-iakweik membōr ro ālkin jar im jino tōn jerbal eo ke ritōl mijen eo ilo ward eo eaar kwaļo̧k n̄an kōm̧ juon ļaddik 12 an iiō, Kong Sung-Gyun. Ekar itok n̄an jar raan eo im kar kōņaan ekkatak eļapļok kōn gospel eo.
Aet kōm kar lukkkuun m̧ōņōņō kōn jōkjōk eo kōm kar katakin e, ak ikar barāinwōt leln̄o̧n̄ in katakin juon eo elukkuun dik. Kōm kar errā n̄an lukkuun lale bwe kōm en bōk mālim eo an jinen im jemān, kōn menin ikar ko̧o̧ļ e m̧weo im̧ōn Kong Sung-Gyun im kōnnaan ippān jinen, Pak Mi-jung. Ikar ilbōk ke ekar ba ekar m̧ōņōņō ke laddik eo nejin ekar pikot n̄an an itok im jar im bwe enaaj m̧ōņōņō in kirtok kōm bwe kōm en katakini.
Rikatak ro jejjab jeļā kake er
Joteen eo juon kōm kar jikrōkļo̧k m̧weo im̧ōn ļaddik eo, pojak in katakin. Kōm̧ eaar ilbōk ke Pak Mi-Jung ekar barāinwōt kōņaan bwe kōm̧in katakin leddik eo nejin, Kong Su-Jin. Im kōnke kōm eaar ruwaimājet ilo m̧weo im̧ōn, Pak Mi-Jung ekar kōņaan jijōt ilo iien katak eo. Aet kōm kar m̧ōņōņō in katakin elōn̄ ļo̧k ro rekōņaan ron̄jake.
Ālkin aer naajdik kōm̧, kōm kar jijōt ippān doon im jino kōnono. Ijjello̧kin am̧ kajju jino kōn katak eo, Pak Mi-Jung ekar kōņaan jeļā kajjem eļapļo̧k im kwaļo̧k n̄an kōm jōkjōk eo baam̧le eo ej jelm̧ae. Eaar jiron̄ kōm kōn mālijon̄ ko im apan̄ ko raar iooni, ekoba nan̄inmej eo an leddik eo nejin kōn cancer. Ekar tōprak an kar bōk kōm̧adm̧ōd ko jen radiation ko, im cancer eo ekar jako kiō, ak taktō ro rekar kakkōl er bwe emaron̄ bar rooltok jabdwōt iien. Men in ekar ļap an eddo n̄an bam̧le in. Rekar juon baam̧le eo eļap aer eowan ilo jerbal, im jemān ej aikuj in ļap an jerbal n̄an kabwe juon bōrwo̧o̧j n̄an aer pad ium̧win im m̧ōn̄ā n̄an ioon tabōl eo.
Ikar ilbōk im būrum̧ōj kōn mālijjon̄ in ilo mour eo aer. Mour ekar jab pidodo n̄an er, ak kotaan ko ikōtaan baam̧le eo ekar ļap an kam̧ool jen jabdwōt baam̧le ikar jeļā kajjen ilo Korea, eo ej kwaļo̧k kōn aorōk in baam̧le ilo jukjukinpād eo āinwōt Korea. Kōm kar jepļaak jān m̧weo joteen eo im kar jino jeļā kajjeen baam̧le in eaorōk im kar wōr aō iien n̄an kwaļo̧k enaan eo an gospel eo ippāer.
Eo m̧ōtta im n̄a kar bar etal im katakin jejjo alen tok ālik ilo wiik eo, kajjojo iien kōmij en̄jake ejjā aenōm̧m̧an in im jouj eo kōm kar en̄jake ilo lotok eo am kein kajuon. Ke unin kōnono eo peptaij ekar wallōn̄tak, ajri ro rekar jim̧or ikdeleel in kobatok ilo Kabun̄ in. Mekarta, jineer ekar jab bōk m̧ōņōņō eo aer. Mekarta katak ko am rekar melele n̄an e im ekar kōjatdikdik ke rej m̧ool, ekar jab en̄jake ke ej aikuj in kōm̧m̧an im ļoor kakien ko me rej menin aikuj n̄an kobatok ilo Kabun̄ in. Ekar jab bar en̄jake ke ej juon men ejim̧we n̄an e bwe en peptaij ak ļeo ippān ejjab, eo im kōm ejjan̄in kar ioone. Bōtaab, ekar ļap an m̧ōņōņō n̄an wōnm̧aanļo̧k wōt im ekkatak ippām im bar āinwōt kobatok ippān ajri ro nejin ilo mōn jar eo.
