2015
Nokon in Jota eo an Baam̧le—Komaron̄ Kōm̧m̧ane!
Eprōļ 2015

Im̧ōko Im̧ōd, Baam̧le ko Ad

Nokon in Jota eo an Baam̧le—Komaron̄ Kōm̧m̧ane!

Jekdo̧o̧n baam̧le rōt ņe am, nokon in jota eo an baam̧le emaron̄ kōjeram̧m̧an im kōkajoorļo̧k eok.

Pija
composite of older photo and paint brushes with paint on them.

Pija in bwebweanto ko jen Brigham Young University; jin̄a jen iStock/Thinkstock

Juon baba eo ej itok jen jikin jerbal im lo aolepān baam̧le eo an kōn en̄jake ko rejjab em̧m̧an. Joteen M̧ande, im ejjab em̧m̧an n̄an kōm̧m̧an nokon in jota eo an baam̧le. Ālkin juon jar n̄an jipan̄, baba im m̧am̧a eo rekar pepe n̄an kōm̧m̧ani men ko repidodo. Raar kakuktok baam̧le eo ippān doon, al al in jar ko, im jar ippān doon. Raar leļo̧k n̄an kajjojo uwaan baam̧le eo kāāntōļ n̄an kōmeram ilo aer kwaļo̧k men ko raar im̧we er m̧okta ļo̧k. Ilo ruum̧ eo emarok, meram in kāāntōļ ko raar pinej jenkwan im̧we im kōm̧m̧an bwe ajri ro ren ron̄jake wōt. Ilo aer kwaļo̧k naan in kam̧ool ko, juon en̄jake eo eaenōm̧m̧an im iakwe eaar pādejake im̧weo. Baam̧le eo ekar kōjem̧ļo̧k joteen eo kōn m̧ōņōņō bwe rekar kōm̧m̧ane nokon in jota eo.

Kwar jeļā ke bwe nokon in jota eo an baam̧le ej juon būrookram̧ an Kabun̄ ium̧win100 iiō? Ilo Eprōļ 1915, Būreejtōnji eo Kein Kajuon eaar karon̄ membōr ro n̄an kōjeno̧ļo̧k juon jota kajjojo wiik n̄an jar an baam̧le, al, katak gospel eo, bwebwenato ko, im m̧akūtkūt ko. (Lale peij 80 kōn leta eo jān Būreejtōnji eo Kein Kajuon.) Rikanaan ro rej kakeememej wōt kōn aorōk eo an nokon in jota eo an baam̧le. Būreejtōn Thomas S. Monson eaar ba, “Jeban kowaan būrookram̧ in eim̧we.” “Emaron̄ bōktok eddōk ļo̧k ilo jetōb n̄an kajjojo uwaan baam̧le eo, jipan̄ ļeo ak lio n̄an jutak ņae kapo ko rej pād aolep jikin.”1

Erkein rej jet wāween ko n̄an kejōkļo̧kjeņ kaki ilo am̧ kōm̧m̧ane bwe nokon in jota eo an baam̧le ej m̧ōttam̧ ilo kajjojo wiik.

Menin ej jerbal n̄an eō. “Nokon in jota eo an baam̧le rej n̄an aolep,” Elder L. Tom Perry eaar ba jen Doulul eo an Jon̄oulruo Rijilōk ro.2 Kōj aolep—ripālele ak jab ripālele, ejjeļo̧k nejin ak elōn̄ nejin—maron̄ leļo̧k iien n̄an kōkajoorļo̧k baam̧le eo im ekkatak gospel eo.

Imaron̄ lo iien. Kabun̄ in ej kōm̧m̧an waanjon̄ok bwe joteen in M̧ande ko en ejjeļo̧k m̧akūtkūt an Kabun̄. Komaron̄ kwaļo̧k n̄an Irooj im baam̧le eo am̧ bwe kwoj kōnaan joļo̧k jidik iien kōn ta eo elukkuun in aorōk.

