Lotu Vakamatavuvale—SA RAWA NI O CAKAVA Ni O Cakava!

Se vakacava na ituvaki ni nomu matavuvale, na lotu vakamatavuvale e rawa ni vakalougatataki ka vaqaqacotaki iko.

iVakatakilakila

composite of older photo and paint brushes with paint on them.

Veitaba makawa lolomataka na Brigham Young University, itaba ni droini mai vei iStock/Thinkstock

E yaco mai ki vale ena oca e dua na tama ni oti e dua na siga dredre e cakacaka ka raica ni ra sasaga dredre voli na vo ni matavuvale ena ka vataga e vakila tiko. E bogi ni Moniti, ka vaka me dredre ni vakayacori na lotu vakamatavuvale. Ni cabori oti e dua na masu ni kere veivuke, sa nanuma o tama kei tina me tauri vakarauta na veika me vakayacori. Erau kaciva vata na matavuvale, lagata e dua na serenilotu, ka masu vata. Erau solia na kadrala ki na lewenivale yadua me waqaca ni ra tukuna e dua na ka a vakauqeti ira wale tikoga. Ena dua na rumu butobuto, na rarama ni kadrala e matataka na veivakauqeti ka vakaraica na nodra kauwai na gone. Ni ra sa wasei na ivakadinadina, a vakilai ni curuma na itikotiko e dua na vakacegu kei na loloma. E mai vakacavara na matavuvale na bogi oya ena vakavinavinaka ni ratou a vakayacora na lotu vakamatavuvale.

O sa kila li ni lotu vakamatavuvale esa parokaramu tu mai ni Lotu ena 100 na yabaki? Ena Epereli 1915, a dusimaki ira kina na lewenilotu na mataveiliutaki taumada mera biuta vakatikitiki e dua na bogi ena veimacawa me baleta na masumasu, sere kei na ivakatagi, vulici ni kosipeli, italanoa, kei na itaviqaravi eso vakamatavuvale. (Raica na tabana e 80 me baleta e dua na ivola ni nodratou vosa na Mataveiliutaki Taumada.) Era sa dau tomana mera vakananumi keda na parofita me baleta na bibi ni lotu vakamatavuvale. “Sa sega ni rawa ni da vakawalena na parokaramu vakauqeti mai lomalagi oqo,” a kaya o Peresitedi Thomas S. Monson. “E rawa ni kauta mai na tubu vakayalo ki na lewe ni matavuvale yadua, ka vukei ira mera vorata na veitemaki eso e sa tu wavoki.”¹

Oqo eso na ivalavala ni bula me vakasamataki ni o vakayaco lotu vakamatavuvale ena veimacawa:

Oqo e vakaibalebaletaki kivei au. “Na lotu vakamatavuvale e sa baleti keda kece,” a kaya o Elder L. Tom Perry ena Kuoramu ni iApositolo Le Tinikarua.² O keda taucoko—vakawati se tiko duadua, vakaluveni se sega—sa rawa ni vakatikitikitaka eso na gauna me vaqaqacotaka na matavuvale kei na vulici ni kosipeli.

Au sa rawa ni raica na gauna. Sa tuvalaka na ivakaraitaki na Lotu ena vagalalataki ni veibogi ni Moniti mai na itaviqaravi eso ni Lotu. Sa rawa ni o vakaraitaka vua na Turaga kei na nomu matavuvale ni o sa tuvakarau mo biuta vakatikitiki na gauna ki na ka e sa bibi duadua.

Au sa rawa ni raica na ka e veiganiti ki na noqu matavuvale. Kevaka e sa veitawasei na nomu matavuvale vakaiwase ni itikotiko, tovolea e dua na “lotu vakamatavuvale ena mataveilawa” mo veivosaki kei na lewe ni matavuvale ena komupiuta se na talevoni. E dua beka me na cakacaka bera? Vakayacora e dua na “lotu vakamatavuvale ena vanua ni gade” donuya e dua na cegu volekata na vanua ni cakacaka. E dua na tama sere oti e vakayaco “lotu vakamatavuvale vakaivola” ena vei Moniti, ni volavola voli kivei ira na luvena ka tiko vakayawa tu.³ Raica na dredre eso me idewadewa ki na vakavure ni vakasama cecere.

Au sa rawa ni tekivu ena macawa oqo. Sa rawa ni vakarautaki na lotu vakamatavuvale me vakatau ki na gagadre kei na ituvaki ni nomu itikotiko. Oqo eso na vakatutu raraba.

Tekivuna ka vakacavara ena masu.
Vakayagataka na sere kei na ivakatagi, oka kina na serenilotu kei na sere ni Lalai.
Vuli mai vei ira na parofita edaidai kei na ivolanikalou.
Okata eso na itaviqaravi duidui eso, itavi vakaveivuke, kei na itaviqaravi vakosipeli eso ena veimacawa.
Marautaka! Vakayacora e dua na qito se caka vakalomavinaka.
Mo vakaivakarau. Kevaka o sega ni rawa ni vakayacora ena Moniti, raica tale e dua na siga me caka kina.

Au vinakata na veivakalougatataki. Era sa yalataka na parofita ni kevaka eda vakaitavi ena lotu vakamatavuvale, ena yaco na veivakalougatataki levu: Ena vakalevutaki na loloma kei na talairawarawa ena itikotiko. Ena taraicake na vakabauta ena lomadra na itabagone. Na matavuvale “ena rawa kaukauwa me valuta na veivakayarayarataki vakatani kei na veitemaki” e wavoliti ira.⁴

Me vaka ni na rairai sega ni taucoko sara na veika e sotavi ena nomu lotu vakamatavuvale ena gauna taucoko, ena vaqaqacotaki ka vakalougatataki na nomu matavuvale mai na nomu sasaga. “Na lotu vakamatavuvale yadua e sa dua na itoqabarasi ena tavuleni ni yaloda,” a vakatavulica o Elder David A. Bednar ena Kuoramu ni iApositolo Le Tinikarua. “E sega ni dua na soqo me na rairai vakasakiti sara se ivakananumi. Ia me vaka ga na … itoqa ni boro ni ra veitokonitaka vata vakayadua ka rawata e dua na itagede cecere, na noda duavata ena vakayacori ni veika lalai sa rawa ni muataki ki na vatuka eso vakayalo e kilai tani.”⁵