Jekjek ko An Gospel
E Emōj an Jerkak
David O. McKay ekar ļotak ilo Jeptōm̧ba 8, 1873. Ekar ekkapit n̄an rijilōk ilo Eprōļ 9, 1906, ke ej 32 iiō dettan, im ilo Eprōļ 9,1951, kar rejtak e Būreejtōn eo kein kōratimjuon an Kabun̄ in. En̄in ej ennaan ko ekar kwaļo̧ki ilo Eprōļ 1966 kweilo̧k eo eļap. N̄an lale aolep enaan eo, lale riboot in Kweilo̧k eo eļap, Eprōļ. 1966, 55–59.
Jab pere ilo Kraist ej men eo eaorōktata laļ in eaikuji.
Eļan̄n̄e kabwilōn̄lōn̄ ko rej men ko kajoor ko aer eļapļok jen māletlet an armej, innām jerkakpeje eo an Jisōs Kraist ej kajoor in kabwilōn̄lōn̄ eo eļap iaan aolep. Ilo men in ej kwaļo̧k kajoor bōtata eo an Anij im wabanban an armej.
Jerkakpeje eo ej juon kabwilōn̄lōn̄, mekarta, ilo wōt ļōmņak in ke tarjen jon̄an an armej maron̄ jeļā im meļeļe kake. N̄an aolep ro rej rejtak ke ej m̧ool, ej juon jeļā eo bōk kōn kien ko an mour. …
Likūt bwe en juon meļeļe bwe Kraist ekar bōk lōn̄ļo̧k ānbwinnin im waļo̧k āinwōt juon eo ekar kwojarjar, im ekar jerkakpeje, im kwoj uwaake kajjitōk eo jān etto: “eļan̄n̄e armej remej, renaaj ke bar mour?” (Job 14:14).
Rikam̧ool ro an Jerkakpeje eo
Bwe Jerkakpeje eo an Kraist jen lōb ekar juon men ekar bōk jikin n̄an rikaļoor ro raar jeļā kake E im ej lukkuun juon men em̧ool. Ilo kōļmenļo̧kjeņ ko aer ekar lukkuun ejjeļo̧k pere. Rekar rikam̧ool kōn men eo ekar waļo̧k; rekar jeļā kōnke rekar loe kōn mejāer, lojiln̄ier ekar ron̄, peier kar en̄jake lukkuun peltokin Ripinmuur eo ekar jerkakpeje.
Piter, Rijilōk eo ekar tōl, ilo tōre eo ke ro jon̄oul juon rekar ioon doon n̄an kālet juon bwe en pinej jenkwan Judas Iscariot, ekar ba, “Innām jān armej rein … juon iad en ri kōnnaan ipped kōn An jerkakpeje.” (Jerbal 1:21–22). …
Ilo bar juon tōre Piter ekar kwaļo̧k im̧aan rikōjdāt ro aer, armej eo ekar likūt Jisōs n̄an mej ioon debāāl: “Kom̧, armej in Israel, kom̧win ron̄jake naan kein; … Anij ear kajerkakpeje Jisōs in, kom̧ otemjej rikōnnaan kake. (Jerbal 2:22, 32). …
Rikam̧ool ro Jet
Kabun̄ eo an Jisōs Kraist im Armej ro Rekwojarjar ilo Raan-ko Āliktata rej jutak ippān Piter, ippān Paul, ippān Jemes, im ippān aolep Rijilōk ro m̧okta ro rekar rejtak Jerkakpeje eo ejjab m̧ool wōt, ak āinwōt men eo eaorōk tata ilo mijen eo an Kraist ioon laļ in.
