2014
Anemkwoj in Kālet ak Anemkwoj ilo Mour?
Oktoba 2014


Anemkwoj in Kālet ak Anemkwoj ilo Mour?

Māletlet ilo ad kōjerbal kālet ko ad ej kōjparok kālet ko kōkm̧anm̧anļo̧k ad kālet jim̧we.

Pija
composite of 2 photos of a young man in casual clothes and him in a suit.

KŌMEĻEĻE IN PIJA JĀN Christina Smith; Kōmeļeļe ko jān Bryan Beach

Ij keememej wōt jon̄an aō kar kijoror ilo aō kōppojak n̄an loļo̧k bisop eo aō kōn jerbal e juon mijen. Iaar ļōmņak eļan̄n̄e iaar em̧m̧an n̄an jerbal e juon. Iaar jab en̄jake aō bōd kōn jabdewōt jerawiwi enana (lale Joseph Smith—History 1:28), ak iaar ikkum̧kūm.

Iaar leln̄o̧n̄ kōnke iaar jab maron̄ bōjrak ak ļōmņak kōn eo m̧ōtta Danny (et eo em̧ōj an oktak). Ium̧win elōn̄ allōn̄ ko Danny eaar kōnono kake ewi jon̄an an reim̧aanļo̧k n̄an jerbal e juon mijen. Bōbaat eaar oktak ālkin an ioon bisop eo.

Kōnke Danny eaar bōk koņaan ilo m̧wil ko rej jab erreo ippān jet iaan jiron̄ ro, e tokālik ekar ba n̄an n̄a, ekar joļo̧k e make jān jerbal in juon mijen. Eaar jako an maron̄ anemkwoj in kālet e juon mijen.

Danny, ilo naan ko an Būreejtōn Boyd K. Packer, Būreejtōn eo an Jon̄oulruo Rijilōk ro, kar wōtlo̧k ilo kapo ko an Satan, “n̄an jab jim̧we ilo kōjerbal anemkwoj ilo mour eo [an].”1

Anemkwoj eo em̧ool, āinwōt For the Strength of Youth ej katakin, itok n̄e jej kōjerbal anemkwoj in kālet eo ad n̄an kālet pokake. Luuji anemkwoj, āinwōt Danny eaar katak, ej itok jān kālet jab pokake.

“Jej anemkwoj n̄an kālet ta jenaaj im n̄an bōk im kālet jerbal ko ad, ak jejjab anemkwoj n̄an kālet jem̧ļo̧k eo. Mekarta n̄an em̧m̧an ak nana, waļo̧k ko rej ļo̧o̧ri āinwōt tōprak in kālet ko kwaar kōm̧m̧ani.”2

Rijerbal n̄an Kōj Make

Kōnke jeje ko rekwojarjar rej katakin kōj bwe jej “anemkwoj n̄an kālet,” “anemkwoj n̄an kōm̧m̧an,” im anemkwoj n̄an kōm̧m̧an aolep men “ilo kōņaan eo [ad] make” (2 Nipai 2:27; 10:23; D&C 58:27; Hilamōn 14:30), ekka ad kōjerbal naan in “anemkwoj in kālet.”

Ak kwojeļā ke naan in “anemkwoj in kālet” ejjab waļo̧k ilo jeje ko rekwojarjar? Ijjelo̧kin jeje ko rekwojarjar rej katakin bwe jemaron̄ kōm̧m̧an ekkar n̄an katak ko im pedped ko ekkar n̄an anemkwoj ilo mour eo E ekar letok n̄an kōj, bwe jen eddoik jerawiwi ko ad make (lale D&C 101:78; aorōk eo kobaiktok).