Iturinļo̧k jem̧ļo̧k in wiik eo kein karuo, ilo am wōnm̧aanļo̧k im katakin ilo m̧weo im̧ōn, kōm kar ioon ļeo pāleen, Kong Kuk-Won—juon em̧m̧an eo im ettā būruwōn, im jouj. Ekar kobatok ippām ilo katak ko āliktata im m̧ōkaj an tōmak aolep men ko kōm kar katakin, ekoba katak ko jet armej rej lo ke reppen āinwōt juon m̧ōttan jon̄oul im naan in māletlet. Jekdoon n̄e rekar apan̄ kōn jāān, rekar jino kōļļā joun m̧ōttan jon̄oul. Apan̄ eo an Jemān baam̧le eo ekar bwe ej jerbal in Jabōt. Ej jerbal ilo International Airport eo ilo Seoul aolep Jabōt, kōn menin ekar jab maron̄ in kobatok n̄an jar ippān aolepān baam̧le eo. Men̄e jikejuuļ in jerbal eo an ak erro kōrā eo ippān kar kōm̧m̧an koņ n̄an kobatok ilo iien peptaij eo an ajri ro nejierrro jabōt eo tok juon.
Ālkin peptaij eo an ajri ro nejierro, kom̧ro kar wo̧nm̧aanļo̧k im loļo̧k er emakijkij ilo m̧weo im̧ōn baam̧le eo Kōm kar kōm̧m̧an nokon in jota eo an baam̧le, kwaļok jet eoon ko im iien ko rej lōn̄aj mour ko aer, im kwaļo̧k kadkadier n̄an membōr ro ilo ward eo. Mekarta, jekdoon n̄e kōm kar wōnm̧aanļo̧k im kwaļo̧k gospel, jinen im jemen rekar jab epaak aer peptaij.
Ilo ejja iien in wōt ļeo m̧ōtta ekar em̧m̧akūt, im ļeo m̧ōtta ekāāl ekar juon elder ej kajjutok jān jikin kaminene eo an mijinede. Ekar obrak kōn tōmak, kajoor, im lem̧ōņōņō, im ekar pen aō m̧akūtkūt ippān. Ālkin am loļo̧k Kong Kuk-Won im Pak Mi-Jung ālkin jet iien, ļeo m̧ōtta ekar jelm̧ae eō im kajiitōk eļan̄n̄e kom̧ro ļeo m̧ōtta m̧okta kar jitlo̧k ippāer. Kom̧ro ejjan̄in kar. Ilo m̧ool, ļomņak in ejjain̄in kar jiktok ippa. Kōn menin komro kar bar ioon bam̧le eo im kwaļok am̧ro lōmņak n̄an jitlo̧k. Ikar ilbōk ke kar ron̄ ke rekar jen iien n̄an iien jitlo̧k ippāer make, jim̧or n̄an ājmour eo an ļaddik eo nejier im n̄an oktak in jikejuuļ ko aer bwe ren maron̄ kōm̧m̧an bwe Kong Kuk-Won en itok im jar. Ālkin amro ļeo m̧ōtta kobaļok ippāer ilo jitlo̧k, jar ko am̧ro rekar uwaak im jikejuuļ in jerbal eo an Kong Kuk-Won ekar oktak. Ak Pak Mi-Jung elakkar jab kōņaan peptaij.
Juon Kar Ļōmņak Im̧we
Eo m̧ōtta ilo iien eo ekar bar wōr juōn an ļōmņak em̧m̧an. Ekar kadiwōjtok book in al jidikdik eo an jen bōjo eo an im kajjitōk elan̄e kōm maron̄ in al ippāer. Jekdoon n̄e kōm kar al ippāer m̧oktaļo̧k, ijjan̄in kar lo an Pak Mi-Junk al im ikar ļōmņak ke ekar jab em̧m̧an ippān al ak ekar jab iminene kōnke al ko rekar kāāl n̄an e. Eo m̧ōtta ekar kajjitōk ippān eļan̄n̄e elōn̄ al eņ em̧m̧ān ippān, im ikar bwilōn̄, ekar lukkuun m̧ōņōņō im uwaak ke jen ke ekar leddik jidikdik, al eo em̧m̧antata ippān ekar “Ij Aikuij Yuk Aolep Awa” (Al ko al in ajri,nō. 8). Kōm kar al kōn aolepān ainikien ko, jemāer ekar al raino, jineer ekar al alto, im ļeo m̧ōtta ekar tena, im ikar peij.