Jon̄oul ralitōk taujin iiō ko ālkin an Kraist mej ioon debāāl, rikanaan eo Joseph Smith ekar kwaļo̧k bwe Irooj eo ekar jerkakpeje ekar waļo̧k ļo̧k n̄an e, ekar ba: “Iar loe ruo armij ro elap air llikun meram im aibujuij n̄ōn aō kwalok wāwen irro. Irro ar jutak ioō ilo mejatoto. Juon iair ear konono n̄ōn iō, ear kir kin etan eo etan—En̄in Nejū Jiten bōro. Ron̄jake E!” (Joseph Smith—History 1:17). …
Eļan̄n̄e naan in kam̧ool eo an Joseph Smith ej jutak ļak make iaan, enaaj kar āinwōt, an kar Kraist ba kōn naan in kam̧ool eo An ke ekar kōnono kake E make, ilo an ejjeļo̧k rekar kam̧ool; ak epād naan in kam̧ool eo an Anij im ko an Rijilōk ro. Im Joseph Smith ewōr jet an rikam̧ool [ro rekar] lukkuun kapen naan in kam̧ool eo [an], m̧ool eo kar kwaļok kake jān waļo̧k lak eo an Enjeļ Moronai n̄an er. …
… Kabun̄ eo an Jisōs Kraist im Armej ro Rekwojarjar ilo Raan-ko Āliktata ej kwaļo̧k kōn vision eo eaiboojoj an Rikanaan Joseph Smith:
Im kiiō, ālkin elōn̄ naan in kam̧ool ko me raar kwaļo̧k kōn Rilo̧mo̧o̧r eo, eaar letok naan in kam̧ool in, āliktata, eo kōmij kwaļo̧k kōn E: Bwe Rilo̧mo̧o̧r eo ej mour! (lale D&C 76:22). …
Ilo meram in naan in kam̧ool ko kojab maron̄ in kajejtokjān ilo an kar kwaļo̧k jen Rijilōk ro etto—naan in kam̧ool ko jān raan ko im iiō ko m̧oktaļo̧k jen ien eo make—ilo meram in an revelesōn in eaorōk ilo tōre kein Kraist eo ej mour, emaron̄ in pen n̄an meļeļe etke armej remaron̄ kōjekdo̧o̧n E im maron̄ pere jab wabanban an armej.
Ta eo Jej Aikuji Rainin
Jab pere ilo Kraist ej men eo eaorōktata laļ in eaikuji. Eļapļok jān juon en̄jake eo eim̧we. Ej kajoor eo ej kōm̧akūt n̄an kōm̧m̧ane, im emaron̄ ilo mour an armej men eo elemwaan tata iaan aolep men rekam̧ōņōņō. …
N̄e armej remaron̄ in kar “kōm̧anm̧an An kilaan,” ijjelo̧kin reilo̧k ilo ejeļo̧k kōjatdikdik bwe lōb eo ej boktok būrom̧ōj, remaron̄ in bok mejāer lōn̄ļo̧k n̄an lan̄ im jeļā ke Kraist em̧ōj an jerkak. …
Kabun̄ eo an Jisōs Kraist im Armej ro Rekwojarjar ilo Raan-ko Āliktata rej kwaļo̧k n̄an laļ in bwe Kraist ej nejin Anij, Ripinmuur eo an laļ in. Ejjeļok rikaļoran eo em̧ool ej po an ļōmņak ke E ej juon eo ekar kōm̧m̧ane juon jepelļo̧k in kabun̄, rūkaki eo ewājepdik, ak juon eo e wāppen. RiGalilee eo ej—jab juon eo epidodo meļeļe kake, bōtaab ilo m̧ool—eo nejin Anij eo ej mour. …
Ekar bar lotak juon alen
Ejjeļo̧k armej emaron̄ in lukkuun m̧ool ilo jerbale n̄an kōm̧m̧āne ta ko ekar ilo aolepān mour eo an katak ko an Jisōs RiNazareth eo ilo an en̄jake juon oktak ilo aolepān e. Naan eo “bar ļotak” elōn̄ men ko rem̧winaļ ļok ippān jen men ko armej rej kobaļo̧k n̄an ippān. … E m̧ōņōņō armej eo ej lukkuun m̧ool in en̄jake kajoor in ļōn̄aj, im oktak eo ej itok jān epaakeļo̧k Rilo̧mo̧o̧r eo, atartar ippān Kraist eo emour. Ij kam̧m̧oolol bwe ijeļā ke Kraist ej aō Ripinmuur. …
Enaan eo an Jerkakpeje eo … ej eo im eļaptata an kaenōm̧m̧an, eo eļaptata an aiboojoj kar letok n̄an armej, bwe kōnke n̄e mej ej bōk juon eo eaorōk ippād jān kōj, bōro ko ad im rebūrom̧ōj rej kaenōm̧m̧an jān kōjadikdik im kaenōm̧m̧an eo ekwojarjar im ej kwaļo̧k ilo naan ko: “E ejjab pād ijin; em̧ōj an jerkakpeje!” [Lale Matu 28:6; Mark 16:6].
Kōn aolepān būruwō ijeļā ke mej em̧ōj an anjo kōn Kraist, im kōnke ad Ripinmuur ej mour, kōn menin jenaaj.