Elder D. Todd Christofferson jen Doulul eo an Jon̄oulruo Rijilōk ro eaar katakin: “Naan eo anemkwoj ej waļo̧k [ilo jeje ko rekwojarjar] ilo an make iaan ak ippān naan eo ej kwaļo̧k kadkad in ilo mour in kanniōk. … N̄e jej kōjerbal naan eo anemkwoj ilo mour, jej kwaļo̧k ilo jim̧we wāween bōk eddo ej menin aorōk im ej m̧ōttan menin letok eo ekwojarjar an menin letok eo an anemkwoj. Kōj armej kanniōk im jej Rijerbal n̄an kōj make, anemkwoj n̄an kālet ak bar āinwōt eddoik make kālet ko ad.”3

Būreejtōn Packer eaar kakkobaba, ”Anemkwoj eo ej kōmeļeļe ilo jeje ko rekwojarjar āinwōt anemkwoj ilo mour, meļeļein bwe jemaron̄ kālet kōtaan em̧m̧an im nana.4 Menin letok in jān Anij meļeļein jej “Anemkwoj n̄an kālōt anemkwoj im mour indeeo, kōn Ri Jojomar eo an armej otemjeļo̧k, ak n̄an kālōt kōm̧akoko im mej, ekkar n̄an kōm̧akoko im kajoor eo an devil” (2 Nipai 2:27).

Tariņae eo an Setan ņae Anemkwoj

Kōnke anemkwoj ilo mour in eļap ijo koņaan ilo karōk in lo̧mo̧o̧r, Satan ekar pukot bwe en kakkure ilo mour eo m̧okta. Kar jolaļtak e kōn nana eo an im kiiō ej pukōt n̄an m̧oņ im tōl piloik armej, im tōl er n̄an kakkure ilo ankilaan (lale Moses 4:3–4).

Satan ekōņaan bwe jen kōm̧m̧an kālet ko im renaaj kabōjrak anemkwoj eo ad, bōkļo̧k n̄an imminene nana ko im an̄ūrlep ko, im joļo̧k bwe jān kajoor ko ad n̄an roļo̧k jān kapo ko an. Aiboojoj eo an gospel in ej bwe ej kōm̧m̧an bwe jān ellewetak kōn kālet ko ad im jineekjej in kālet kein. Māletlet ilo ad kōjerbal kālet ko ad ej kōjparok kālet ko kōkm̧anm̧anļo̧k ad kālet jim̧we.

Waanjon̄ak eo an Rilo̧mo̧o̧r eo

Ke karōk in lo̧mo̧o̧r eo kar kwaļo̧k ilo Ko̧o̧njeļ eo Eļap ilo Lan̄, Rilo̧mo̧o̧r eo ekar kwaļo̧k n̄an kōj wāween kōjerbal anemkwoj ilo mour in eo ad ilo jejjet. Jisōs Kraist eaar ba bwe ankilaan Jemān aikuj dedeļo̧k im aiboojoj ej aikuj an Jemān n̄an indeeo (Moses 4:2). Kōnke Ekar m̧ōņōņō in kōm̧m̧ane ankilaan Jemān innām tokālik ilo jikin kallib Gethsemane im ioon dōbwāāl eo (Matu 26:39; Luk 22:42), Jisōs eaar kōļļā wōņāān kālet ko ad rejjab em̧m̧an im kōpooj juon iaļ n̄an ad bōk jeorļo̧k in bōd kōn ukweļo̧k.

Eļan̄n̄e jenaaj ļoor waanjon̄ak eo an Rilo̧mo̧o̧r eo, ijjelo̧kin ad ba, “Ij kōm̧m̧ane men eo ikōņaan,” jenaaj kwaļo̧k, “Ij kōm̧m̧ane men eo Jema ekōņaan.”5 Kōjerbal anemkwoj eo ad ilo mour ilo wāween in enaaj boktok n̄an kōj anemkwoj im m̧ōņōņō.

Ilo aō kar etal im ioon Bisop eo aō ilo intōrpiu eo aō kein kajuon n̄an mijen, ikar m̧ōņōņō bwe ikar kōm̧m̧an kālet ko rem̧m̧an. Jet allōn̄ ko tokālik ikar jerbal n̄an Irooj ilo Guatemala—katakin ro jet karōk in lo̧mo̧o̧r eo im eddo eo eaorōk an anemkwoj ilo mour ej bōk jikin karōk in.

Kakeememej ko

  1. Boyd K. Packer, “These Things I Know,” Liahona, May 2013, 8.

  2. For the Strength of Youth (2011), 2.

  3. D. Todd Christofferson, “Moral Agency,” Ensign, June 2009, 47.

  4. Boyd K. Packer, “These Things I Know,” 8.

  5. Lale Wolfgang H. Paul, “The Gift of Agency,” Liahona, May 2006, 35.