Imaron̄ lo ta eo em̧m̧an n̄an baam̧le eo aō. Eļan̄n̄e baam̧le eo am̧ repād etto ļo̧k, kajieon̄ e “nokon in jota eo an baam̧le ilo intōrnet” im kōnono ippān ro uwaan baam̧le eo ilo intōrnet ak ilo taļboon. En ke to an juon itok jen jikin jerbal? Kōm̧m̧ane juon “nokon in jota eo an baam̧le,” ijo epaake jikin jerbal eo ilo iien kakije. Juon baba ejepel eaar kōm̧m̧ane juon “nokon in jota eo an baam̧le” kajjojo M̧ande ilo an jeje leta, n̄an ajri ro nejin rej pād etto ļo̧k.3 Kōm̧m̧an bwe apan̄ ko ren jako ļo̧k.

Imaron̄ jino wiik in. Nokon in Jota eo an baam̧le emaron̄ kōm̧m̧an ekkar n̄an aikuj ko im jekjek ko ilo kapijuknen eo am̧. Erkein jet ļōmņak ko:

  • Jino im kōjjem̧ļo̧k kōn jar.

  • Kōjerbal al, ekoba al in jar ko im al in Būraimere ko.

  • Katak jān jeje ko rekwojarjar im rikanaan ro remour.

  • Ekoba m̧akūtkūt ko, būrojāāk ko, im m̧akūtkūt ko ilo gospel in jān wiik n̄an wiik.

  • En limo̧! Kōm̧m̧an ikkure ak kōm̧m̧an kapije.

  • Jokkin wōt Juon. Eļan̄n̄e kojjab maron̄ kōm̧m̧ane ilo M̧ande, pukōt raan ko jet me emaron̄ jerbal.

Ikōņaan kōjeram̧m̧an ko. Rikanaan ro raar kallim̧ur bwe eļan̄n̄e jej bōk kūņad ilo nokon in jota eo an baam̧le, elōn̄ kōjeram̧m̧an ko reļļap renaaj waļo̧k: Iakwe im pokake ilo kapijuknen naaj ļapļo̧k. Tōmak enaaj ļapļo̧k ilo būruwōn jodikdik ro. Baam̧le ko “renaaj bōk kajoor n̄an tariņaeik im̧we im kapo ko an devil” me renaaj jepo̧o̧ļ er.4

Men̄e eban wājabdik im jab lukkuun jejjet aolep iien, baam̧le eo am̧ naaj kajoorļo̧k im naaj jeram̧m̧an kōn kijejeto ko am̧. “Kajjojo nokon in jota eo an baam̧le ej juon im̧we n̄an jetōb ko ad,” Elder David A. Bednar jen Doulul eo an Jon̄ourlruo Rijilōk ro eaar ba. “Ejjeļo̧k juon nokon in jota eo an baam̧le enaaj lukkuun em̧m̧an ak jejjet. Ak āinwōt ilo an … būraaj in uno ko jerbal ippān doon im kwaļo̧k juon tōprak, āindein ad emakijkij kōm̧m̧ane men ko reddik me remaron̄ tōl ļo̧k n̄an tōprak ko raorōk an jetōb.”5

Kakeememej ko

  1. Thomas S. Monson, “Constant Truths for Changing Times,” Liahona, May 2005, 19.

  2. L. Tom Perry, “Therefore I was Taught,” Ensign, Māe 1994, 38.

  3. “Family Home Evening: Any Size, Any Situation,” Ensign, Dec. 2001, 42.

  4. Būreejtōnji eo Kein Kajuon, ilo James R. Clark, comp., Ennaan ko an Būreejtōnji eo Kein Kajuon jān Kabun̄ eo an Jisōs Kraist im Armej ro Rekwojarjar ilo Raan-ko Āliktata, 6 vols, (1965–75), 4:339.

  5. David A. Bednar, “More Diligent and Concerned at Home,” Liahona, Nov. 2009, 19–20.