2014
Naan in Kam̧ool eo Aō Elioktitpok
Oktoba 2014


Gospel eo ilo Mour eo Aō

Naan in Kam̧ool eo Aō Elioktitpok

Rijeje eo ej jokwe ilo Singapore.

N̄an n̄a, m̧ool eo an gospel eo an Jisōs Kraist im m̧ool eo an Bok in Mormon eo rej dim ippān doon. Eļan̄n̄e gospel in ej m̧ool, innām Bok in Mormon eo ej m̧ool.

Mijenede ro rekar katakin baam̧le eo aō gospel eo ilo m̧weo im̧ōm̧ ilo Singapore. Jema eaar jab kobatok ilo Kabun̄ in ak jinō ekar. Ekar katakin kōm̧ kōn Jisōs Kraist im kōn gospel eo An. Men̄e āinwōt juon ajri, iaar m̧ōņōņō in jiron̄ ro m̧ōtta bwe iaar juon Armej eo Ekwojarjar ilo Raan-ko Āliktata.

Iaar aolep iien lōke katak ko an jinō. Ak ke iaar erom jodikdik, juon mijenede eaar kajjitōk ippa jete kōttan aō kar riiti Bok in Mormon eo, ijjab jeļā eļan̄n̄e ekar m̧ool. Rekar kajjitikin n̄a kajjitōk in m̧okta, ak iien in ikar kile ke kōnke ijjan̄an riiti Bok in Mormon eo, ijjab jeļā eļan̄n̄e ekar m̧ool.

Juon Meļeļe eo Ijjab Maron̄ Kariab

Iaar jab maron̄ in ņo̧o̧j juon meļeļe ijjab maron̄ kariabe. N̄an n̄a, m̧ool eo an gospel eo an Jisōs Kraist im m̧ool eo an Bok in Mormon eo rej dim ippān doon. Eļan̄n̄e gospel in ej m̧ool, innām Bok in Mormon eo ej m̧ool. Kōnke iaar jab jeļā eļan̄n̄e Bok in Mormon eo eaar m̧ool, iaar kiiō en̄jake pere kōn men otemjej ikar rūttoļo̧k im tōmak kaki. Pok eaar bōk jikin ilo kōļmenļo̧kjeņ e aō, im kajjitōk—“Bok in Mormon eo ej ke m̧ool?”—ekar pād wōt ilo būruwō.

Jem̧jerā eo aō ippān Rilo̧mo̧o̧r eo, Jisōs Kraist, ebar bokļo̧k n̄a n̄an juon ikdeleel kōn m̧ool eo. Raan eo iaar kile ke ijjab maron̄ in ekkatak eļapļo̧k kōn Jisōs Kraist ilo aō jab lukkuun lin̄ūri Bok in Mormon eo ekar raan eo iaar lukkuun ikdeleel n̄an jeļā eļan̄n̄e ekar m̧ool.

Kūr āinwōt juon Rūkaki

Ikar jar kōn jipan̄. Ilo tōre in branch būreejtōn eo aō ekar kūr eō n̄an katakin kōn Bok in Mormon ilo kūlaaj in katak kōn gospel eo. Iaar bōk kūr eo kōnke iaar en̄jake ke emaron̄ in uwaak eo an Irooj n̄an jipan̄ n̄a jeļā m̧ool eo kōn Bok in Mormon im n̄an epaakeļo̧k Rilo̧mo̧o̧r eo.

Katakin ekar pen. Ālkin Jabōt ko jet jinoin, ikar jeļā eban em̧m̧an aō katakin m̧ae iien inaaj tōmak ilo Bok in Mormon eo.

Bwebwenato ko Rej Waļo̧k tok Jepta ālkin Jepta

Iaar jinoe katak jān Bok in Mormon eo kajjojo wiik im ejjab etto iaar lo lan̄lōn̄ ilo aō riit. Bwebwenato ko ilo Bok in Mormon eo rekar itok jepta ālkin jepta im kepaakļo̧k eō n̄an Jisōs Kraist.

Iaar riiti kōn ļotak eo an Kraist, eo kar loe ilo visiōn jān Nipai:

“Im iaar lo jikin kweilo̧k Nazaret, im ilo jikin kweilo̧k in Nazaret iaar lo juon virgin, im eaar kanooj aiboojoj im mouj. 

“… Im [enjeļ eo] eaar ba n̄an eō: Im Lo, virjin eo kwōj lo e ej eo jinen eo Nejin Anij, ilo nememein kanniōk im bōtōktōk” (1 Nipai 11:13, 18).

Iaar riit kōn karōk in m̧ōņōņō eo im katak bwe tōmak ilo Jisōs Kraist ej menin aikuj n̄an lo̧mo̧o̧r ko ad. Amulek eaar katakin:

“Ijeļā bwe Kraist naaj itok ilubwilijin ro nejin armej, n̄an bōk ioon nana ko an armej ro An, im bwe Enaaj pinmuur kōn jerawiwi ko an laļ; bwe Irooj Anij eaar kōnono men in.

…“Bwe ekkar n̄an karōk eļap an Anij Indeeo eaikuj wōr juon pinmuur kōm̧m̧ane, n̄e jab aolep armej reaikuij lukkuun jako” (Alma 34:8–9).

Iaar riiti an Jisōs Kraist kwaļo̧k n̄an jiip ko An jet ilo Amedka, im iaar jeļā bwe E ej Anij an aolep laļ. Eaar jiron̄ riNipai ro: “Kom̧ ej er ro Iaar ba: Bwe sip ko jet Aō rejjab jān wōrwōr in; er barāinwōt Ij aikuj bōktok, im renaaj ron̄ ainikiō; im renaaj juon wōt bwij, im juon wōt seperd” (3 Nipai 15:21).

Kam̧ool eo Aō Eaar Itok Jidik kōn Jidik

Ilo aō riiti Bok in Mormon eo, tōmak eo ilo Jisōs Kraist ekar kōmeram̧ļo̧k im meļeļe eo aō kōn karōk eo An eaar debakbakļo̧k (lale Alma 32:28).

Ij kam̧ool bwe Bok in Mormon ej dekā in jabōn em̧ eo an Kabun̄ in ad. Jetōb Kwojarjar eo ekar kwaļo̧k n̄an n̄a ke Joseph Smith ej juon rikanaan em̧ool eo ekar kōjepļaaktok Kabun̄ eo an Anij n̄an ioon laļ in im ukōt Bok in Mormon eo jen peliej kooļ ko. Bok in Mormon eo ej kam̧ool kōn Jisōs Kraist im jerbal ippān baibōļ eo. Ippān doon rej kam̧ool bwe Jisōs Kraist ej lukkuun nejin Anij bwe ej Anij in aolep laļ ko, jab juon wōt.