Jetōb eo ekar kajoor ilo ruum̧ eo. Ilo am al kōn eoon jilu, en̄jake ko rekar im̧we, ainikien ekar bōjrak ilo am̧ al:
Ij Aikuj Yuk Aolep Awa
ilo iien lan̄lōn̄ ak metak.
M̧ōkaj im itok im pād ippa,
Ak mour in epen.
Ij aikuj Eok, o, ij aikuij Eok;
Aolep awa ij aikuj Eok!
O, kwon kōjeram̧m̧an eō kiō, aō Rilo̧mo̧o̧r;
Ij itok n̄an Ippam̧!
Ilo am tōpad jemļokin eoon emān im āliktata, ekar jan̄. Ilo an ļeo ippān ekar kajjieon̄ kaenōm̧m̧an e, ekar maron̄ in kaenōm̧m̧an emake. Ekar kalimjōk meja im ba, “Ij aikuj in peptaij.”
Peptaij eo an Kong Kuk-Won im Pak Mi-Jung raelepen jabōt eo ekar juon iaan en̄jake in jetōb ilo mijen eo aō. Ajri ro nejier rekar bōk ko̧ņaer ilo iien eo, im elōn̄ membōr ro rekar itok im kwaļo̧k aer rie n̄an baam̧le eo ekāāl tata ilo ward eo aer. Eo m̧ōtta im n̄a kar al kōn juon al: “Ij Aikuij Yuk aolep awa.”
Āliktata ikar kadedeļo̧k mijen eo aō im ro̧o̧l n̄an ijo jikū. Ālkin juon iiō ilo college, ikar ro̧o̧l n̄an Korea m̧ōttan ekkatak ko aō ilo summer eo, im kajjojo jem̧ļokin juon wiik ij kōm̧m̧an iien n̄an loļo̧k elōn̄ ro m̧ōtta im baam̧le ko ikar ioon er ilo mijen eo aō. Ālkin jet wiik ikar tōprak ļo̧k n̄an Balsan im ioon baam̧le in eļap aer aorōk. Ke ikar tōparļo̧k m̧weo, ikar kile ke juon ekar jako—ļaddik eo nejier. Kōn dānin kōmjaaļaļ jen mejān, Pak Mi-Jung ekar kwaļo̧k enaan eo n̄an n̄a: kāānjer eo an ļaddik eo nejier ekar bar jepļaaktok im ekar jako ke ej 14 an iiō.
Ilo aō kajjieon̄ kwaļo̧k aō naan in būrom̧ōj im barāinwōt bōbrae jon̄an būrom̧ōj eo aō, Kong Kuk-Won ekar jiron̄ eō bwe aolep men renaaj em̧m̧an. Rekar iakwe gospel eo, tiljek etal n̄an m̧ōn jar eo, im reim̧aanļo̧k n̄an raan eo n̄e baam̧le eo aer renaaj maron̄ liāp ippān doon n̄an indeeo ilo Seoul Korea Temple. Jekdoon n̄e rekar metak, baam̧le eo rekar jeļā ke renaaj bar lo Kong Sung-Gyun im pād ippān doon bar juon alen. Pak Mi-Jung ekar bar ba n̄an n̄a ke ej al jen al in jar ko aolep raan ej lo kajoor n̄an kōkajoor im en̄jake aenōm̧m̧an eo Jetōb eo ej bōktok.
Ilo aō ilo̧k jen m̧weo im̧weer joten eo, ikar bar kejōkļo̧kijeņ kōn naan ko jen al eo em̧m̧an ippān Pak Mi-Jung. Ij m̧ōņōņō bwe Jemedwōj Ilan̄ ekar kōjeram̧m̧an baam̧le eo kōn aenōm̧m̧an ālkin an Kong Sung-Gyun mej, im eļaptata aō kam̧m̧olol kōn jerbal eo an Jetōb n̄an oktak eo an Pak Mi-Jung, eo ekar kōm̧m̧an bwe baam̧le eo en maron̄ in bōk kōjeram̧m̧an ko indeeo an tampeļ eo.