Ennaan eo an Būreejtōnji eo Kein Kajuon
Jar Kōn Tōmak
Jān Būreejtōn Henry B. Eyring
Rikakpilōklōk eo Kein Kajuon ilo Būreejtōnji eo Kein Kajuon
Jar eļapļo̧k jān naan ko jej kōnono n̄an Anij. Ewōr ruo wāween kōnono ikōtaan Anij im ajri ro Nejin.
N̄e jar ej jerbal āinwōt ej aikuj, jej kwaļo̧k en̄jake ko an m̧wilaļ in būruwōd. Jemedwōj Ilan̄ ej lukkuun uwaaki ilo An likūt ļōmņak ko ad kōn en̄jake. Aolep iien Ej ron̄jake jar eo jān m̧wilaļ in bōro n̄e jej jar kōn juon kalim̧m̧ur n̄an pokake E, jabdewōt uwaak eo An im jabdewōt iien eo itok.
Irooj ej kōm̧m̧ane kalim̧m̧ur in n̄an aolep ro rej riit im jar kōn Bok in Mormon:
“Im n̄e kom̧ naaj būki men kein, ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool; eļan̄n̄e kom̧ naaj kajjitōk kōn juon bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļo̧k m̧ool in n̄an kom̧, jān kajoor eo an Jetōb Kwojarjar.
“Kōn kajoor eo an Jetōb Kwōjarjar kom̧ maron̄ jeļā m̧ool eo kōn men ko otemjej” (Moronai 10:4–5).
Kalim̧m̧ur in ej m̧ool. Milien armej ro em̧ōj aer kar kajjieon̄ im kam̧ool e bwe kalim̧m̧ur in em̧m̧an kōn jar n̄an bōk juon kōjeram̧m̧an me eaar kobrak mour ko aer kōn lan̄lōn̄ im lem̧ōņōņō eo ejjeļo̧k jem̧ļo̧kin. Kalim̧m̧ur in ej jerbal n̄an aolep jar ko ad n̄an jeļā ļōmņak im ankilaan Anij n̄an kōj. Jemaron̄ kōjerbal jabdewōt iien jej bōk naan in kapilōk jān juon rikarejar an Anij eo emālim n̄an letok n̄an kōj tōl. N̄an waanjon̄ak, jemaron̄ pedped wōt ioon ilo ad ron̄jake an kwaļo̧k ilo kweilo̧k eo eļap. Jemaron̄ mour kake n̄e jej katak jān mijenede ro ettā būruwer kar kūr in Anij jān rikanaan eo emour. Ej barāinwōt jerbal barāinwōt n̄an kapilōk eo jej bōke jān bisop eo ad ak branch būreejtōn eo.
N̄an an jar jerbal ilo mour ko aer, wāween kein rej pidodo. Jej aikuj kajjitōk n̄an jeļā ta eo em̧ool ilo jar n̄an Jemed ilo etan Jisōs Kraist. Jej aikuj kajjitōk kōn juon bōro em̧ool, meļeļein bwe ej aikuj wōr juon un em̧ool n̄an kōm̧m̧ane jabdewōt uwaak an Anij kōn kōj. Im kōņaan eo ad ej aikuj in itok jān ad tōmak ilo Jisōs Kraist.
Rikatak ro me raar riiti Bok in Mormon m̧okta ļo̧k jān aer kar peptaij im kar kapen remaron̄ bōk jim̧or juon jeļā bwe bok in em̧ool im juon kam̧ool bwe Joseph Smith eaar ukōte kōn kajoor eo an Anij. Ālkin kapen āinwōt juon membōr in Kabun̄ in, jemaron̄ bōk Jetōb Kwojarjar āinwōt m̧ōttad n̄an kapen m̧ool ko jet. Innām, n̄e jej jar kōn tōmak, jemaron̄ jeļā bwe Jetōb Kwojarjar enaaj kam̧ool n̄an kōj bwe Jisōs ej riKraist eo, bwe Anij Jemād ej mour, im bwe Er rej iakwe kōj im jej aolep ajri ro nejin Jemedwōj Ilan̄.
En̄in ej unleplep eo bwe en wōr juon kalim̧m̧ur ilo Bok in Mormon bwe jen bōk iakwe em̧ool ilo būruwōd āinwōt an Jetōb Kwojarjar kwaļo̧k kam̧ool n̄an kōj bwe Jisōs ej riKraist eo: “Eļan̄n̄e armej eo ej inem̧m̧an im ettā ilo bōro, im kwaļo̧k buruwōn jān kajoor eo an Jetōb Kwojarjar bwe Jisōs ej Kraist eo, eaikuj wōr an iakwe-em̧ool” (Moronai 7:44).
Ewōr juon iien em̧m̧an n̄an eddōkļo̧k ilo mour in jetōb ilo kajjojo Jabōt in jitlo̧k. Jabōt in jitlo̧k emaron̄ jipan̄ kōj ilo en̄jake ko an Alma im ļōm̧aro nejin Mosaia, ro raar jar im jitlo̧k n̄an jeļā m̧ool bwe ren maron̄ katakin ri Laman ro kōn kajoor, maron̄, im iakwe (lale Alma 17:3, 9).
Ilo Jabōt in jitlo̧k jej kobaiki jar im jitlo̧k. N̄an kōjeram̧m̧an eo ejeramōl, jej leļo̧k jortak in jitlo̧k ko ad n̄an bisop eo ak branch būreejtōn eo me ekitbuuj iien m̧ōn̄ā ko ruo jar jūlo̧ki. Ļōmņak im jar ko ad raar n̄an Rilo̧mo̧o̧r eo im n̄an ro me Enaaj kar kōņaan bwe jen jerbal n̄an er ilo aikuj ko aer ilo jetōb im ilo kanniōk.
Jar im ikdeleel ko ad aaet rej āinļo̧k wōt ļo̧k jar ko im ikdeleel ko an Rilo̧mo̧o̧r eo ilo ad jitlo̧k n̄an ļapļo̧k tūriam̧o, kemanwa, im iakwe. Im āinwōt An kar kōm̧m̧ane, jej jar n̄an jeļā ankilaan Jemed n̄an kōj im n̄an kōm̧m̧ane.