Wōn eo Ebun̄bun̄ Ippam̧?
Rijeje eo ej jokwe ilo California, USA.
Ellie ekar jeļā wōn eo ebun̄bun̄ ippān, ak ekar mijak in ba.
“Dāpij wōt en̄jake eo kwojeļā, am̧ kautiej, am̧ tōmak; jutak āinwōt juon eo ebun̄bun̄” (Children’s Songbook, 158).
Ellie ekar kij addin pein ilo an leln̄on̄. Miss Fitz ekar etal itok wōt ippān tebōļ ko im kajjitōk ippān kajojo rijikuuļ juon kajjitōk, juon ilo̧k juon.
“Wōn eo ebun̄bun̄ ippam̧?” Miss Fitz ekar kajjitōk ippān Jeremy.
Jeremy ekar jab likūt jidik iien n̄an uwaak. “Jema” ekar m̧ōņōņō ilo an ba.
Miss Fitz ekar ettōn̄ dikdik. “Im eo am̧, Sarah?”
Uwaak eo an ekar m̧ōkaj an itok. “Abraham Lincoln”
Ellie ekar en̄jake an menono eo an em̧m̧akūtkūt ilo an Miss Fitz itok wōt ippān rijikuuļ ro. Rekar kōnono kōn wōn eo ebun̄bun̄ aolepān raan eo, im kiiō aolep rej aikuj in ba wōn eo ebun̄bun̄ ippān—im̧aan aolepān kūlaaj eo!
Amber im Justin rekar ba bwe jineer ekar armej eo aer ebun̄bun̄. Walter ekar ba eo an ej jim̧m̧aan. Jejjo rijikuuļ rekar ba eo aer ekar juon kiin̄ ak juon būreejtōn.
Jejjo wōt rijikuuļ rekar em̧m̧akūt m̧okta jān an Miss Fitz kar tōpar Ellie. Ej aikuij in kar ļōmņak kōn juon eo ebun̄bun̄ ippān—im en m̧ōkaj an kōm̧m̧ane.
Ellie ekar reilaļļo̧k n̄an juuj ko an, ekar jook. Ba juon eo ebun̄bun̄ ekar jab juon jorrāān. Ekar jeļā wōn eo ebun̄bun̄ ippān. Ekar Jisōs Kraist. Ekar kōmour rinan̄inmej ro, kōjerkak rimej ro, im kōļļāik wōņāān jerawiwi ko an aolep. Ekar armej eo ebun̄bun̄ tata eo ekar mour ilo laļ in! Ekar mijak in ba.
Ellie ekar kūj addin pein ilo an ļōmņake an naaj ba n̄an aolepān kūļaaj eo ke Jisōs Kraist ekar armej eo ebun̄bun̄. Ak n̄e Jeremy ekajjirere kake e? Ak n̄e Sarah im Amber renaaj unoojdikdik kake e ilo iien kakkuje?
Aaet ekar jeļā ke Jisōs Kraist ekar eo im ebun̄bun̄ ippān. Ak jab kar meļeļein ke aolep raar aikuj in jeļā.
Miss Fitz ekar bōjrak im̧aan tebōļ eo an Ellie im ettōn̄ dikdik. “Im wōn eo ebun̄bun̄ ippām̧, Ellie?”
Ellie ekar kalimjōk rijikuuļ ro iturin n̄an ippān Miss Fitz. “Abraham Lincoln,” ekar unoojdikdik.
Miss Fitz ekar ettōn̄. “Em̧m̧an!” Ekar ba ilo an etal n̄an ippān rijikuuļ eo juon.
Ke ekar etal, aeran Ellie ekar meraļo̧k jān eddodo. Kamm̧olol em̧ōj an dedelo̧k. Men eo ekar jab kōņaan bwe aolep ro ilo kūļaaj eo en jeļā wōn eo ebun̄bun̄ ippān—
“Jisōs Kraist” juon ainikien ekar ba:
Ellie ekar bwilōn̄ ilo an jidik wōt an erreilo̧k. Ijo—jidik wōt an ettoļo̧k jān ijo ej pād ie—ekar jijet juon ļaddik jidikdik eo ebūran̄ran̄ bōran. Ekar aidik im ejjokook, im aolep iien ej jijōt ituliktata ilo kūļaaj eo. Ellie ekar jab jeļā etan. Ejjab keememej an kar kwaļo̧k juon naan—m̧ae iien kiiō.
Jejjo rijikuuļ rekar oktakļo̧k im kalimjōk ļaddik eo, ak ekar jab kile er. Ekar reilo̧k n̄an Miss Fitz im bar ba. “Armej eo ebun̄bun̄ ippa ej Jisōs Kraist.”
Miss Fitz ekar ettōn̄ dikdik im wōņm̧aanļo̧k wōt ilo row eo. Ak Ellie ekar kalimjōk ļaddik eo ilo an bwilōn̄. Ekar mijak in ba n̄an aolep kōn armej eo ebun̄bun̄ ippān, ak ļaddik eo ekar jab. Jekdo̧o̧n n̄e ekar jab jar ilo m̧ōn jar eo an! Ak ekar jeļā ewi jon̄an an aorōk n̄an jutak āinwōt waanjon̄ak an Jisōs Kraist, jekdo̧o̧n n̄e ekar pen.
Ellie ekar ettōn̄ ļo̧k n̄an ļaddik eo. Liin ej jāmin bar mijak in ba wōn eo ebun̄bun̄ ippān. Āliktata, ewōr ruo iaer ippān kiiō.